1 Dóó tʼáá aaníí ánihidishní, binahjįʼ ééhózinii nihichʼįʼ kóshłééh, binahjįʼ díí kʼadę́ę ádaa haneʼígíí baa hoolzhishgo bee nihił béédahózin doo—haashį́į́ nízahdę́ę́ʼ tadaʼoosdeeʼ yę́ę, áłah áńdeeshdlííł, shidineʼé, O Israel bighandóó danilíinii, dóó bitah Zion bee hanáhodideesdlííł;

2 Jó áádóó, díí binahjįʼ ééhózinii éí nihichʼįʼ kóshłééh—háálá tʼáá aaníí ánihidishníigo díí bee nihichʼįʼ haasdzíʼígíí, dóó tʼáá shí bee nihichʼįʼ hanáádeesdzihígíí, dóó Iiʼsizį́ Diyinii éí éí aTaaʼ nihaidooléłígíí bibee adziilii bee, Gentile dineʼé ałdóʼ bił ííshjání ádoolnííł áko diné Jacob bighandóó dineʼé danilínígíí bił béédahózin dooleeł, dóó díí shidineʼé baa tʼaidoojahígíídóʼ bił béédahózin doo;

3 Tʼáá aaníí, tʼáá aaníigo, ánihidishní, díí aTaaʼ bił ííshjání áyiilaago, dóó éí bitsʼą́ą́dę́ę́ʼ, aTaaʼ baa hodidootsʼį́į́ł.

4 Háálá aTaaʼ bił bééhózinígíí bikʼehgo Gentile dineʼé díí kéyah bikáaʼgi ńdahidooʼnééł, dóó tʼáá bí ádaa ndahatʼáago aTaaʼ bibee adziilii yee yá hwiidoołʼaał, áko díí tʼáadoo leʼé ííshją́ą́ ádoolnííł haʼnínę́ę éí dineʼé bitsʼą́ą́dóó nikʼǫ́ǫ́ʼ ńdeididoolééł, áko aTaaʼ tʼáadoo leʼé bidineʼé yee yił ahaʼdeetʼánę́ę biʼdoolnííł, O Israel bighandóó danilíinii;

5 Éí bąą, díí naanish dóó nihitahgóó naanish ánáádadoolníłígíí éí Gentile dineʼé bitsʼą́ą́dę́ę́ʼ, náásgóó naʼáłchíní danilį́į dooleełígíí bąąhági átʼéii biniinaa doo daʼoodlánígíí yichʼįʼ íidoolííł;

6 Háálá ákótʼáo aTaaʼ bíniʼkʼehgo éí Gentile dineʼé bitsʼą́ą́dę́ę́ʼ díí ííshjání ádoolnííł, áko beʼadziilii Gentile dineʼé yichʼįʼ ííshjání íidoolííł, háálá díí biniinaa Gentile dineʼé, doo bijéí deidoołtłʼisgóó, áko bąąhági átʼéii yóó deidiyiiʼaahgo dóó shaa hakáahgo dóó shízhiʼ binahjįʼ tó bee dabiʼdiilzį́įhgo dóó shinaʼnitin tʼáá aaníí ádaatʼéii bił béédahózingo, áko shidineʼé yitah daóltaʼ dooleeł, O Israel bighandóó danilíinii;

7 Dóó díí baa dahwiishzhiizhgo, nikʼǫ́ǫ́ʼ díí bił béédahózingo—éí bichʼįʼ bee ééhózinii yę́ę átʼéii dooleeł, áko aTaaʼ díí dineʼé Israel bighandóó danilínígíí yił ahaʼdeetʼánę́ę yeʼeléehgo yindiilnishgo bił béédahodoozįįł.

8 Dóó éí bíiníłką́ągo, naatʼáanii danilíinii chʼééh hadaadziihgo tʼóó dadéezʼį́į́ʼ dooleeł; tʼah doo bee hoł dahaneʼii éí daazhdínóołʼįįł; dóó tʼah doo daazhdiitsʼį́įhii éí baa ntsídajíkees dooleeł.

9 Háálá éí bijį́, shiniinaa aTaaʼ naʼanish éí ndoolnish, éí tsʼídá ayóó átʼéego dóó ayóó ánoolningo diné yitahgóó ndoolnish; dóó bitahgóó łaʼ doo dayoodlą́ą da dooleeł, azhą́ diné łaʼ bił hoolneʼ ndi.

10 Jó ndi, shinaalʼaʼí éí beʼiinaʼ shílákʼee silá; éí bąą doo atídeidoolíił da, azhą́ ákótʼée ndi bí biniinaa achʼįʼ nahwiiʼná bee bikʼeʼeshchʼíiʼ dooleeł. Ákondi hadaałtʼéego áńdeeshdlííł, háálá éí díí hachʼįʼ ííshjání ádeeshłííł shintsékees éí chʼį́įdii beʼiiníziinii binaʼadloʼii bilááh ábóodziil.

11 Éí bąą baa hodoolzhish tʼáá háiida shizaad doo yoodlánígíí, shí Jesus Christ áshtʼį́, éí éí aTaaʼ díí Gentile dineʼé bee bił hodíílnih yidííniidę́ę, dóó bee adziilii yeidooléeł doo áko Gentile dineʼé yił ííshjání íidoolííł, (Moses ádííniidę́ę biʼdoolnííł) éí shidineʼé bił ałhadadiʼnishtʼáanii bitahdóó kʼíhodiʼdookał.

