Capitulo 5
Sariah cu taquiʼc u pól Lehi. Le caʼatúloʼoboʼcu quiʼmaʼcchahal u yóloʼob úchic u sut u palaloʼob. Baʼaxoʼob dzíbtaan yókol le laminaoʼob mentaan yétel bronceoʼ. Lehieʼ huntúl u palal u palaloʼob Jose. Beyxan Labaneʼletiʼxan huntúl u palal u palaloob Jose. U taniloʼob Lehi yoʼolal le baʼax bín úchucoʼ.
1 Cu dzoʼocol tún c xímbal ich kax tac teʼ tuʼux yan c tataoʼ, heʼel túnaʼ hach quiʼmaʼcchah u yól beyxann in maʼmaʼ Sariah h quiʼmaʼcchah u yól tumen hach tu hahileʼ dzoʼoc u sén okol t oʼolal.
2 Tumen tu tuclaheʼ h químoʼon teʼ kaxoʼ yétel dzoʼoc xan u sén taquiʼc u pól in tata tán u yaʼalic tiʼ de que chén cu yilic baʼal ích u tuculoʼob tán u yaʼalic tiʼ: Tech ta hóksoʼon teʼ t luʼum dzaʼan toʼon tumen c tataoʼoboʼ yételeʼ behlaʼeʼ minaʼan in palal, toʼon xaneʼ ich kax bín químicoʼonoʼ.
3 Bey tún úchic in maʼmaʼ u taquiʼc u pól in tataoʼ.
4 In tataeʼ tu núcah tiʼ tán u yaʼalic: In woheʼl huntúlen maʼc cu yilic visionoʼob, tumen wá maʼ úchic in wilic u baʼaliloʼob Hahal Dios tiʼ humpʼél visioneʼ, behlaʼ maʼ tán caʼach in kahóltiʼc u yutsil Yumtsileʼ, yétel dzoʼoc xan caʼach in pʼátal Jerusalen yétel in sucuʼunoʼob ca químiquen yételoʼob teʼeloʼ.
5 Baʼaleʼ heʼel túnaʼ dzoʼoc u dzaʼabal ten humpʼél luʼum prometertaan ten, yételeʼ cu quiʼmaʼcchahac in wól tiʼ le baʼaloʼobaʼ; beyoʼ, teneʼ in woheʼl Yumtsileʼ bín u canánt in palal tu kab Laban ca u bet u sutoʼob tiʼcnal wáy h kaxaʼ.
6 Yétel tún le tʼanoʼobaʼ, in tata Lehieʼ tu quiʼmaʼccunsah u yól in maʼmaʼ t oʼolal caʼaliquiʼl tán c bin ich kax tac Jerusalen tu yoʼolal ca c chʼaʼ le u dzíbtaan tsicbaIil le Judioʼoboʼ.
7 Le tún cah sunahoʼon teʼ tu nahil in tata le mentaan yétel nokoʼ, hach quiʼmaʼcchah u yóloʼob, beyxann in maʼmaʼ quiʼmaʼcchah u yól.
8 Ca tún h tʼanah in maʼmaʼ tán u yaʼalic: Behlaʼ hach in woheʼl Yumtsil u yaʼalmaʼh tiʼ in wícham ca hókoc wáy h kaxaʼ, beyoʼ, hach in woheʼl xaneʼ dzoʼoc u canántiʼc in palal, dzoʼoc u luʼsicoʼob tu kab Laban yétel dzoʼoc u dzaic páhtalil tiʼoʼob ca u betoʼob baʼax h aʼalaʼab tiʼoʼob. Bey úchic u tʼan in Mamaʼoʼ.
9 Tu yoʼolal u hach quiʼmaʼquiʼl u yóloʼobeʼ ca tu betahoʼob sacrificio tiʼ Yumtsil tán u dzaicoʼob diosboʼotiʼc tiʼ u Hahal Diosil Israel.
