Chedaol llechukl
3 Nephi 20


20 Bliongel

A Jesus a kudmokl a blauang me a bino er a tekoi el chelid el lmuut el mo kudmeklii a chedaol belsoil el moertir – A rengelekel a Jakob a lmuut el mo medengelii a Rubak el Dios er tir, a mo choubeluu er a Merikel – A Jesus a profet el uaia Moses – A rechedal a Nephi a ngelekir a reprofet – A rebebil er a rechedal a Rubak a mo mechudel er a Jerusalem.

1 E solang diluer er a ildois me bolemerek el meluluuch, me a roderchelel direk. E diluer tir meng diak bolak loluluuch er a chelsel a rengrir.

2 E diluer tir me lebekiis el mo dechor. Mete mlekiis el mo dechor.

3 Meng liluut el mechedii a blauang e miltelat er ngii, e uldersii el mo er a roderchelel me longang.

4 Me a bocha lemerek el mengang, eng diluer tir me lebached a blauang e lorous er a ildois.

5 Me a bocha lemerek el merous er a ildois, eng direk el milsterir a bino me lolim, e diluer tir me lorous el mo er a ildois.

6 Chelechang dimlak a blauang me a lechub el bino lullab el mei a roderchelel, me a lechub e lildois.

7 Endi ngii a mera el milsterir a blauang longang me a bino el lolim.

8 Meng diluer tir: Ngikei el mo kolii tiang el blauang a mo kolii a bedengek el mo er a delbengel; me ngikei el mo ngilmii tiael bino a mo melim er a resechek el mo er a delbengel; me a delbengel a dikeael luut el mo songerenger me a kabol meched a rengul, e dimo medinges.

9 Chelecha ildois er a bocha lemerek el mengang e lolim, ochoi, te mlo medinges er a Reng; meng di mlo ta ngerir loldiu odanges el mo er a Jesus, el lulsang e rirngesii.

10 Me a bocha lemerek loldars odanges el mo er a Jesus, eng dilur tir: Chelechang ak mla rokir a llach el Edam a milskak el kirir tirkael chad, el tir a ngalk er a blai er a Israel.

11 Ko mo melbedebek er a kulekoi er kemiu el kmo, ngoingerang eng mo tmaut a tikingel a Isaia, ngii a lluches, ko molab er medemiu me bo morritel.

12 Meng klemerang, ngklemerang, me ak melekoi er kemiu el kmo, sel le bol merekui, e ngii a mla mecherrungel a telbiil el Edam a kiltmeklii el mo er a rechedal, E blai er a Israel.

13 Misei ea rengalk el di mla mo berriid er cheroid er a bluulechad er rokir, a mo mechudel, a rengar chongos, me a rengar ngebard, me a rengara dims me a rengara diluches; me te mo mengai el mo soiseb er a klemedengei er a Rubak el Dios er tir, el mla olsobel er tir.

14 Me a Edam a mla dmuer ngak meng kirek el meskemiu tiael beluu el mo blingeliu.

15 Mak subdemiu el kmo, alsekum a reIsentael a diak le bo louuchel a rengrir er a kenterir, ruriul er a klengel tengat el bo lengai, me a uriul er a bla lomriid er a rechedak–

16 Seie kemiu el ngalk er a blil a Jakob, a motloi er tir; e mo er a delongelir a robdois; e motloir er tir el uaia raichong er a delongelel a charm er a oreomel, el uaia ngeask el raichong er a delongelel a delbechel sib, el lebong di merderd, e mesodel diomriid e diak a sebechel mo mesebechakl.

17 A chimam a mo mekiis el mo oltilech er a romtok er kau, me a rokui el cherroem a mo medort.

18 Mak mo mengudel er a rechedak el modmak, el uaia chad a bo longudel a uluchulel chelchedal a mungi el mo er a ulaol.

19 Mak mo meruul er a rechedak el tir a Edam a mla kudmeklii a telbiilir, oi, ak mo rullii orsum el mo deel, ak mo remuul ochim el mo sintsyu. Me kau a mo oldechelakl er a rebetok el chad me tedi mo mechuchiut; me Ngak a mo odars a lengilai el mo er a Rubak, me a kloklir a mo er a Rubak er tiael bluulechad er rokir. Me momes, Ngak ngikei el meruul er ngii.

20 Meng diak el iit el ta er a klebesei, a Edam a dmung, a saider er ngak er a llemalt a mo medullokl er bebrir riseel sils; me a lsekum eng diak bo louuchel a rengrir er a kenterir, eng momoiit er tir, a Edam a dmung, oi, ngii el rokui el blurir a reIsentael.

21 Meng diak el iit el ta er a klebesei, eak mo melisiich er a rechedak, E, blai er a Israel.

22 Me chelechang e tirkaikid el chad a bo kusmechokl er tir er tiael beluu, el moltirakl a telbiil el Ngak a kildmeklii el dilak Ngak me a demmiu er a Jakob; meng ngii a mo beches el Jerusalem. Me a klisiichel babeluades a mo er a delongelir tirkael chad; oi, me Ngak a direk el mo er a delongeliu.

23 Ka morrenges, Ngaki ngii el Moses a diluel kmo: A profet a moerngii el Rubak el Dios er kemiu a mo mekurulii el kiriu er a rodech er a rodam er kemiu, el di mo uai ngak; me ko mo rongesiu er a rokiu el tekoi, ngii dilengerang el bol dung er kemiu. Meng diak el iit el ta er a klebesei, ea ngii dil chad el mo diak lorrenges er ngikael profet a mo medort er a delongelir a rechad.

