1. Inche, Nephi, ngokwana inde igoro y’obobani boria tata akwanete, igoro ya Joseph, oria oiretwe goika Misiri.

2. Naende rigereria, nigo ekeene abanete igoro y’oroiboro rwaye. Na obobani boria arigete tibori obonge na obonene. Naende akabana igoro yaito, na igoro yengaki yaito ya bosio na ororeria rwaito; na nigo obobani obo borikire igora ase chibao chiefetha.

3. Erio ekero tata akorire gokwana igoro y’obobani bwa Joseph, akabarangeria abana ba Lamani, abamura na abaiseke baye na kobatebia ng’a: Rigereria inwe abamura na abaiseke bane, abwo more abamura na abaiseke b’omwana one omotangi, nigo nabaganeirie moigwe amang’ana ane.

4. Ekiagera Omonene Nyasae otebire ng’a: Buna morabe mokoyarenda amachiko ane imobe mokomenteka ase ense; naboigo buna motari koyarenda amachiko ane naboigo imobe mokorusigwa ase obosio bwane.

5. Korende rigereria, inwe abana abamura na abaiseke bane, tingoika kogenda ase embera goika nabatigeire ogoseseneka ase more; korende rigereria, nigo imanyete ng’a onye mokoretwa ase enchera mogwenerete kogenda timokoyetiga naende.

6. Aseigo, onye moragereirie, rigereria, nabatigeire ogoseseneka kwane ase more ng’a nario okoragererigwa korarusigwe ase more nakoiranerigwa ase emetwe ya abaibori baino.

7. Aseigo, ase engencho y’ogoseseneka kwane Omonene Nyasae takobatiga erinde monyare gosira; korende nabe n’amabera ase more na ase oroiboro rwaino kare na kare.

8. Erio ekero tata akora gokwana na abana abamura na abaiseke ba Lamani, akabatebia abamura na abaiseke ba Lemuel baretwe ase are.

9. Naende agakwana nabwe nagoteba ng’a: Rigereria, inwe abamura bane na abaiseke bane, abwe more abamura nabaiseke b’omwana one okabere; rigereria nabatigeire ogoseseneka koria nabete inkobatigera abamura nabaise ba Lamani; aseigo, timogosirigwa nonya ng’ake; korende ekero ki’omoerio oroiboro rwao ndosesenigwe.

10. Erio ekero tata akora enkwana yaye ase bare, rigereria agakwana na abana ba Ishmael, nonya nenyomba yaye boigo.

11. Erio ekero akora gokwana na barobwo, agakwana na Sam na goteba ng’a: Aye osesenigwe n’oroiboro rwao; ekiagera noyeire ense buna oyomino Nephi. Na oroiboro rwao ndobarwe noroiboro rwaye; na nigo oramobwekane momura omino, na oroiboro rwao buna oroiboro rwaye; naye nosesenigwe ase amatuko ao onsi.

12. Erio ekero tata, Lehi, akwanire ase abanto benyomba yaye, koreng’ana nebirengererio bienkoro yaye na omoika bw’Omonene oyio orenge ime yaye, goika akaba omogaka. Erio egaika engaki agokwa na agatindekwa.

13. Erio ekero amatuko aera makeigo korwa ogokwa kwaye, Lamani na Lemuel na abana ba Ishmael bakaba nobororo nainche ase engenchio obobui bw’Omonene.

14. Erio inche, Nephi, inkaba inkobetererigwa gokwana ase bare, koreng’ana nering’ana riaye, erio ingakwana amang’ana amange ase bare, naboigo tata nakwanete atarakwa; amange yenkwana yane nigo arikire igoro ase chibao chinde chiane; na emegano emenge nigo erikire ase chibao chiria chinde chiane.

15. Na igoro ase aya nabeire inkoyarika ase omoyo one, na amariko amange aria arikire ase chibao chiefetha. Omoyo one nigo ore nenchara ase amariko, na enkoro nigo eyaganetie, na koyarika ase okweorokia na ase ogokonya abana bane.

16. Rigereria, enkoro yane nigo ere nokogania na amang’ana y’Omonene; na enkoro yane nigo ere nogwechanda botambe igoro ase ebinto biria nabete inkorora na koigwa.

