1 Áádóó kʼad Jesus yáʼąąsh góodei dah ńdiidzáago, diné áłah jílínę́ę ałtso taooskai, diné tʼááłáʼí nízinígo beʼesdzáán dóó baʼáłchíní bighangóó yił anáheeskai.

2 Dóó tʼáadoo hiłiijį́į́ʼgóó, tʼáadoo hodíinaʼí haneʼ diné bitahgo dideesdláád, diné áłah jílínę́ę Jesus dayiiłtsą́, dóó ndabineestą́ąʼgo, dóó yiską́ągo diné áłah náánádlééhgo yaa náánádáhígíí.

3 Aooʼ, tłʼééʼ bíighah Jesus baa dahojilneʼ; dóó áko índa diné tʼóó ahayóígo bitahgo, aooʼ, tsʼídá tʼóó ahayóí, tłʼééʼ bíighah ndaalnish, áko yiską́ągo Jesus náánádááhą́ągi dahoniidlǫ́ǫ doo danízingo.

4 Áádóó biiskání, diné áłah náánásdlį́įʼgo, jó, Nephi dóó bikʼis, Timothy daaztsą́ ńtʼę́ęʼgo nínéidiisą́hą́ą, dóó ałdóʼ Nephi biyeʼ, Jonas wolyéhígíí, dóó ałdóʼ Mathoni dóó bikʼis, Mathonihah, dóó Kumen, dóó Kumenihah, dóó Jeremiah, dóó Shemnon, dóó Jonas, dóó Zedekiah, dóó Isaiah—kʼad díí éí Jesus naakitsʼáadahí akééʼ naazíinii náyiizláʼą́ą dabízhiʼ—Áádóó nagháijįʼ diné áłah jílínę́ę yitahdóó naazį́.

5 Jó áádóó, áłah jílínę́ę tsʼídá tʼóó ahayóí áłah daazlį́įʼgo bąą naakitsʼáadahí diné naakitsʼáadahgo ałtsʼádeeznil.

6 Dóó naakitsʼáadahí éí diné áłah jílínę́ę ndeidíníitą́ą́ʼ; jó áádóó, áłah jílínę́ę niʼjįʼ ntsidadoohgeeh, dóó Jesus bízhiʼ binahjįʼ aTaaʼ bichʼįʼ sodadołzin deidííniid.

7 Dóó akééʼ naazíinii Jesus bízhiʼ binahjįʼ aTaaʼ yichʼįʼ sodadilzin. Áádóó deizįʼ dóó diné nináádeidíníitą́ą́ʼ.

8 Dóó Jesus yínaʼneestą́ʼą́ą tsʼídá kótʼéego yínadaʼneestą́ą́ʼ—tsʼídá tʼáadoo łahgo átʼéhé Jesus yínaʼneestą́ʼą́ą yíndaʼniłtin—jó, ntsináádadeesgoʼ dóó Jesus bízhiʼ binahjįʼ aTaaʼ yichʼįʼ sonáádadilzin.

9 Dóó tsʼídá aláahgo deinízinígíí éí yíká sodadilzin; dóó éí díí Iiʼsizį́ Diyinii nihaa doolyééł éí tsʼídá aláahgo danízin.

10 Dóó ákótʼéego ałtso sodadoolzingo ńléí tábąąhgóó yíkai, dóó áłah jílínę́ę bikééʼ yíkai.

11 Áádóó Nephi taah yíyá dóó tó bee biʼdoolzį́į́ʼ.

12 Dóó táyiʼ yiizįįʼ dóó tó yee iʼniisį́į́ʼ. Dóó hastóí Jesus náyiizláʼą́ą tʼáá átʼé tó yee yiyíísį́į́ʼ.

13 Áádóó tʼáá ałtso tó bee daalzį́įʼgo táyiʼdę́ę́ʼ hánáskaigo, Iiʼsizį́ Diyinii bikʼidahooleʼ, dóó tʼáá ałtso Iiʼsizį́ Diyinii biiʼ hadadéébįįd dóó tʼáá ałtso kǫʼ biiʼ hadadéébįįd.

14 Jó áádóó, kǫʼ bináztʼiʼ nahalin silį́į́ʼ; dóó éí yáʼąąshdę́ę́ʼ hadaaldo, áłah dajílínę́ę dahóónááł, dóó baa dahojilneʼ; dóó yáʼąąshdę́ę́ʼ diyin yá naalʼaʼí adaakai dóó ndeineeztą́ą́ʼ.

15 Áádóó tʼahdii diyin yá naalʼaʼii akééʼ naazíinii ndeinitingo, jó, Jesus níyá dóó yitahdóó yiizįʼ dóó neidíníitą́ą́ʼ.

16 Áádóó áłah nilínę́ę yichʼįʼ haadzííʼ, niʼjįʼ ntsináádadoohgeeh, dóó bikééʼ naazínę́ę ałdóʼ ntsidadoohgeeh yidííniid.

17 Áádóó niʼjįʼ ałtso nitsidadeesgoʼgo, bikééʼ naazíinii sodadołzin yidííniid.

18 Jó áádóó, sodadiʼniilzin; dóó Jesus, nihiBóhólníihii dóó nihiDiyin God deiłníigo, yichʼįʼ sodadoolzin.

19 Áádóó Jesus akééʼ naazíinii binííʼdóó dah diiyá, dóó tʼáá áyídíjįʼ niníyá dóó niʼjįʼ ntsidinígoʼ, dóó ání:

20 ShiTaaʼ, ahéheeʼ díí náhiséláʼígíí Iiʼsizį́ Diyinii bee bikʼidasínídliʼígíí; dóó díí éí nihookááʼ dineʼé bitahdóó náhálááʼ dashoodlánígíí biniinaa.

