Mataupu 3
O Le Saolotoga e Filifili ai, o se Mataupu Faavae e Faavavau
“Ua tuuina mai le faitalia ia i tatou uma e fai ai faaiuga taua ia o le a i ai ni aafiaga malolosi i lo tatou faaolataga. O na faaiuga e aafia ai lo tatou fiafia i le faavavau.”
Mai le Soifuaga o Ezra Taft Benson
I le soifua ai ma galue i se faatoaga, sa aoao ai Ezra Taft Benson e uiga i taunuuga o faaiuga lelei. Sa ia ta’ua: “Sa ou ola a’e ma se talitonuga e faapea, o le naunautaiga ma le tomai e galue ai o le tulaga manaomia aupito taua lea o le manuia o se faatoaga. O le galue malosi ma le atamai o le ki lea. Ia faaaoga, ona lelei ai lea o ou avanoa e manuia ai.”1 I lona talavou, sa aoao ai e Ezra o le a maua e ia ma lona aiga ni taumafa se tele e taumafaina pe afai latou te filifili e tausi la latou faatoaga. Sa ia aoaoina afai e manao o ia ia manuia le pisinisi susu povi a le latou aiga, e tatau ona ia filifili e alapo i aso uma e tatau ia susu o povi.2 Sa ia vaaia lena mea ina ua ia faia le filifiliga e galue malosi, sa faafaigaluegaina ai o ia e le au faifaatoaga i le lotoifale e faavāvā a latou piti [beets] ma la’u a latou vaomago.3 Sa ia vaaia foi e oo mai tofotofoga i e amiotonu, ae na ia vaaia foi e mafai e tagata taitoatasi ma aiga ona filifili e tali atu i tofotofoga i se auala o le a fesoasoani ai ia i latou e fiafia ai ma faamanuiaina.4
Mo le taulealea o Ezra Taft Benson, o nisi o taunuuga o faaiuga lelei e mafai ona fuatiaina i pakete susu, i uta vaomago a loli, ma i se totogi lelei mo se aso o galuega mamafa. O isi sa faigata atu ona fuatiaina ae na umi ona i ai. Mo se faataitaiga, a o ia matauina ona matua, sa ia vaaia le olioli, toafilemu, ma le malosi lea na oo mai ina ua filifili tagata o le aiga ina ia faamaoni i le tasi ma le isi faapea ma le Alii.5 Sa ia aoaoina o le tulafono o le seleselega —“o le mea e luluina e le tagata, o le mea lava lea e seleseleina mai ai e ia” (Kalatia 6:7)—e faatatau i sailiga faaleagaga faapea foi ma galuega faaletino.
I le avea ai o lenei aafiaga ma se faavae, sa faamanatu soo ai e Peresitene Ezra Taft Benson i le Au Paia o Aso e Gata Ai ma isi le taua o le faitalia—le saolotoga “e filifili [ai] le ala e tatau ona latou mulimuli ai.”6 O ana aoaoga e uiga i lenei mataupu faavae o le faitalia na sili atu nai lo na o se faamanatu e “filifili i le va o le sa’o ma le sese.”7 Sa ia saunoa e uiga i le faitalia e faapea o le tomai lea e “fai ai faaiuga taua ia o le a i ai ni aafiaga malolosi i lo tatou faaolataga” ma o le a “aafia ai lo tatou fiafia i le faavavau.”8 Sa ia uunaia le Au Paia o Aso e Gata Ai ma isi e faaaoga o latou faitalia e “galulue ai i latou lava,” e aunoa ma le tau faatalitali ia tuupoloaiina i mea uma.9 Fai mai a ia, o le mataupu faavae o le faitalia, “e taavale pei o se filo auro i le fuafuaga o le talalelei a le Alii mo le manuia o lana fanau.”10
Sa mulimuli Iesu Keriso i le muai olaga i le ata o le faaolataga a le Tama Faalelagi, lea na faasaoina ai lo tatou saolotoga e filifili ai.
Aoaoga a Ezra Taft Benson
1
O le faitalia—le saolotoga e filifili ai—o se mataupu faavae e faavavau, ua tuuina mai e le Atua.
Ou te molimau atu o i tatou o fanau agaga a se Atua alofa, o lo tatou Tama Faalelagi (tagai Galuega 17:29; 1 Ni. 17:36). Ua i ai Sana fuafuaga sili o le faaolataga lea e mafai ai ona faaatoatoaina Lana fanau e pei o Ia ma ia mafai ai ona maua le atoatoaga o le olioli e pei ona Ia olioli ai. (Tagai 1 Ni. 10:18; 2 Ni. 2:25; Alema 24:14; 34:9; 3 Ni. 12:48; 28:10.)
