1 Asin ta ngonian uminagi an panahon na pagkatapos, na ako, si Nephi, makatapos kan sakuyang pagtaram sa sakuyang manga tugang, totoo sinda nagsabi sa sakuya: An saimong pinagsasabi samuya magagabat na manga bagay, na orog pa sa matitios niamo.

2 Asin ta uminagi an panahon na ako nagsabi sa sainda na aram ko na ako nagtaram nin magagabat na manga bagay na laban sa masusumbikal, susog sa katotoohan; asin an manga matatanos sakuyang sinurog, asin nagpatotoo na sinda mapapaitaas sa huring aldaw; kaya an manga makasalan inaako na an katotoohan magabat, huli ta ini minalugad sa sainda sagkod sa kairaroman.

3 Asin ngonian sakuyang manga katugangan, kun kamo naging matanos asin binoot na magdangog sa katotoohan, asin hinimati nindo idto, tanganing makapaglakaw kamo na matanos sa atubangan kan Dios, dangan dai kuta kamo magngururob-ngurob huli sa katotoohan, asin magsabi: Ika nagtataram nin magagabat na manga bagay laban samuya.

4 Asin ta uminagi an panahon na ako, si Nephi, sinadol an sakuyang manga tugang, sa orog na paghinguha, na magsunod sa manga tugon nin Kagurangnan.

5 Asin ta uminagi an panahon na sinda nagpakumbaba sa atubangan kan Kagurangnan; sagkod na naogma ako asin nagkaigwa nin dakulang paglaom sa sainda, na sinda maglalakaw na sa manga dalan nin katanusan.

6 Ngonian, an gabos na manga bagay na ini sinabi asin ginibo kan sakuyang ama, mantang nag-eerok sa tolda sa kapatagan na saiyang inapod na Lemuel.

7 Asin ta uminagi an panahon na ako si Nephi, inagom ko an saro kan manga aking babae ni Ismael; asin an manga tugang kong lalaki inagom man an ibang manga aking babae ni Ismael; asin man si Zoram inagom an pinakamatuang aking babae ni Ismael.

8 Asin sa paaging ini nautob kan sakuyang ama an gabos na pinagboot saiya kan Kagurangnan. Asin man ako, si Nephi, biniyayaan nin labi-labi kan Kagurangnan.

9 Asin ta uminagi an panahon na an tingog kan Kagurangnan nagtaram sa sakuyang ama sa banggi, asin ta pinagbotan siya na sa kinaagahan magpadagos siya sa paglakaw sa kadlagan.

10 Asin ta uminagi an panahon na kan pagbangon kan sakuyang ama sa pagkaaga, asin nagpasiring sa pintoan kan tolda, sa saiyang dakulang pagngalas siya nakahiling sa daga nin bilog na bola na napapalaen an pagkagibo; asin idto gibo sa malinigon na tanso. Asin sa laog kan bola igwang duwang puntero; asin an saro nagtuturo sa dalan kun sain kami kaipuhan magduman sa kadlagan.

11 Asin ta uminagi an panahon na tiniripon niamo an gabos na manga bagay na kaipuhan na darahon sa kadlagan, asin gabos na tada kan pagkabuhay na itinao kan Kagurangnan samuya; asin ta nagdara kami nin palaen-laen na pisog na samuyang madadara sa kadlagan.

12 Asin ta uminagi an panahon na samuyang dinara na an samuyang manga tolda asin ta huminali na kami sa kadlagan, pasiring sa ibong kan salog na Laman.

13 Asin ta uminagi an panahon na kami nagralakaw sa laog nin apat na aldaw, na garo pasiring sa gawing sur-sirangan, asin samuya na itinurugdok giraray an samuyang manga tolda; asin ta samuyang inapod an lugar na Shazer.

14 Asin ta uminagi an panahon na samuyang dinara an samuyang manga busog asin manga pana, asin ta nagduman kami sa kadlagan tanganing mangdakop nin manga hayop na makakakan kan samuyang manga pamilia; pagkatapos na makapangdakop kami nin manga hayop na makakakan kan samuyang manga pamilia nagbalik giraray kami sa samuyang manga pamilia sa kadlagan, sa lugar na Shazer. Asin nagduruman giraray kami sa kadlagan, sinunod an dating direksiyon, na dai nagrarayo sa pinakamataba na kabtang kan kadlagan, na harani sa gilid kan Pulang Dagat.