21 ShiTaaʼ, díí bíká sodiszin tʼáá ałtso díí bizaad dayoosdląądígíí Iiʼsizį́ Diyinii shá bee bikʼidaazhdíídliił.

22 ShiTaaʼ, Iiʼsizį́ Diyinii bee baa deisíníbaʼ dashoodlánígíí biniinaa; dóó níníłʼį́įʼgo éí dashoodlą́ dóó yísíníłtsą́ąʼgo, dóó shichʼįʼ sodadilzin; dóó shichʼįʼ sodadilzin bitah honishłónígíí biniinaa.

23 Dóó kʼad shiTaaʼ, bá nichʼįʼ sodiszin, dóó tʼáá ałtso bizaad daʼiidoodląąłígíí ałdóʼ, áko dashiidoodląął, áko biiʼ honishłǫ́ǫ doo, nígi átʼáo, shiTaaʼ, shiiʼ honílǫ́ átʼéego, áko tʼááłáʼí niidlį́į doo.

24 Áádóó Jesus ákótʼéego aTaaʼ yichʼįʼ sodoolzingo, bikééʼ naazíinii yaa náádzá, jó áádóó, éí ńtʼę́ę́ʼ tʼahdii, doo niʼ ádaanééhgóó, bichʼįʼ sodadilzin; dóó doo éí tʼóó ałkʼińdeidiyiłtʼée da, háálá bíká sohodidoozįįłígíí éí bił ííshją́ą́ ályaa, dóó deinízingo yíká sodadilzin.

25 Áádóó bichʼįʼ sodadilzingo Jesus yikʼijisdliʼ; dóó yaa bił hóózhǫǫd, dóó biniiʼ bitsʼádiʼńdínę́ę éí yikʼiʼdiiłdláád; jó áádóó tʼáá átʼé Jesus biniiʼjįʼ dóó beʼééʼ ałdóʼ łigai yę́ęgi átʼéego daalgai daazlį́į́ʼ; jó áádóó díí łigaigi átʼáo éí tʼáadoo beełtʼéhé da, aooʼ, niʼ bikááʼgóó doo kótʼéego łigai da.

26 Dóó Jesus kóyidííniid: Tʼáá sodadołzin; ákótʼée ndi tʼáadoo sodizin niʼ ádayiilaa da.

27 Dóó nááná hatsʼą́ąjįʼ, dóó tʼáá áyídíjįʼ nínáánádzá dóó niʼjįʼ ntsináádinígoʼ; dóó aTaaʼ yichʼįʼ sonáádoolzin, kóníigo:

28 ShiTaaʼ, ahéheeʼ díí náháláʼígíí doo bąąh chinígóó ádeinilaa, beʼoodląʼígíí biniinaa, dóó bá sodiszin, dóó bizaad binahjįʼ daʼiidoodląąłígíí ałdóʼ, éídóʼ shinahjįʼ doo bąąh dachiní da dooleeł, bizaad dayoosdląądígíí binahjįʼ, bí shinahjįʼ doo bąąh dachinígóó ádabiʼdiilyaaígi átʼáo.

29 ShiTaaʼ, nihookááʼ dineʼé éí doo tʼáá átʼé bá sodiszin da, ndi tʼáá hazhóʼó nihookááʼ dineʼé beʼoodląʼ biniinaa, shaa dííníʼánígíí tʼéiyá, áko éí shinahjįʼ doo bąąh chinígóó ádadoolnííł, áko biiʼ dahonishłǫ́ǫ doo nígi átʼéego, shiTaaʼ, shiiʼ honílóní, áko tʼááłáʼí niidlį́į doo, áko binahjįʼ hadideeshtʼeeł.

30 Dóó Jesus díí saad yee haadzíiʼgo dóó akééʼ naazínę́ę yaa nínáánádzá; jó áádóó bichʼįʼ, tsʼídá yéigo sodadilzin, doo niʼ ádaanééhgóó; dóó yaa bił nááhóózhǫǫd; jó áádóó tsʼídá daalgai, Jesus átʼéhígi átʼéego.

31 Áádóó nagháí nízahjįʼ nínáánádzá dóó aTaaʼ yichʼįʼ sonáádilzin;

32 Dóó saad yee sodoolzinígíí diné eii éigi átʼéego doo łaʼ yee hadoodzih da, doo ndi díí saad yee sodoolzinígíí diné nááyidíyóozohgo ałdóʼ doo yíighah da.

33 Dóó diné áłah jílínę́ę deidiiztsʼą́ą́ʼ dóó yaa dahalneʼ; dóó bijéí ąą ádáádzaa dóó bijéí biyiʼjįʼ yikʼidaʼdiitą́ saad yee sodilzinę́ę.

34 Ákótʼée ndi, ayóó ábóodziil dóó ayóó ánoolningo saad yee sodilzin áko nááhídóodzohgo éí doo bíighah da, dóó ałdóʼ diné da yee hadoodzihígíí doo bíighah da.

35 Áádóó Jesus ałtso sodoolzingo bikééʼ naazínę́ę yaa nínáánádzá, dóó yichʼįʼ haadzííʼ: Kótʼéego oodlánígíí éí Jew dineʼé bitahdi tʼáadoo łaʼ yiiłtsą́ą da; ákohgo kótʼéego álílee naʼanishígíí éí tʼáadoo hanááł áshłaa da, doo daʼajoodlą́ą́góó biniinaa.

36 Tʼáá aaníigo ánihidishní, tsʼídá tʼááłáʼí ndi díí ayóó átʼéego naʼanish danółʼínígíí łaʼ yiyiiłtsą́ą da; dóó ałdóʼ díí ayóó átʼéii dasidootsʼą́ʼígíí tʼáadoo deidiiztsʼą́ąʼ da.