Chedaol llechukl
3 Nephi 18


18 Bliongel

A Jesus a mechelii a chedaol belsoil er a delongelir a rechedal a Nephi – A llach a moer tir el mo blechoel meluluuch loba ngklel – Tirkei el diak le keldmokl e mo kolii a bedengel e ngilmii a resechel a nguu a dellebeakl – A roderuchel a nguu a klisiich el mo menged er a Edaol Reng.

1 E chelecha Jesus a dilung er a roderchelel me bo lengai a blauang me a bino el mei er ngii.

2 Me tia rael dibus losiik a blauang me a bino, eng dilu er a rubdois me bol dengchokl er a chutem.

3 E tia er a lemeremang a roderchelel lolab a blauang me a bino, eng ngiluu a blauang el mechedii e chemedolii, e milsterir a roderchelel e diluer tir me longang.

4 Me a bocha le merek el mengang el medngesang, eng diluer tir me lorous er a ildois.

5 Me a ildois er a longang el mocha medinges, eng diluer er a roderchelel: Chelechang a tar kemiu kirel mo mechedaol, me ak mo msa klisiich el mo meliud a blauang e chemedolii e morous er ngii el er a rechad er a ikelesia er Ngak, el moer tirkei er rokui el mo oumerang e mo metecholb er a ngklek.

6 E tiaikid chobo blechoel meruul er ngii, el diuaia blakuruul, el diuai Ngak el milchedii a blauang e mlengedaol erngii e milskemiu.

7 E tiang chobo moruul er ngii lomeltkiu er a bedengek, el bla kuchotii er kemiu. Meng mo olechotel el mo er a Edam el kmo, ko blechoel melatk er Ngak. Ea lsekum e komo blechoel melatk er Ngak eng moerngii a Reng er Ngak lobengkemiu.

8 Me chelechang al delang a ikael tekoi, eng dilu er a roderchelel me lengu a kob er a bino e le ngilmii, e lenguu el direk el mesterir a rildois me bol sebechir el melim er ngii.

9 Meng mlo uaisei me te millim er ngii e mlo kellechakl a rengrir: me te ngiluu el mesterir a rildois me te millim er ngii e mlo kellechakl a rengrir.

10 Mar rella tiang a roderchelel, ea Jesus a diluer tir: Kom ngeltengat el kirel tiael tekoi el blamrellii, le tia a mo rokir a llechuk, me tiang ochotii er a Eam el kmo, kemiu a somiu el mo oltirakl aikel blakdung er kemiu.

11 E tiaikid chobo blechoel meruul er ngii el moer tirkei el mo ouuchel a rengrir er a kenterir e mo metecholb er a ngklek; me komo meruul er ngii lomeklatk er kemiu er a resechek el mlo mechoit el kiriu, me bol sebechiu lochotii el mo er a Edam el kmo ko blechoel melatk er Ngak. Ea chobo blechoel melatk er Ngak, eng moerngii a Reng er Ngak lobengkemiu.

12 Mak meskemiu a llach el kiriu el mo meruul aikang el tekoi. Ea chobo blechoel meruul aikang el tekoi e komo ngeltengat le kom dechor er bebul a risois er Ngak.

13 Ea ngii dil tang er kemiu el mo dochel me a lechub e ngongesonges aikang a diak el dechor er a risois er Ngak, leng bai dechor er a chelechol lomekedecheraol; me a le boerngii a chull e lemetengel a imui, me a ses el iolt el mo oldechelakl er tir, e te mo ruebet, me a tungelel a beluu er a ngau a keltmokl el teleu el mo melai er tir.

14 Misei eke ngeltengat chobo moltirakl a llechuk, el Edam a mla dmu er ngak el kirek lomeskemiu.

15 Ngklemerang, ngklemerang a kulekoi er kemiu, bom kerekikl e blechoel meluluuch, le ko mol mechitikaik er a diablong, e mengai el mo ngar cheungel.

16 Meng di uai Ngak el meluluuch er a delongeliu, bol uaisei chomoluluuch er a ikelesia er Ngak, er a delongelir a rechedak el mo ouuchel a rengrir er a kenterir e metecholb er a ngklek. Kamosang Ngak a llomes; Ak mla chotii er kemiu a teletelel.

17 E chelecha Jesus er a lemerekong el melekoi ikael tekoi el mo er a roderchelel, eng mileltii el mo er a ildois e dilung el mo ertir:

18 Kamosang, ngklemerang, ngklemerang me ak melekoi er kemiu, ngkmal kiriu el mo kerekikl e blechoel meluluuch le lak e kau a soiseb er a ongitikaik; le Satan a soal ngoikau, me bo lombebidokl er kau el kora mungi.

