1 Ka sa yaco ni rau sa vakarokoroko vua na Turaga, ka lako yani vata kei au; ka keitou sa cakacakataka na kau ena kedra icakacaka vakamatai sara. Ka ni sa vakaraitaka vei au na Turaga ena veigauna e so na ivakarau me’u cakacakataka kina na kau ni waqa.

2 Ia oqo, koi au ko Nifai, au sa sega ni cakacakataka na kau me vaka e vulica na tamata, se me’u taya na waqa ena kena icakacaka vaka-tamata; ia au sa taya ga ena kena icakacaka sa vakaraitaka vei au na Turaga; o koya, a sa sega kina ni vaka na kena icakacaka vaka-tamata.

3 Ia koi au, ko Nifai, au sa dau lako vakawasoma ki na ulunivanua, ka’u sa dau masu vakawasoma vua na Turaga; a sa vakaraitaka kina vei au na Turaga na veika lelevu.

4 Ka sa yaco ni’u sa taya oti na waqa, me vaka na vosa ni Turaga, e rau sa raica na tuakaqu ni sa vinaka, ka sa matai sara na kena icakacaka; o koya, e rau sa vakayalomalumalumutaki rau tale kina vua na Turaga.

5 Ka sa yaco ni sa rogo tale vei tamaqu na domo ni Turaga, me keitou cavutu ka lako sobu ki waqa.

6 Ka sa yaco ena mataka, ni keimami sa vakarautaka oti na veika kece, e levu na vuata kei na lewe ni manumanu mai na lekutu, kei na oni ena kena levu, kei na ka yaga kecega me vaka sa vakarota vei keimami na Turaga, keimami sa qai lako sobu ki waqa, kei na neimami iyaya kecega kei na sore ni kau, kei na veika cava tale keimami a kauta voli mai, na tamata yadua me vaka na nona yabaki; keimami sa lako vata kece yani ki waqa, kei ira na wati keimami kei na luvei keimami.

7 Ia oqo, a sa sucu e rua tale na luvei tamaqu tagane ena lekutu; na yacai koya ka qase ko Jekope, kei koya ka gone ko Josefa.

8 Ka sa yaco ni keimami sa lako sobu kece yani ki waqa, ka kauta vata kei keimami na veika e yaga vei keimami kei na veika e a vakaroti vei keimami, keimami sa qai tavo ki wai ka biligi yani ena cagi vaka ki na vanua yalataki.

9 Ia ni keimami sa biligi voli yani ena cagi me vuqa na siga, raica, e ratou sa tekivu marau na tuakaqu kei rau na luvei Isimeli tagane kei na watidratou, ka ratou sa tekivu me ia na meke, kei na laga sere, ka tauca na vosa velavela, io, e ratou sa guilecava na kaukauwa ka kauti ira voli mai ki ke ya; io, e ratou sa vakalevulevui iratou ka itovo velavela.

10 Ka sa tekivu me’u taqaya vakalevu, koi au, ko Nifai, de na cudruvi keimami na Turaga, ka yaviti keimami ena vuku ni neimami caka cala, me keimami tilomi kina ena wasaliwa titobu; o koya, au sa vosa kina vei iratou koi au, ko Nifai, ena vosa vakayalomatua; ia raica e ratou sa cudruvi au, ka kaya: Keitou na sega ni vakatara me liutaki keitou na taci keitou gone.

11 Ka sa yaco ni rau a tauri au ko Leimani kei Lemueli ka vesuki au ena dali, ka vakayacora vei au na ivalavala voravora; ia, sa vakalaiva ga na Turaga me na vakaraitaka kina na nona kaukauwa, me vakayacori kina na nona vosa ka a vosataka me baleti ira na dau caka ca.

12 Ka sa yaco ni rau sa vesuki au oti ka’u sa sega kina ni yavala rawa, sa sega talega ni cakacaka na kabasi ka a vakarautaka na Turaga.

13 O koya, era sa sega kina ni kila na mua me ra vagolea kina na waqa, ka sa liwa mai e dua na cagilaba levu, io, e dua na cava levu ka rerevaki, ka keimami a biligi lesu ena dela ni wai me siga tolu; ka sa tekivu me ra rere vakalevu de ra na luvu e wasawasa; ia e rau a sega ga ni sereki au.

