1 Ca tún h tʼanaheʼn tiʼn sucuʼunoʼobeʼ ca tiʼn wáʼalah tiʼoʼob: Coʼoneʼex sut Jerusalen, coʼox dzic c ól utiaʼal c betiʼqueʼex u tʼan Yumtsil, tumen Letiʼeʼ maʼs yan u páhtahil tiʼ tulácal yókolcab. Beyoʼ maʼ wá yan u páhtalil tiʼ maʼs que tiʼ Laban yétel u cincuenta maʼquiʼloʼob yan tiʼ wá u diez u milil?

2 Coʼoneʼex túneʼ, ca anchahac c muk bey heʼebix Moiseseʼ, tumen letiʼeʼ, tu hahileʼ tu tʼanah u haʼil Mar Rojoeʼ ca tu hatsuba tu xnoʼoh yétel tu xdzíc cah maʼn c tataoʼobeʼ maʼ h baʼatel maʼc Faraoneʼ tán caʼach u chʼaʼapachtiʼcoʼobeʼ cah láh buʼuloʼob tiʼ Mar Rojooʼ.

3 Bey túnoʼ, teʼexeʼ hach a woheʼleʼex tu hahil le baʼaloʼobaʼ, a woheʼleʼex xan huntúl angel dzoʼoc u tʼaniqueʼex; bix tún u caʼapʼelchahal a wóleʼex? Coʼoneʼexiʼ tumen Yumtsileʼ heʼel u páhtal u yántiʼcoʼon heʼebix tu yántah c tataoʼobeʼ yétel heʼel u páhtal u xuʼulsic Laban heʼebix tu betah yételle Egiptoiloʼobeʼ.

4 Cu dzoʼocol in wáʼalic tiʼoʼob lelaʼ, cah kuxilnahoʼobeʼ lailiʼ u bin u mucul tʼanoʼobeʼ, baʼaleʼ h taloʼob tiʼn pach tac h kuchoʼon tu caʼanal pakil Jerusalen.

5 Dzoʼoc u yákabtal, ca tiʼn betah u taaquiʼcubaoʼob tu pach le pakoʼ. Cu dzoʼocol u taaquiʼcubaoʼobeʼ, ten Nefieneʼ, h oquen ichil le noh cahoʼ cah binen tu yotoch Laban.

6 Teneʼ tán tún in bineʼ tán in bin heʼebix u yaʼalaʼal ten tumen le Pixanoʼ, mix in woheʼleʼ baʼax u deber in betiʼc.

7 Quex beyoʼ h binen, le tún cah nadzen tu yotoch Labaneʼ tiʼn wilah huntúl maʼc lúbaʼan luʼum tánil tiʼ ten tumen calaʼan.

8 Le ca tiʼn nadzinbaeʼ ca tiʼn wilaheʼ le maʼcoʼ letiʼ Laban.

9 Le tún ca tiʼn wilah u tadz maʼscabileʼ ca tiʼn hóksah tu píx. Ca tún tiʼn wilaheʼ u chun le tádz maʼscaboʼ mentaan yétel oro, hach sén maʼalob betaabicoʼ, le xan u tadz maʼscabiloʼ mentaan yétel hach maʼalob ácero.

10 Le Pixanoʼ ca tu yaʼalah ten ca in quíns Laban; baʼaleʼ ca tiʼn tucultah tiʼn pucsiʼkaleʼ: Mix huntén in wec u kiʼikel maʼc. Ca hoʼopʼ in quiʼquiʼlanquiʼleʼ maʼ tiʼn wóltah in quínsiquiʼ.

11 Catu caʼa tʼanaheʼn le Pixanoʼ ca tu yaʼalah ten: Heʼel túnaʼ Yumtsileʼ dzoʼoc u kubic ta kab. Teneʼ in woheʼl xan, yáxeʼ letiʼ tu yóltah u quínsen, yételeʼ maʼ u kát caʼach u yuʼub u tʼan Yumtsiliʼ; yételeʼ dzoʼoc xan u chʼaʼic c ayikaliloʼob.

