1 Totoo nanggad, na uminagi an panahon na an Kagurangnan nagsabi sa sakuyang ama, iyo, maski sa sarong pangaturogan, asin sinabi sa saiya: Paladan ka Lehi, huli sa manga bagay na saimong ginibo; asin huli ta nagi kang maimbod asin ibinalangibog sa manga tawo na ini an manga bagay na sakuyang ipinagboot saimo, totoo, saindang minamawot na halian ka nin buhay.

2 Asin ta uminagi an panahon na an Kagurangnan nagboot sa sakuyang ama, maski sa sarong pangaturogan, na ipag-iba niya an saiyang pamilia asin magpasiring sa kadlagan.

3 Asin ta uminagi an panahon na masinunod siya sa tataramon kan Kagurangnan, kaya saiyang ginibo siring sa ipinagboot kan Kagurangnan.

4 Asin ta uminagi an panahon na siya nagpasiring sa kadlagan. Asin ta saiyang binayaan an saiyang harong, asin an saiyang dagang pinanunod, asin an saiyang bulawan, asin an saiyang plata, asin an saiyang manga mahalagang pagsadiri, asin ta dai siya nagdara nin ano pa man, kundi an saiyang pamilia, asin manga pagkabuhay, asin manga tolda, asin ta nagpasiring sa kadlagan.

5 Asin ta siya uminagi sa gilid na harani sa baybayon kan Pulang Dagat; asin ta siya naglakaw sa kadlagan na nasa gilid na orog na harani sa Pulang Dagat; asin ta siya naglakaw sa kadlagan na kairiba an saiyang pamilia, na iyo an sakuyang ina, na si Sariah, asin an sakuyang manga matuang tugang na lalaki, na sinda Laman, Lemuel, asin Sam.

6 Asin ta uminagi an panahon na kan makatulong aldaw na siyang naglalakaw sa kadlagan, siya nagpatindog kan saiyang tolda sa kapatagan sa gilid nin salog nin tubig.

7 Asin ta uminagi an panahon na siya nagtugdok nin altar na manga gapo, asin ta siya nagdulot nin sarong atang sa Kagurangnan, asin ta nagpasalamat sa Kagurangnan na satuyang Dios.

8 Asin ta uminagi an panahon na saiyang pinangaranan an salog na Laman na nagbubulos pasiring sa Pulang Dagat; asin an kapatagan na nasa gilid harani sa bukana kaidto.

9 Asin kan mahiling kan sakuyang ama na an salog nagbubulos sa burabod kan Pulang Dagat, siya nagtaram ki Laman, an sabi: O magi ka man lugod siring sa salog na ini, na danay na nagbubulos pasiring sa burabod nin gabos na katanusan!

10 Asin ta nagtaram man siya ki Lemuel: O magi ka man lugod siring sa kapatagan, na matibay asin dai natatanyog, asin dai nahihiro sa pagsunod sa manga tugon kan Kagurangnan!

11 Ngonian siya nagtaram kaini huli sa pagkasutil ni Laman asin Lemuel; huli ta sinda nagpaparangurob-ngurob sa kadakol na manga bagay na tumang sa saindang ama, huli ta siya nakakahiling sa saiyang isip, asin ta iniriba sinda paluwas sa daga kan Jerusalem, na binayaan an saindang dagang pinanunod, asin an saindang bulawan, asin an saindang plata, asin an saindang manga mahahalagang bagay, tanganing mapara sana sa kadlagan. Asin ini saindang sinabi na ginibo ini huli sa kabuahan na huna-huna kan saiyang puso.

12 Asin ta siring si Laman asin si Lemuel, bilang manga matua, nagparangurob-ngurob tumang sa saindang ama. Asin nagparangurob-ngurob sinda huli ta sinda dai nakaaram sa agi-agi kan Dios na idto na naglalang sa sainda.

13 Ni sinda nagtutubod na an Jerusalem, an bantog na siudad, marurumpag susog sa manga tataramon kan manga propeta. Asin ta sinda siring sa manga Judio na nasa Jerusalem, na naghuhuroma na halian nin buhay an sakuyang ama.

14 Asin ta uminagi an panahon na an sakuyang ama nagtaram sa sainda duman sa kapatagan kan Lemuel, na may kapangyarihan, ta pano siya kan Espiritu, sagkod na an saindang manga hawak nagtarakig sa atubangan niya. Asin ta saiyang rinilibong sinda na sinda dai na nakasimbag na tumang sa saiya; kaya, nagsunod sinda sa ano man na saiyang ipinagboot sa sainda.

15 Asin ta an sakuyang ama nag-erok sa sarong tolda.

16 Asin ta uminagi an panahon na ako, si Nephi, aki pang gayo, alagad dakula an hawak, asin igwa nin dakulang pagmawot na maaraman an manga tagong hilom kan Dios, kaya, ako nag-apod sa Kagurangnan; asin nangyari na dinalaw niya ako, asin pinalumoy an sakuyang puso kaya nagtubod ako sa gabos na tataramon na tinaram kan sakuyang ama; kaya, dai ako nagtumang sa saiya siring kan sakuyang manga matuang tugang na lalaki.

17 Asin ta ako nagsabi ki Sam, pinabatid ko saiya an manga bagay na pinamati sa sakuya kan Kagurangnan sa paagi kan saiyang Banal na Espiritu. Asin ta nangyari na siya nagtubod sa sakuyang manga tataramon.

18 Alagad, uya si Laman asin si Lemuel habong magdarangog sa sakuyang manga tataramon; asin huli ta namundo huli sa katagasan kan saindang manga puso ipinamibi ko sinda sa Kagurangnan.

19 Asin ta uminagi an panahon na an Kagurangnan nagtaram sa sakuya, na an sinabi: Paladan ka, Nephi, huli sa saimong pagtubod, huli ta hinanap mo ako, na igwa nin pagpapakumbaba sa puso.

20 Asin sagkod na ika nagsusunod sa sakuyang manga tugon, ika mauswag, asin ta ika dadarahon sa dagang ipinangako; iyo, an daga na sakuyang inandam para sa saimo; iyo, an daga na pinili orog sa gabos na ibang manga daga.

21 Asin sagkod na an saimong manga tugang magsusuklit sa saimo, sinda hahalion sa atubangan kan Kagurangnan.

22 Asin sagkod na ika nagsusunod sa sakuyang manga tugon, ika gigibohon kong pamayo asin paratukdo kan saimong manga tugang.

23 Alagad, sa aldaw na sinda magtumang sa sakuya, isusumpa ko sinda nin makuring sumpa, asin ta sinda mahahalian nin kapangyarihan sa saimong manga bunga apuera na kun sinda magturumang man sa sakuya.

24 Asin ta kun mangyari na sinda magturumang sa sakuya, sinda magiging pasakit sa saimong manga ibubunga, na pangpukaw sa sainda sa pagrumdom.