1 Asin ta uminagi an panahon na kami nagpadagos giraray sa pagralakaw sa kadlagan; asin ta kami nagralakaw pasiring sa sirangan magpoon kaidto. Asin ta kami nagralakaw asin nagtirios nin gayo sa labi-labing kasakitan sa kadlagan; asin an samuyang manga babae nag-araki sa kadlagan.

2 Asin ta dakulang gayo an balaog samuya kan Kagurangnan, na maski nabubuhay sana kami sa hilaw na karne sa kadlagan, an manga ina nagkaigwa nin kadakol na gatas na ipapadudo sa saindang manga aki, asin sinda makukusog, iyo, siring kan manga lalaki; asin ta nakaya nindang magralakaw na dai na nagngurorob-ngurob.

3 Asin sa siring satuyang nahihiling na an manga tugon kan Dios kaipuhan mautob. Asin ta kun mangyari na an manga aki nin tawo magsunod sa katugonan kan Dios sinda papangatamanon, asin sinda pakukusogon, asin tatawan nin paagi na sinda makahaman kan manga bagay na saiyang pinagboot sa sainda; kaya, siya nagtao nin paagi sa samuya mantang kami nag-erok sa kadlagan.

4 Asin kami nag-erok nin dakol na manga taon, iyo, sagkod na walong taon sa kadlagan.

5 Asin ta uminabot kami sa dagang samuyang inapod na Bountiful, huli sa kadakolan kaidto nin manga bunga nin kahoy asin manga dugos; asin an gabos na ini hinanda kan Kagurangnan tanganing dai kami mapara. Asin ta samuyang nahiling an dagat, na samuyang inapod na Irreantum, na an boot sabihon, dakol na manga tubig.

6 Asin ta uminagi an panahon na samuyang itinurugdok an samuyang manga tolda sa baybayon; asin maski na nagkaigwa kami nin dakol na manga pagtios asin manga kasakitan, iyo, kadakol na gayo na dai niamo ikakasurat gabos, nagkaorogma kaming gayo pag-abot niamo sa baybayon, asin ta samuyang inapod an lugar Bountiful, huli sa kadakolan kan manga bunga nin kahoy.

7 Asin ta uminagi an panahon na pagkatapos na ako, si Nephi, nasa daga na kan Bountiful sa laog nin dakol na manga aldaw, an tingog kan Kagurangnan nag-abot sa sakuya na an sabi: Pagbangon, asin magtukad ka sa bulod. Asin ta uminagi an panahon na ako nagbangon asin nagtukad sa bulod, asin namibi nin maludok sa Kagurangnan.

8 Asin ta uminagi an panahon na an Kagurangnan nagtaram sa sakuya, na an sabi: Maggibo ka nin barko, siring sa sakuyang ipapahiling saimo, tanganing madara ko an saimong manga tawo sa ibong kaining tubig.

9 Asin ako nagsabi: Kagurangnan, sain ako maduman tanganing makakua ako nin metal na tutunawon, tanganing makagibo ako nin manga kasangkapan sa pagpatindog kan barko siring kan ipinahiling mo sa sakuya?

10 Asin ta uminagi an panahon na an Kagurangnan isinabi sakuya kun sain ako maduman na makakua nin metal, tanganing makagibo ako nin manga kasangkapan.

11 Asin ta uminagi an panahon na ako, si Nephi, naggibo nin botobot sa paghayop kan kalayo, na gibo sa anit nin manga hayop; asin pagkatapos na magibo ko an botobot, tanganing igwa akong panghayop sa kalayo, binagid ko an duwang gapo tanganing magkaigwa ako nin kalayo.

