Mataupu 4

Ola Fiafia i Taimi Faigata

“O le fiafia iinei ma i le taimi nei e aofia ai le faailoaina atu saoloto, ma le alofa, ma le fiafia o le finagalo o le Atua mo i tatou—ma le faia i auala uma ma tulaga uma e tetele ma laiti.”

Mai le Soifuaga o Ezra Taft Benson

O se tasi o uluai tofiga a Peresitene Ezra Taft Benson i le avea ai ma se Aposetolo, o le fesoasoani lea e aumai le toomaga i le Au Paia i Europa i le mavae ai o le Taua Lona II a le Lalolagi. A o malaga atu i Siamani, sa feiloai atu o ia i tagata faamaoni o e na mafai ona ola manuia e ui lava i faatafunaga na siomia ai i latou. Sa ia tusia i lana api o talaaga:

“O le faafanoga na sili ona leaga ua ou molimauina sa ou vaai i ai ananei. … A o ou tietie atu i auala [o Perelini] ma savalia nisi o auala sa le mafai ona sao i ai se taavale, sa ou … vaaia ai ni fafine na toetoe a matelaina i le fiaaai, o totogi atu ma le naunautai se tau na taugata tele mo ni pa’u pateta. … sa ou vaaia toeaiina ma olomatutua ma ni tama’i to’i o eliina ma le naunautai ni tagutugutu laau ma ni aa laau i se taumafaiga ia maua ai ni fasi fafie ona toso atu lea o na mea i le fale i le tele o maila, i soo se mea e mafai ona taavale—mai ni pa’u laiti o se mea na avea muamua ma taavale pepe e oo i taavale toso laiti—na pei o ni manuvaefa sa aveina uta mamafa.

“Mulimuli ane na matou faafesagai ai i totonu o le fogafale tolu o se faletele malulu ma na tele ina faaleagaina i se magaala na tu’ipomuina, ma le toa 480 o tagata faamaoni, maalilili ma fiaaai o le Au Paia o Aso e Gata Ai i se sauniga konafesi. Sa o se faamalosiauga le vaaia o le malamalama o le faatuatua. … Sa leai ni lagona tiga po o le ita, ae o le toe faafoi atu o se lagona matagofie ma le faailoaga o le faatuatua i le talalelei.”¹

“Na leai ma se tasi o le au paia na faato’ai mai se faitioga e uiga i o latou tulaga e ui o le mea moni lava, o nisi sa i ai i tulaga faaiu o le matelaina i le fiaaai lea na vaaitino i ai o matou mata.

“… O o tatou Au Paia … e tumu i le faamoemoe, lototoa, ma le faatuatua, ma po o fea lava latou te i ai, latou te tulimatai atu lava ma le laufofoga fiafia ma se faaaliga o le faatuatua loloto mo le talalelei ma mo le avea ai o i latou ma tagata auai o le Ekalesia. O se tasi lea o faaaliga aupito maoae ua matou vaaia o fua moni o le talalelei i soifuaga o alii ma tamaitai.”²

Sa vaaia foi e Peresitene Benson ni faataitaiga o le faamoemoe ma le talitonu o le a lelei mea uma, na latalata atu ia te ia, lea sa tumau ai le foliga fiafia o ona uso a faifaatoaga e ui lava ina sa latou feagai ma ni faigata ogaoga. Sa ia faapea mai:

