Scriptures
2 Nefi 32


Tanaj 32

Ri Nefi cʼa nuyaʼ na chʼakaʼ chic lokʼolej rutzijol. Nichʼo chiquij ri quichʼabel ri takonaxelaʼ. Nutzijoj ri rusamaj ri Uxlabixel.

1 Vacami cʼa, vachʼalal ri ix nucʼuʼxlan, ninnojij chi rix nichʼob rij pan ivánima ri achique rucamon chi niben tok rix ix oquinek cʼa chic pa ri bey. Vaveʼ cʼa, ¿achique cami cʼa roma tok nichʼob rij ronojel reʼ pan ivánima?

2 ¿La man nokaʼ ta chiʼicʼuʼx chi xinbij chive chi tok icʼulun chic ri Uxlabixel, jariʼ tok yixtiquir chic yixchʼo pa ri quichʼabel ri takonaxelaʼ? ¿Achique cʼa banel richin yixchʼo pa quichʼabel ri takonaxelaʼ vi man ta roma ri Uxlabixel?

3 Ri takonaxelaʼ yechʼo roma ri ruchukʼaʼ ri Uxlabixel. Roma cʼariʼ, xa niquibij cʼa ri ruchʼabel ri Cristo. Xa romariʼ tok xinbij chive chi tivetamaj ri ruchʼabel ri Cristo. Can kitzij vi cʼa, ri ruchʼabel ri Cristo xtiquibij chive rix ronojel ri rucʼamon chi niben.

4 Roma cʼariʼ, tok nutzijon chic re chʼabel reʼ chive, vi man yekʼax ta chivech rix, riʼ xa roma man nicʼutuj ta, ni ta chukaʼ man yixcʼoscʼaʼ ta pe. Roma cʼariʼ, man yixcʼamatej ta pa sakil, xa cʼo chi yixyojtej cʼa pa kʼekuʼm.

5 Can kitzij vi chi ninbij chive jun bey chic chi vi yixoc pa ri bey y nicʼul ri Uxlabixel, rijaʼ xtucʼut chivech rix ronojel ri rucʼamon chi niben.

6 Can ja vi reʼ ri rutijonic ri Cristo y man xtiyaʼox ta chic jun, cʼa tok rijaʼ xtukʼalajirisaj riʼ chivech rix riqʼuin ri ruchʼacul. Tok rijaʼ nukʼalajirisaj cʼa riʼ chivech rix riqʼuin ri ruchʼacul, ronojel ri xtubij chive jariʼ ri can xtiben vi.

7 Vacami cʼa, yin Nefi man yitiquir ta ninbij chʼakaʼ chic. Ri Uxlabixel nukʼil nuchʼoven. In yaʼon can richin yinokʼ roma man niquinimalaʼ ta ri vinakiʼ, y can niquibanalaʼ vi ri itzel, y man niquetamaj ta, y can cof ri cánima. Rijeʼ man niquicanoj ta ri etamabel, y man nikʼax ta chiquivech ri nimalej etamabel tok can kʼalaj vi nicʼut chiquivech stapeʼ cʼa can kʼalaj vi achiʼel jun chʼabel.

8 Vacami cʼa, vachʼalal ri ix nucʼuʼxlan, nintzʼet chi cʼa nichʼob na rij pan ivánima. Yibison cʼa roma cʼo chi yichʼo iviqʼuin chirij reʼ. Roma cʼa vi ta ninimaj ri Uxlabel ri nutijoj jun vinek richin nichʼo akʼanij riqʼuin ri Ajaf, xtivetamaj ta cʼa chi cʼo chi yixchʼo akʼanij riqʼuin ri Dios. Ri itzel uxlabel man nutijoj ta jun vinek richin nichʼo akʼanij riqʼuin ri Dios. Xa nutijoj chi man tichʼo cʼa akʼanij riqʼuin ri Dios.

9 Man riqʼuin vi riʼ, xa kitzij ninbij chive chi cʼo chi yixchʼo akʼanij riqʼuin ri Dios junelic y manjun bey yixkʼitej. Chukaʼ ninbij chive chi man utz ta xtiben manjun, vi man ta nabey yixchʼo akʼanij riqʼuin ri Tataʼixel pa rubiʼ ri Cristo, richin queriʼ xtuturusaj ka chive rix ri xtiben. Riqʼuin cʼariʼ, ri achique ri xtiben can utz vi xtuben chire ri ivánima.