Pene 21

Te semeio nō te mau mahana hope’a o te ’ohipa misiōnare

« Tē ani mānihini nei au ia ’outou ’ia riro ’ei hō’ē nu’u rahi ma te ’ana’anatae nō teie ’ohipa ’e ma te hō’ē hina’aro rahi pūai ’ia tauturu i te mau misiōnare i roto i tā rātou hōpoi’a rahi ».

Nō roto mai i te orara’a o Gordon B. Hinckley

’Ei taure’are’a, ’ua riro Gordon B. Hinckley ’ei hō’ē taea’e itoito tei mau i te autahu’ara’a, ’aita rā ’oia i mana’o e pi’ihia ’oia ’ia tāvini i te hō’ē misiōni rave tāmau. ’Ua fa’a’ite mai ’oia i muri mai ē, « e tau nō te topatarira’a ’ino roa a’e i te pae terera’a faufa’a i roto i te ’ā’amu o te ao nei ». ’Ua fātata i te 35 i ni’a i te hānere o te feiā ’aore e ’ohipa i [te ’oire nō Roto Miti], ’e te rahira’a o te feiā ’ohipa ’ore e mau tāne fa’aipoipo ’e e mau metua tāne ïa, nō te mea e mea iti roa te mau vahine e rave ra i te ’ohipa. E mea iti roa te mau misiōnare e haere i te misiōni i taua taime ra… ’Ua fāri’i au i ta’u parau tū’ite a te fare ha’api’ira’a teitei ’e ’ua ’ōpua vau i te haere atu ā nō te tītau i te tahi parau tū’ite teitei a’e. I reira tō te ’episekōpo haerera’a mai ma te hō’ē mea, e au ra iā’u ē, i te hō’ē mana’o hitimahuta. ’Ua paraparau ’oia nō te hō’ē misiōni ».¹

’Ua fāri’i Gordon i te « mana’o hitimahuta » o tōna ’episekōpo, ’e i te matahiti 1933, ’ua pi’ihia ’oia ’ia tāvini i te fenua Peretāne—te hō’ē noa o nā 525 misiōnare tei pi’ihia i taua matahiti ra.² ’Ua fa’aruru ’oia e rave rahi mau tāmatara’a i roto i tāna misiōni, ’ua ha’atūtau rā tāna tāvinira’a i tōna fa’aro’o :

« E ’ere te ’ohipa i roto i te misiōni i te mea ’ōhie. E mea fifi ’e te hepohepo. ’Auē rā ïa ’ohipa fa’ahiahia ē ! I tō’u hi’ora’a i muri, ’ua ’ite au e taure’are’a paha vau e hi’o noa iāna iho i tō’u taera’a atu i te fenua Peretāne. ’Auē ïa ha’amaita’ira’a i tō’u tu’ura’a i te hiti i tō’u iho mau mana’o nō ni’a iā’u nō te maita’i o te ’ohipa a te Fatu […]

’Auē ïa vau i te māuruuru nō te ’ohipa tā’u i ’ite i roto i taua misiōni ra. ’Ua ha’aputapū vau i te ’ā’au o te tahi mau ta’ata tei fa’a’ite nā roto i te mau matahiti i muri mai i tō rātou māuruuru. E mea faufa’a rahi te reira. ’Aita roa atu rā vau i ha’ape’ape’a rahi nō ni’a i te rahira’a bāpetizora’a tā’u ’e ’aore rā tā te tahi atu mau misiōnare i rave. ’Ua tae mai tō’u māuruuru nā roto i te ha’apāpūra’a ’ē ’ua rave au i te mea tā te Fatu i hina’aro iā’u ’ia rave ’e ’ua riro vau ’ei mauha’a i roto i Tōna rima nō te fa’atupura’a i Tāna mau ’ōpuara’a. I roto i taua ’ohipa ra, ’ua niu-roa-hia i roto iā’u nei te hō’ē ha’apāpūra’a ’e te ’itera’a ē teie mau te ’ohipa mau ’e te ora a te Atua, tei fa’aho’ihia mai nā roto i te hō’ē peropheta nō te ha’amaita’ira’a i te mau ta’ata ato’a ’o te fāri’i i te reira ’e ’o te ora i te mau ture o te reira ’ohipa ».³

Nā te misiōni a te peresideni Hinckley i ha’amau i te ’ē’a nō te hō’ē orara’a tei ha’amo’ahia nō te ’ohipa a te Fatu. I roto i tāna tāvinira’a ’ei Peresideni nō te ’Ēkālesia, ’ua tere ’oia e hau atu i te 1,6 milioni kilometera e hau atu i te 70 fenua nō te fa’a’ite i tōna ’itera’a pāpū nō Iesu Mesia ’e Tāna ’evanelia tei fa’aho’ihia mai.⁴