19 Me a uchul eng kiriu el blechoel mluluuch el mo er a Edam loba ngklek.

20 Ea ngii dil ngerang el molngit er a Edam loba ngklek, el ngii a melemalt, e oumerang el kmo kau a monguu, momes, e bol beskau.

21 Moluluuch lobengkel a telungalk er kemiu el mo er a Edam, el di blechoel loba ngklek, me bol ngeltengat a rebechemiu me a rengelekiu.

22 Morrenges, komo blechoel mo keldibel; e diak bo molekebai er a ngii dil chad el me teloi er kemiu sel bom keldibel, e bechititerir me lemei er kemiu e lak molekebai er tir.

23 Ko bai mo meluluuch el kirir e diak moldik er tir; ealsekum tir a mo blechoel me obengkemiu, e komo meluluuch el kirir el mo er a Edam loba ngklek.

24 Me a leuaisei e modersii cholbtelem me bo lomekellomes el mo er a bluulechad. Kamosang Ngak a llomes el kiriu loldars er ngii aikel bla mosekak el meruul. Chelecha komla mesekak el meluluuch el mo er a Edam, kemiu er rokui a mla mo sioning.

25 E kemiu tiael lomes el kmo, ak mla melekoi el kmo ngdiak er kemiu a moer cheroid, ak bai mla melekoi el kmo mei er Ngak, me bo morutech e momes; meng kiriu el mo uaisei el mo er a bluulechad; e ngikei el mo tomellii tiakid e llach a dingii el motungii er a chelsel ongitikaik.

26 Chelecha Jesus er a bocha lemerek el melekoi aikael tekoi, e ngulemes el mo er a roderchelel el blalolilt er tir e diluel tir:

27 Kamorrenges, ngklemerang, ngklemerang me ak melekoi er kemiu, ak meskemiu ata er a llach, e solae kirek el mo er a Demak meng mo sebechek el mo kudmokl a bebil er a llach el Ngii a mla meskak.

28 Me chelechang e tiakid a llach el bok beskemiu, el kmo, ngdiak el sebechemiu el medengelii a chad el diak le keltmokl er a rengul emkengei er ngii el mo melai er a bedengek me a resechek sel chobo morous er ngii;

29 Le ngikei el mo mengang e melim er a bedengek me a resechek e diak le keltmokl a rengul, a kolii e ngilmii a dellebeakl el mo er a delbengel; me a leuaisei ea lsekum e komedengelii a chad el diak le keltmokl a rengul mo mengang e melim er a bedengek me a resechek eng diak mkengei er ngii.

30 Endi, diak moldik er ngii er a dlongeliu, e bai mo olisechakl er ngii, e mo meluluuch el kirel, mo er a Edam loba ngklek; ea lsekum eng mo ouuchel er a rengul er a kentil e mo metecholb er a ngklek, e kom nguu, e mochu msa bedengek me a resechek.

31 Endi lsekum eng diak bo louuchel er a rengul er a kentil, eng diak bo lulcherangel er a rechedak, meng diak bo lolemall er a rechedak, lek medengei a sib er Ngak, le tulcherangel.

32 Endi diak bo moldik er ngii er a ikelesia er kemiu, me a lechub eng blil omengull, le tirkeia kiriu el melemolm lolsisechakl er tir; leng diak modengei el kmo kele lobult e bo louuchel e lemei er Ngak loba blak el reng, me ak mo omekungil er tir; meng kemiu a mlouchul tir a mo suobel.

33 Me bo moltirakl aikael tekoi el blak dung er kemiu, me lak el mer kemiu a dellebeakl; leng chebuul ngikei el Edam a mo dobeklii.

34 Mak meskemiu aikang el llach, le klautitekangel el ngarngii er a delongeliu. E komo ngeltengat alsekum eng modiak a klautitekangel er a delongeliu.

35 Me chelechang ak mo er a Edam, leng kirek el mo er a Edam el kiriu.

36 Chelecha Jesus er a bocha lemerek er a ikael tekingel, eng mlo merutech er tirkael loderchelel lullilt er tir loba chimal loudertang er tir rokui, el mlengedecheduch er tir er a lorutech er tir.

37 Endi tiael lildois a dimlak el renges a tekoi ledilung, meng dimlak bo lolchotel; endi roderchelel a mlo cholchotel kmo, ngmilsterir a klisiich el mo menged er a Edaol Reng. Mak mochotii er kemiu ruriul el kmo, tiael lolchotel a klemerang.

38 Chelecha Jesus er a bla lorutech er tir er rokui, ea iabed a mler bebrir a rubdois e mengucheb er tir meng mlo diak lesa Jesus.

39 Me tia er a longucheb er tir eng tilobed er a delongelir e ngilasch el moer babeluades. Me a roderchelel a milsang e mloerngii cholchotel kmo, ngliluut el ngmasch el moer babeluades.