12 Ca tu caʼa aʼalah ten le Pixanoʼ: Quínseʼ tumen Yumtsil dzoʼoc u kubic ta kab.

13 Heʼel túnaʼ Yumtsileʼ cu xuʼulsic kakas maʼcoʼob tu yoʼolal u dzoʼocsaʼal baʼaxoʼob hach tohtac u tuculmaʼh. Mas maʼalob ca químil chén huntúl maʼc mu láh kascuntiʼc tulácal u maʼquiʼloʼob humpʼél cah yétel ca xuʼulsaʼacoʼob bey maʼ yoheʼloʼob le hahiloʼ.

14 Le tún ca tiʼn wuʼuyah lelaʼ, ten Nefieneʼ, h kaʼah ten le baʼax u yaʼalmaʼh Yumtsil teʼ kaxoʼ, le tʼanoʼob heʼeloʼobaʼ: Wá tumen a palal le bín síhicoʼoboʼ cu betiʼcoʼob in tʼanoʼobeʼ bín anac yaʼab baʼaloʼob tiʼoʼob teʼ luʼum in wáʼalmaʼh bín dzaʼabac tiʼoʼob.

15 Beyoʼ, ca tiʼn tuclah xaneʼ maʼ bín páhchac u betiʼcoʼob u tʼan Yumtsil heʼebix aʼalaʼan tu leyil Moiseseʼ wá minaʼan tiʼoʼob le dzíbtaan leyoʼ.

16 In woheʼl xaneʼ le leyoʼ tiʼ yan dzíbtaan tu yókol le laminaoʼob mentaan yétel bronceoʼ.

17 Ulak baʼax xaneʼ tiʼn naʼatah Yumtsil dzoʼoc u kubic Laman tiʼn kab tu yoʼolal u páhtal u yantal ten le dzíbtaan tsicbaloʼ, heʼebix u yaʼalmaʼhileʼ.

18 Le betiʼc túneʼ tu yoʼolal in wuʼuyic u tʼan le Pixanoʼ ca tiʼn chʼah Laman tu tsoʼotsel u poleʼ, ca tiʼn lah chʼacah u cal yétel u tadz maʼscabil.

19 Cu dzoʼocol in chʼacah u pól yétel u maʼscabileʼ, ca tiʼn búquiʼntiʼnba yétel u nokil Laban, cu dzoʼocol in búquiʼntiʼc tulácaleʼ ca tiʼn dzah tiʼn wókol u yétel armaʼdurail.

20 Le cah dzoʼoc in betiʼc tulácal lelaʼ cah binen teʼ cúchil tuʼux cu taaquiʼc u tesoro Laban. Le cah nádzeneʼ ca tiʼn wilaheʼ tiʼ yan u meyhuloʼob maʼquiʼl Laban teʼ cúchiloʼ letiʼ calántiʼc u yaveil le tesorooʼ. Ca tún h tʼanaheʼn bey heʼebix u dzuliloʼ, ca tiʼn wáʼalah tiʼ ca talac tiʼn pach ca xiʼicoʼon teʼ cúchil tuʼux yan le tesorooʼ.

21 Letiʼeʼ tu tucultaheʼ u dzulilen tumen tu yilah le nok in búquiʼntmaʼhoʼ yétel le tadz maʼscab in kaxmaʼh tiʼn nakoʼ.

22 Ca hoʼopʼ u tʼan tiʼn wétel tu yoʼolal le Judioʼoboʼ tumen u yoheʼl Laban, u dzulileʼ, tiʼ yan yételoʼob ich el ákaboʼ.

23 Cah tʼanaheʼn yételeʼ tán in betiʼc beyen Labaneʼ.

24 Ca tiʼn wáʼalah tiʼ xaneʼ kabét ca in bis tiʼ in sucuʼunoʼob yanoʼob teʼ tu pach u caʼanal pakil le noh cahoʼ, tulácal le baʼax dzíbtaanoʼob yókol le laminaoʼob mentaan yétel bronceoʼ.