12 Huli ta an Kagurangnan dai pa tinugotan poon kaidto na magkaigwa nin kalayo, kan kami nagralakaw sa kadlagan; huli ta sinabi niya: Pahahamison ko an manga pagkakan nindo tanganing dai kamo magruluto;

13 Asin ta ako man an saindong liwanag sa kadlagan; asin ta sakuyang ihahanda an saindong dalan, kun kamo magsusurunod kan sakuyang manga tugon; kaya, sagkod na kamo nagsusurunod kan sakuyang manga tugon sakuyang aantabayan kamo pasiring sa dagang ipinangako; asin ta maaaraman nindo na huli sa sakuya kamo naaantabayan.

14 Iyo, asin ta an Kagurangnan nagsabi man: Pagkatapos kan pag-abot nindo sa dagang ipinangako, maaaraman nindo na ako, an Kagurangnan, iyo an Dios; asin na ako, an Kagurangnan, an nagligtas saindo sa pagkarumpag; iyo, na ako an nagdara saindo paluwas sa daga kan Jerusalem.

15 Kaya ako, si Nephi, naghinguha nanggad na masunod an katugonan kan Kagurangnan, asin ta sakuyang sinadol an sakuyang manga tugang sa maimbod na pagtubod asin pagkamaigot.

16 Asin ta uminagi an panahon na ako naggibo nin manga kasangkapan na metal sa sakuyang tinunaw na hali sa manga gapo.

17 Asin kan mahiling kan sakuyang manga tugang na ako magibo kan barko, nagpoon sinda na magngururob-ngurob laban sakuya, an sabi: An satuyang tugang bua, huli naghuna siya na makakagibo siya nin barko; iyo, asin ta naghuhuna man siya na makakabalyo siya sa ibong kaining mahiwas na manga tubig.

18 Asin siring an nginururob-ngurob kan sakuyang manga tugang laban sakuya, asin ta boot ninda na dai magpagal, huli ta dai sinda nagtuturubod na makakagibo ako nin barko; ni sinda nagtuturubod na ako pinapasunod kan Kagurangnan.

19 Asin ta ngonian uminagi an panahon na ako, si Nephi, namundo nin labi-labi huli sa katagasan kan saindang manga puso; asin ta ngonian kan mahiling ninda na ako nagpoon na magmundo nagkaorogma sinda sa saindang manga puso, sagkod na ako pinag-urulokan ninda, an sabi: Aram niamo na dai ka man makakagibo nin barko, huli ta aram niamo na kulang ka sa pakaaram; kaya dai mo matatapos an kadakulang gibong iyan.

20 Asin ta siring ka man sa satuyang ama, na nadadara kan buang paghuna-huna kan saiyang puso; iyo, ta dinara niya kita sa luwas kan daga kan Jerusalem, asin ta nakalakop na kita sa kadlagan sa kadakol na manga taon na ini; asin an satuyang manga babae magagabat an manga gibo, maski na sinda manga bados; asin ta sinda nag-araki na sa kadlagan asin tinios an gabos na manga bagay, apuera na sana sa kagadanon; asin ta marahay pang nagkagaradan na sinda bago sinda nagluwas sa Jerusalem ki sa nagtios kan manga sakit na ini.

21 Totoo nanggad, ining kadakol na manga taon nagtios kami sa kadlagan, na kutana sa panahon na idto nag-oorogma kami sa samuyang manga pagsadiri asin sa daga na samuyang pinanunod; iyo, maorogma na kutana kami.

22 Asin ta samuyang aram na an manga tawo sa daga kan Jerusalem manga matatanos na tawo; huli ta sinda nagsusunod kan manga susundon asin manga hatol kan Kagurangnan, asin an gabos na manga tugon niya, sunod sa katugonan ni Moises; kaya, naaaraman niamo na sinda matatanos na manga tawo; asin an satuyang ama hinukoman sinda, asin dinara kita sa harayo huli ta nagdangog kita kan saiyang manga tataramon; iyo, asin an satuyang tugang siring sa saiya. Asin sa siring na manga tataramon na ini sinda nagngururob-ngurob asin nag-aragrangay laban sa sakuya.

