Wase 9
A sa cakava e rua na iwasewase ni ivolatukutuku ko Nifai—Erau sa vakatokai me peleti i Nifai—Sa tu ena peleti lelevu na itukutuku ni veika vakavuravura; ka qarava vakatabakidua ga na veika tabu na peleti lalai. Rauta na 600–592 B.K.
1 Ia na ka kece oqo sa raica, ka rogoca, ka vosataka ko tamaqu, ni a vakaitikotiko voli ena dua na vale laca, ena buca ko Lemueli, kei na vuqa tale na ka lelevu e so, sa sega ni rawa ni volai ena peleti oqo.
2 Ia oqo, ni’u a sa vosa oti me baleta na peleti oqo, raica e sega ni peleti oqo au na vola kina na itukutuku taucoko ni veika a sa yaco vei ira na noqu tamata; ia na peleti au na vola kina na itukutuku taucoko baleti ira na noqu tamata, au sa vakatoka ena yaca Nifai; o koya, ka sa yacana kina na peleti i Nifai, ka vakatokai ki na yacaqu; ia, sa vakatokai talega na peleti oqo, me peleti i Nifai.
3 Ia, au sa vakaroti mai vua na Turaga me’u bulia na peleti oqo, ka kena inaki bibi me ceuti kina na itukutuku ni nodra veiqaravi vakalotu na noqu tamata.
4 Me ceuti ena peleti ka dua na itukutuku ni nodra gauna ni lewa na tui, kei na nodra ivalu kei na nodra veileti na noqu tamata; ia na peleti oqo sa qarava vakatabakidua ga na nodra veiqaravi vakalotu; ia, na peleti kadua sa baleta vakalevu cake na nodra gauna ni lewa na tui kei na nodra ivalu kei na nodra veileti na noqu tamata.
5 O koya, sa vakaroti au kina na Turaga me’u bulia na peleti oqo ena nona inaki vuku, ia na inaki oqori au sa sega ni kila.
6 Ia na Turaga sa kila na ka kecega mai na ivakatekivu; o koya, sa vakarautaka kina na sala me rawata kina na nona cakacaka ena kedra maliwa na luve ni tamata; ka raica, sa tu vua na kaukauwa kecega me vakayacora kina na nona vosa kece. Ka sa vakakina. Emeni.