17. Nonya naboigo, tari ase ogotenenia obuya bw’Omonene, ase okonyorokia emeremo yaye y’ogokumia, omoyo one nigo okorera: O omonto omworo Inche inde! Enkoro yane nigo ere nobororo asengencho y’omobere one; omoyo one nigo ogechirie ase engencho y’obobe bwane.

18. Naetananirwe, ase engencho ya amatemwa na ebibe ebio bigokoreka ase obworo na kong’ira.

19. Na ekero nkogania kogoka enkoro yane yeng’ereria ase engencho y’ebibe; nonya naboigo nimanyete oyo inyegenete.

20. Nyasae one obeire omokonyi one; obeire okondaa ase oboakong’u bwane ase eroro; na kondenda igoro ase amache yechindiba chinene.

21. Ong’ichoirie nobwanchani bwaye, nonya nase ogosareka kw’omobere one.

22. Obatangire ababisa bane, nakobakora kogwa ase obosio bwane.

23. Rigereria oigure ebirero biane ase rituko eri, na ong’eire obong’aini n’okorora ase obotuko.

24. Na ase rituko ang’a chinguru ase amasabo ase are; eriogi riane inkariira igoro mono; na amaraika agacha ase inde nakweorokia ase inde.

25. Na igoro ase chimbaba chiaye chiomoika chikabogoria omobere one na koyoira are mono igoro ase ebitunwa. Na amaiso ane akarigereria ebinto ebinene na ebinene kobua biria omonto akorora; aseigo inkabiswa ng’a timbaisa kobirika.

26. O onye naende ndora ebinto ebinene kobua ebi, onye Omonene amabera ase abana bamwanyabanto are amanene, naseki enkoro yane ekorera na omoyo one gosoa ase rigoko ri’aboro, na omobere ogosira, na chinguru chiane chikoera ase engenecho yemechando yane?

27. Na ninki gekogera inkoba ase ebibe, ase engencho y’omobere one? Ninki gekogera ingosoa ase amatemwa, na ebirecha ebibe biamenyire ime ase enkoro yane na gosiria omorembe na gochanda omoyo one? Ninki gekogera inde n’obororo igoro ya ababisa bane?

28. Boka, omoyo one! Na tosoa as’ebibe naende. Goka, o enkoro yane, naende torwa ribaga ase omobisa bw’omoyo one.

29. Tibwegechia naende ase engencho ya ababisa bane. Tosiria chinguru chiane ase engencho y’emechando yane.

30. Goka, O enkoro yane, na teba ng’a: O Omonene nimbe ingogotogia kare na kare; omoyo one nogoke ase ore, aye Nyasae one, ore egetare ki’ogotoreka kwane.

31. O Omonene inee noyoborie omoyo one? Inee nonkonye korwa ase amaboko y’ababisa bane? Inee nombeke imbe ingotengechigwa ase okooroka kwebibe?

32. Tiga ebiita bia chanamu bisiekwe botambe ase inde, ase engencho enkoro yane yabunekire na omoika one ochandekire! O Omonene, nigo orasieke ebiita biobochenu bwao ase obosio bwane, erinde imbaise gotara ase chinchera chia amagoko are inse erinde imbe mamincha ime ase chinchera chindonge:

33. Omonene! Nong’etanane neganchwa y’oboikeranu bwao; O Omonene nonyare nkondoseria enchera inyare gotamera korwa ase ababisa bane! Nobe gogontangera ebigocha ase chinchera chiane! Nombekere chinchera chiane koba chindonge – – korende nobe gokorosia enchera yane, na tosieka chinchera chiane, korende chiria chiomobisa one.

34. O Omonene, negenire ase ore, na nimbe inkwegena ase ore kare na kare. Tinkobeka okwegena kwane ase amaboko y’omobere; ekiagera nimanyete ng’a oragererigwe ere oria okobeka okwegena kwaye ase omaboko y’omobere. Naboigo oragererigwe ere oyokobeka okwegena kwaye ase omonto gose gokora omobere koba amaboko aye.

35. Nimanyete ng’a Nyasae narwe amaya ase oria okoyaboria. Nyasae one nang’e, onye ngosaba takombora; aseigo nimbe inkoimokia eriogi riane igoro ase ore; nindere ase ore; aye Nyasae one, egetare ki’obochenu bwane. Rigereria, eriogi riane nditire goika igoro abwo ase ore, aye egetare kiane na Nyasae bw, obogima bwane bwa kare na kare. Amina.