’Ua ani pinepine te peresideni Hinckley i te mau melo nō te ’Ēkālesia ’ia ’āmui atu iāna nō te fa’a’itera’a i te ’evanelia. Hau atu i te 400 000 misiōnare rave tāmau tei pāhono i taua pi’ira’a ra i roto i tōna tau ’ei Peresideni. Tauturuhia nā roto i tā rātou tāvinira’a ’e te ’ohipa a te mau melo misiōnare, hau atu i te 3 500 000 melo fa’afāriu tei bāpetizohia i te roara’a o taua tau ra.⁵

Ma te ’ana’anatae noa, ’ua fa’a’ite te peresideni Hinckley i te hō’ē hi’ora’a ’ā’ano e nāhea te ’ohipa a te Fatu e tāmau ai i te tupu :

« Mai te mea e haere tātou i mua, ma te ’ore roa e ha’amo’e i te hi’o atu i tā tātou fā, ma te ’ore e fa’a’ino i te ta’ata, ma te orara’a i te mau ha’api’ira’a fa’ahiahia tā tātou i ’ite ē e mea mau, e tere ïa teie ’ohipa ma te hanahana ’e te pūai nō te fa’a’ī i te fenua nei. E matara ïa te mau ’ōpani tei piri i teienei i te porora’a o te ’evanelia ».⁶

« E mea rahi tō tātou ti’aturira’a i te ananahi ’e e mea pūai tō tātou fa’aro’o. ’Ua ’ite tātou ē ’ua ha’amatara na’ina’i tātou i te mea ’o te tupu mai i te mau matahiti e vai nei i mua… E mea ’ū’ana tā tātou hōpoi’a ’ia haere i mua. E mea hanahana rā tā tātou rāve’a ».⁷

« E haere ana’e tātou e fārerei i tō te ao nā roto i tā tātou tāvinira’a misiōnare, ma te ha’api’ira’a i te mau ta’ata ato’a o te fa’aro’o i te fa’aho’ira’ahia mai te ’evanelia ».

Te mau ha’api’ira’a a Gordon B. Hinckley

E ti’a ia tātou ’ia haere atu e fārerei i tō te ao nā roto i te tāvinira’a misiōnare, ma te ha’api’ira’a i te mau ta’ata ato’a ’o te fa’aro’o mai.

’Oia mau, e fa’auera’a hanahana tā tātou ’ia ’ia ’āfa’i i teie poro’i i te mau fenua ato’a, i te mau nūna’a ato’a, i te mau reo ato’a ’e i te mau ta’ata ato’a. E fa’auera’a tā tātou ’ia ha’api’i ’e ’ia bāpetizo i te i’oa o te Fatu ra ia Iesu Mesia. ’Ua parau te Fa’aora tei ti’afa’ahou, « e haere ’outou e ’ati noa a’e te mau fenua ato’a e fa’a’ite haere i te ’evanelia i te ta’ata ato’a » (Mareko 16:15). Tei roto tātou i te hō’ē tūtavara’a fa’ahiahia ’e te rohirohi nō te parau mau ’e te maita’i.⁸

Hou te ’Ēkālesia i fa’anahonahohia ai, tē vai ra te ’ohipa misiōnare. ’Ua tāmau noa mai taua taime mai ā, noa atu te mau fifi o te mau tau e rave rahi tā tō tātou nūna’a ta’ata i fa’aruru. E fa’aoti ana’e tātou pā’āto’a i roto ia tātou iho ’ia ti’a atu nō te hō’ē rāve’a ’āpī, te hō’ē aura’a ’āpī nō te hōpoi’a, te hō’ē fafaura’a ’āpī nō te tītaura’a ’ia tauturu i tō tātou Metua i te Ao ra i roto i Tāna ’ohipa hanahana i te fa’atupura’a i te tāhuti ’ore ’e te ora mure ’ore o Tāna mau tamaiti ’e mau tamāhine nā te ao ato’a nei.⁹

Haere ana’e tātou te feiā mo’a i te mau mahana hope’a nei ’ia vetahi ’ē e ’ere nō tō tātou nei fa’aro’o. ’Eiaha roa atu tātou e rave i te ’ohipa nā roto i te hō’ē vārua fa’a’oru ’aore rā mai te huru ra e mea maita’i a’e tātou i te tahi atu mau ta’ata. E fa’a’ite rā tātou i te aroha ’e te fa’atura ’e te tauturura’a ia rātou. ’Aita tātou e ta’a-maita’i-hia ra, ’e tē mata’u nei au ē, te tumu rahi, nō tā tātou iho ïa mau ’ohipa. E nehenehe tātou ’ia rahi atu ā te fa’a’oroma’i, ’ia rahi atu ā te here i tō tātou ta’ata tupu, ’ia rahi atu ā te auhoara’a, ’ia rahi atu ā te hi’ora’a maita’i i nā mua atu. Ha’api’i ana’e i tā tātou mau tamari’i ’ia fa’ahoa i te tahi atu mau ta’ata, ma te fa’atura, te here ’e te fa’ahiahiara’a. Nā te reira huru e fa’atupu mai i te hotu maita’i a’e ’eiaha rā nā roto i te te’ote’o […]