23 Asin ta uminagi an panahon na ako, si Nephi, nagtaram sa sainda, an sakuyang sabi: Nagtutubod daw kamo na an satuyang manga kamagurangan, na manga aki ni Israel, nakahali sa manga kamot kan manga taga-Egipto kun dai sinda nagdangog kan manga tataramon kan Kagurangnan?

24 Iyo, sa paghuna-huna nindo nakaluwas daw sinda sa pagkaoripon, kun dai pinagbotan si Moises kan Kagurangnan na halion sinda sa pagkaoripon?

25 Ngonian aram nindo na an manga aki kan Israel nasa pagkaoripon; asin naaaraman nindo na pinasan ninda an magagabat na manga gibo, na makamurumundo pasanon; kaya, aram nindo na marahay nanggad na bagay sa sainda, an makahali sinda sa pagkaoripon.

26 Ngonian aram nindo na si Moises pinagbotan kan Kagurangnan na gibohon idtong dakulang gibo; asin ta aram nindo na sa paagi kan saiyang tataramon an manga tubig kan Pulang Dagat nabanga padigdi asin paduman; asin ta uminagi sinda sa mamarang daga.

27 Alagad ta aram nindo na an manga taga-Egipto nagkaralamos sa Pulang Dagat, na manga hukbo ni Faraon.

28 Asin ta aram man nindo na sinda pinakaon nin manna sa kadlagan.

29 Iyo, asin ta aram man nindo na si Moises, sa paagi kan saiyang tataramon susog sa kapangyarihan kan Dios na nasa saiya, tinugbok an gapo, asin igwang luminuwas na tubig, tanganing maumayan an paha kan manga aki ni Israel.

30 Asin minsan pa na pinag-aantabayan sinda kan Kagurangnan nindang Dios, na saindang Paratubos, naglalakaw sa enotan ninda, inaantabayan sinda kun aldaw, asin tinatawan nin liwanag kun banggi, asin ta ginigibo an gabos na manga bagay para sa sainda na kaipuhan nanggad na akoon nin tawo, pinatagas ninda an saindang manga puso asin pinadiklom an saindang manga isip, asin nagturuya-tuya tumang ki Moises asin tumang sa totoo asin buhay na Dios.

31 Asin ta uminagi an panahon na susog sa saiyang tataramon pinara niya sinda; asin susog sa saiyang tataramon inantabayan niya sinda; asin susog sa saiyang tataramon ginibo niya an gabos na manga bagay para sa sainda; asin ta daing ni sarong bagay na naginibo na bako sa tataramon niya.

32 Asin pagkatapos na makabalyo sinda sa salog kan Jordan pinakusog nanggad niya sinda sa pagpahali kan manga tawo kan daga, iyo, sagkod sa magkawaragas sinda asin marumpag.

33 Asin ngonian, ano sa paghuna nindo kan manga tawo digdi sa daga na nasa dagang ipinangako, na inaralaw paluwas kan satuyang manga kamagurangan, sa paghuna nindo matatanos sinda? An totoo, sinasabi ko sa saindo, Bako.

34 Ano sa paghuna nindo an satuyang manga kamagurangan nagin kuta na orog na pinaorog ki sa sainda kun sinda matatanos? Sinasabi ko sa saindo, Dai.

35 Totoo nanggad, na an Kagurangnan pantay an paghiling sa manga tawo; siya na matanos pinapaorog kan Dios. Alagad totoo, an manga tawong ini isinikwal an lambang tataramon kan Dios, asin ta sinda hinog na sa kasalan; asin an kabilogan kan kaanggotan kan Dios napasainda; asin ta isinumpa kan Kagurangnan an daga laban sa sainda, asin benendisionan idto para sa satuyang manga kamagurangan; iyo, isinumpa niya idto laban sa sainda sagkod sa saindang pagkarumpag, asin saiyang benendisionan idto para sa satuyang manga kamagurangan tanganing magkaigwa sinda nin kapangyarihan duman.

