1 Vacami cʼa, vachʼalal ri ix nucʼuʼxlan, nusiqʼuin chivech re reʼ richin nivetamaj chiquij ri cʼulanen tzij ri e rubanon can ri Ajaf riqʼuin ronojel ri rujayul ri Israel.

2 Pa tok ri tuiquiribel pe ri Ajaf chʼovinek quiqʼuin ri e aj Judá riqʼuin ri quichʼabel ri chʼajchʼojilej e yaʼol lokʼolej rutzijol. Queriʼ cʼa nuben quiqʼuin conojel iyaj mamaj ijaʼtzul, cʼa tok rijeʼ xquetzolitej chic pa ri kitzij rukʼataj y rumolaj ri Dios. Jariʼ tok rijeʼ xquemolotej chic chupan ri ruvachʼulef quichinan y xquepabatej cʼa chic chupan ri ruvachʼulef e sujun can chique.

3 Can kitzij vi vachʼalal ri ix nucʼuʼxlan, yin ninbij chive ronojel reʼ richin chi yixquicot y yixtzuʼun akʼanij benek ruvech, roma ri turusanic xtuyaʼ ri Ajaf chique ri ivalcʼual.

4 Yin vetaman cʼa chi e qʼuiy chive rix janíla inicʼon richin nivetamaj achique xticʼulvachitej apon. Roma cʼariʼ, yin vetaman chi rix ivetaman chi ri kachʼacul cʼo chi xtiyojtej y xticom. Man riqʼuin vi riʼ, cʼo chi xtikatzʼet ri Dios riqʼuin ri kachʼacul.

5 Yin vetaman cʼa chi rix ivetaman chi rijaʼ xtucʼut riʼ riqʼuin ri ruchʼacul chiquivech ri e cʼo pa Jerusalem acuchi xojel vi pe. Janíla cʼatzinel cʼa chi rijaʼ nicʼojeʼ chiquicojol rijeʼ. Nicʼatzin cʼa chi ri nimalej Tzʼucunel nukasaj riʼ riqʼuin ri ruchʼacul chiquivech ri vinakiʼ, y nicom coma conojel vinakiʼ. Riqʼuin cʼariʼ, conojel vinakiʼ xtiquikasaj cʼa quiʼ chuvech rijaʼ.

6 Ri camic petenek cʼa pa quiviʼ conojel ri vinakiʼ richin nikʼajer ri joyovabel nucʼun banel richin ri nimalej Tzʼucunel. Que cʼa chukaʼ riʼ, cʼo chi nicʼojeʼ ri uchukʼaʼ richin ri cʼastajibel. Ri cʼastajibel cʼo cʼa chi nipe chique conojel vinakiʼ roma cʼa ri tzakinen. Ri tzakinen xpe roma xkʼajtej ri pixaʼ y xetzak ri vinakiʼ. Cʼa cʼariʼ tok xeʼelesex el riqʼuin ri Ajaf.

7 Roma cʼariʼ tok cʼo chi nicʼojeʼ jun jumul tojbalil mac. Vi man ta jumul cʼa ri tojbalil mac riʼ, manek ta jun banel richin queriʼ re tzʼil reʼ nuqʼuen cʼa ka chʼajchʼojil. Queriʼ cʼa, ri nabey kʼatonic tzij ri xpe pa ruviʼ ri vinek, cʼo ta chi xcanej can jumul. Vi ta queriʼ, re chʼaculaj reʼ cʼo ta cʼa chi nimuk ka y nikʼey, y niturutej chupan ri ulef, y man ta xticʼastej cʼa chic.

8 ¡Janíla ri retamabal ri Dios y chukaʼ ri rujoyovabal y ri rutzil! Can kitzij vi cʼa chi vi ri kachʼacul man ta xticʼastej chic, cʼo ta cʼa chi ri kuxlabal xquejitzʼtej ta pa rukʼaʼ ri takonaxel ri xtzak el chuvech ri Jumul Dios. Ri takonaxel riʼ xoc cʼa ri itzel vinek y man xtiyacatej ta chic.