E haere ana’e tātou e fārerei i tō te ao nā roto i tā tātou tāvinira’a misiōnare, ma te ha’api’ira’a i te mau ta’ata ato’a ’o te fa’aro’o i te fa’aho’ira’ahia mai te ’evanelia, ma te parau ma te ri’ari’a ’ore, ma te ’ore ato’a rā e fa’ahua, i te ’ōrama mātāmua, te fa’a’itera’a i tō tātou ’itera’a pāpū nō ni’a i te Buka a Moromona ’e te fa’aho’ira’ahia mai te autahu’ara’a. E tūturi ana’e tātou, e tō’u mau taea’e ’e mau tuahine, ’e e pure ana’e nō te rāve’a ’ia ’āfa’i mai ia vetahi ’ē i roto i te ’oa’oara’a o te ’evanelia.¹⁰

E ’ohipa māere ’e te fa’ahiahia ’e ’ua putapū e rave rahi tauasini ta’ata i te semeio o te Vārua Mo’a, ē ’ua ti’aturi rātou ’e ’ua fāri’i ’e ’ua riro mai ’ei melo. ’Ua bāpetizohia rātou. ’Ua taui roa tō rātou orara’a nō te maita’i ē a muri noa atu. Tē tupu nei te mau semeio. ’Ua tae mai te hō’ē huero nō te fa’aro’o i roto i tō rātou ’ā’au. ’Ua tupu te reira i te rahi ’a ha’api’i ai rātou. ’E ’ua fāri’i rātou i te mau ha’api’ira’a i ni’a i te mau ha’api’ira’a, ē tae noa atu ’ua fāri’i rātou pā’āto’a i te mau ha’amaita’ira’a fa’ahiahia ’o te tae mai i te feiā tei haere ma te fa’aro’o i roto i teie, Te ’Ēkālesia a Iesu Mesia i te Feiā Mo’a i te mau Mahana Hope’a nei.¹¹

E ti’a ia tātou ’ia tauturu i te mau misiōnare rave tāmau ’ia ’āfa’i ia vetahi ’ē i te hō’ē ’itera’a o te parau mau.

’Ua fārerei au i te hō’ē vahine i Amerika Apato’a tei ’āmui iho nei i te ’Ēkālesia. Ma te tūra’i-pūai-hia e te hō’ē here rahi nō te mea tāna i ’ite, ’ua haere ’oia ma te ’ana’anatae e parau i te tahi atu mau ta’ata. I roto i te hō’ē ’ārea e hitu noa ’āva’e mai tōna bāpetizora’ahia, ’ua fa’ahaere mai ’oia e toru hānere ta’ata mātauhia e āna i te mau misiōnare ’ia nehenehe i te mau misiōnare ’ia ha’amāramarama i te ’evanelia ia rātou. I te hō’ē taime, ’ua haere mai e ono ’ahuru i te purera’a. E mea pāpū e rave rahi tei haere mai. I Sao Paolo, Beresiria, ’ua fārerei au i te hō’ē misiōnare ’āpī tei ha’api’i mātāmua iāna i te ’evanelia. E ta’ata fa’afāriu-ato’a-hia ’oia, ’e ’ua haere ’oia i te misiōni nō te ti’a nō te ’Ēkālesia ma te tusia moni huru rahi. Te vahine tā’u i fa’ahiti ’o te hō’ē ïa o nā maha ’ahuru ma toru ta’ata tāna i tauturu i te ’āfa’i mai i roto i te ’Ēkālesia ē tae roa mai i taua taime ra. ’Ua fa’arahi teie taure’are’a nō Beresiria iāna iho hau atu i te hō’ē hānere taime—maha ’ahuru ma toru melo fa’afāriu nāna iho ’e e ono ’ahuru nā roto i te hō’ē o te mau ta’ata tāna i fa’afāriu mai, e hau atu nō roto mai i te tahi o tāna mau ta’ata fa’afāriuhia ’o te haere mai ā.¹²

E rave rahi o tātou e fa’ariro nei i te ’ohipa misiōnare mai te haere noa e ’ōpere i te mau buka. ’Ua ’ite te ta’ata ato’a ’o tei mātau i teie ’ohipa ē tē vai nei te hō’ē rāve’a maita’i a’e. Taua rāve’a ra e mea nā roto ïa i te mau melo nō te ’Ēkālesia. I te mau taime ato’a e fa’a’ite mai te hō’ē melo i te hō’ē melo ’ore, tē vai ra i te reira iho ā taime te hō’ē fa’anahora’a nō te pāturura’a i taua melo ’ore ra. E fa’a’ite te melo i tōna ’itera’a pāpū nō ni’a i te parau mau o te ’ohipa. E māna’ona’o ’oia i te ’oa’oa o tōna hoa melo ’ore. E ’ana’anatae rahi ’oia ’a haere ai taua hoa ra i mua i roto i tāna ha’api’ira’a i te ’evanelia.