15 Asin ta uminagi an panahon na kami nagralakaw sa laog nin dakol na manga aldaw, nagkukua nin pagkakan sa dalan sa paagi kan samuyang manga busog, asin samuyang manga pana asin samuyang manga gapo asin samuyang manga lagpitaw.

16 Asin ta samuyang sinusunod an pinasunod kan bola, na nagdara samuya sa orog na mataba na daga kan kadlagan.

17 Pagkatapos na kami magralakaw sa laog nin dakol na manga aldaw, kami nagpatirindog kan samuyang manga tolda sa laog nin halipot na panahon, tanganing kami makapahingalo asin maghanap naman nin manga pagkakan kan samuyang manga pamilia.

18 Asin ta uminagi an panahon na kan ako, si Nephi, naglakaw ta mahanap nin pagkakan, nabari ko an sakuyang busog, na gibo sa malinigon na asero; asin kan mabari an sakuyang busog; nangyari, nagkaaranggot an sakuyang manga tugang sa sakuya huli sa pagkawara kan sakuyang busog, huli ta dai na kami nakakua nin pagkakan.

19 Asin ta uminagi an panahon na kami nagbaralik na daing pagkakan sa samuyang manga pamilia, asin huli ta pagal nang gayo sa pagparalakaw, nagtios sinda sa kakulangan nin pagkakan.

20 Asin ta uminagi an panahon na si Laman asin si Lemuel asin an manga aking lalaki ni Ismael nagpoon na magngururob-ngurob nin labi-labi huli sa saindang pagtios asin sa manga kasakitan sa kadlagan; asin man an sakuyang ama nagpoon na magngurob-ngurob tumang sa Kagurangnan niyang Dios; iyo, asin sinda gabos nagmurundo nin labi-labi, sagkod na sinda nagngururob-ngurob tumang sa Kagurangnan.

21 Ngonian uminagi an panahon na ako, si Nephi, pinapagtios kan sakuyang manga tugang huli sa pagkabari kan sakuyang busog, asin sa pagkawara kan gobtik kan saindang manga busog, kaya orog na nagkagarabatan na kami, iyo, sagkod sa dai na kami nakakua nin pagkakan.

22 Asin ta uminagi an panahon na ako, si Nephi, nagparataram sa sakuyang manga tugang, huli ta pinataragas giraray ninda an saindang manga puso, sagkod sa pag-aragrangay tumang sa Kagurangnan nindang Dios.

23 Asin ta uminagi an panahon na ako, si Nephi, naggibo nin pana sa kahoy asin busog, sa matildong na bala; kaya, nagkaigwa ako nin busog asin pana asin lagpitaw asin manga gapo. Asin nagsabi ako sa sakuyang ama: Sain ako maduman na makakua nin pagkakan?

24 Asin ta uminagi an panahon na siya naghapot sa Kagurangnan, huli ta nagpakurumbaba na sinda huli sa manga tataramon ko; huli ta dakol na manga bagay an itinaram ko sa sainda sa kakusogan kan sakuyang kalag.

25 Asin ta uminagi an panahon na an tingog kan Kagurangnan uminabot sa sakuyang ama; asin ta totoong gayo na inanggotan siya huli sa saiyang pagparangurob-ngurob tumang sa Kagurangnan, sagkod na uminabot siya sa labi-labing pagmundo.

26 Asin ta uminagi an panahon na an tingog kan Kagurangnan nagsabi sa saiya: Hilinga an bola, asin hilinga an manga bagay na nakasurat.

27 Asin ta uminagi an panahon na kan mahiling kan sakuyang ama an manga bagay na nakasurat sa bola, natakot siya asin tinakigan na gayo, asin man an manga tugang ko asin an manga aking lalaki ni Ismael asin an samuyang manga agom.

28 Asin ta uminagi an panahon na ako, si Nephi, nahiling an manga puntero na nasa bola, na an manga idto naghihiro susog sa samuyang pagtubod asin pagkamaigot asin pagsunod na samuyang itinao duman.