9 Que cʼariʼ, ri kuxlabal cʼo ta chi xqueʼoc achiʼel cʼa rijaʼ. Roj xkojoc ta cʼa itzel tak vinakiʼ, y ri takonaxelaʼ richin ri itzel vinek, y xkojelesex ta el riqʼuin ri Dios. Cʼa cʼariʼ, xkojcanej ta can pa kʼaxomal riqʼuin ri tataʼaj richin ri tzʼucuj tzij, achiʼel cʼa rijaʼ. Ja ri itzel vinek riʼ, ri xerukʼol ri nabey kateʼ katataʼ. Rijaʼ jubaʼ chic man noc jun takonaxel richin sakil y yeruyukʼ ri vinakiʼ richin yequiben itzel tak quikʼataj pan evel y pa kʼekuʼm.

10 ¡Can janíla vi nim ri rutzil ri Dios roma tok rijaʼ nunucʼ ri bey richin chi yojanimej el pa rukʼaʼ re nimalej xibinel! Re nimalej xibinel reʼ ja ri camic y ri xibalbay. Ri ninbij cʼa yin ja ri camic richin ri chʼaculaj y chukaʼ ri camic richin ri uxlabel.

11 Ri ka Dios, ri Lokʼolaxel richin ri Israel, xuchojmirisaj ri bey richin yojcolotej. Can roma vi cʼariʼ tok ri camic, achojchij in chʼovinek vi, can xquerutzolij ri rucaminakiʼ. Ri camic riʼ, jariʼ richin ri chʼaculaj y jariʼ tok yojmuk.

12 Chukaʼ ri camic richin uxlabel, achojchij in chʼovinek vi, can xquerutzolij vi pe ri rucaminakiʼ chukaʼ. Ri camic riʼ richin uxlabel, ja ri xibalbay. Queriʼ cʼa, ri camic y ri xibalbay cʼo chi yequitzolij pe ri quicaminakiʼ. Ri xibalbay cʼo chi yerutzolij pe ri uxlabel ri e tzʼapin can chiriʼ. Ri mukubel cʼo chi yerutzolij pe ri chʼaculaj ri e rutzʼapin. Ri chʼaculaj y ri uxlabel quichin ri vinakiʼ xtiquitun cʼa quiʼ jun bey chic. Ronojel reʼ nibanatej can, xaxe roma ri uchukʼaʼ richin ri rucʼastajibel ri Lokʼolaxel richin ri Israel.

13 ¡Can janíla vi nim ri nucʼun banel richin ri ka Dios! Roma cʼa chukaʼ ri lokʼolej rucʼojlibal richin quicoten richin ri Dios cʼo chi yerutzolij pe ri uxlabel quichin ri e choj. Queriʼ cʼa chukaʼ, ri mukubel cʼo chi yerutzolij pe ri quichʼacul ri e choj. Cʼa cʼariʼ, ri uxlabel y ri chʼaculaj xtiquitun chic quiʼ. Conojel vinakiʼ yeʼoc cʼa janíla chʼajchʼoj y man e camel ta chic. Ri quicʼaslemal rijeʼ can cʼaslic vi cʼa jumul. Rijeʼ cʼo cʼa jun tzʼaket quetamabal, achiʼel cʼa roj riqʼuin kachʼacul. Jacʼa chiriʼ ri ketamabal roj xtoc can tzʼaket vi.

14 Roma cʼariʼ, xticʼojeʼ jun tzʼaket ketamabal chiquij ri kamac, y ri katzʼilol, y ri kachʼanayil. Xticʼojeʼ cʼa quiqʼuin ri e choj jun tzʼaket quetamabal richin ri quiquicoten y ri quichojmilal. Xquevik cʼa riqʼuin chʼajchʼojil y riqʼuin ri tziek richin chojmilal.

15 Xticʼulvachitej cʼa chi tok conojel ri vinakiʼ xquekʼax pa re nabey camic reʼ, cʼa pa cʼaslen, can xqueʼoc vi man e camel ta chic. Can ja vi riʼ tok cʼo chi yepe chuvech ri kʼatbel tzij richin ri Lokʼolaxel richin ri Israel. Ja cʼariʼ tok nipe ri kʼatonic tzij y cʼo chi nikʼat tzij pa quiviʼ rijeʼ, riqʼuin cʼa ri lokʼolej kʼatonic tzij ri nuben ri Dios.

