1 Ia oqo raica, oi kemudou na wekaqu lomani, au na vosa mada vei kemudou; koi au, ko Nifai, au na sega ni laiva mo dou nanuma ni dou sa yalododonu cake vei ira na kai Matanitu tani. Ia raica, kevaka dou sa sega ni muria na ivakaro ni Kalou, dou na rusa vakatalega kina; ia dou kakua ni nanuma ni ra na vakarusai sara ko ira na kai Matanitu tani ena vuku ni vosa sa tukuni oti.

2 Ia raica, au sa kaya vei kemudou ni ra sa tamata ni veiyalayalati ni Turaga ko ira kece na kai Matanitu tani era sa veivutuni; kei ira kece na Jiu era na sega ni veivutuni era na muduki tani; ni sa sega ni veiyalayalati na Turaga vata kei na dua ka vakavo ko ira era sa veivutuni ka vakabauta na Luvena, ko Koya na Yalo Savasava ni Isireli.

3 Ia oqo, au na parofisaitaka e so tale na ka me baleti ira na Jiu kei ira na kai Matanitu tani. Ni sa lako oti mai na ivola ka’u a tukuna, ka na volai vei ira na kai Matanitu tani, ka qai maroroi tale vua na Turaga, era na lewe vuqa era sa vakabauta na vosa sa volai; ka ra na qai kauta yani vei ira na ivovo ni noda kawa.

4 Ia era na qai kila na ivovo ni noda kawa na veika e baleti keda, ni da a lako tani mai Jerusalemi, ka ni da sa kawa vaka-Jiu.

5 Ia ena vunautaki vei ira na kosipeli i Jisu Karisito; o koya era na qai kila kina na kedra itukutuku na nodra qase, kei na veika e baleti Jisu Karisito ka a tu vei ira na nodra qase.

6 Ia era na qai reki; ni ra na qai kila ni sa ka ni veivakalougatataki vei ira mai na liga ni Kalou; ena tekivu me takali tani na vari ni butobuto mai matadra; ia ena sega mada ni takali yani mai vei ira e vuqa na itabatamata, ni ra na yaco me ra tamata savasava ka taleitaki.

7 Ia ena qai yaco me ra vakabauta talega na Karisito ko ira na Jiu era sa veiseyaki tu; era na tekivu me soqoni vata ena dela ni vanua; ka ra na yaco talega me tamata taleitaki ko ira kecega sa vakabauta na Karisito.

8 Ia ena qai yaco ni na tekivuna na Turaga na Kalou na nona cakacaka ena kedra maliwa na veimatanitu, veimataqali, duivosavosa, kei ira na tamata, me vakayacori kina na nodra vakalesui tale na nona tamata ena delai vuravura.

9 Ia ena dodonu ga ena lewai ira na dravudravua na Turaga na Kalou, ka veivunauci vakatautauvata ena vukudra na yalomalua e vuravura. Ia ena yaviti vuravura ena ititoko ni gusuna; kei na icegu ni tebenigusuna ena vakamatei ira kina na daucaka ca.

10 Ni na yaco vakusakusa mai na gauna me na vakavuna kina na Turaga na Kalou e dua na tawase levu vei ira na tamata, ena vakarusai ira na daucaka ca; ia ena vakabulai ira na nona tamata, io, ke na mani vakarusai ira sara kina na ivalavala ca ena bukawaqa.

11 Ena ivau ni tolona na yalododonu, ka ivau ni domona na yalodina.

12 Ena qai tiko veimaliwai na wolifa kei na lami, ka na davo vata na leopate kei na luve ni me; kei na luve ni bulumakau kei na laione gone kei na manumanu uro era na tiko vata; ka na vakatawani ira e dua na gone lailai.

13 Ena kana vata na bulumakau yalewa kei na pera; ena davo sobu vata na luvedra; ia na laione ena kania na co madu me vaka na bulumakau.

14 Ena qito mai na qara ni gata na gone dramidrami, ia na gone sa qai kali ena tabaka ena ligana na qara ni gata bati gaga.

15 Era na sega ni ia na vakacaca se vakarusa ena noqu ulunivanua tabu kecega; ni na roboti ko vuravura ena veikilai ni Turaga, me vaka sa ubia na wasawasa na wai.

16 Ia, ena vakatakilai na ka ni veimatanitu kecega; io, ena vakatakilai na veika kece vei ira na luve ni tamata.

17 Sa sega na ka e vuni tu me sega ni vakatakilai mai; sa sega na cakacaka ni butobuto me sega ni vakavotui mai ena rarama; ka sa sega ni dua na ka sa dregati e vuravura me na sega ni sereki mai.

18 O koya, ena siga ko ya ena vakatakilai kina na veika kece sa vakatakilai oti vei ira na luve ni tamata; ia ena sega kina na kaukauwa i Setani me rawa na yalodra na luve ni tamata, me yacova e dua na gauna balavu. Ia oqo, oi kemudou na wekaqu lomani, au sa tinia mada eke na noqu vosa.