1 Áádóó kʼad nihaa haneʼ ndeitʼáhígíí bikʼehgo, díí nihaa haneʼígíí éí tʼáá aaníí átʼéego nihił béédahózin, jó háálá, diné tsʼídá yáʼátʼéehii éí haneʼ yaa áhályą́ą́ ńtʼę́ę́ʼ—háálá tʼáá aaníí Jesus bízhiʼ binahjįʼ álílee naalnish ńtʼę́ę́ʼ; dóó doo éí tʼáá yigáłígíí Jesus bízhiʼ binahjįʼ álílee naalnish da doo tʼáá hazhóʼó bąąhági átʼéii tsʼídá bąąh ádingo tʼéiyá—

2 Áádóó kʼad, díí diné doo asiihgóó nihił yoołkáłígíí yiyííłtaʼgo, éí kʼad tádiin dóó baʼaan tááʼ nááhai;

3 Dóó diné Diyin God yá halneʼii Samuel, Laman bidineʼé nilíinii, bee ééhózinii ádoonííł níigo yee haadzíʼę́ę ayóó yíká dadéezʼį́įʼgo hahoolzhiizh, aooʼ, niʼ bikááʼgóó tágí jį́ chahodoołhił hodooʼniidę́ę.

4 Dóó azhą́ tʼóó ahayóí binahjįʼ éédahózinii bidaʼalyaa ndi tʼóó ahayóí diné éí doo daʼoodlą́ą da dóó saad hólǫ́ dahazlį́į́ʼ.

5 Áádóó tádiin dóó baʼaan dį́į́ʼ góneʼ yihahgo, dóó tʼááłáʼí góneʼ yiziłgo, dóó dį́įʼgo yoołkáałgo, tsʼídá ayóó átʼáo ahoʼniiłtą́; tsʼídá hádą́ąʼda díí kéyah bikáaʼgi kótʼéego nihootą́ʼígíí éí ádin.

6 Dóó níłtsą́ tʼóó báhádzidgo bił deeyol; dóó tsʼídá yéigo ndaʼdilchʼilgo, wónáasiiʼ nahasdzáánę́ę nayiiłná ałtsʼádooltał nahalingo.

7 Dóó tʼáá naʼńleʼdii ndaʼdilchʼil, tsʼídá hádą́ąʼda díí kéyah bikáaʼgi tʼah doo ákónéeh da ńtʼę́ę́ʼ.

8 Dóó Zarahemla wolyéego kin dashijaaʼą́ą diiltłah.

9 Dóó Moroni wolyéego kin dashijaaʼą́ą taah yíltsʼid, dóó ákweʼé kéédahatʼínę́ę ałtso tó dabííghą́ą́ʼ.

10 Dóó Moronihah wolyéego kin sinil yę́ę éí bikʼihoołdaaz, dóó ákweʼé éí dził ayóó áníłtsogo siʼą́ silį́į́ʼ.

11 Dóó shádiʼááhjígo kéyahą́ą éí tsʼídá yéigo ndahaazchxǫʼ.

12 Jó ndi, náhokǫsjígo kéyahą́ą éí tsʼídá aláahgo yíchxǫʼ; jó háálá kéyahą́ą łahgo átʼé silį́į́ʼ, tʼóó báhádzidgo nahoołtąʼígíí dóó níyoltsoh ndaaskaihígíí, dóó ndaʼdilchʼil dóó ńdaʼdeesnih, dóó tʼóó báhádzidgo nahasdzáán nahaasnáʼígíí biniinaa kódzaa.

13 Dóó íiyisíí daʼnítiinę́ę ndahaastǫʼ, dóó hodilkǫǫhgo ndaʼaztiinę́ę ndi ndahaazchxǫʼ, dóó dahonteel yę́ęgo dahonoojí hazlį́į́ʼ.

14 Dóó tʼóó ahayóí kin nitsaago dah naazjaaʼą́ą dóó béédahoʼdílzinę́ę táyiʼ góyaa daazlį́į́ʼ, dóó tʼóó ahayóí adahideezkʼą́ą́ʼ, dóó łaʼ éí tsʼídá yéigo ndahasnáhígíí bąą nahasdzáán bikáaʼjįʼ ndahaasdááz, dóó akweʼé kéédahojitʼínę́ę ndaaztseed, dóó kéyah bikáaʼgo doo siláhá da silį́į́ʼ.

15 Dóó łaʼ kin nitsaago dah naazjaaʼą́ą éí daadzííʼ, ndi tsʼídá yéigo ndahaazchxǫʼ, dóó tʼóó ahojíyóí ákweʼé ndajizhtseed.

16 Dóó náánáłaʼ éí níyoltsoh adahwiizhjaaʼ; háágóó dajizlį́ʼígíí éí tʼáadoo bił bééhóziní da, tʼáá hazhóʼó níyoltsoh náhwiiláʼą́ą tʼéí bił béédahózin.