Ou te molimau atu, i lo tatou tulaga i le muai olaga o lo tatou Uso Matua i la le agaga, o Iesu Keriso lea, na avea ma o tatou Faaola na muai faauuina i le ata o le faaolataga a le Tama. (Tagai Mosaea 4:6–7; Alema 34:9.) O Ia o le taitai au o le tatou faaolataga ma e na o le pau lea o le auala e mafai ai ona tatou toe foi atu i lo tatou Tama i le Lagi ia maua ai lena atoatoaga o le olioli. (Tagai Epe. 2:10; Mosaea 3:17; Alema 38:9.)
Ou te molimau atu sa i ai foi Lusifelo i le fono i le lagi. Sa ia saili e faaumatia le faitalia o le tagata. Sa fouvale o ia. (Tagai Mose 4:3.)Sa i ai se taua i le lagi, ma o le tasi vaetolu o au sa lafo ifo ai i le lalolagi ma teena ai le mauaina o ni tino. (Tagai Faaaliga 12:7–9; MF&F 29:36–37.) O Lusifelo o le fili o le amiotonu uma ma saili ia pagatia tagata uma. (Tagai 2 Ni. 2:18, 27; Mosaea 4:14.)11
O le mataupu autu i lena fono i le muai olaga o le: Pe tatau i le fanau a le Atua ona i ai le faitalia le faatapulaaina e filifili ai le auala e tatau ona latou mulimuli ai, e tusa lava pe lelei pe leaga, pe tatau ona faamalosia ma fosi i latou ia usiusitai? O Keriso ma i latou uma na mulimuli ia te Ia sa tutu mo le fautuaga na muamua—saolotoga e filifili ai; na tu Satani mo le fautuaga mulimuli—fai faamalosi ma fosi.12
Ua faamanino mai tusitusiga paia e faapea, sa i ai se taua tele i le lagi, o se tauiviga i le mataupu faavae o le saolotoga, o le aia tatau e filifili ai. (Tagai Mose 4:1–4; MF&F 29:36–38; 76:25–27; Faaaliga 12:7–9.)13
O le taua sa amatalia i le lagi e uiga i lenei mataupu e le’i ma’ea lava. O loo faaauau pea fetauaiga i malaetau o le olaga nei.14
O le saolotoga e filifili ai o se mataupu faavae e faavavau ua tuuina mai e le Atua. O le fuafuaga sili o le saolotoga o le fuafuaga lea o le talalelei. E leai se faiga faamalosi o i ai; leai se fosi, leai se taufaamata’u. E saoloto le tagata e talia pe teena le talalelei. E mafai ona ia taliaina ona toe musu lea e ola ai, pe mafai ona ia taliaina ma ola atoatoa ai. Ae o le a le mafai lava ona faamalosia i tatou e le Atua e ola i le talalelei. O le a Ia faaaogaina le faatauanau e ala mai i Ana auauna. O le a Ia valaauina i tatou ma o le a Ia taitaiina i tatou ma o le a Ia tauanauina i tatou ma uunaia i tatou ma o le a Ia faamanuiaina i tatou pe a tatou tali atu, ae o le a Ia le faamalosia lava le mafaufau o le tagata soifua. (Tagai Hymns, no. 240.)15
2
O le olaga lenei o se taimi o tofotofoga lea tatou te saoloto ai e filifili i le va o le lelei ma le leaga.