25 Tiʼn wáʼalah tiʼ xan ca talac tiʼn pach.

26 Letiʼeʼ hach tu tuclaheʼ tán in tʼan tu yoʼolal sucuʼunoʼob teʼ iglesiaoʼ, yétel hach tu tuclah tu hahil teneʼ Labanen, le maʼx maʼ sám in quínseʼ, cah tal tiʼn pach.

27 Yaʼab u ténel h tʼanah tiʼn wétel tu yoʼolal u ancianoiloʼob le Judioʼoboʼ, caʼaliquiʼleʼ teneʼ tán caʼach in bin xímbalil tu tohil tuʼux yan in sucuʼunoʼob tu pachil u caʼanal pakil le cahoʼ.

28 Le tún ca tu yilaheʼn Lamaneʼ haʼak yól, beyxann Lemuel yétel Sam; cah hók yálcaboʼob tiʼn tán tumen tu tuclahoʼobeʼ Labanen yételwá dzoʼoc u quínsiqueneʼ tán u tal quínsicoʼob xan letiʼoʼob.

29 Ca tun tiʼn tʼanahoʼob, le ca tu yuʼubahoʼob in tʼaneʼ cah xuʼul u yálcaboʼob tiʼn tán.

30 Le tún u meyhuloʼob Laban ca tu yilah in sucuʼunoʼoboʼ cah hoʼopʼ u quiʼquiʼlanquiʼl yétel hach taitac u yálcab tu cahal Jerusalen.

31 Ten Nefieneʼ caʼanal in baquel yétel tumen tiʼn sén kamaʼh muk tiʼ Yumtsileʼ ca tiʼn chʼah u esclavoiʼl Labaneʼ maʼ tiʼn chaʼah u púdzuliʼ.

32 Ca tún tiʼn wáʼalah tiʼeʼ wá tumen u yuʼub in tʼaneʼ teneʼ quiʼn wáʼalic tiʼ tu yoʼolal Yumtsil yétel tu yoʼolal in cuxtaleʼ maʼ bin c quínsiquiʼ.

33 Ca tiʼn tʼanah in hach hah tʼan tiʼeʼ, ca tiʼn wáʼalah tiʼeʼ maʼ u chʼaʼic sahaquiʼl; wá letiʼ cu tal t pach teʼ kaxoʼ bin pʼátac beyoʼoneʼ maʼ esclavoiʼ.

34 Tiʼn wáʼalah tiʼ xaneʼ: Tu hahileʼ Yumtsil u yaʼalmaʼh toʼon ca c bet beyaʼ, maʼ wá u deber c dzaic c ól utiaʼal c betiʼc u tʼan Yumtsiliʼ? Le betiʼc túneʼ wá a kát bin ich kax yétel in tataoʼ yan cúchil atiaʼal ichiloʼon.

35 Zoram túneʼ, bey u kabaʼ le maʼc esclavooʼ, hach sén tiʼn dzah ól tiʼ hach tu dzah u yól u betiʼqueʼ ca tu yuʼubah baʼax tiʼn wáʼalah tiʼ, ca tu yaʼalah tu hahileʼ heʼel u bin ich kax tuʼux yan in tataoʼ. Ca tu yaʼalah u hahil tʼan tiʼ toʼoneʼ heʼel u pʼátal ichiloʼoneʼ.

36 Toʼoneʼ c kát ca pʼátac ichiloʼon tumen beyaʼ le Judioʼoboʼ maʼ tu páhtal u yoheltiʼcoʼob bix púdzicoʼon ich kax yétel xaneʼ, beyoʼ maʼ tu páhtal chʼaʼapachtiʼcoʼonoʼb ca u quínsoʼonoʼob.

37 Le tún cah dzoʼoc u yaʼalic toʼon u hahil tʼan Zorameʼ cah háw c sahquiʼl tu yoʼolal letiʼ.

38 Ca tún h binoʼon ich kax yétel le laminaoʼob mentaan yétel bronceoʼ beyxann Zoram u meyah maʼquiʼl Laban, cah binoʼon tu nahil in tata le mentaan yétel nokoʼ.