16 Can jic vi qʼues ri Ajaf. Can jic vi quereʼ chukaʼ chi ri e choj cʼa e choj na xquecʼojeʼ, y ri e itzel cʼa e itzel na xquecʼojeʼ. Can ja vi ri Ajaf Dios ri biyon queriʼ y jareʼ ni jumul ruchʼabel rijaʼ ri man nitiquir ta nikʼax cʼa el. Que vi cʼariʼ, ri e tzʼil je rijeʼ ri itzel vinek quiqʼuin ri rutakonaxelaʼ. Rijeʼ xquebe cʼa ka chupan ni jumul kʼakʼ. Ri quikʼaxomal rijeʼ xa achiʼel jun choy richin kʼak y cʼaten yaʼal. Ri ruxak kʼak chiriʼ nijoteʼ akʼanij benek ruvech y manek ruqʼuisirinen.

17 ¡Can janíla vi ri ruchojmilal y ri rukʼatoj tzij ri ka Dios! Rijaʼ can nuben vi ronojel ri ruchʼabel ri nel pe pa ruchiʼ, y conojel ri rupixaʼ cʼo chi yekʼajer.

18 Can kitzij vi cʼa chi ri e choj, ja ri chojlaxelaʼ richin ri Lokʼolaxel richin ri Israel, je rijeʼ ri e nimayon richin ri Lokʼolaxel richin ri Israel. Rijeʼ e quicochʼon ri ejkaʼn richin paban kʼeban cheʼ richin ri ruvachʼulef y quixovan ri ruqʼuixbel. Rijeʼ xtiquichinaj cʼa ri rajavaren ri Dios. Ja cʼariʼ can chojmirisan vi pe chique rijeʼ, cʼa pa tok rutiquiribel pe ri ruvachʼulef, y ri quiquicoten can tzʼaket vi benek ruvech.

19 ¡Can janíla vi nim ri rujoyovabal ri ka Dios, ri Lokʼolaxel richin ri Israel! Rijaʼ yerucol ri ruchojlaxelaʼ pa rukʼaʼ ri nimalej xibinel, jariʼ ri itzel vinek, y ri camic, y ri xibalbay. Chukaʼ yerucol pe pa ri choy richin kʼakʼ y cʼaten yaʼal can ja vi ri kʼaxomal jumul.

20 ¡Can janíla vi nim ri chʼajchʼojil richin ri ka Dios! Rijaʼ retaman cʼa ronojel y manjun cʼo vi ri man retaman ta rijaʼ.

21 Rijaʼ nipe cʼa chuvech re ruvachʼulef richin chi yerucol conojel vinakiʼ, vi niquinimaj ri ruchʼabel. Can kitzij vi, rijaʼ nucʼovisaj ri quipokonal conojel ri vinakiʼ. Nutij cʼa pokon coma conojel ri e qʼues, conojel cʼa achiʼaʼ, ixokiʼ, y alcʼualaʼ ri e cʼo pa ri ruchinamit ri Adán.

22 Rijaʼ nuben cʼa chi re cʼastajibel reʼ xtipe chique conojel ri vinakiʼ, richin chi conojel xqueʼapon chuvech rijaʼ chupan ri nimalej kʼij richin kʼatonic tzij.

23 Rijaʼ nubij chique conojel vinakiʼ chi cʼo chi titzolin pe quicʼuʼx y quekasex chuxeʼ yaʼ pa rubiʼ rijaʼ. Que cʼariʼ niquiben tok cʼo chic ri tzʼaket quicukubabel cʼuʼx riqʼuin ri Lokʼolaxel richin ri Israel. Vi man ta queriʼ, xa manek ta yetiquir cʼa yecolotej pa ri rajavaren ri Dios.

24 Vi man nitzolin ta pe quicʼuʼx, y niquinimaj ri rubiʼ, y yekasex chuxeʼ yaʼ pa rubiʼ rijaʼ, y yecochʼon cʼa pa ri ruqʼuisibel, jariʼ tok can xqueʼetzelex vi. Can que vi cʼariʼ rubin can ri Ajaf Dios, ri Lokʼolaxel richin ri Israel.

25 Roma cʼariʼ tok ruyaʼon rijaʼ jun pixaʼ. Man riqʼuin vi riʼ, tok man niyaʼox ta jun pixaʼ, manek cʼa chukaʼ jun cʼajisabel. Tok manek cʼajisabel, manek chukaʼ jun etzelanic. Tok manek etzelanic, ri joyovabel richin ri Lokʼolaxel richin ri Israel yerucol, roma ri rutojbalil mac nuben. Rijaʼ yerucol cʼa roma ri ruchukʼaʼ rijaʼ.