12 Dóó shidineʼé Jacob bighandóó danilínígíí éí Gentile dineʼé yitaadaakai dooleeł, aooʼ, biníiʼgi náshdóítsoh naaldlooshii tsintahgóó dahólónígíí yitah yigááł nahalingo, náshdóí ániid naagháhí dibé yitah yilwod nahalingo, éí éí, yitah yigháahgo yił nayiideeł dóó nayiłdlaad, dóó tʼáadoo yisdáboołtéłí da łeh.

13 Bikʼijįʼ danilíinii bílaʼ yee yikʼijįʼ dah dadéelnih dooleeł, áádóó bikʼijįʼ danilíinii éí kʼídadookał.

14 Aooʼ, Gentile dineʼé yíi bił hólǫ́ǫ doo tʼáá hazhóʼó bąąhági átʼéii yóó adaazhdeeztʼą́ągo tʼéiyá; háálá náasdi éí beidoołkááł, ní aTaaʼ, nihilį́į́ʼ éí nihitah doo nahjįʼ kódeeshłííł, dóó nihitsinaabąąsjádí bee ndaʼołbąsii nihitsʼą́ą́ʼ nihideeshchxǫǫł;

15 Dóó nihikéyah bikááʼgóó kin hadaalʼáhą́ą nahjįʼ kʼídahideeshkał, dóó nihighan bił nahazʼánę́ę ałtso naaʼahideeshnił;

16 Dóó bee daʼnohdzinę́ę nihikéyahdóó nahjįʼ kʼídahideeshkał, dóó náás ádahodoonííł yaa dahalneʼ ídaʼdilʼíinii ádin dooleeł;

17 Nihiʼishchíín ałdóʼ nahjįʼ kʼídahideeshkał, dóó ishchíín nihitahgóó naazíinii nahjįʼ kʼídahideeshkał, dóó doo nihílaʼ bee ádaalʼíinii bichʼįʼ sonáádadołzin da dooleeł.

18 Dóó tsin nihitahgóó naazkad yę́ę nihitsʼą́ą́ʼ hahideeshtłʼił; kótʼéego nihikin hadaasʼáhąą nihideeshchxǫǫł.

19 Dóó baa dahodoolzhish tʼáá ńtʼę́ę́ʼ yoochʼííd, dóó naʼadloʼ, dóó oolchʼį́į́d, dóó daʼahijigą́, béeso yikʼé sodadilzinígíí, dóó aláahdi joodláhígíí, ałtso ndahidootʼiʼ.

20 Háálá náasjįʼ baa dahodoolzhish, ní aTaaʼ, éí bijį́ háíshį́į́ bąąhági átʼéii doo yóó iidiʼaahii dóó shiYeʼ Ayóí ííníshʼníinii doo yee yigháhígíí, éí díí shidineʼé O Israel bighandóó danilíinii, bitahdóó nahjįʼ kʼídahideeshkał;

21 Dóó doo daʼoodláanii nahalingo, tʼáá íiyisíí shá háchįʼgo atíʼhodeeshłííł, tsʼídá tʼah doo díigi átʼáo dazhdiitsʼį́įhgo.

22 Ndi bibąąhági átʼéii yóó adeidiyizʼą́ągo dóó shizaad yikʼeh dahosʼįįdgo, dóó tʼáadoo bijéí deiłtłʼisí, shisodizin bá hooghan bitahgóó ndeeshʼááł, dóó ałhaʼdeetʼánę́ę éí yikʼidookah dóó Jacob bidineʼé danilínígíí yitah daóltaʼ dooleeł, éí éí díí kéyah baa diníʼą́.

23 Dóó éí éí shidineʼé, Jacob bidineʼé danilínígíí yíká adoojah, dóó haashį́į́ néelą́ą́ʼ Israel bighandóó danilínígíí náheeskaígíí yił, áko kin haalʼá ndeidoonił, Jerusalem Ániidígíí wolyée dooleeł.

24 Dóó índa shidineʼé áłah ánálnéehii yíká adoojah, nahasdzáán bikááʼgóó taooskai yę́ę, Jerusalem Ániidígíí biyiʼjįʼ áłah áńdeidoodlííł.

25 Dóó índa yáʼąąshdę́ę́ʼ, bibee adziilii bitah dooleeł; dóó shídóʼ biníiʼgi honishłǫ́ǫ dooleeł.

26 Dóó índa éí bijį́ aTaaʼ binaanish bee hahodoolzhish, díí naʼnitin éí díí diné tʼahdii daadziihii bínabídíʼnóoltįįł. Tʼáá aaníí ánihidishní, éí bijį́ aTaaʼ binaanish hadootʼiʼ shidineʼé taooskai yę́ę bitahgóó, aooʼ, azhą́ dóoneʼé yóó aheeskai yę́ę ndi, éí éí aTaaʼ Jerusalemdóó chʼideizhʼeezh.

27 Aooʼ, shidiné taooskai yę́ę bitahgóó naanish hadootʼiʼ, índa aTaaʼ éí yá hashtʼehodoolííł áko shaa hidookah, áko bee aTaaʼ shízhiʼ binahjįʼ yichʼįʼ sodadilzin dooleeł.

28 Aooʼ, dóó índa aTaaʼ yił hadadoolnish, tʼáá ałtsogo ałʼąą dóoneʼé kéyah bił nahazʼą́ągo bidineʼé bighanjįʼ kéyah baa deetʼánę́ęjįʼ áłah áńdooʼníłígíí yá hashtʼedeidoolííł.

29 Dóó ałʼąą kéyah dah naaznildę́ę́ʼ chʼíhidookah; doo éí tsxį́į́ł danilį́įgo da, doo ndóʼ éí chʼídadínóodzoł da, háálá bitsijįʼ yishááł dooleeł, dóó bikééʼdę́ę́ʼ ałdóʼ baa áháshyą́ą dooleeł, ní aTaaʼ.