Nā te mau misiōnare rave tāmau e fa’atere i te ha’api’ira’a, nā te melo rā, i te mau taime ato’a e nehenehe iāna, e pāturu i taua ha’api’ira’a ra nā roto i te pūpūra’a i tōna fare nō te fa’ahaere i teie tāvinira’a misiōnare. E fa’a’ite te melo i tōna ’itera’a pāpū nō ni’a i te hanahana o te ’ohipa. Tei reira ïa ’oia nō te pāhono i te mau uira’a mai te mea ’aita te mau misiōnare i reira. E riro ïa ’oia ’ei hō’ē hoa nō te melo fa’afāriuhia ’o te rave i te hō’ē tauira’a rahi roa ’e te fifi i te mau taime ato’a.

E ’ere te ’evanelia te tahi mea e ha’amāhia. Te tahi rā mea e ti’a ’ia te’ote’ohia. « ’Eiaha ’oe e ha’amā i te parau o tō tātou Fatu », tā Paulo ïa i pāpa’i atu ia Timoteo (2 Timoteo 1:8). Tei te mau vāhi ato’a te mau rāve’a nō te fa’a’ite i te ’evanelia […]

« Tei te mau vāhi ato’a te mau rāve’a nō te fa’a’ite i te ’evanelia ».

Te ravera’a nō te fa’ahaere mai i te mau ta’ata ’āpī i roto i te ’Ēkālesia e ’ere ïa i te hōpoi’a nā te mau misiōnare ana’e. E manuia maita’i rātou ’ia riro ana’e te mau melo ’ei puna i reira te mau melo ’ore ’āpī e ’itehia ai […]

’Ia fa’atupuhia te hō’ē ’itera’a i roto i te ’ā’au o te melo tāta’itahi nō tōna ’aravihi ’ia fa’ahaere mai ia vetahi ’ē i te hō’ē ’itera’a nō ni’a i te parau mau. ’Ia ha’a ’oia i ni’a i te reira. ’Ia pure ’oia ma te hina’aro rahi nō ni’a i te reira […]

Tō’u mau taea’e ’e mau tuahine, e nehenehe tā tātou e vaiiho i te mau misiōnare ’ia tāmata i te rave i te reira rātou ana’e, ’aore rā e nehenehe tā tātou e tauturu ia rātou. Mai te mea e rave rātou i te reira ’o rātou ana’e, e pātoto atu ïa rātou i te mau ’ōpani i te mau mahana ato’a e iti mai ïa te ’ō’otira’a. ’Aore rā ’ei mau melo, e nehenehe tā tātou e tauturu ia rātou ’ia ’imi ’e ’ia ha’api’i i te mau melo ’ore […]

’Ia fa’atupuhia i roto i te mau titi ato’a te hō’ē ’itera’a i te rāve’a ’ia ’imi i te mau ta’ata ’o te fa’aro’o i te parau poro’i o te ’evanelia. ’Eiaha rā tātou e fa’a’ino’ino… ’Eiaha tātou ’ia fa’arahi ia tātou. Te mauha’a hau atu i te maita’i tā tātou e ’āfa’i ’o te maita’i ïa o tō tātou iho mau orara’a ’e tō tātou hi’ora’a maita’i. ’A rave ai tātou i teie tāvinira’a, e maita’i ïa tō tātou orara’a, nō te mea e ara tātou ’ia ’ore e rave ’aore rā e parau i te tahi mea ’o te fa’ataupupū i te terera’a i mua o te feiā tā tātou e tāmata nei i te arata’i atu i te parau mau […]

E ti’a ’ia rahi mai te ’ana’anataera’a i te mau tuha’a ato’a i roto i te ’Ēkālesia. ’Ia paraparauhia te parau nō te [’ohipa misiōnare] i te tahi mau taime i roto i te purera’a ’ōro’a. ’Ia tuatāpapahia te reira i roto i te autahu’ara’a ’e te Sōtaiete Tauturu i roto i tā rātou mau apo’ora’a hepetoma. ’Ia paraparau te feiā ’āpī tāne ’e te feiā ’āpī vahine i te reira ’e ’ia fa’anaho rātou i te mau rāve’a nō te tauturu i roto i teie ’ohipa faufa’a rahi roa. ’Ia feruri ato’a te mau tamari’i Paraimere i te mau rāve’a nō te tauturu. E rave rahi mau metua tei haere mai i roto i te ’Ēkālesia nō te mea ’ua ani mānihini te hō’ē tamari’i ia rātou ’ia haere i te Paraimere […]