26 Ri rutojbalil mac ri nuben rijaʼ xa nuben cʼa chi yekʼajer ri rurayibal ri kʼatoj tzij pa quiviʼ ri man yaʼon ta ri pixaʼ chique. Que cʼariʼ, rijeʼ yecolotej chuvech ri nimalej xibinel, ri camic y ri xibalbay y chuvech ri itzel vinek, y ri choy richin kʼakʼ y cʼaten yaʼal. Jariʼ cʼa ri kʼaxomal jumul. Rijeʼ xa xquetzolix cʼa chire ri Dios ri xyaʼon ri cuxlaʼ. Jacʼa rijaʼ ri Lokʼolaxel richin ri Israel.

27 Man riqʼuin vi riʼ, joʼoc ruvech rijaʼ ri niyaʼox ri pixaʼ chire y ri e cʼo conojel ri rupixaʼ ri Dios riqʼuin, achiʼel cʼa e cʼo kiqʼuin roj, vi rijaʼ yerukʼej cʼa ri pixaʼ riʼ. Joʼoc cʼa ruvech vi yerusachalaʼ ri kʼij richin ri rutejtobenic, roma can janíla vi cʼayef xtuben chire.

28 ¡Janíla ri kʼolonel naʼoj richin ri itzel vinek! ¡Janíla ri bananenriʼil, y chʼakijriʼil, y ri nacanic naʼoj quichin ri vinakiʼ! Tok janíla niquitijoj quiʼ, niquinojij chi rijeʼ e etamanelaʼ y man niquinimaj ta ri pixabanic richin ri Dios. Xa niquixutuj y niquinojij chi manjun achique chic niyaʼon ri etamabel. Roma cʼariʼ, ri quetamabal rijeʼ xa nacanic naʼoj y manjun nuyaʼ chique. Rijeʼ can xquesach vi.

29 Man riqʼuin vi riʼ, can utz vi chukaʼ tok niquitijoj quiʼ, vi ta xa cʼa niquinimaj na ri rupixabanic ri Dios.

30 Xa joʼoc cʼa quivech ri beyomaʼ ri cʼo qʼuiy quibeyomel richin ri ruvachʼulef. Rijeʼ e beyon, y roma cʼariʼ xaxe yequixovaj ri a mebaʼiʼ y yecokotaj ri e chʼuchʼuj cánima. Xaxe cʼa ri quibeyomal rijeʼ nurayij ri cánima. Roma cʼariʼ, ri quibeyomal jariʼ ri qui dios. Can kitzij vi cʼa chi ri quibeyomal xtibeqʼuis chukaʼ quiqʼuin rijeʼ.

31 Joʼoc quivech ri e achiʼel e tʼoj ri niquiben chi man yetiquir ta nicacʼaxaj, roma rijeʼ can xqueyoj vi.

32 Joʼ cʼa oc quivech ri e achiʼel e moyiʼ ri niquiben chi man yetiquir ta yetzuʼun, roma rijeʼ xqueyoj chukaʼ.

33 Joʼoc quivech ri man e chʼuchʼuj ta ri cánima. Ri quetamabal rijeʼ chirij ri itzel quibanobal, can xquerusoc vi pa ri ruqʼuisibel kʼij.

34 Joʼoc ruvech ri tzʼucuy tzij, roma rijaʼ can xtitorix vi ka pa xibalbay.

35 Joʼoc ruvech ri camisanel ri can nucanoj vi richin nicamisan, roma rijaʼ xticom.

36 Joʼoc quivech ri yetzʼiʼn, roma rijeʼ xa xquetorix cʼa ka pa xibalbay.

37 Joʼoc cʼa quivech ri niquiyaʼ quikʼij ri tak tiox, roma ri itzel vinek quichin conojel itzel tak vinakiʼ niquicot quiqʼuin.

38 Can que vi cʼariʼ, joʼoc quivech conojel ri yecom quiqʼuin ri quimac. Rijeʼ xquetzolin cʼa riqʼuin ri Dios, y xtiquitzʼet ruvech, y xquecanej can chupan ri quimac.