“Ou te manatua lo’u auai ai i se fonotaga e latalata i Bancroft, Idaho. … Sa manaia lava le matou fonotaga, ma ina ua ma’ea, sa ou feiloai atu i nisi o faifaatoaga lelei sa i ai iina, ma o se tasi o i latou o se tamalii e suafa ia Uso Yost, ma sa ou faapea atu, ‘Uso Yost, o a mai tulaga o le faatoaga?’ Sa fai mai Uso Yost, ‘Oi, o loo manuia, Uso Benson, ae pe a ma le 20 afe talā ua sili atu ai ona ou faaletonu nai lo le mea sa ou i ai i le tolu aso talu ai.’ Sa ou fai atu, ‘O le a le mea ua tupu—o se isi malulu?’ Sa ia faapea mai, ‘Ioe, ua lavea ai le sana ae ua lata ona matua, ma ua e silafia lava foi le uiga o lena mea.’ Sa ia fai mai, ‘O taeao e amata ai ona matou moaina i lalo ia sana, ae o loo lelei lava mea uma. O loo i ai lava sina sana itiiti i le paelo, ma ua uma ona tuuese se vaega itiiti o la matou sapalai mo le tausaga. O le a matou le matelaina, ma o le a i ai foi se isi seleselega.’ A o ma tuumuli ese atu, sa ou fai atu i lo’u toalua, ‘Oka se manaia o le agaga lena.’

“Sa matou tietie atu i Logan [o se aai i Iuta, pe a ma le 80 maila, pe 130 kilomita, mai Bancroft]. Sa matou i ai ma la’u fanau, ma sa matou tutu i le Magaala Autu matou te o atu i se faleoloa e aumai ni nai kuki mo tamaiti. Ma o ai la na tatau ona ou fetaui i ai i luga o le auala savali, o Uso Yost. Sa ou fai atu, ‘O le a lau mea o fai iinei i lenei mea mamao?’ Sa ia fai mai, ‘Uso Benson, o le aso lenei ma te o ai i le malumalu.’ Ma sa ou fai atu, ‘E le mafai e mea faaletonu ona faavaivaia lua agaga a ea?’ Ona ia aoao mai lea o se lesona ia te a’u. Fai mai a ia, ‘Uso Benson, a oo mai faafitauli, o taimi ia e sili ona tatou manaomia ai le malumalu.’”³

O tali a Peresitene Benson lava ia i faigata na faagaeetiaina ai i latou na iloaina o ia, e pei lava foi ona faamalosia o ia e faataitaiga a isi tagata o le Au Paia. Na faamatalaina e Elder Neal A. Maxwell o le Korama a Aposetolo e Toasefululua ia Peresitene Benson o se “tagata e maitauina ma le toto’a ia mea e tutupu, [o lē] e faatumauina se talitonuga mautinoa o le a lelei mea uma ma le fiafia lea e lelei pe a tatou mataituina. O sea talitonuga faapea o le a lelei mea uma,” fai mai ai Elder Maxwell, “e le sau mai le le ano i mea o loo tutupu, ae e mai i le matauina o nei mea ae o loo vaavaai atu i ona talaatu i folafolaga e faatatau i auala o le a iu ina manumalo ai le malo.”⁴

Sa fai e Peresitene Ezra Taft Benson se faataitaiga o le ola fiafia.

Aoaoga a Ezra Taft Benson

Faatasi ai ma le faatuatua i lo tatou Tama Faalelagi, e mafai ai ona tatou maua le faamoemoe mo le lumanai, talitonu o le a lelei mea uma i a tatou galuega o fai nei, ma le lagona toafilemu o le loto.

O le a tatou oo uma i le le fiafia ma le lotovaivai—o le vaega lena o le olaga. Ae afai o le a ia i tatou le faatuatua, o mea faalavefau ia i tatou o le a na’o sina taimi, ma o le a oo mai le manuia mai mea e foliga mai ua tatou toilalo ai. E mafai e lo tatou Tama Faalelagi ona faia vavega e ala atu ia i tatou taitoatasi pe afai o le a tuu atu o tatou talitonuga ma lo tatou faalagolago ia te Ia.⁵

O se faamanuiaga sili le i ai o le filemu i le loto, le i ai o se faamautinoaga, le i ai o se agaga o le toafilemu ma le toafimalie i le loto i taimi o puapuaga ma faigata, i taimi o le faanoanoa ma tofotofoga. E faamalie loto le iloa o loo tu le Atua i le foe, e silafia e Ia Lana fanau, ma e mafai ona tatou tuu atu ma le talitonu atoa lo tatou faatuatuaga ia te Ia.⁶