29 Asin ta igwa man duman na nakasurat na bagong surat, na malinaw basahon, na nagtao samuya nin pasabot manunungod kan manga paagi kan Kagurangnan; asin idto nakasurat asin binabago paminsan-minsan; susog sa samuyang pagtubod asin pagkamaigot na samuyang itinao duman. Asin ta satuyang mahihiling na sa sadit na manga paagi an Kagurangnan nakakagibo nin darakulang bagay.

30 Asin ta uminagi an panahon na ako, si Nephi, nagtukad sa tuktok kan bulod, susog sa pasunod na itinao kan bola.

31 Asin ta uminagi an panahon na ako nakagadan nin manga lalaw na hayop sagkod sa nakakua ako nin pagkakan para sa samuyang manga pamilia.

32 Asin ta uminagi an panahon na nagbalik na ako sa samuyang manga tolda, dara-dara an manga hayop na sakuyang nagadan; asin ta kan mahiling ninda na nakakua ako nin manga pagkakan, dakulang gayo an saindang kaogmahan! Asin ta uminagi an panahon na nagpakurumbaba sinda sa atubangan kan Kagurangnan asin nagtao nin pasalamat sa saiya.

33 Asin ta uminagi an panahon na samuyang pinadagos giraray an samuyang pagralakaw, nagralakaw sa dalan na siring kan samuyang pagpoon; asin pagkatapos kan samuyang pagralakaw sa laog nin dakol na manga aldaw nagturugdok giraray kami kan samuyang manga tolda, tanganing mag-erok kami duman sa laog nin halipot na panahon.

34 Asin ta uminagi an panahon na si Ismael nagadan, asin ta ilinubong sa lugar na inaapod na Nahom.

35 Asin ta uminagi an panahon na an manga aking babae ni Ismael nagmurundo nin labi-labi, huli sa pagkawara kan saindang ama, asin huli sa saindang kasakitan sa kadlagan; asin sinda nagngururob-ngurob tumang sa sakuyang ama, huli ta dinara niya sinda paluwas sa daga kan Jerusalem na an sabi: An samuyang ama gadan na; iyo, asin ta nakalakop na kami digdi sa kadlagan, asin kami nagtirios nin dakol na kasakitan, gutom, paha, asin kapagalan; asin pagkatapos kan manga pagtirios na ini magkaparara kami sa kadlagan sa gutom.

36 Asin ta siring nagngururob-ngurob sinda tumang sa sakuyang ama, asin man tumang sakuya; asin ta sinda nagmarawot na magbaralik giraray sa Jerusalem.

37 Asin ta si Laman nagsabi ki Lemuel asin sa manga aking lalaki ni Ismael: Magdangog kamo, gadanon ta an samuyang ama, asin man an samuyang tugang na si Nephi, na nagboot na siya an maging satuyang pamayo asin satuyang paratukdo, na saiyang manga matuang tugang.

38 Ngonian, nagsabi siya na nakipag-ulay saiya an Kagurangnan, asin man ta an manga anghel nagrilingkod sa saiya. Alagad totoo, na aram niato na siya nagpuputik sa satuya; asin ta nagtataram siya kaining manga bagay na ini satuya, asin ta kadakol an ginibo niyang manga bagay sa paagi kan manga tusong isip tanganing saiyang malansi an satuyang manga mata, naghuna gayod na madadara niya kita sa harayo asin dai midbid na kadlagan; asin pagkatapos na nasa harayo na kita, inisip na niya na gibohon an sadiri niya na hadi asin tagapamayo niato, tanganing magibo niya an ano man susog sa saiyang boot asin ikakaogma. Asin sa paaging ini pinaribok kan sakuyang tugang na si Laman an saindang manga puso sa kaanggotan.

39 Asin ta uminagi an panahon na an Kagurangnan yaon sa samuya, iyo, sagkod na an tingog kan Kagurangnan uminabot asin nagtaram nin dakol na tataramon sa sainda, asin ta sinda inanggotan nin labi-labi; asin pagkatapos kan pag-anggot kan tingog kan Kagurangnan hinali ninda an saindang kaanggotan, asin nagsorolsol kan saindang manga kasalan, sagkod na an Kagurangnan balaogan giraray kami nin pagkakan kaya dai kami nagkagaradan.