17 Dóó ákótʼáo niʼ bikááʼgóó ałtso dahóóchxǫʼ, tsʼídá tʼáá áwołí bee níłtsą́ bił ndaayolígíí dóó, ndadeesniiʼígíí dóó ndaʼdeeschʼilígíí dóó niʼ nahaasnáʼą́ą biniinaa.

18 Jó áádóó, tséhę́ę ndahaastǫʼ; tʼáá ałtso nahasdzáán bikááʼgóó nihidelʼáh silį́į́ʼ, áko índa niʼ dahaskʼiz yę́ęgo dóó niʼ ndahaazdládę́ęʼgo, tséhę́ę ndadeeztąąd, tʼáá ałtsogóó nahasdzáán bikáaʼgi.

19 Áádóó ndaʼdiʼnínę́ę dóó ndaʼdilchʼil yę́ę, dóó níłtsą́ bił deeyol yę́ę, dóó niʼ nahaʼnánę́ę áhodiilzeeʼ—jó háálá tsʼídá daatsʼí tááʼ ahééʼilkidgo índa niʼ kódzaa; dóó łaʼ ádaaníigo éí tʼáá íiyisíí hodíinaʼ daaní; ákótʼée ndi, díí ákóhóótʼįįdígíí éí tááʼ ahééʼilkidjįʼ áhoodzaa—jó áádóó índa, niʼ bikááʼgóó ałtso chahóółhéél.

20 Áádóó chahałheełę́ę ditą́ silį́į́ʼ tʼáá ałtso niʼ bikááʼgóó, áko índa dajoodziʼ yę́ę éí díí chahałheeł yę́ę áhí nahalingo baa ákodazhniizį́į́ʼ;

21 Dóó tʼáá haʼátʼíida bee adinídíín ádoolníłígíí éí ádin, díí chahałheeł ditánígíí biniinaa, doo ndi akʼah kǫʼ, doo ndóʼ kǫʼ ndaaltʼáʼígíí da; dóó ałdóʼ azhą́ tsin tsʼídá danizhónígíí dóó tsʼídá deíłtseiígíí ndi doo bíighah da, áko tʼáá haʼátʼííshį́į́ bee adinídíín dooleełígíí éí ádin.

22 Dóó tʼáá háadi da adinídíín dooleełígíí éí ádin, doo kǫʼ ndi, doodago tʼįįhdígo dałichíʼígíí ndi, doo ndi jóhonaaʼéí, doodago ooljééʼ da, doodago sǫʼ ndi, doo daatʼį́į ndi da, háálá tʼáá ałtso kéyah bikááʼgóó chahałheeł ditą́ągo niʼ nikéshgishígíí biniinaa.

23 Áádóó díí tʼáá chahałheełgo tágí jį́ azlį́į́ʼ adinídíín doo yitʼį́į́góó; dóó tʼáá ałtsogóó diné yínííł bikʼee tʼáá áwołí bee dazhdiʼní dóó dazhdilwosh dóó dajicha tʼáá áłahjįʼ; aooʼ, ayóó íitsʼaʼgo diné dadiʼní, chahałheeł dóó ayóó átʼáo hóóchxǫʼígíí biniinaa.

24 Dóó łaʼ hazʼą́ągi dajicha jiní, kódajiníigo: O dooládóʼ da tʼáá íídą́ą́ʼ niheʼiinaʼ łahgo áńdeiilyaa dooleeł ńtʼę́ę́ʼ tʼah doo tʼóó báhádzidgo nihił áhánéhę́ędą́ą́ʼ, dóó índa nihidineʼé kintah ayóó átʼéii Zarahemla doo yił adahididookʼą́ął da ńtʼę́ę́ʼ.

25 Dóó nááná łahgo éí dajicha jiní, kódajiníigo: O dooládóʼ da tʼáá íídą́ą́ʼ niheʼiinaʼ łahgo áńdeiilyaa dooleeł ńtʼę́ę́ʼ tʼah doo tʼóó báhádzidgo nihił áhánéhę́ędą́ą́ʼ, dóó Diyin God yá halneʼii doo ndadiiltsił da ńtʼę́ę́ʼ dóó doo tsé bee bił ndadziʼdiyiilniił da ńtʼę́ę́ʼ lá, doo chʼídadíníilkał da ńtʼę́ę́ʼ lá; índa nihimáhą́ą dóó nihitsiʼ danizhóní yę́ę, dóó nihaʼáłchíní yę́ę yisdáákai dooleeł ńtʼę́ę́ʼ, dóó doo éí kintah ayóó átʼéii Moronihah yił bikʼidahołdaaz da ńtʼę́ę́ʼ. Dóó ákótʼéego ayóó íitsʼaʼgo yínííł bikʼee dajicha.