Scriptures
kinsa kaq Nefi 29


29 T’aqa

Mormonpa anyaynin, Wiraqochaq rimayninkunata ruwayninkunatawan pisichaqkunaman.

1 Kunanqa qankunata niykichis, yachaysapa kayninpi Wiraqocha allin kasqanta rikuqtin, kay rimaykuna rimayninman hina hawarunakunaman hamunqa; chaymi qankuna yachanaykichis, chaskikuyninku hallp’aman yapamanta churasqa kanankumanta Israelpa wawankunawan Taytaq rimanakuynin hunt’akuytaña qallarisqanta;

2 Qollanan unanchaqkunaq rimasqanku Wiraqochaq rimayninkuna llapan hunt’akunanta yachanaykichispaqwan; manataqmi ninaykichischu—Israelpa wawankunamanta watukuyninta Wiraqocha unayyachin nispaqa.

3 Manataqmi sonqoykichispi yuyayta nesitankichischu, yanqapaqmi karqan rimasqan rimaykuna, nispa; yuyarinqan Wiraqocha, Israelpa wasinpa llaqtanwan rimanakusqanta.

4 Qankuna puraman kay rimaykuna hamusqanta rikuspaykichisqa, manañan astawan nesitankichischu Wiraqochaq ruwayninkuna pisichayta; paña makinpin chaninchayninpa q’anchinan kashan. Haqay p’unchawpi ruwayninkunata pisichankichis chayqa, usqhayllan qankunaman aypachimusunkichis.

5 Ay, Wiraqochaq ruwayninkuna alqochaq runamanta; ari, ay Cristota ruwayninkunatawan mananchaq runamanta!

6 Ari, ay Wiraqochaq rikuchiyninkunata mananchaq runamanta—Wiraqochaqa manañan rikuchiykunawan, unanchaykunawan, qoykunawan, simikunawan, alliyachiykunawan, utaq Qollanan Nunaq atiyninwanpas llank’anñachu niq runamanta!

7 Ari, ay haqay p’unchawpi mirachikuyniyoq kananrayku—manan ima milagropas Jesucristoq ruwasqanqa kanmanchu, nispa niq runamanta. Khayna ruwaq runaqa waqllisqa churi hinan wakinqa, manataq khuyapakuy paypaq karqanchu Cristoq rimayninman hina!

8 Ari, manañan astawan judiokunata nitaq Israelpa wasinpa puchuntapas pisichayta, alqochayta ni cheqniytapas nesitankichisñachu; Wiraqochaqa yuyarinmi paykunapaq rimanakuyninta; paykunapaqtaq ruwanqa jurasqanman hina.

9 Chhaynaqa, manan Wiraqochaq paña makinta lloq’e qayllaman t’ikrayta atinaykichista yuyanaykichischu, Israelpa wasinwan rimanakusqanta hunt’ananpaq chaninchayta mana llank’achinanpaq.