Te mau taea’e ’e te mau tuahine, ’o ’outou pā’āto’a i roto i te mau pāroita ’e te mau titi ’e i roto i te mau mata’eina’a ’e te ’āma’a, tē ani mānihini nei au ia ’outou ’ia riro mai ’ei hō’ē nu’u ’ana’anatae rahi nō teie ’ohipa ’e te hō’ē hina’aro pūai rahi ’ia tauturu i te mau misiōnare i roto i tā rātou hōpoi’a rahi ’ia ’āfa’i i te ’evanelia i te mau nūna’a ato’a, te mau ’ōpu ato’a, te mau reo ato’a ’e te mau fenua ato’a. « ’Ua teatea ato’a te ’āua ’e ’ua [ineine ho’i] nō te tau ’auhune » (PH&PF 4:4). ’Ua parau tāmau te Fatu i te reira. E’ita ānei ïa tātou e ti’aturi i Tāna ra parau ?¹³

I te i’oa o te mau misiōnare… tē hina’aro nei au e ani i te feiā mo’a ato’a ’ia rave i te mau mea ato’a e nehenehe ia ’outou ’ia rave nō te hōro’a i te i’oa o te mau [ta’ata] tā rātou e nehenehe e ha’api’i. E ’oa’oa ïa ’outou ’ia nā reira ana’e ’outou. Te mau ta’ata ato’a tā ’outou e ’ite ’ia tomo mai i roto i te ’Ēkālesia nā roro i tā ’outou tauto’ora’a, e ’āfa’i mai ïa rātou i te ’oa’oa i roto i tō ’outou orara’a. Tē fafau atu nei au i te reira ia ’outou tāta’itahi.¹⁴

E ’āfa’i mai te ’ohipa misiōnare rave tāmau i te ’oa’oa maoro i roto i te feiā e tāvini ra.

E ti’a ia tātou ’ia fa’arahi i te fāito o te parau ti’a ’e te mau tītaura’a o te mau ta’ata e haere nā te ao nei ’ei mau ti’a nō te Fatu ra ia Iesu Mesia.¹⁵

Tē hina’aro nei tō te ao i teie mahana i te mana nō te ’itera’a pāpū vi’ivi’i ’ore. Tē hina’aro nei tō te ao i te ’evanelia a Iesu Mesia, e mai te mea e ti’a i tō te ao ’ia fa’aro’o i taua ’evanelia ra, e ti’a ’ia vai mai te mau ve’a nō te ha’api’i atu i te reira.

Tē ani nei mātou i te mau metua ’ia ha’amata ’oi’oi i te ha’api’i i tā rātou mau tamari’i [nō te tāvinira’a misiōnare]. I roto i te pure ’utuāfare ānei, i roto i te mau pō ’utuāfare ānei, i te taime nō te tai’ora’a i te mau pāpa’ira’a mo’a ānei, i reira e mea itoito te metua tāne ’e te metua vahine i roto i te ’Ēkālesia ē ’ia paraparau ma te ’ana’anatae rahi nō ni’a i te ’Ēkālesia ’e te ’evanelia, e ’ī noa ïa te mau tamari’i i roto i taua mau ’utuāfare ra i te hina’aro ’ia ha’api’i i te ’evanelia ia vetahi ’ē. I te rahira’a o te taime tē vai nei te hō’ē peu tumu nō te ’ohipa misiōnare i roto i taua mau huru ’utuāfare ra. E ha’amauhia te moni ha’aputu i te na’ina’ira’a o te mau tamari’i. E pa’ari te mau tamāroa ma te hō’ē ti’aturira’a ē e pi’ihia ïa rātou ’ia tāvini ’ei mau misiōnare nō te ’Ēkālesia. E riro mai ïa te hō’ē misiōni mai te hō’ē tufa’a nō te orara’a o te hō’ē tamāroa mai te ha’api’ira’a.¹⁶

Te ’ohipa misiōnare e hōpoi’a tumu ïa nā te autahu’ara’a. Nō reira, e ti’a ai i tō tātou feiā ’āpī tāne ’ia ’amo i te rahira’a o te hōpoi’a. Nā rātou teie hōpoi’a ’e teie tītaura’a.¹⁷