36 Totoo, na an Kagurangnan linalang an kinaban tanganing idto erokan; asin linalang niya an saiyang manga aki tanganing masadiri idto.

37 Asin ta nagpapatindog siya nin sarong matanos na nasion, asin rinurumpag niya an manga nasion kan masusumbikal.

38 Asin ta dinadara niya an matatanos sa pinaorog na manga daga, asin an masusumbikal rinumpag niya, asin isinusumpa an daga para sa saindang kapakanan.

39 Siya an maghahadi sa kaitaasan kan kalangitan, huli ta idto an saiyang trono, asin ta ining daga an saiyang tungtongan.

40 Asin ta namomootan niya idtong manga maako saiya na maging saindang Dios. Totoo, namomootan niya an satuyang manga kamagurangan, asin siya nakipagtipan sainda, iyo, sagkod ki Abraham, ki Isaac, asin ki Jacob; asin ta saiyang narumdoman an tipan na saiyang ginibo; kaya, saiyang hinali sinda paluwas sa daga kan Egipto.

41 Asin ta saiyang pinadusahan sinda duman sa kadlagan kan saiyang hampak; huli ta saindang pinatagas an saindang manga puso, siring man sa saindo; asin an Kagurangnan pinadusahan sinda huli kan saindang kasumbikalan. Pinadarahan sinda nin naglalayog na manga mararang halas; asin pagkatapos na sinurungot sinda naghanda siya nin sarong paagi na sinda mabulong; asin an gibo na saindang gigibohon iyo an maghiling; asin huli sa kayanohan sana kan paagi, o huli ta madali sanang gibohon idto, dakol an nagkagaradan.

42 Asin ta igwang manga oras na pinataragas ninda an saindang manga puso, asin sinda nagturuya-tuya tumang ki Moises, asin tumang man sa Dios; alagad, saindong aram na inantabayan pa sinda kan saiyang daing siring na kapangyarihan sa dagang ipinangako.

43 Asin ta ngonian, pagkatapos kan manga bagay na ini, uminabot na an panahon na nagi sindang manga masusumbikal, iyo, harani na sa pagkahinog; asin ta dai ko aram alagad sa manga aldaw na ini sinda madali nang rumpagon; huli ta aram ko na an aldaw totoong maabot na kaipuhan na rumpagon sinda, makakaligtas man an magkapira sana, na dadarahon sa pagkabihag.

44 Kaya, pinagbotan kan Kagurangnan an sakuyang ama na magpasiring siya sa kadlagan; asin ta an manga Judio boot man siyang bawian nin buhay, iyo, asin ta kamo man boot man na bawian siya nin buhay; kaya, kamo manga paragadan sa saindong manga puso asin ta siring kamo sa sainda.

45 Maliliksi kamo sa paggibo nin karaotan alagad maluluway sa pagrumdom sa Kagurangnan na saindong Dios. Kamo nakahiling na nin anghel, asin ta siya nagtaram sa saindo; iyo, nadangog nindo an saiyang tingog paminsan-minsan; asin ta nagtaram siya sa saindo sa sarong madaging na maluyang tingog, alagad kamo dai nang pakamati ta dai na nindo namamatean an saiyang manga tataramon; kaya, siya nagtaram sa saindo siring sa tingog kan dalogdog, na nakayugyog kan kinaban na garo na magkabaranga.

46 Asin ta aram man nindo na sa kapangyarihan kan saiyang makakamhan na tingog magigibo niyang mawara an kinaban; iyo, asin aram man nindo na sa paagi kan saiyang tataramon magigibo niya na mapantay an manga bulod asin an manga pantay magkabaranga. O, saka, ngata ta labi-labi kamo katagas sa saindong manga puso?

