An Enot na Libro ni Nephi
An Saiyang Pamamahala Asin Paglilingkod
Sarong kasaysayan ni Lehi asin an saiyang agom na si Sariah, asin an saiyang apat na aking manga lalaki, na inaapod, (magpoon sa kamatuahan) Laman, Lemuel, Sam, asin Nephi. An Kagurangnan nagpatanid ki Lehi na maghali sa daga kan Jerusalem, huli ta siya nagpopropesia sa manga tawo manunungod sa saindang kasumbikalan asin ta boot ninda na halian siya nin buhay. Tulong aldaw sindang nagralakaw sa kadlagan kaiba an saiyang pamilia. Iniriba ni Nephi an saiyang manga tugang asin nagbalik sinda sa daga kan Jerusalem tanganing kuahon an kasuratan kan manga Judio. An kasaysayan kan saindang manga pagtios. Kinua ninda an manga aking babae ni Ismael tanganing agomon. Iniriba ninda an saindang manga pamilia asin naghali pasiring sa kadlagan. An saindang manga pagtios asin pagdusa sa kadlagan. An manga inagihan ninda kan saindang paglakaw. Uminabot sinda sa mahiwas na tubig. An manga tugang ni Nephi iniwal siya. Linibong niya sinda, asin guminibo nin barko. Inapod an pangaran kan rona na Bountiful. Nagbalyo sinda sa mahiwas na tubig pasiring sa daga na ipinangako, asin iba pa. Ini susog sa sinurat ni Nephi; o sa ibang tataramon, ako, si Nephi, sinurat an kasuratan na ini.
Kapitulo 1
Pinonan ni Nephi an kasuratan kan saiyang manga tawo—Si Lehi nakahiling nin bision na sarong hariging kalayo asin nagbasa sa sarong libro nin propesia—Inumaw niya an Dios, hinulaan an pag-abot kan Mesias, asin nagpropesia kan pagkarumpag kan Jerusalem—Siya inusig kan manga Judio. Manga 600 B.C.
1 Ako, si Nephi, namundag sa manga marahay na manga magurang, kaya ako natukdoan sunod sa gabos na inadalan kan sakuyang ama; asin ta nakahiling nin kadakol na manga pagtios sa pag-agi kan sakuyang manga aldaw, maski siring, dakula an pag-uyon sakuya kan Kagurangnan sa sakuyang gabos na manga aldaw; iyo, igwa nin dakulang kaaraman kan karahayan asin manga tagong hilom kan Dios, kaya ako naggibo nin sarong kasuratan kan sakuyang manga naginibo kan sakuyang manga aldaw.
2 Iyo, ako naggigibo nin kasuratan sa tataramon kan sakuyang ama, na kairiba an manga kaaraman kan manga Judio asin an manga tataramon kan manga taga-Egipto.
3 Asin ta sakuyang aram na an kasuratan na sakuyang ginigibo totoo; asin ta sakuyang ginigibo ini sa sadiri kong kamot; asin ta sakuyang ginigibo ini sunod sa sakuyang kaaraman.
4 Huli ta uminagi an panahon na sa pagpoon kan enot na taon kan paghadi ni Sedecias, hadi kan Juda, (an ama ko, si Lehi, nag-erok sa Jerusalem sa gabos kan saiyang manga aldaw); asin sa siring na taon nag-arabot an kadakol na manga propeta, na nagpopropesia sa manga tawo na sinda magsorolsol, o an dakulang siudad kan Jerusalem rurumpagon.
5 Kaya uminagi an panahon na an sakuyang ama, na si Lehi, mantang siya nagpopropesia nagpamibi sa Kagurangnan, iyo, sa bilog niyang puso, para sa saiyang manga tawo.
6 Asin ta uminagi an panahon na mantang siya namimibi sa Kagurangnan, igwang uminabot na hariging kalayo asin nag-ontok sa ibabaw nin gapo sa atubangan niya; asin dakol an saiyang nahiling asin nadangog; asin huli kan manga bagay na saiyang nahiling asin nadangog siya tinakigan asin nayugyog nin labi-labi.
7 Asin ta uminagi an panahon na siya nagbalik sa sadiri niyang harong sa Jerusalem; asin siya naghigda sa saiyang higdaan, huli ta siya nadaog kan Espiritu asin kan manga bagay na saiyang nahiling.
8 Asin sa siring na nadaog kan Espiritu, siya nadara sa sarong bision, sagkod sa saiyang nahiling na nagbukas an kalangitan, asin siya naghuna na nahiling niya an Dios na nakatukaw sa saiyang trono, na napapalibotan nin dai mabilang na katiripunan nin manga anghel na nagkakaranta asin nag-ooromaw sa saindang Dios.
