Scriptures
Egetabu Gia Kabere Kia Nephi 3


Egesieri 3

Lehi ase omwana oye Joseph – – Obobani bwa Joseph ime ya Misiri – – Omobani omochorwa akabanwa – – Emeremo ya Musa – – Amariko Ya Abaibirania na Abanephi.

1. Na bono nigo ingokwana ase ore aye, Joseph, omwana one omokogoti aye oyo kwaiboreretwe ase eroro y’emechando yane; ase amatuko y’obororo bwane obonene ekero nyoko akoiborete.

2. Na tiga Omonene akoe naye ense eye, eye ere engiya mono, ekiagera ase obomenyo bwao na obomenyo bw’oroiboro rwao amo n’abamino, ase oborendi bwao kare na kare, na onye aya akoba bo goika oyarende amachiko yoria omochenu o Israel.

3. Na bono Joseph, omwana one omokogoti, oyo naruseti eroro ime ase emechando yane, tiga Omonene agosesenie kare na kare ekiagera oroiboro rwao tirogosirigwa.

4. Korende rigereria, aye nigo ore ritunda riogochandeka kwane; na nigo inde ororeria rwa Joseph oria oiretwe obosibwa ase ense ya Misiri. Na amanene naria ng’a Omonene nabwatane na Joseph.

5. Aseigo, Joseph ekeene akayarora amatuko aito. Na akanyora eira y’Omonene, ng’a korwa ase ritunda ri’echinguru chiaye Omonene Nyasae naimokie orosagia ase enyomba ya Israel; tari Massia, korende orosagia orwe rorasarigwe nonya naboigo koinyorwa ase okobwatanigwa kw’Omonene ng’a Massia na okweorokia ase bare ekero kiamatuko y’omoerio ase omoika bwechinguru, ase okoretwa kwabo korwa ase omosunte na korwa ase obosomba gocha ase obosibore.

6. Ekeene Joseph agakwana, na goteba ng’a: Omorori nigo arabe Omonene Nyasae nache, oyio orabe omobani omochorwa ase ritunda riechinguru chiane.

7. Ekeene Joseph agateba ng’a Omonene agakwana ase inde ng’a nimoimokie omobani omochore korwa ase ritunda riechinguru chiao; na naimokererigwe igoro ase egati y’eritunda ri’echinguru chiao. Na ase are nimoe ogochika ng’a abe ogokora emeremo ase ritunda riechinguru chiao, abamwabo baria Mbabe ogokonya okonene ase are, nonya nokobareta ase obong’aini bw’okobwatana koria nakorete amo nabaibori baino.

8. Na nimoe ogochika ase are okwe atakore kende, gotatiga emeremo eria indamochike. Na nimokore koba omonene ase amaiso ane naboigo nabe ogokora emeremo yane.

9. Na nigo arabe omonene buna Musa, oyio natebire ng’a nimoimokie korwa asemore, koboria abanto bane be enyomba ya Israel.

10. Na nimoimokie Musa igoro kobaboria abanto bao korwa ase ense ya Misiri.

11. Korende omobani oria indaimokie korwa ase ritunda riechinguru chiao; na asere nimoe chinguru koreta ring’ana riane ase oroiboro rw’abanto bao – – na tari okoreta ring’ana rioka, otebire Omonene, korende ase okobaonchora ase ring’ana riane, erio rirabe riaikire ase bare.

12. Aseigo, amatunda aino narike; na amatunda o Yuda narike; na amang’ana aria ararikwe namatunda yechinguru chiaino, amo naria ararikwe namatunda yechinguru chia Yuda, mbakine amo, ase ogotanga amorokererio y’oborimo na koyatiga onsi na gochaka omorembe egati ya amatunda aino, na kobareta ase obong’aini bwa abaibori babo ase amatuko agocha, naboigo ase obong’aini, bw’okobwatana, otebire Omonene.

13. Na ase obworo nakorwe omokong’u, ase rituko riria ekero emeremo yane arabe erasiarerwe egati ya abanto bane bonsi, ase okobaboria, o inwe enyomba ya Israel, otebire Omonene.

14. Naende Joseph akabana na goteba ng’a: Rigereria, omobani oyio Omonene namosesenie; na oria orarigie komoita nasarigwe; aseigo eira eye, nanyorire korwa ase Omonene, igoro y’eritunda riechinguru chiane, naikerane. Rigereria, ninde nekeene igoro y’ogoikerana kweira eye;

15. Na erieta eri ndirokwe nyuma ase inde; na ndibe rire magega ase erieta ria ise. Na nigo arabe buna inche; ase egento Omonene ararete n’amaboko aye, ase chinguru chiomonene narete abanto bane ase ogotoreka.

16. Erio Joseph akabana ng’a: Nigo inde nekeene ase omang’ana aya, buna inde nekeene ase eira ya Musa; ekiagera Omonene otebire ase inde, ng’a nindende oroiboro rwao kare na kare.

17. Na Omonene otebire ng’a: Nimoimokie Musa igoro; na nimoe chinguru chinyinge; na nimoe ekina ase amariko arikire. Naboigo tingosiria oromeme rwaye, aseigo nakwane amang’ana amange, na tinkomokora koba omonya-nguru ase ogokwana. Korende nigo indamorikere amachiko, ane, ase ebiara biamaboko ane; na nimobekere omokuani oye.

18. Na Omonene otebire boigo ng’a: Inche ninyimokie ritunda rechinguru chiao naboigo nimochorere omokwani. Na rigereria, nimotebie ng’a rika okorika kwe ritunda riechinguru chiao, ase ritunda riechungoru chiabo na omokwani bw’echinguru chiao abe okoyakwana.

19. Na amang’ana ararike goika abe amang’ana aria akorwa ase chisemi chiane gochia ase ritunda riechinguru chiao na nigo arabe buna ritunda riechinguru chiao na gokura ase bare korwa ase amaroba; ekiagera nimanyete okwegena kwabo.

20. Naboigo mbarere korwa ase amaroba; nonya nokoangama ase abamwabo, nonya nyuma ekero kiebigori ebinge biagendire ase bare. Na erio neike engaki okorera kwabo korabe gokogenda, nonya nkoreng’ana n’obwororo bwa amang’ana abo.

21. Ase engencho y’okwegena kwabo, amang’ana abo nabe akogenderera korwa ase omonwa one gochia ase abamwabo abwo bare amatunda yechinguru chiabo; na obworo bwa amang’ana abo nimbeke chinguru ase okwegena kwabo, ase okoinyora okobwatanigwa kwane koria nakorete amo na batata baino.

22. Nabono rigereria omwana one Joseph, ase engencho eye ere akabana.

23. Aseigo, ase engencho y’okobwatana oko aye gwasesenigwe; aseigo oroiboro rwabo tirogosirigwa, ekiagera imbaigwe amang’ana y’egetabu.

24. Na naimoke oyore nechinguru egati yabo, oyorakore amaya amange mono, ase amang’ana na ase amakoro, oyore ekebekerero kiamaboko a Nyasae, oyore nokwegena okonene gokora amakumia amanene, na gokora aria are amanene ase obosio bwa Nyasae, na koreta okoiranigwa kw’enyomba ya Israel, na ase oroiboro rwa abamino.

25. Bono gwasesenigwe aye Joseph. Rigererio nigo ore omoke; aseigo yaigwe amang’ana amomura omino Nephi, naboigo nakorekane ase ore koreng’ana buna nabeire ingokwana. Inyora amang’ana aiso oria okwete. Amina.