1 Vacami cʼa vachʼalal ri ix nucʼuʼxlan, yin Nefi nintanabaʼ ruyaʼic lokʼolej rutzijol chive rix. Xaxe yitiquir yentzʼibaj jun caʼiʼ oxiʼ rutzijol ri vetaman yin chi can xquecʼulvachitej vi. Chukaʼ xaxe yitiquir yentzʼibaj can e jubaʼ chique ri ruchʼabel ri nuchakʼ Jacob.

2 Romariʼ, ri xintzʼibaj cʼa yirucukirisaj. Xaxe jun caʼiʼ oxiʼ chʼabel chic chirij ri rutijonic ri Cristo cʼo chi nintzijoj chive. Roma cʼariʼ tok can kʼalaj vi xquichʼo iviqʼuin rix, achiʼel cʼa ri kʼalajirisanen richin ri lokʼolej rutzijol ri ninyaʼ.

3 Ri vánima niquicot riqʼuin ri kʼalajirisanen. Can que vi cʼariʼ nisamej ri Ajaf Dios chiquicojol ri vinakiʼ. Ri Ajaf Dios nusakirisaj cʼa ri quinojibal. Nichʼo cʼa quiqʼuin ri vinakiʼ pa quichʼabel rijeʼ richin chi nikʼax chiquivech.

4 Que cʼariʼ, ninvajoʼ chi nokaʼ chiʼicʼuʼx chi yin in chʼovinek iviqʼuin rix chirij ri yaʼol lokʼolej rutzijol ri xucʼut ri Ajaf chinuvech. Ja rijaʼ ri xtikasan chuxeʼ yaʼ ri Rucarneʼl ri Dios ri xquerelesaj ri quimac ri e aj re ruvachʼulef.

5 Vacami cʼa, ri Rucarneʼl ri Dios can chʼajchʼoj vi. Vi nicʼatzin chi rijaʼ nikasex chuxeʼ yaʼ richin nitzʼaket ronojel ri chojmilal, can janíla vi cʼatzinel chukaʼ chike roj oj aj maquiʼ, richin yojkasex chuxeʼ yaʼ.

6 Vacami cʼa, vachʼalal ri ix nucʼuʼxlan, ninvajoʼ ta nincʼutuj chive quereʼ: ¿Achique roma tok ri Rucarneʼl ri Dios xuben chi xkʼajer ronojel ri chojmilal tok rijaʼ xkasex chuxeʼ yaʼ?

7 ¿La man ivetaman ta cami chi rijaʼ can chʼajchʼoj vi? Man riqʼuin vi riʼ, rijaʼ nucʼut chiquivech ri vinakiʼ chi nuchʼutinirisaj riʼ riqʼuin ruchʼacul chuvech ri Tataʼixel. Queriʼ chukaʼ nujiquibaʼ chuvech ri Tataʼixel chi rijaʼ nunimaj rutzij roma yerutakej ri rupixaʼ.

8 Cʼa cʼariʼ, tok kasan chic chuxeʼ yaʼ, ri Uxlabixel xkaka pa ruviʼ achiʼel cʼa jun paxcuʼy.

9 Ja cʼariʼ, nucʼut cʼa chukaʼ chiquivech ri vinakiʼ chi choj ri bey y chʼutiʼn ruvech ri oquibel acuchi cʼo chi yeʼoc vi. Rijaʼ xucʼut cʼa ri rubanic chiquivech rijeʼ.

10 Chukaʼ xubij chique ri vinakiʼ quereʼ: Quinitzekelbej. Roma cʼariʼ, vachʼalal ri ix nucʼuʼxlan, ¿la yojtiquir cami nikatzekelbej ri Jesús vi man nikajoʼ ta yekatakej ri pixaʼ richin ri Tataʼixel?

11 Ri Tataʼixel xubij cʼa queré: Titzolin pe icʼuʼx, titzolin pe icʼuʼx y quixkasex chuxeʼ yaʼ pa rubiʼ ri Nucʼajol Nulokʼokʼen.

12 Chukaʼ xpe ri ruchʼabel ri Cʼajolaxel y quereʼ xubij chuve: Ri Tataʼixel xtuyaʼ ri Uxlabixel chire ri nikasex chuxe yaʼ pa nubiʼ yin, achiʼel cʼa xuyaʼ pe chuve. Roma cʼariʼ, quinitzekelbej y tibanaʼ ri achique itzʼeton chi yin xinben.

13 Roma cʼariʼ, vachʼalal ri ix nucʼuʼxlan, rucʼamon chi nitzekelbej ri Cʼajolaxel riqʼuin ronojel ivánima y man yixkʼolon ta, ni ta chukaʼ niben caʼiʼ ipalej chuvech ri Dios. Xa nicʼatzin cʼa chi nitzekelbej rijaʼ riqʼuin jun choj irayibal y nitzolin pe icʼuʼx chupan ri imac. Riqʼuin cʼariʼ, nijiquibaʼ chuvech ri Tataʼixel chi nivajoʼ niqʼuen ka pan iviʼ ri rubiʼ ri Cristo roma ri kasanic chuxeʼ yaʼ. Jaʼ, roma cʼa nitzekelbej ri Ajaf, ri Colonel, chupan ri yaʼ achiʼel ri xubij. Yin vetaman cʼa chi can ja vi riʼ tok xticʼul ri Uxlabixel. Ca cʼariʼ nipe ri turusanic richin kʼakʼ y richin ri Uxlabixel. Cʼa cʼariʼ, xquixtiquir xquixchʼo pa quichʼabel ri takonaxelaʼ y xtisiqʼuij akʼanij ri icʼavomabel chire ri Lokʼolaxel richin ri Israel.