E te feiā ’āpī tāne, tē ti’aturi nei au ē tē fa’aineine nei ’outou pā’āto’a nō te tāvinira’a misiōnare. E’ita tā’u e nehenehe e fafau atu ia ’outou i te ’ārearea. E’ita tā’u e nehenehe e fafau atu ia ’outou i te orara’a maita’i ’e te au. E’ita tā’u e nehenehe e fafau atu ia ’outou ē e’ita ’outou e fa’aruru i te hepohepo, i te ri’ari’a, te ’ati rahi i te tahi mau taime. E nehenehe rā tā’u e fafau atu ia ’outou ē e tupu ’outou e ’ere rā mai te reira te huru i roto i te hō’ē ā taime, i roto i te tā’āto’ara’a o tō ’outou nei orara’a. E nehenehe tā’u e fafau atu ia ’outou te hō’ē ’oa’oa ta’a ’ē roa ’e te fa’ahiahia ’e te vai maoro mai. E nehenehe tā’u e fafau atu ia ’outou ē e hi’opo’a fa’ahou ’outou i tō ’outou orara’a, ē e ha’amau ’outou i te mau mea faufa’a rahi ’āpī, e ora piri atu ’outou i te Fatu, ’e e riro te pure ’ei ’ohipa mau ’e te fa’ahiahia, ’e e haere ’outou ma te fa’aroo i roto i te hope’ara’a o te mau mea maita’i tā ’outou e rave.¹⁸

Tē hina’aro nei mātou i te tahi feiā ’āpī tamāhine [nō te tāvini i te misiōni]. Tē rave nei rātou i te hō’ē ’ohipa fa’ahiahia. E nehenehe ia rātou ’ia tomo atu i roto i te mau fare e’ita e nehenehe i te mau taea’e e haere atu […]

[’Āre’a rā]… ’eiaha te feiā ’āpī tamāhine e mana’o ē e hō’ē ā tā rātou ’ohipa i tā te feiā ’āpī tāne. Tē hina’aro rahi nei te tahi o rātou ’ia haere. Mai te mea e hina’aro rātou, e ti’a ïa ia rātou ’ia paraparau atu i tō rātou mau ’episekōpo ’e tō rātou ato’a mau metua… I te mau tuahine, tē parau atu nei au ia ’outou ’ē e fa’atura-rahi-hia ’outou, e hi’ohia ’outou mai te mea ra ē ’ua fa’auehia ’outou, e fāri’ihia tā ’outou mau tauto’ora’a ’e te Fatu ’e e te ’Ēkālesia ’ia haere ’outou ’aore rā ’ia ’ore ’outou e haere i te misiōni.¹⁹

Ta’a ’ē noa atu ē tē hina’arohia ra te mau misiōnare tāne ’e te misiōnare vahine, tē vai nei te hō’ē hina’aro rahi nō te mau tāne ’e te mau vahine fa’aipoipo i roto i te misiōni. Tē rave nei te mau tāne pa’ari ’e tā rātou mau vahine fa’aipoipo i te hō’ē ’ohipa fa’ahiahia i roto i te mau misiōni. E rave rahi atu ā ’o te hina’arohia. Tē hina’aro nei mātou i te feiā iho ā rā e mea ’aravihi rātou i roto i te mau reo ’e’ē. E nehenehe tā rātou e tāvini i roto i te mau ti’ara’a e rave rahi i raro a’e i te arata’ira’a a te mau peresideni misiōni maita’i ’e te here.

Tē rahi noa atu ra te feiā e haere nei i roto i te fa’atufa’ara’a ma te tino maita’i ’e te pūai, e rave rahi ho’i ’o te nehenehe e fa’a’ohipahia i roto i te ’ohipa a te Fatu.²⁰

Tē [vai nei ] tā tātou mau tāne ’e mau vahine tei fa’atufa’ahia ’o te tāvini manuia maita’i nei ’ei misiōnare nā te ’Ēkālesia nā te ao nei. Tē rahi nei tō rātou nūmera. Tē haere nei rātou i te vāhi i pi’ihia’ ai rātou. Tē tāvini nei rātou i te vāhi i hina’arohia ai rātou. E ha’amauhia te mau auhoara’a ; e ’ōperehia te mau ’ite ; e matara te mau rāve’a nō te mau taata ’o te ’ore roa atu e ha’amo’e i te mau tāne ’e te mau vahine tei haere mai i rotopū ia rātou ma te vārua nounou ’ore nō te ha’api’i ’e nō te hāmani maita’i. ’Aita rātou e fāri’i nei i te moni. Nā rātou iho tā rātou mau ha’amāu’ara’a ’ia haere rātou. ’Aita e ’ōti’a te fāito nō tō rātou itoito. E’ita e noa’a i te nūmerahia te mau ha’amaita’ira’a nō tā rātou mau tauto’ora’a.²¹

« Tē hina’aro nei tō te ao i te ’evanelia a Iesu Mesia, e mai te mea e ti’a i tō te ao ’ia fa’aro’o i taua ’evanelia ra, e ti’a ’ia vai mai te mau ve’a nō te ha’api’i atu i te reira ».