9 Asin ta uminagi an panahon na saiyang nahiling an Saro na nagbababa hali sa katahawan kan kalangitan, asin saiyang nahiling na an saiyang aniag maliwanag pa sa liwanag kan aldaw sa kaudtohan.
10 Asin saiyang nahiling man an sampulo may duwa na iba pa na nagsusurunod saiya, asin an saindang aniag maliwanag pa sa manga bitoon sa kalangitan.
11 Asin sinda nagbaraba asin nagpasiriring sa ibabaw kan kinaban; asin an enot nagrani asin tuminindog sa atubangan kan sakuyang ama, asin itinao saiya an sarong libro, asin sinabihan siyang magbasa.
12 Asin ta uminagi an panahon na kan siya nagbabasa, napano siya kan Espiritu kan Kagurangnan.
13 Asin ta siya nagbasa, na an sabi: Herak man, herak man, kan Jerusalem, huli ta sakuyang nahiling an saindang kasumbikalan! Iyo, asin ta kadakol pang manga bagay an nabasa kan sakuyang ama manunungod kan Jerusalem—na ini rurumpagon, asin an manga nag-eererok duman; dakol an mapapara sa paagi kan espada; asin dakol an madadara sa pagkabihag sa Babilonia.
14 Asin ta uminagi an panahon na pagkatapos na mabasa asin mahiling an darakula asin makangangalas na manga bagay kan sakuyang ama, siya nagkurahaw nin kadakol na manga bagay sa Kagurangnan; siring sa: Darakula asin makangangalas an saimong manga gibo, O Kagurangnan na Dios na Makakamhan! An saimong trono nasa kahalangkawan kan kalangitan, asin an saimong kapangyarihan, asin karahayan, asin pagkaherak sa nag-eerok sa kinaban; asin, huli ta ika maheherakon, dai mo matitios an minadurulok sa saimo na sinda mapara!
15 Asin sa siring na paagi an tataramon kan sakuyang ama sa pag-omaw sa saiyang Dios; huli ta an saiyang kalag nag-ogma, asin an saiyang bilog na puso napano, huli sa manga bagay na saiyang nahiling, iyo, an pinahiling kan Kagurangnan saiya.
16 Asin ngonian, ako, si Nephi, dai ako na magibo kan kasaysayan kan manga bagay na isinurat kan sakuyang ama, huli ta kadakol na manga bagay an isinurat na saiyang nahiling sa manga bision asin sa manga pangaturogan; asin siya man nagsurat nin kadakol na manga bagay na saiyang pinagpropesia asin itinaram sa saiyang manga aki, na dai ko na gigibohan nin bilog na kasaysayan.
17 Alagad ako magibo nin kasaysayan kan sakuyang manga agi-agi sa sakuyang manga aldaw. Totoo, naggigibo ako nin sarong pinahalipot na kasuratan kan sakuyang ama, sa manga plake na ginibo kan sakuyang sadiring manga kamot; kaya, pagkatapos kong mapahalipot an kasuratan kan sakuyang ama saka na ako magibo kan kasaysayan kan sakuyang buhay.
18 Kaya, sakuyang minamawot na saindong maaraman, na pagkatapos na ipahiling kan Kagurangnan an kadakol na makangangalas na manga bagay sa sakuyang ama, na si Lehi, iyo, manunungod kan pagkarumpag kan Jerusalem, totoo nanggad na siya nagduman sa manga tawo, asin nagpoon na magpropesia asin magbalangibog sa sainda manunungod kan manga bagay na saiyang nahiling asin nadangog.
19 Asin ta uminagi an panahon na an manga Judio tinuya-tuya siya huli sa manga bagay na saiyang pinagpatotoohan sa sainda; huli ta totoong siya nagpatotoo kan saindang kasumbikalan asin manga karumpotan; asin saiyang pinatotoohan na an manga bagay na saiyang nahiling asin nadangog, asin man an manga bagay na saiyang nabasa sa libro, malinaw na nagpapatunay sa pag-abot kan sarong Mesias, asin man an pagtubos kan mundo.
20 Asin kan an manga Judio makadangog kan manga bagay na ini, sinda nagkaaranggot saiya; iyo, siring sa manga propeta kan suanoy pa, na saindang pinaharali, asin ginarapo, asin ginaradan; asin man hinanap siya ninda sa pagmawot na bawian siya nin buhay. Alagad totoo nanggad, na ako, si Nephi, ipapahiling sa saindo na an maoyong pagkaherak kan Kagurangnan nangingibabaw sa gabos na saiyang pinili, huli sa saindang pagtubod, tanganing pakusugon sagkod sa kapangyarihan nin pagligtas.