1 Ngklemerang me ak melekoi er kemiu, ak meskemiu olangch me komo medengei sel bochul temel aikael tekoi el moerngii–lek mo mengudel er tir er a betekngel a rak le berriid, a rechedak, e blai er a Israel, e lmuut el mo okisii er a delongelir a Zion er Ngak;

2 Me kamorrenges, tiakid el tekoi a bok beskemiu el mo olangch–leng klemerang me ak melekoi er kemiu el kmo, a ikang el tekoi el kulekoi er kemiu, me a ikel tekoi el bo kulekoi er kemiu ruriul el kirek, ngokiu a klisiichel Edaol Reng el bol beskemiu a Edam, a bolodengei a reIsentael, me bol sebechir el mo medengei el kirir tirkang el chad el blachel er a blil a Jakob, me a kirir tirkael chedak el bo lomriid er tir;

3 Ng klemerang, ngklemerang me ak melekoi er kemiu, sel le bol cholt er tir a ikaikid el tekoi er a Edam, e ngara Edam el moertir el meier kemiu;

4 Leng ngellemesel a uldesuel a Edam me te mo moterkokl er tiael beluu, e mo mesmechokl el mimokl el chad leng klisiichel a Edam a uchul, me a ikael tekoi a mo sebechel mei er tir el mo er a blechelel a redechem, me a telbilel a Edam a mo motaut el meltib er Ngii me a rechedal, el blai er a Israel.

5 Me chelechang aikael lurreor me a ureor el moerngii er a delongeliu ruriul a mo mei loeak a reIsentael, el mo er a rengelekiu el mo diak loumerang leng kenterir a uchul.

6 Meng mle soal a Edam a lemei loeak a reIsentael, me bo lochotii a klisiichel mo er a reIsentael, me tiaikid a uchul me a lsekum a reIsentael a modiak lolcherecher a rengrir, e bo louuchel a rengrir er a kenterir e lemei er Ngak e bol metecholb er a ngklek, e bo lodengei a klemerang er a osisecheklek, e te mo ulecherangel er a rechedak, el blai er a Israel;

7 Me sel bochal uaisei aikael tekoi me a rengelekiu bo lomuchel el mo medengei aikael tekoi, eng mo olanch el moertir, me bolodengei el kmo, a urerel a Edam a mocha omuchel el churrengelii a telbiil el lekildmeklii Ngii me a rechad el chad er a blai er a Israel.

8 Me a le merema sel sils, eng diak boliit me a reking a di mo obutek a ngerir; le ng dirkak a dmung er tir a boloes; me a dirkak el renges a bo lomtab.

9 Le sel sils el mo kirek ea Demak a mo oureor er a ureor el mo klou e mengasireng lurreor er a delongelir; e mo betok er tir a mo diak loumerang er ngii, engdi chad a mo ouchais er ngii el mo er tir.

10 Endi kamosang, a klengar er a mesiungek a ngara chimak, meng diak bol temellii, ngdimo cheltechat le tir a uchul. Endi Ngak a mo omekungil er ngii, e ochotii er tir el kmo a mellomes luldesuek a kuk ngaruchei er a chelbeldil a diablong.

11 Me a leoaisei eng diak le boliit el ngikei el mo diak loumerang a tikingek Ngak el Jesus Kristo, el Edam a mo dmung er ngii meng mo ngmai el mo er a reIsentael, e momsa klisiich meng mo ngmai el mo er a reIsentael, (ngmo mekedmokl el di mouaia le dilung a Moses) tir a mo medort er a rechedak el ngara chelsel a telbiil.

12 Me a rechedak el resechel a Jakob a mo teloi er a reIsentael, oi, mo er a dlongelir el uaia raichong er a dlongelel a charm er a chereomel, el uaia ngeask el raichong er a delongelel a delbechel sib, el lebong di merderd e mesodel diomriid, e diak a sebechel me mesebechakl.

13 A chimorir a mo mekiis el mo oldechelakl er a romtok er tir, me a rokui el cherrouir a di mo medort.

14 Oi, alii er a reIsentael alsekum eng diak bo louuchel a rengrir; eng diak boliit erisel sils, a Edam a dmung el kmo, ak mo ngmai a uos er kemiu er a dlongeliu, e tomall a kareta er kemiu.

15 Ak mo tomall a meklou el beluu er a blumiu, e chongkangk aikel rokui el euatel el klisiichel a blumiu;

16 E okidii a blumiu er a temall, e merekong el dikeael leboerngii a rechad er a olai er kemiu.

17 Me a bleob lokesiu er kemiu me ak mo tomall, me a dechor lokesiu er a dlongeliu, e merekong el dikea bo mongull a urelel a chimam.

18 E madel a kerrekar er a blil chomengull er a dlongeliu; e dirrek el tomall a meklou el blumiu.

19 E diak boliit el rokui el blulak, me a omengeblad, me a chelecheielreng, me a klodechelakl me a olai me a laokreng a di mo diak.

20 Meng diak boliit, a Edam a dmung, sel sils e ngikei el mo diak bo louuchel a rengul er a kentil, e lemei er a Betik er a Renguk el Ngelekek, tirkei a mo medort er a dlongelir a rechedak, el blai er a Israel;

21 Ak mo mlaitechei, e ochotii a ngesechel a renguk el mo ertir, el uaia mo er a rediak longull er a Dios, el dirkak el rengesii a uai ngii.

22 Endi lesekum e te mo ouuchel a rengrir e mo remenges a tikingek, e diak lolcherecher a rengrir, eak mo mechelii a ikelesia er Ngak er a delongelir, me te mo ngara telbiil e mo ulecherangel luldak er tirkael ngelekel a Jakob, el tir a blakbesterir tiael beluu el mo blingelir;

23 Meng tir a mo olengeseu er a rechedak el resechel a Jakob, me a direk el betok el ngara blai er a Israel mei, me te mo omekedechor er a klou el beluu el mo ngeklel a beches el Jerusalem.

24 E sola ete mo olengeseu er a rechedak el mo mechudel, tirkei el berriid er bebul a beluu er rokir el mei er a beches el Jerusalem.

25 E sola ea klisiichel babluades a me metengel el mer tir; me Ngak a direk el mo er a delongelir.

26 E solang a urerel a Edam a mo omuchel erisel sils el ngii tiael lungil Chais a mo mosisechakl er a delongelir a re blechelir tirkael chad. Ngklemerang me ak melekoi er kemiu, sel sils ea urerel a Edam a mo omuchel er a dlongelir a rulebriid el chedak, oi, me tirke kebliil el mlo dibus, el Edam a ulemekrael er tir el tuobed er a Jerusalem.

27 Oi, a ureor a mo omuchel er a dlongelir a rechedak lulebrii, me a Edam a mo kudmeklii a rolel e tir a mei er ngak, me te mo omekedong er a ngklel a Edam loba ngklek.

28 Oi, e solang a ureor omuchel me a Edam a mo er a rokui el beluu el mengedmokl er a rolel ea rechedal a mo mechudel er a blirir er a beluu el blingelir.

29 Me te mo tuobed er a rokui el beluu, e diak bol tobed loba reched, me a lechub e bo lorael diak el keldmokl, le Ngak a moruchei er tir, a Edam a dmung, e Ngak a moba btil omrael.