24. Kaperneum
Kaperneum, ej pād ioon parijet in Lom̧aļo in Galili ituiōn̄, eaar ioļapļap in ministry eo an Jisōs ilo Galili (Matu 9:1–2; Mark 2:1–5). Juon jikin wiakake eaorōk im eļap tōprakin eo̧n̄ōd ie, ekar ijo jikin ro riAelōn̄ ko im barāinwōt riJu. Oran armej eo ilo epepen eo kein kajuon emaron̄ kar jan̄in le jān 1,000 armej. Kaperneum ekar pād ioon kāboņ in iaļan kōm̧akūtkūt kein wia ko reaorōk, ippān bwidej ko rem̧m̧an rej jepooļ e. Ritariņae in Rom ro rekar ekkal im̧ōn kōppojak ko im jikin ko̧koņ ko ijin. Jekdo̧o̧n n̄e mennin bwilōn̄ ko rellōn̄ rekar kōm̧m̧an ijin, armej ro ekkā wōt aer kar eļļo̧k jān ministry eo an Rilo̧mo̧o̧r. Kōn menin Jisōs eaar kaliaik jikin kwelo̧k in (Matu 11:20, 23–24). Ālikin jidik iien, Kaperneum eaar wōtlo̧k ilo jeepepļo̧k im ejjan̄in bar wōr armej ie.
Men Ko Reļļap: Kaperneum kar jeļā kake bwe ej jikin kwelo̧k eo “an Rilo̧mo̧o̧r makmake” (Matu 9:1–2; Mark 2:1–5). Eaar kōm̧m̧an elōn̄ mennin bwilōn̄ ko ijin. N̄an waanjon̄ok, Eaar kōmour elōn̄ armej (Mark 1:32–34), ekobaik ļeo karejeran senturiōn eo (Luk 7:1–10), kōrā eo jelpān Piter (Mark 1:21, 29–31), riakā eo im jikin kiki eo an kar lelaļļo̧k jān bōrwaj eo (Mark 2:1–12), im ļeo pein eaar m̧ōrā (Matu 12:9–13). Ijin Jisōs eaar barāinwōt kadiwōjļo̧k elōn̄ jetōb ko rettoon (Mark 1:21–28, 32–34), kōjerkak leddik eo nejin Jairōs jān ro remej (Matu 9:18–19, 23–26; Mark 5:22–24, 35–43), im sermon in pilawā in mour ilo im̧ōn kwelo̧k eo an riJu ilo Kaperneum (Jon 6:24–59). Rilo̧mo̧o̧r eaar jiron̄ Piter n̄an kōkojōke juon ek jān Lom̧aļo in Galili, kōpeļļo̧ke lo̧n̄iin, im lo juon jāān dekā eo kake emaron̄ kōļļā ewōj eo (Matu 17:24–27).