10 Cu dzoʼocol u dzaicoʼob diosboʼotiʼc tiʼ u Hahal Diosil Israeleʼ in tata Lehieʼ ca tu chʼaʼah le tsicbaloʼoboʼ le dzíbtaan teʼ laminaoʼob mentaan yétel bronceoʼ ca tu xocah desde u cáhal.
11 Ca tún tu yilah tiʼ yan le u cinco libroiloʼob Moisesoʼ, leloʼobaʼ cu tsolicoʼob bix mentaabic yókolcab, beyxann u cuxtaliʼl Adan yétel Eva, c yáx tataoʼob.
12 Beyxan tsicbalil bix cuxlahic le Judioʼoboʼ cáhiʼc hach tu yáx parteil tac tu cáhal u betiʼc u nohchilil Zedequiʼas u reyil Juda.
13 Beyxan u tʼaniloʼob le hahil profetaoʼoboʼ, tu yáx chun tac u cáhal u nohchilil Zedequiʼas yétel yaʼab tiʼ u tʼaniloʼob le profeta Jeremiasoʼ.
14 Tu yókol xan le laminaoʼob mentaan yétel bronceaʼ, in tataeʼ tu yilah u tsoʼolol u síhil u palal u úchben tataoʼob tu yoʼolaleʼ tu yoheltaheʼ tu familiail Jose u tal, beyoʼ, Joseeʼ u pal Jacob, le maʼx h coʼon ich Egiptoeʼ, letiʼ le maʼx canántaan tumen u kab Yumtsil tu yoʼolal u páhtal u tséntiʼc u tata, Jacob, yétel tulácal u nahil.
15 H luʼsaʼaboʼob xan tu esclavoiʼloʼob yétel hóksaʼoʼob ich Egipto tumen Hahal Dios le maʼx canántiʼcoʼob.
16 Bey úchic u caxtiʼc Lehi, in tata, u tsoʼolol u familiail u palal u úchben tataoʼob. Laban xaneʼ tiʼ u palal u palaloʼob Jose u tal caʼachiʼ, tu yoʼolal túneʼ letiʼ yétel u tataoʼobeʼ u taacmaʼhoʼob caʼach le dzíbtaan tsicbaloʼ.
17 In tata tún le ca tu yilah tulácal le baʼaloʼobaʼ, h chuʼup yétel le Pixanoʼ ca hoʼopʼ u yaʼalic le baʼax bín úchuc tu palal cu síhil tiʼ u palal letiʼ.
18 Tán u yaʼaliqueʼ le laminaoʼoboʼ le mentaan yétel bronceoʼ bin xiʼic tiʼ tulácal; cahoʼob, maʼcoʼob, tʼanoʼob yétel meheʼn cahal tiʼ u palal u palaloʼob letiʼ.
19 Le betiʼc túneʼ tu yaʼalaheʼ le laminaoʼoboʼ maʼ bín xuʼuluc mix bikiniʼ mix bín páhchahac u luksaʼal u lémbalil tu yoʼolal u maʼn yaʼab kin. Ca tún tu yaʼalah hach hah yaʼabach baʼaloʼob tu yoʼolal u palal u palaloʼob.
20 Tac tiʼ le kinoʼob heʼeloʼobaʼ in tata yétel teneʼ c betmaʼh u tʼan Yumtsil u dzamaʼh toʼonoʼ.
21 Dzoʼoc tún c chʼaʼic le úchben tsicbal tu yaʼalah toʼon Yumtsiloʼ ca t sén xocah tu beleʼ ca t ilaheʼ hach kabét toʼon, beyoʼ hach coʼocoʼoh baʼal c tiaʼal toʼon tumen beyoʼ heʼel u páhtal c taaquiʼc u tʼanoʼob Yumtsil utiaʼal c palaloʼobeʼ.
22 Le betiʼc túneʼ tu naʼatiʼl Hahal Dioseʼ t bisah t étel caʼaliquiʼl tán c bin ich kax tac tiʼ le luʼum prometertaan toʼonoʼ.