O le tatalo—tatalo faatauanau —e mafai ona tatou fesootai ai ma le Atua, lo tatou punavai silisili o le mafanafana ma fautuaga. “Tatalo e le aunoa, ina ia mafai ona e sau ai o lē ua manumalo.” (MF&F 10:5.) O le “faaaogaina o lo’u malosi atoa e valaau atu ai i le Atua e laveai a’u” o le auala lea na faamatala ai e Iosefa Samita talavou le auala na ia faaaogaina i le Vao Paia e taofi ai le fili mai le faaumatiaina o ia. (IS—T 1:16.)⁷

A aunoa ma le faatuatua i lo tatou Tama Faalelagi, e le mafai ona tatou manuia. O le faatuatua tatou te maua ai le vaaiga mamao i le mea e ono tupu, faamoemoe mo le lumanai, ma le talitonu o le a lelei mea uma i a tatou galuega o i ai nei. A i ai le faatuatua, tatou te le masalosalo lava i le faamanuiaina mulimuli ane o le galuega.⁸

Mai tagata uma lava, o i tatou i le avea ai o ni Au Paia o Aso e Gata Ai, e tatau ona sili atu lo tatou talitonu o le a lelei mea uma ae ia aupito itiiti se lagona o le a le lelei mea uma. Aua e ui ua tatou iloa “o le a aveesea ai le filemu mai le lalolagi, ma o le a maua ai e le tiapolo le mana i luga o lana lava pulega,” ae ua faamautinoa mai foi ia i tatou “o le a i ai foi i le Alii le mana i luga o lana au paia, ma o le a nofotupu i lo latou lotolotoi.” (MF&F 1:35–36.)

Faatasi ai ma le faamautinoaga o le a tumau pea ona pipii le Ekalesia i le Atua e taitaiina ai i taimi faigata o loo lumanai, ua avea ai la ma o tatou tiutetauave le vaaia o tutumau i tatou uma taitoatasi i le faamaoni i le Ekalesia ma ana aoaoga. “Ae o ia o le e nofo tumau ma lē faatoilaloina, o ia lava lea o le a faaolaina.” (IS—M 1:11.)⁹

O le fiafia e tatau ona maua i lea aso ma lea aso, ae e tauia i taumafaiga uma.

E leai se mafuaaga tatou te soona popole ai. Ola i le talalelei ma tausi poloaiga. Ia auai i a outou tatalo i po ma taeao i le tou aiga. Ia tausisia tulaga faatonuina o le Ekalesia. Taumafai e ola toafimalie ma le fiafia. … O le fiafia e tatau ona maua i lea aso ma lea aso. Ae e tauia i taumafaiga uma.¹⁰

A o tigaina le gasegase o Siaosi A. Samita, sa asiasi atu i ai lona tausoga, le Perofeta o Iosefa Samita. Sa lipoti mai e le alii puapuagatia: “Sa fai mai [le Perofeta] ia te a’u e aua lava ne’i ou lotovaivai, po o a lava faigata e ono siomia ai a’u. Afai ou te magoto ifo i le lua aupito maualalō i Nova Scotia pe tanumia foi a’u i le Mauga Papa atoa, e le tatau ona ou lotovaivai, ae ia pipii pea, faaaoga le faatuatua, ma ia tumau pea i le lototele lelei, ma o le a ou manua’e i luga o le faupuega.” …

E i ai taimi ia e tatau ai ona e pipii pea ma le amiotonu ma faatoilalo ai le tiapolo seia oo ina aluese atu lona agaga le fiafia ma oe. E pei ona ta’u atu e le Alii i le Perofeta o Iosefa Samita: “O lou tiga ma ou puapuaga o le a na’o sina minute laitiiti;

“Ma ona oo lea, afai e te talitalia lelei, o le a faaeaina oe e le Atua i lugā.” (MF&F 121:7–8.)