14 Man riqʼuin vi riʼ vachʼalal ri ix nucʼuʼxlan, can kitzij vi chi quereʼ xubij chuve yin ri ruchʼabel ri Cʼajolaxel: Tok tzolitajinek pe chic ri icʼuʼx chupan ri mac, y ijiquiban chic chuvech ri Tataʼixel chi nivajoʼ yeʼitakej ri nupixaʼ roma xixkasex cʼa chuxeʼ yaʼ, y icʼulun chic ri turusanic richin ri kʼakʼ y ri Uxlabixel, y yixtiquir yixchʼo pa jun cʼacʼaʼ chʼabel, can quichin takonaxelaʼ, y vi chirij pe ronojel reʼ, xquinivevaj ka, jariʼ tok janíla utz ta chive chi man ta xivetamaj nuvech.

15 Xinvacʼaxaj ri ruchʼabel ri Tataʼixel, quereʼ xubij: Can kitzij vi chi ri ruchʼabel ri Nulokʼokʼen can e kitzij vi. Ri xticochʼon cʼa pa ruqʼuisibel, jariʼ ri xticolotej.

16 Vacami cʼa vachʼalal ri ix nucʼuʼxlan, yin vetaman chi jun achin man nitiquir ta nicolotej vi man nicochʼon ta cʼa pa ruqʼuisibel, y nutzekelbej ri xucʼut can ri Rucʼajol ri cʼaslic Dios.

17 Roma cʼariʼ, tibanaʼ ri achique xinbij chive chi xintzʼet chi ri Ivajaf, ri Lokʼolej Ivelesanel, xtuben apon. Xa roma cʼariʼ, tok e cʼutun cʼa chinuvech. Xa richin nivetamaj ri oquibel achojchupan cʼo chi yixoc vi. Ri oquibel acuchi yixoc vi, ja ri tzolibel cʼuʼx y ri kasanic chuxeʼ yaʼ. Cʼa cʼariʼ nipe ri cuyubel quichin ri imac roma ri kʼakʼ y roma ri Uxlabixel.

18 Cʼa cʼariʼ, yixcʼojeʼ chupan ri chojilej bey ri chʼutiʼn ruvech, ri nibe cʼa pa ri cʼaslen jumul. Kitzij cʼa chi ix oquinek chic pa ri oquibel. Can ibanon vi achiʼel ri pixaʼ quichin ri Tataʼixel y ri Cʼajolaxel. Chukaʼ icʼulun ri Uxlabixel ri nijiquiban chiquij ri Tataʼixel y ri Cʼajolaxel. Riqʼuin cʼariʼ, xkʼajer ri sujunic ri xuben tok xubij chi can xibecʼuluʼ vi ri Uxlabixel vi xixoc ta pa ri bey.

19 Vacami, vachʼalal ri ix nucʼuʼxlan, tok ix oquinek chic pa ri chojilej bey ri chʼutiʼn ruvech, nincʼutuj cʼa chive quereʼ: ¿La xbanatej yan cami ronojel? Can ninbij vi chive chi manjani. Ix petenek cʼa vaveʼ xaxe roma ri ruchʼabel ri Cristo y ri covilej icukubabel cʼuʼx riqʼuin rijaʼ. Chukaʼ icukuban iviʼ riqʼuin ri rutzil rijaʼ ri can nitiquir vi nicolon.

20 Roma cʼariʼ tok cʼo chi yixbiyin chivech, y nijiquibaʼ ri ivánima riqʼuin ri Cristo, y can choj vi nivoyobej pan ivánima, y nivajoʼ cʼa ri Dios y conojel vinakiʼ. Cʼa cʼariʼ, vi yixbiyin chivech, y can nivetamaj vi ri ruchʼabel ri Cristo, y yixcochʼon cʼa pa ri ruqʼuisibel, jariʼ tok can kitzij vi chi quereʼ nubij ri Tataʼixel chive: Xticʼoje ri icʼaslen jumul.

21 Vacami cʼa, vachʼalal ri ix nucʼuʼxlan, can ja vi reʼ ri bey y manek chic jun ta. Man niyaʼox ta cʼa jun chic bey o jun chic biʼaj chuxeʼ ri caj achojroma ri vinek nitiquir nicolotej vi y noc cʼa pa rajavaren ri Dios. Vacami cʼa; can kitzij vi chi jareʼ ri tijonic richin ri Cristo. Xa can ja vi reʼ ri kitzij tijonic richin ri Tataʼixel y ri Cʼajolaxel y ri Uxlabixel. Rijeʼ e jun Dios, y man yeqʼuis ta. Amen.