Ba’yuc Svun Nefi
Ja’ C’u X-Elan Yabtel Xchi’uc C’usi La Spas
C’usi la spas Lehi, xchi’uc yajnil Saríah xchi’uc chanib xnich’nab ti ja’ jech sbiique (xlic caltic ta banquilaletic) Lamán, Lemuel, Sam xchi’uc Nefi. Ti Cajvaltique la jyalbe Lehi ti ac’o loc’uc ta jteclum Jerusalene, yu’un ja’ ta xalbe ti steclumal ti c’u x-elan ti sbolilique, jech ta sc’an ta smilic. Xanob batel oxib c’ac’al ta xocol banamil xchi’uc snailal. Nefi chi’nbil yu’un sbanquiltac, sutic batel ta yosilal Jerusalen bat yich’ictal ti spoco’ lo’ilic Judioetique. Ti bu tsacal ti svocolique. La jyajnilinbeic stsevetic Ismael. Loq’uic batel ta xocol banamil xchi’uc snailalic. Ti c’u x-elan svocolic xchi’uc yatel yo’ntonique. Ti c’alal xanoic batele. C’otic ta muc’tiquil vo’etic. Te ilinic ti sbanquiltac Nefi ta stojolale. Jech muyuc la ya’ybe smelolal jech te la spas jun barco, jech ep c’usitic oy (abundancia) la jyac’beic sbi ti te bu oyique, jech te jeloic batel ta muc’tiquil nabetic c’otic ta banamil (ti bu albil ono’ox sc’oplale) ep to jech. Ti li’e ja’ jech la jyal ti Nefie, ta yantic c’opetic, vu’un, Nefiun, la jts’iba ti poco’ lo’iletique.
Ba’yuc Capitulo
Nefi ta sliquesbe yalel ti spoco’ lo’ilal steclumale—Lehi la jyil ta xojobal c’oc’ xchi’uc la sq’uel jun libro c’u x-elan yich’oj alel—La jyich’ ta muc’ Riox—La jyal ti ta xtal Jcoltavanej ta bee xchi’uc la jyalbe batel smelolal ti ta xich’ vuq’uesel Jerusalene. Ta xich’ nutsel ta Judioetic.
1 Vu’un Nefiun, li voc’ ta lequil totil me’il xchi’uc la jquich’, ti c’u x-elan li xchanubtas ti jtote; xchi’uc la jquil vocolil ti c’alal li ch’italele, jech te scotol c’ac’al cuch cu’un ti c’usi la jyac’bun ti Cajvaltique, jech ja’ to te la jna’oj lec, jech, ja’ te la jna’ o lec ti c’usi ep sc’an ta yo’nton spas ti Rioxe, ta jts’iba, ti c’u x-elan, poco’ lo’iletic pasbil cu’un li ch’italele.
2 Jech, ta jpas jech chac c’u cha’al sc’op li’ jtote, ti jech pasbil jech chac c’u cha’al sna’ic Judioetic ta sc’opic Egipcioetique.
3 Jna’oj ti poco’ lo’iletic ta jts’ibae ti ja’ ta bats’imelele, ta jts’iba ta jc’ob jtuc, jech chac c’u cha’al jna’oje.
4 Jech c’ot ta pasel, ta sliquebal jabil ti c’alal och ta ajvalilal Sedequíase, Ti ajvalil te ta Judá banamil (ti jtot Lehie te o no’ox nacal ta Jerusalen ti c’uxa yepal c’ac’al xcuxleje), c’otic epal lequil viniquetic ti ja’ jech ta sjabilale, te la jyalbeic yajvaltac jteclum ti ac’o sutes yo’ntonique, ti me mo’oje ta xich’ vuq’uesel ti muc’ta jteclum Jerusalene.
5 Ja’o jech, chano batel ti jtot Lehie la sc’opan Cajvaltic, jech, ta scotol yo’nton, ta sventa ti steclumale.
6 Jech ti c’alal ja’ o sc’opan Cajvaltique, ja’ o te vinaj ta stojolal te ta ba ton jun xojobal c’oc’; ti c’usi la jyil xchi’uc ti c’usi la jya’aye; te ixi’ te it’el ta xi’el ta scoj ti c’usi la jyile xchi’uc ti c’usi la jya’aye.
7 Jech sut batel ta sna ta Jerusalen, jech te mochi ta svayab, yu’un alubtasat ta Ch’ul Espíritu xchi’uc ta scoj ti c’usi la jyile.
8 Ti c’alal jech la jyich’ alubtasel yu’un ti Ch’ul Espíritue, yu’un oy c’usi ch-ac’bat yil, jech la jyil jam ti vinajele, ja’ o te la jyil ti Riox te chotol ti te bu xchotlebe, te joybil ta epal yabattac te chq’uejinic te ta xich’ic ta muc’ ti Srioxique.