14 Ia ena ikava ni siga keimami a biligi lesu tiko kina, sa toro cake sara na kaukauwa ni cagilaba.

15 Ka sa yaco ni sa vakarau me tilomi keimami na wasaliwa titobu. Ia ni keimami sa biligi lesu tiko e wasawasa me va na siga, e rau sa qai tekivu raica na tuakaqu ni sa tau vei iratou na lewa ni Kalou, ka ratou na mate vakavo ga kevaka e rau na veivutunitaka na nodrau caka cala; o koya, e rau sa lako mai kina vei au, ka sereka na ivesu ena noqu ilabe ni ika, ka raica e rau sa vuce vakalevu sara; ka rau sa vuce vakalevu talega na noqu qurulasawa, ka sa ka levu dina na kena mosi.

16 Ia, au a tacake ga vua na noqu Kalou, ka vakacaucautaki koya ena siga taucoko; ka’u a sega ni vosa kudrukudrutaka na Turaga ena vuku ni noqu vakararawataki.

17 Ia oqo sa vosataka e vuqa na ka ko Liai na tamaqu, vei rau, kei rau talega na luvei Isimeli tagane; ia, raica, e rau sa veivakarerei vei ira era via totaki au; ia me vaka ni rau sa qase sara na noqu itubutubu, ka rau sa sotava e vuqa na ka rarawa ena vukudratou na luvedrau, e rau a biu sobu kina, io, ena dela ni nodrau idavodavo ni tauvimate.

18 Ena vuku ni nodrau yalobibi kei na rarawa levu, kei na nodrau caka cala na tuakaqu, sa voleka kina me rau kau tani mai na bula oqo me sotava na nodrau Kalou; io, a sa voleka me vakotori sobu ki na kuvu ni soso na drauniuludrau sikoa; io, a sa voleka me rau biu yani ena rarawa ki na dua na ibulubulu waiwaiya.

19 E rau sa rarawa talega ko Jekope kei Josefa, ena vuku ni leqa nei tinadrau, ni rau sa gone ga ka dodonu me rau qaravi vakavinaka; kei watiqu talega, ena wai ni matana kei na nona masu, kei iratou talega na luvequ, e a sega ni vakamalumalumutaka na lomadrau na tuakaqu me rau sereki au kina.

20 Ka sa sega tale ni dua na ka, ia na kaukauwa ga ni Kalou, ka sa voleka ni vakarusai ira, sa rawa me vakamalumalumutaka na lomadrau; okoya, ni rau sa raica kina ni sa voleka me tilomi ira na wasaliwa titobu, e rau sa qai veivutunitaka na ka erau sa vakayacora, ka rau sa sereki au kina.

21 Ka sa yaco ni rau sa sereki au oti, raica, au sa taura na kabasi, ka sa cakacaka me vaka na noqu gagadre. Ka sa yaco ni’u a masu vua na Turaga; ka ni’u sa masu oti sa mudu mai na cagi, ka sa ruru mai na cava, ka sa qai yaco e dua na maravu levu.

22 Ka sa yaco ni’u sa vagolea na waqa, koi au, ko Nifai, ka keimami soko tale yani ki na vanua yalataki.

23 Ka sa yaco ni keimami sa soko tiko ka oti e vuqa na siga keimami sa qai yaco ki na vanua yalataki; ka keimami sa lako yani ki vanua, ka birika na neimami vale laca; ka keimami sa vakatoka na vanua ko ya ko vanua yalataki.

24 Ka sa yaco ni keimami sa cukiraka na vanua ka tea na sore ni kau; io, keimami sa biuta kece na neimami sore ni kau ki na qele, ka keimami a kauta mai na vanua ko Jerusalemi. Ka sa yaco ni ra sa tubu vakalevu sara; o koya, keimami sa kalougata kina vakalevu.

25 Ka sa yaco ni keimami a kunea ena vanua yalataki, ena neimami a lako yani ki na lekutu, ni ra sa tu na manumanu e veikau ena kedra veimataqali kece, na bulumakau yalewa kei na bulumakau tagane, kei na asa kei na ose, kei na me kei na me kila, kei na veimataqali manumanu kila kecega, sa yaga vua na tamata. Ka keimami sa kunea na veimataqali oa kecega, na oa ni koula, kei na siliva, kei na kopa.