39 Vachʼalal ri ix nucʼuʼxlan, tokaʼ cʼa chiʼicʼuʼx chi can janíla vi itzel richin nikʼej ri rupixaʼ ri Lokʼolej Dios. Chukaʼ janíla itzel richin nitzekelbej cʼa el ri nubij ri kʼolonel vinek. Tokaʼ cʼa chiʼicʼuʼx chi tok yixnojin riqʼuin ri chʼaculaj, can ja vi camic riʼ. Y ja ri cʼaslen jumul tok yixnojin riqʼuin ri uxlabel.

40 Vachʼalal ri ix nucʼuʼxlan, tiyaʼ cʼa ixiquin chire ri nuchʼabel. Tokaʼ cʼa chiʼicʼuʼx chi janíla nim ri chojmilal ri Lokʼolaxel richin ri Israel. Man tibij cʼa chi cʼayef ri nubin chive. Roma vi queriʼ nibij, can nipabaʼ vi iviʼ chuvech ri kitzij. Yin nutzijon cʼa chive ri ruchʼabel ri Tzʼucuyon ivichin. Yin vetaman chi ri chʼabel richin ri kitzij can cʼayef vi chire ri tzʼilol. Man riqʼuin vi riʼ, ri e choj man niquixibij ta quiʼ chuvech re chʼabel reʼ, roma rijeʼ nicajoʼ ri kitzij y man e silon ta.

41 Roma cʼariʼ vachʼalal ri ix nucʼuʼxlan, quixjel pe riqʼuin ri Ajaf ri Lokʼolaxel richin ri Israel. Tokaʼ cʼa chiʼicʼuʼx chi ri rubey rijaʼ can e choj vi. Can kitzij vi chi xa chʼutiʼn ruvech ri bey acuchi nicʼatzin chi yebiyin ri vinek. Man riqʼuin vi riʼ, can chojmin vi chiquivech. Ri Lokʼolaxel richin ri Israel, jacʼa rijaʼ ri chajinel richin ri oquibel, y man nucusaj ta jun chic rusamajel chiriʼ. Manjun chic rubeyal richin yixoc, xaxe cʼa chupan ri oquibel riʼ. Manjun xtikʼolon cʼa richin rijaʼ, roma can ja vi rijaʼ ri Ajaf Dios.

42 Rijaʼ nujek cʼa chuvech ri nicʼoscʼaʼ. Rijaʼ xaxe yeruxovaj cʼa ri etamanelaʼ, y ri yequitijolaʼ quiʼ, y ri e beyomaʼ ri niquinimirisaj quiʼ roma cʼa ri quetamabal, y ri quitjonic, y ri quibeyomal. Rijaʼ can man xtujek ta vi chiquivech rijeʼ vi xa man niquixutuj ta can ronojel reʼ, y vi xa man niquinojij ta chi cʼo chi yenacanon chuvech ri Dios, y cʼo chi can janíla vi xtiquichʼutinirisaj quiʼ chuvech.

43 Ri cʼo quiqʼuin ri choj quinaʼoj y ri utz quinojibal xqueʼevex junelic chiquivech ri e itzel. Ri quicoten ri chojmirisan chiquivech ri chojlaxelaʼ, jariʼ ri xtevex chiquivech ri e itzel.

44 Vachʼalal ri ix nucʼuʼxlan, tokaʼ cʼa chiʼicʼuʼx ri nuchʼabel. Can kitzij vi, ninvelesaj cʼa ri nutziak y nintotaj chivech. Nincʼutuj cʼa chire ri Dios richin ri nucolotajic chi quirutzʼetaʼ na pe riqʼuin ri runakʼ ruvech ri nutzʼet ronojel. Queriʼ cʼa, pa ri ruqʼuisibel kʼij, rijaʼ xtukʼet tzij pa quiviʼ conojel vinakiʼ chirij cʼa ri quibanon. Ja cʼariʼ tok rix xtivetamaj chi ri Dios richin ri Israel can xutzʼet vi chi xintotaj el pa ri vánima ri itzel ibanobal rix. Xtitzʼet chukaʼ chi yin can in chʼajchʼoj vi xquipaʼeʼ apon riqʼuin rijaʼ y in oskʼopin el riqʼuin ri iquiqʼuel.

45 Vachʼalal ri ix nucʼuʼxlan, tijechʼej el iviʼ chupan ri imac. Titotaj el ri ximibel richin ri najovan yixruxim cof. Quixjel pe riqʼuin ri Dios, ri ja rijaʼ ri abej richin ri icolotajic.