O le fetaomi atu i taumafaiga malualii, e tusa lava pe o siomia e ao o le popolevale, o le a iu lava ina aumaia ai oe i fafo i le tumutumu o le la susulu. Na oo lava foi i lo tatou matai o Iesu le Keriso, a o feagai ma lena tofotofoga sili o le tuua toatasi mo se taimi le tumau e lo tatou Tama Faalelagi i le taimi o le faasatauroga, ae na faaauau pea ona faatino ana galuega mo le fanauga a tagata, ma sa lei pine ina ua mavae lena, sa faamamaluina ai o ia ma maua le atoatoaga o le olioli. A o afatia ai oe i ou tofotofoga, e mafai ona e mafaufau i mea na e manumalo ai i taimi ua mavae ma faitau faamanuiaga ua e maua ma se faamoemoe mautinoa o isi faamanuiaga sili atu o le a mulimuli mai pe afai e te faamaoni. Ma e mafai ona e maua lena malamalama mautinoa i le taimi e tatau ai, o le a soloiesea ai e le Atua loimata uma o “mea e le’i vaaia e mata, e le’i lagona foi e taliga, e le’i oo foi i le loto o se tagata, o mea ia ua saunia e le Atua mo i latou o e alolofa ia te ia.” (1 Korinito 2:9.)¹¹

Ia e fiafia i mea uma e te faia. Ola olioli. Ola fiafia. Ola naunautai, i le iloa e le afio le Atua i le le fiafia ma lagona faanoanoa, ae o le malamalama ma le alofa.¹²

“O le ola fiafia o le tuputupua’e lea i le malosiaga faaleagaga e agai atu i le atoatoa.”

E finagalo le Tama Faalelagi ia tatou fiafia, ma o le a Ia faamanuia i tatou a o tatou mulimuli ai i Lona finagalo mo i tatou.

“Ua ola tagata ina ia latou maua le olioli” (2 Nifae 2:25). E finagalo lo tatou Tama Faalelagi ia tatou fiafia. Ua Ia faamoemoeina i tatou ina ia fiafia. Ae e leai se fiafia i le tuuina i lalo o tulaga faatonuina. E leai se fiafia pe a e le ola e tusa ai ma ou talitonuga maumaututu, e tusa ai ma mea ua e iloa e sa’o. E faigofie tele ona fatu le mausa o le tuuālaloina o tulaga faatonuina o ni mea faapitoa. E faigofie tele ona fatu le mausa o le saili masei, po o le faitio, po o le teulotoina o ni masalosaloga e uiga i ni mea faapitoa i le Ekalesia. E faigofie tele ia i tatou ona oo i lagona tiga, ona nofonofo ai lava lea ma lena lagona, ma oo ina faanoanoa ma tatou feoai ai lava ma foliga faanoanoa. O se foliga faanoanoa e le mafai ona manumalo i se fetauaiga i le taua po o le alofa.¹³

Pe ua tatou iloa ea o le fiafia iinei ma i le taimi nei e aofia ai le faailoaina atu saoloto, ma le alofa, ma le fiafia o le finagalo o le Atua mo i tatou—ma le faia i auala uma ma mea uma e tetele ma laiti? O le ola atoatoa lelei o le ola fiafia lea. O le ola fiafia o le tuputupua’e lea i le malosiaga faaleagaga e agai atu i le atoatoa. O faatinoga uma e faia e tusa ai ma le finagalo o le Atua, o se vaega lea o lena tuputupua’e. Ia aua ne’i o tatou vaevaea o tatou olaga. Ia tatou tuufaatasia o tatou olaga, ia le popole i viiga ma mamalu ia e le oo mai faatasi ma le faamaoniga a le Atua. Ia tatou manatua o le punavai moni o lo tatou malosi ma le fiafia, e le au atu i ai le malosi o le tagata ma tulaga.¹⁴