47 Totoo, na an sakuyang kalag maroronot sa kulog huli sa saindo, asin an sakuyang puso nakukulogan; natatakot ako na tibaad isirikwal kamo sagkod pa man. Totoo, ako pano kan Espiritu kan Dios, sagkod na an sakuyang hawak dai na nin kusog.

48 Asin ta uminagi an panahon na kan maitaram ko an manga tataramon na ini nagkaaranggot sinda sakuya, asin naghurulaw na iapon ako sa kahiraroman kan dagat; asin kan magrani sinda tanganing basangan ako kan saindang manga kamot, nagtaram ako sa sainda, an sabi ko: Sa pangaran kan Makakamhan na Dios, pinagbobotan ko kamo na dai kamo sakuya magdurotdot, huli ta ako pano kan kapangyarihan kan Dios, sagkod sa pagtunaw kan sakuyang laman; asin an siisay man na pagbasangan ako kan saiyang kamot, maaalang siring sa mamarang duot; asin magigi siyang siring sa dai sa atubangan kan kapangyarihan kan Dios; huli ta papadusahan siya kan Dios.

49 Asin ta uminagi an panahon na ako, si Nephi, nagsabi sainda na dai na sinda magngururob-ngurob na tumang sa saindang ama; ni mag-imot kan pagtabang sakuya, huli ta an Dios pinagbotan ako na maggibo nin barko.

50 Asin ta ako nagsabi sa sainda: Kun an Dios nagboot sakuya na gibohon an gabos na manga bagay, magigibo ko an manga iyan. Kun pagbotan ako niya na magsabi sa tubig na ini, magi kang daga, ini magiging daga; asin kun sasabihon ko ini, ini mangyayari nanggad.

51 Asin ta ngonian, kun an Kagurangnan igwa nin kadakulang kapangyarihan, asin ta nakagibo nin kadakol na manga milagro sa manga aki nin tawo, paanong dai niya ako mapasunod, na makagibo nin barko?

52 Asin ta uminagi an panahon na ako, si Nephi, nagtaram nin kadakol na manga bagay sa sakuyang manga tugang, sagkod na sinda nagkarilibong asin ta sinda dai nakasirimbag tumang sa sakuya; ni nagbaralo sinda na basangan ako kan saindang manga kamot ni durotdoton ako kan saindang manga muro, sa laog nin dakol na manga aldaw. Ngonian dai nanggad sinda nagbaralo na maggibo kaini ta tibaad sinda maalang sa atubangan ko, labi kadakula an kapangyarihan kan Espiritu kan Dios; asin siring an naginibo kaini sa sainda.

53 Asin ta uminagi an panahon na an Kagurangnan nagsabi sa sakuya: Unata giraray an saimong kamot sa manga tugang mo, asin ta dai sinda maaalang sa atubangan mo, alagad patatarakigon ko sinda, sabi kan Kagurangnan, asin ta gigibohon ko ini, tanganing maaraman ninda na ako an Kagurangnan nindang Dios.

54 Asin ta uminagi an panahon na inunat ko an sakuyang kamot sa sakuyang manga tugang, asin ta dai sinda nagkaaralang sa sakuyang atubangan, alagad pinatarakig sinda kan Kagurangnan, siring sa manga tataramon na sinabi niya.

55 Asin ta ngonian, nagsabi sinda: Aram niamo na totoo na an Kagurangnan yaon saimo, huli ta aram niamo na an kapangyarihan kan Kagurangnan iyo an nagpatarakig samuya. Asin ta sinda nagdarapa sa sakuyang atubangan, asin ta sasambahon kutana ako, alagad dai ko sinda tinugotan, an sabi ko: Ako an tugang nindo, iyo, na nguhod pa saindo; kaya, sambahon nindo an Kagurangnan na saindong Dios, asin igalang nindo an saindong ama asin ina, tanganing maghalawig an saindong manga aldaw sa daga na itatao saindo kan Kagurangnan nindong Dios.