’A fa’a’ite ai tātou i te ’evanelia ia vetahi ’ē, e tauturu mai ïa te Vārua o te Fatu ’ia fa’a’ore i te mau ta’a-’ē-ra’a i rotopū ia tātou.

Nō te mea ho’i ē nō roto mai tātou i te hō’ē ā mau metua [’ei mau tamari’i a te Atua], e pāhono atu ïa tātou i te hō’ē ā parau mau. Te mea ra ē e huru ’ē ri’i te ’iri o te hō’ē ta’ata, e mea huru ’ē ri’i te huru o te mata o te tahi, e mea huru ’ē ri’i te ’ahu e ’ō’omohia ra ’e te hō’ē ta’ata, e’ita ïa te reira e fa’ariro iāna ’ei ta’ata ta’a ’ē. E pāhono te mau tāne ’e te mau vahine nā te ao ato’a nei i te hō’ē ā fa’atianira’a nā roto i te hō’ē ā huru. Tē ’imi nei rātou i te māhanahana ’ia to’eto’e rātou ; e ’ite rātou i te hō’ē huru māuiui ; tē ’ite nei rātou i te ’oto, ’e te ’oa’oa […]

’Ia ti’a ana’e mai te mau huru-’ē-ra’a—te mau ta’ata tupu ānei aore rā i roto i te tahi atu mau ta’ere—’ei mau ha’afifira’a ’a tūtava ai tātou i te fa’a’ite i te ’evanelia, i te rahira’a o te taime nā te peu maita’i e ’īriti i teie mau ha’afifira’a. ’Ia ha’apa’o ana’e tātou i te fa’auera’a a te Fatu ’ia fa’a’ite i te ’evanelia ia vetahi ’ē, tē fa’a’ite pāpū nei au ē e tauturu te Vārua o te Fatu ’ia fa’aore i te mau huru-’ē-ra’a i rotopū i te ta’ata ’o te ha’api’i atu ’e te ta’ata ’o te ha’api’ihia ra. ’Ua ha’amāramarama mai te Fatu i te rāve’a ’a parau ai ’Oia ē, « nō reira, ’o ’oia ’o te a’o atu ’e ’o te fāri’i mai, ’ua ’ite ïa rāua te tahi ’e tahi, ’e e ha’amaita’ihia rāua to’opiti ’e e ’oa’oa ’āpipiti ho’i rāua » (PH&PF 50:22).

Tē māuruuru nei au ē te rāve’a maita’i roa a’e ia tātou tāta’itahi ra i roto i tā tātou pi’ira’a ’ia fa’a’ite i te ’evanelia, ’o te Vārua ïa o te Fatu. ’Ua ’ite pā’āto’a tātou i te reira i roto ia vetahi ’ē. ’Ia rave ana’e tātou i te ’ohipa a te Fatu, ’ua ’ite ato’a ïa tātou i te reira i roto ia tātou iho. I taua mau taime ra, e au ra ē e marua mai te mau huru-’ē-ra’a i rotopū ia tātou ’e te mau ta’ata tā tātou e ha’api’i atu mai te mau poa mai roto mai i tō tātou mau mata. (Hi’o 2 Nephi 30:6). E hiti mai te hō’ē vārua māhanahana ’e te auhoara’a ’e te fa’ahiahia ’ia hi’o atu. E ’ite māite tātou te tahi i te tahi, ’e e ha’amaita’i ’e e ’oa’oa tātou pā’āto’a.²²

’A haere ai tātou ma te fa’aro’o, e ha’amaita’i mai ïa te Fatu i tā tātou mau tauto’ora’a nō te fa’a’ite ia vetahi ’ē i te ’evanelia.

Tei roto mau tātou i te hō’ē ’ohipa māere ’e te ’ūmerehia… ’Ua fa’atupu te Atua nō te ra’i i teie semeio nō te mau mahana hope’a nei, ’e te mea tā tātou i ’ite ’o te hō’ē ïa tāmata-noa-ra’a o te mau mea rarahi a’e ’o te tae mai. E ravehia te ’ohipa ’e te mau tāne ’e te mau vahine ha’eha’a, te mea ’āpī ’e te mea pa’ari.²³

E manuia te ’ohipa nō te mea ’ua fafau mai te Fatu :

« E ’o ’oia o te fāri’i mai ia ’outou na, ’ei reira ato’a ia vau, nō te mea e haere au nā mua i tō ’outou mata. E vai ho’i au i tō ’outou pae ’atau ’e i tā ’outou pae ’aui, ’e ’ei roto ho’i tō’u Vārua i tō ’outou ’ā’au, e ta’u mau melahi ho’i e ’ati noa a’e ia ’outou na, ’ia ha’amara’a mai ia ’outou i ni’a ». (PH&PF 84:88).