E ao ona tatou aoao ma aoao pea, e na’o le taliaina ma le ola ai i le talalelei o le alofa, e pei ona aoao mai e le Matai ma e na’o le faia o Lona finagalo e mafai ai ona tatou motusia noataga o le le iloa o se mea ma le masalosalo lea e fusia ai i tatou. E tatau ona tatou iloa lenei upumoni faigofie ma mamalu ina ia mafai ona tatou tofo i le olioli matagofie o le Agaga i le taimi nei ma le faavavau. E tatau ona faamaumauina o tatou lava ola i le faia o Lona finagalo. E tatau ona tatou faamuamuaina o Ia i o tatou olaga. Ioe, e faateleina o tatou faamanuiaga a o tatou faasoa atu Lona alofa i o tatou tuaoi.¹⁵

“Le au uso e,” na saunoa ai Paulo, “a o le mea e tasi ou te faia, ou te faagalogalo i mea ua tuanai, ou te momo’e punou a’i foi i mea o lumanai,

“Ou te tausisi atu i le faailoga, ia maua ai le taui na valaauina ai a’u mai lugā e le Atua ia Keriso Iesu.” (Filipi 3:13–14.)

Ia faataga lou mafaufau e faatumulia i le sini o le avea e faapei o le Alii, ma o le a e tuleia ese ai mafaufauga atuatuvale a o e saili ma le naunautai ia iloa o ia ma fai lona finagalo. Fai mai Paulo, “Ia ia te outou foi lea lava manatu.” (Filipi. 2:5.) Na fetalai Iesu, “Vaai mai ia te a’u i mafaufauga uma.” (MF&F 6:36.) Ma o le a le mea e oo mai ai pe a tatou faia? “E te leoleoina ia fifilemu lava, le ua mausali lona loto.” (Isaia 26:3.)¹⁶

O le a le mafai lava ona tuua na o i tatou pe afai tatou te ola i le ala e tatau ona tatou ola ai, aua o le a faatasi pea lo tatou Tama ma i tatou e faamanuia i tatou. E finagalo o Ia ia tatou manuia. E finagalo o Ia ia tatou fiafia. E finagalo o Ia ia tatou ausia sini lelei tatou te faatutuina. O le a Ia faia Lana vaega pe afai e fai la tatou vaega.¹⁷

Fautuaga mo Suesuega ma le Aoaoina Atu

Fesili

Aisea e te manatu ai o le faatuatua i le Atua e aumaia ai ia i tatou le “faamoemoe mo le lumanai, ma le talitonu o le a lelei mea uma i o tatou tiute o i ai nei”? O le fea upu o fautuaga mai le vaega 1 e te ono faasoa atu i se tasi o loo naunau mo le filemu o le loto? Aisea o le a e filifilia ai na upu?
A o e iloiloina le vaega 2, manatunatu i se taimi na tatau ai ona e “pipii mau ma le amiotonu” i taimi o faigata. Mafaufau i mea ua e mauaina mai lena aafiaga. O a ni auala e fesoasoani ai le Alii ia i tatou pe a tatou loto e onosaia ma le faamaoni ni tofotofoga?
O a ni nisi o aafiaga na fesoasoani ia te oe e te iloa ai e finagalo le Tama Faalelagi ina ia e fiafia ma faamanuiaina? Aisea e te manatu ai “o le fiafia iinei ma i le taimi nei e aofia ai le … faailoaina o le finagalo o le Atua mo i matou”? (Tagai i le vaega 3.)

Mau Fesootai

Mataio 11:28–30; Ioane 14:27; 16:33; Kalatia 5:22; Mosaea 2:41; Moronae 9:25–26; MF&F 101:11–16

Fesoasoani mo Suesuega

“Ia maua se vaaiga aoao, a le o le faitauina faavave o le tusi, mataupu, po o se fuaitau, po o le iloiloina o faaulutala. Saili ia malamalama i le anotusi ma mea na tutupu o le talaaga” (Tala’i La’u Talalelei [2004], 23). Mafaufau e faitau ia sili atu i le faatasi se mataupu po o se fuaitau ina ia e malamalama loloto atili ai. A o e faia lena mea, atonu o le a e iloa ai ni malamalamaaga loloto.