9 Ja’o jech te la jyil yaltal ta vinajel jun; ti xojobale ja’ te la jyil ti ech’em saquil jech chac c’u cha’al o’lol c’ac’al.
10 Te la jyil no’oxtoc ti te nochol talic lajchab yantique ti xojobalique ja’ jech saquilic jech chac c’u cha’al c’analetic ta vinajele.
11 Yalictal xanoic ta sba banamil; ti jun ta bayuque ja’ te c’ot ti te bu’oy ti jtote, te la jyac’be jun libro la jyalbe ti ac’o sq’uele.
12 Ti c’alal ja’o tsq’uel ti libroe, ja’ o te noj ta S-espíritu Cajvaltic.
13 La jyal ti libroe: Ay, ay, vo’ot Jerusalen, yu’un laj xa quil ti amultaque! Jech ti jtote ep c’usi la sq’uel ta sventa Jerusalen: ti yu’un chich’ lajesel xchi’uc ti svinictaque; ja’ jech ep chchamic ta machita xchi’uc ti ep chbatic ta chuquel ta Babilonia banamile.
14 Ja’o jech ti jtot ti c’alal la sq’uel ti vun xchi’uc ti c’usi ep muc’tic no’ox la jyil xchi’uc ti labal sbaique, jech la jyalbe ti Cajvaltique, jech chac c’u cha’al: ¡Ti tu jmuc’tic xchi’uc ti tu j-alac’ sba ti a vabteltaque, vo’ot Rioxot ti tu j-ech’em ti a vu’ele! ti bu joybilot ta avabattac ti te to ta staylejal vinajele, ti atsatsale, ti a lequilale, xchi’uc ti avutsila le li’ to lamal ta stojolalic ti yajvaltac banamile. Yu’un ech’em avutsilal, ja’ yu’un mu xa vac’ ch’ayuc ti voch’otic chac’ sba ta a tojolale!
15 Ja’ jech ta xal ta sq’ueoj ti jtot ta stojolal ti Srioxe, yu’un ti sch’ulele xcuxet no’ox ta scotol yo’nton ta sventa ti c’usi la jyile, ti Cajvaltic la jyac’ ta ilele.
16 Ti vu’un, Nefiune, muyuc la jcac’ venta scotol ti c’usi sts’ibaoj ti jtote, yu’un ep la sts’iba ti c’usi ac’bat yil xchi’uc ti c’usi la svaychine; xchi’uc la sts’iba ti c’usi la xcholbe sc’oplale xchi’uc ti c’usi la jyalbe ti nich’nabe, ti bu muyuc la jca’ybe smelolal scotole.
17 Ja’ ta xcalboxuc ti c’usi jpasoj vu’une, jech ta jpas ta jmoj xchi’uc ti poco’ lo’iletic yu’un jtot ti te ta ba taq’uin vun ti bu jpasoj ta jc’ob jtuque; ja’ jech me la jpas ta jmoje ja’o ta ts’iba ti c’usi jpasoj vu’une.
18 Ja’ jech ta jc’an cha na’ic, ti ta ts’acal ti Cajvaltic ti c’alal la jyac’ ta ilel ti c’usi laval sba ta jtot Lehie, jech ti c’u x-elan ta xich’ vuq’uesel ti Jerusalene, ja’ o ti jtot Lehie loc’ batel ta jteclumetic bat yalbe smelolal ti c’usi la jyil xchi’uc ti c’usi la jya’aye.
19 Ja’o jech ti Judioetique te la sna’leic ta sventa ti c’usi la jyal ta jamal ta stojolalique, yu’un ta melel la jyalbeic ta jamal ti sbolilique xchi’uc ti c’usi mu xtun tspasique, xchi’uc la jyal ta jamal ti c’usi la jyile xchi’uc ti c’usi la jya’aye, jech ti c’usi la sq’uel ta libroe, ti bu ta xal ta jamal ti ta xtal jun Jcoltavanej xchi’uc ti ta scolta scotol banamile.
20 C’alal la jya’yic ti va’ay Judioetique, ilinic ta stojolal, jech, chac c’u cha’al ta stojolalic lequil viniquetic ta vo’neje, ti voch’otic la snutsic loq’uele, ti la jyac’beic tone, xchi’uc ti la smilique; jech ta ox sc’an ta smilic. Ja’ jech ti vu’un Nefiune, ta xcac’boxuc avilic ti yuninal yutsil Cajvaltic ti te q’uiil ta stojolalic ti voch’o ta scoj xch’unolajel yo’nton st’ujoj stuc, jech, ja’ to ti c’uxi oyuc stsatsal c’uxi xu’ xich’ic o coltaele.