Ma te fa’auera’a tei hōro’ahia mai ia tātou e te Atua, ’e te mau ha’amaita’ira’a tei fafauhia mai e te Atua, e haere ana’e na tātou ma te fa’aro’o. ’Ia nā reira tātou, e ha’amaita’i mai ïa te Fatu i tā tātou mau tauto’ora’a. E rave ana’e tātou i tā tātou tufa’a nō te fa’a’itera’a i te ’evanelia i te feiā nā pīha’i iho ia tātou, nā roto, nā mua, i te hi’ora’a maita’i ’e i muri iho nā roto i te ha’api’ira’a fa’auruhia.

E tāmau ïa te ’ōfa’i tei ’ō’otihia mai ’aita rā e rima i te ’ōhu ē tae noa atu e ’ī te fenua tā’āto’a. (Hi’o Daniela 2). Tē hōro’a nei au ia ’outou i tō’u ’itera’a pāpū nō teie parau mau ’e nō te parau mau tā ’outou tāta’itahi e nehenehe e tauturu nā roto i te mau rāve’a ’o te tano i tō tātou mau huru orara’a mai te mea e ’imi tātou i te arata’ira’a ’e te fa’aurura’a a tō tātou Metua i te Ao ra. Teie te ’ohipa a te Atua tā tātou e rave nei, ’e nā roto i tāna ha’amaita’ira’a e manuïa ïa tātou.²⁴

Te mau mana’o tauturu nō te tuatāpapara’a ’e te ha’api’ira’a

Mau uira’a

Nō te aha tātou e mata’u ai i te tahi mau taime ’ia fa’a’ite i te ’evanelia ? E aha te tahi mau rāve’a e nehenehe ai ia tātou ’ia ha’avī i taua mata’u ra ’e ’ia haere atu e fārerei ia vetahi ’ē ? (Hi’o te tuha’a 1). E aha te tahi mau semeio nō te ’ohipa misiōnare tā ’outou i ’ite mata ?
Nō te aha te mau misiōnare e « manuia maita’i ’ia riro ana’e te mau melo te puna i reira te mau melo ’ore ’āpī e ’itehia ai »? (Hi’o te tuha’a 2). E aha te tahi mau rāve’a ’ē atu e nehenehe te mau melo e tauturu i te mau misiōnare rave tāmau ?
Nō te aha te mau misiōni rave tāmau i riro ai ’ei mea faufa’a rahi roa i roto i te orara’a o te mau ta’ata tei tāvini ? Nāhea e nehenehe ai i te mau metua ’ia tauturu i tā rātou mau tamari’i ’ia fa’aineine i te tāvini i te mau misiōni rave tamau ? (Hi’o te tuha’a 3). Nāhea tā te mau ’utuāfare e nehenehe ai e tauturu i te mau tāne ’e te mau vahine pa’ari ’ia tāvini ?
’A hi’o fa’ahou i te tuha’a 4. E aha te tahi o te mau tāpa’o mātauhia e ’itehia nei i roto i te mau ta’ata ato’a ? Nāhea e nehenehe ai ia tātou ’ia fa’a’ore i te mau huru-’ē-ra’a ’o te riro ’ei mau ha’afifira’a nō te fa’a’itera’a i te ’evanelia ? Nāhea tō ’outou ’itera’a i te Vārua o te Fatu i te tauturura’a i te mau ta’ata ’ia fa’a’ore i te mau huru-’ē-ra’a ?
’Ua ha’apūai te peresideni Hinckley ē e ha’amaita’i mai te Fatu i tā tātou mau tauto’ora’a ’ia fa’a’ite i te ’evanelia mai te mea e « haere tātou i mua ma te fa’aro’o » (tuha’a 5). Nāhea tā ’outou e nehenehe ai e fa’arahi i tō ’outou hina’aro ’e tō ’outou fa’aro’o ’ia fa’a’ite i te ’evanelia ?

Te mau pāpa’ira’a mo’a

Isaia 52:7 ; Mataio 28:19–20 ; Alama 26:1–5 ; PH&PF 1:20–23 ; 4 ; 18:15–16 ; 38:40–41

Tauturu ha’api’ira’a

« ’Eiaha e taiā i te taime māniania ’ore. E mea pinepine te mau ta’ata i te rave i te taime nō te feruri hou ’a pāhono ai i te mau uira’a ’e ’aore rā ’a fa’a’ite ’ai i tō rātou mau mana’o. E nehenehe ’outou e rave i te hō’ē taime fa’aeara’a i muri a’e i tā ’outou uira’a, i muri a’e i te fa’ati’ara’ahia te hō’ē ’ā’amu pae vārua ’e ’aore rā i te taime e fifi ai te hō’ē ta’ata i te fa’a’ite i tōna iho mau mana’o » (Te Ha’api’ira’a : ’Aita e Pi’ira’a Te’itei A’e [1999], 67).