24 Ngklemerang me ak melekoi er kemiu, oi, a rokui el profet el ngara Samuel me tirkei el mlo uriul, a ngii dil tang er tir el millekoi, a uluchais el kirek.

25 Me kamosang, kemiu a ngelekir a reprofet; me kemiu a chad er a blai er a Israel; me kemiu a ngara telbiil el Edam a tilbir ngii me a redemmiu, el dilung er a Abraham: Meng resechem a mouchul ea rechad er a bluulechad er rokir a mo ngeltengat.

26 A Edam el di mla kot eng mekedbechak loeak kemiu, e oderechak el me omekngeltengat er kemiu el mo omult er a redertang er kemiu er rokui el mo cheroid er a kentil; le tia uchul meng uaisei, kemiu el ngalk er a telbiil–

27 Me a uriul er a chobla bom ngeltengat eng mla mecherrungel er a Edam a telbiil el Ngii a kildmeklii ngii me a Abraham el kmo: Ngredechem a mouchul ea rechad er a beluulechad a mo ngeltengat meng momaoch Edaol Reng lokiu Ngak el mo er a reIsentael, el ngii el klengeltengat el mo er a reIsentael a rulleterir me te mo mesisiich er a rokui, el moel mo omriid er a rechedak, er a blai er a Israel.

28 Me tir a mo chelebed el mo er a rechad er tiael beluu. Endi lsekum sel le blal nguu a cherrengelel a ungil chais er Ngak, e bo lorecherecher a rengrir lomtok er Ngak, eak moluut a delngerngerir el moer bebul a bterrir, ngdmu Edam.

29 E Ngak a mo lotkii a telbiil el kildmeklii Ngak me a rechedak; lek tilbir Ngak metir el kmo, ak mo mengudel er tir el mo dmak sel mo ungil belsechel er Ngak, me ak lmuut el mesterir a blurir a redemerir el mo blingelir, el ngii a beluu er a Jerusalem, el ngii a beluu er a telbiil el moer tir el mo cherechar, ngdmu Edam.

30 Meng diak el boliit el ta er a klebesei, a bol temel a cherrengelel a ungil chais er Ngak el mo mosisechakl er moer tir;

31 Me te mo oumerang er Ngak el kmo Ngak a Jesus Kristo, el Ngelekel a Dios, me te mo meluluuch el mo er a Edam loba ngklek.

32 E solang ea rechederir el mengkar a mo oldiu el mo ta ngerir e mo mengitakl; le te mo omes el dimo ta besul a mad el mo er a ta er a mad.

33 E sola Edam a mo mengudel er tir el lmuut el mo dmak, e mesterir a Jerusalem el blurir leng blingelir.

34 E solae tir a mo obkais a rengrir er a deuelreng, bomdak el mengitakl kemiu el medidriik el chutem er a Jerusalem; le Edam a mla kidrii a berraod er a rechedal, e mla osobelii a Jerusalem.

35 A Edam a mlachotii a klisiichel a chimal er mederir a rokui el beluu; me a rokui lulebongel er a bluulechad a mo mesa Edam a lolsobel; le Edam me Ngak a ditang.

36 E sola engii a diak boliit aikel mla meluches: Bekiis, mluut el mekiis, e msisiichau, E Zion; bilau er a klebokel bilem E Jerusalem el chedaol beluu, le chelechang el mong eng dikeael luut el me soiseb er a chelsem a diak le klekosek me a rekikiongel.

37 Mriik a bedengem er a chebechab; bekiis e bom dengchokl E Jerusalem; mngebetii chokul a chiklem, E chelsimer ngalk el redil er a Zion.

38 Le Rubak a dmung: Ko mla choltrau er kemiu el dimlak a char, meng diak ludoud a mo mekmad a kiriu.

39 Ngklemerang, ngklemerang me ak melekoi er kemiu el kmo, a rechedak a mo medengelii a ngklek; oi, sel sils e tir a mo medengei el kmo ngaki ngii el melekoi.

40 E sola etir a mo kmo: Ngklebokel er bebul a rois ochil ngikei el lolab a ungil chais el moer tir, ngikei lomerk a budech; lolab a ungil chais el moer tirkel lungil, lomerk er a rael mo suobel; el diluer er a Zion: A Dios er kau a merreder!

41 E sola engii a moerngii a diu: Bom tobed, bom tobed, boer cheroid er tilechang, lako morutech a kikiongel; bom tobed er a chelsel; bom klikiid kemiu lomtebechel a kloklel a Rubak.

42 Leng diako bo morael loba reched, me a lechub e morael diako mkeltmokl; le Rubak a moruchei er kemiu, me a Dios er a Israel a mobabtil omrael.

43 Kamomes, a mesiungek a kirel melemalt omerellel; ng mo ngosechekl e modanges e kmal moerbab.

44 Me te betok a mo mechas a rengrir er Ngii, a medal a dimo telemall el mo diak a chad el mla uaingii, me a bedengel dirkak a ngelekel a chad el mo uaingii.

45 Meng mo melidiim a betok el beluu; me a reking a di momutek a ngerir er ngii, leikel dirkak el medung el mo ertir a boloes; me a ikel dirkak el renges a bo lodengei.

46 Ngklemerang, ngklemerang me ak melekoi er kemiu, aikang er rokui el tekoi a di moerngii el diuaia ledilung er ngak a Edam. Misei e tiael telbiil el Edam a mla kudmeklii ngii me a rechedal a mo mecherrungel; e sola Jerusalem almuut el moerngii er a rechedak, meng mo blingelir el beluu.