46 Tichojmirisaj ri ivánima richin ri jebelilej kʼij richin kʼa tonic tzij tok xtisamajix ri kʼatoj tzij pa quiviʼ ri e choj. Ri kʼij riʼ ja ri kʼij richin ri kʼatonic tzij. Tichojmirisaj cʼa iviʼ richin chi man ta xtivononelaʼ iviʼ riqʼuin jun nimalej xibinriʼil. Que ta chukaʼ riʼ, man ta xticʼojeʼ vi jun tzʼaket natabel quichin ri itzelilej imac, y man ta xtisiqʼuij quereʼ: Can chʼajchʼoj vi ri akʼatonic tzij rat Ajaf Dios Ronojel Tiquirel. Yin vetaman cʼa ri numac. Yin xinkʼej ri apixaʼ y ri nukʼajonic pixaʼ can vichin vi yin. Ri itzel vinek in ruchapon y yin in ajun riqʼuin ricʼayevilej rukʼaxomal.

47 Vaveʼ cʼa vachʼalal, ¿la nicʼatzin cami chi yixincʼasoj riqʼuin ri cʼayevilej kitzij rubanic ronojel reʼ? ¿La xtinnek ta cami ri ivánima, vi ta e choj ri inojibal? ¿La xquichʼo ta kʼalaj, achiʼel cʼa ri rukʼalajirisanen ri kitzij, vi ta rix ix oskʼopitajinek chic pa ri mac?

48 Can kitzij vi chi vi ta rix ix chʼajchʼoj, xquichʼo ta cʼa iviqʼuin chirij ri chʼajchʼojil. Vaveʼ cʼa, rix xa man ix chʼajchʼoj ta. Rix ninojij cʼa chi yin in itijonel y romariʼ tok can rucʼamon vi chi yixinitijoj rix chire ri xtuqʼuen pe ri mac.

49 Can kitzij vi chi ri vánima nretzelaj ri mac y xa niquicot ri nucʼuʼx riqʼuin ri chojmilal. Yin xtinyaʼ cʼa rukʼij ri lokʼolej rubiʼ ri nu Dios.

50 Quixámpe vachʼalal, ivonojel rix ri chakirinek ichiʼ. Quixámpe chuchiʼ ri yaʼ. Ri manek ri rupuak, tipe cʼa, y tilokʼon, y tivaʼ. Tulokʼoʼ cʼa, man riqʼuin ta puek, ri ruyaʼal ruvech utzilej kʼayis y ri ruyaʼal tzʼumaj ri manek rajel nicʼutux chire.

51 Roma cʼariʼ, man tisech ri ipuak roma ri xa manek rejkalen, ni ta chukaʼ ri isamaj roma ri xa manek yixrucukirisaj ta. Quinivacʼaxaj utz y tokaʼ cʼa chiʼicʼuʼx ri chʼabel ri xinbij can chive. Quixjel pe riqʼuin ri Lokʼolaxel richin ri Israel y ticanoj ri man xtisachtej ta, y ri man xtitzʼilobisex ta, y tiquicot cʼa ri ivánima chi utzil.

52 Can kitzij vi, vachʼalal, tokaʼ cʼa chiʼicʼuʼx ri ruchʼabel ri i Dios. Quixchʼo akʼanij riqʼuin rijaʼ jutakel pa kʼij y timatioxij cʼa chire ri lokʼolej ri rubiʼ chakʼaʼ. Tiquicot cʼa ri ivánima.

53 Tichʼoboʼ rij ri nimalej cʼulanen tzij ri nuben ri Ajaf y ri nim lokʼolej rukajinen quiqʼuin ri calcʼual ri achiʼaʼ. Roma cʼa ri nim ránima y ri rutzil y ni rujoyovabal, rijaʼ can rusujun vi chike chi ri kijaʼtzul man xtiyojtej ta jumul pa re cʼaslen reʼ. Xa rijaʼ xqueruchajij, y pa ni iyaj mamaj ijaʼtzul ri xquepe apon, rijeʼ xqueʼoc jun chojmilej kʼabaj richin ri rujayul ri Israel.

54 Vacami cʼa, vachʼalal, ninvajoʼ ninbij jubaʼ chic chive. Man riqʼuin vi riʼ, cʼa chuvak xtinkʼalajirisaj ri chʼakaʼ chic ni nuchʼabel chive. Amen.