Sa faaali atu ia Aperaamo ia fanau agaga a lo tatou Tama Faalelagi ae latou te le’i o mai i le lalolagi. Sa faaali atu foi ia te ia, le foafoaga o le lalolagi, ma sa fetalai atu le Alii ia te ia: “Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua.” (Aperaamo 3:25.) O totonu o lena fetalaiga faalelagi o loo afifi ai foi le aia tatau e filifili ai.16
O le olaga lenei o se olaga vaavaaia: o se vaavaaiga lea e te faamaonia ma ou faamaonia ai lo tatou malosi faaleagaga, o se vaavaaiga e i ai ona taunuuga e faavavau mo i tatou taitoatasi. Ma o lo tatou taimi ma le vaitau lenei—e pei ona sa i ai taimi ma vaitau o augatupulaga uma—e aoao ai o tatou tiute ma faia.17
E moni lava e le fiafia le Alii i le amioleaga. E moni foi e finagalo o Ia ina ia aua nei tupu lena mea. E moni o le a Ia fesoasoani mai ia i latou o e tetee i le amioleaga. Ae o Lona faatagaina o le amioleaga e tupu i Ana fanau uma iinei i le olaga faitino, o le faamaoniga lea o Lona tuuina atu ia i latou o lo latou saolotoga e filifili ai, a o faapolopoloina mo Ia se faavae mo lo latou faamasinoga mulimuli.18
E leai se amioleaga e le mafai ona taofia e [Iesu Keriso]. O loo i Ona aao mea uma. O le lalolagi lenei o Lona malo moni lea. Ae Na te faatagaina le amioleaga ina ia mafai ona tatou faia filifiliga i le va o le lelei ma le leaga.19
O le olaga o se taimi tofotofoina i le olaga faavavau o le tagata, o le taimi lena e tuuina atu ai ia te ia … le aia tatau e filifili ai i le va o le lelei ma le leaga. … O na filifiliga o loo faalagolago i ai taunuuga maoae, e le gata i lenei olaga, ae, e sili atu le taua, i le olaga a sau. O loo i ai tuaoi e i tua atu e le mafai e Satani ona oo atu i ai. I totonu o na tuaoi, ua faatagaina ai o ia i le taimi nei e ofo atu se filifiliga le amiotonu i mataupu faavae amiotonu a le Atua, ma faapea ona faatagaina ai tagata e filifili i le va o le lelei ma le leaga ma faapea ona iloa ai le nofoaga o le a latou nofoia i le olaga a sau.20
3
Tatou te faaaogaina o tatou faitalia e fai ai faaiuga e iloa ai lo tatou fiafia i le taimi nei ma le faavavau atoa.
E alofa le Atua ia te oe e pei ona Ia alofa i Ana fanau taitoatasi uma, ma o Lona finagalo ma faamoemoega ma le mamalu, ia e toe foi atu ia te Ia ma le mamā ma le le pisipisia, ma faamaonia atu lo outou lava agavaa mo se faavavau o le olioli i Lona afioaga.
O loo silafia e lou Tama i le lagi oe. Ua ia tuuina atu ia te oe poloaiga e taitai ai oe, e aoai ai oe. Ua Ia tuuina atu foi ia te oe lou faitalia—le saolotoga e filifili ai—“e vaai pe [e te] faia mea uma o soo se mea [Na te] poloaiina.” (Aperaamo 3:25.) O Lona malo iinei i le lalolagi ua faatulagaina lelei, ma o ou taitai ua tuuto atu e fesoasoani ia te oe. Talosia ia e silafia, matou te alolofa pea, popole pea, ma tatalo pea mo oe.
E iloa lelei foi oe e Satani. Ua tuuto foi o ia i lou faafanoga. Na te le aoaiina oe i poloaiga, ae nai lo lena, na te ofoina atu se saolotoga e “fai ai a oe lava mea.” … O le fuafuaga a Satani o le “taalo i le taimi nei ae totogi mulimuli.” E saili o ia ina ia pagatia tagata uma e pei lava o ia [tagai 2 Nifae 2:27]. O le fuafuaga a le Alii o le fiafia i le taimi nei ma le olioli e faavavau e ala i le ola i le talalelei.21
E saoloto i tatou e filifili, ae tatou te le saoloto e sui taunuuga o na filifiliga.22
E manino lava, o le a i ai ni nai tofotofoga laiti o le faatuatua pe a tatou vave mauaina o tatou taui atoa mo galuega lelei uma, po o le vave faasalaina mo agasala uma. Ae o le a le fesiligia lava le i ai o se taunuuga mo ia tulaga taitasi.23
E ui atonu e maua e se tagata se fiafia le tumau i le faia o le agasala, ae o le taunuuga mulimuli o le le fiafia. “E lei avea lava le amioleaga ma fiafia.” (Alema 41:10.) O le agasala e mafua ai ona feteenai ma le Atua ma e faanoanoa ai le agaga. O le mea lea, e lelei i se tagata ona suesue o ia lava e iloa ai o loo mulimuli o ia i tulafono uma a le Atua. O tulafono uma e tausia e aumai ai se faamanuiaga faapitoa. O tulafono uma e solia e aumai ai se mala patino. O i latou o e o tauaveina avega mamafa o le faanoanoa e tatau ona o atu i le Alii, aua o lana amo e faigofie ma o lana avega e māmā. (Tagai Mata. 11:28–30.)24
O le faamoemoega aupito taua o soo se tagata o le faia lea o faaiuga. E ui o se tasi o meaalofa silisili a le Atua i le tagata o le … aiā tatau e filifili ai, ae ua ia tuuina mai foi i le tagata le tiutetauave mo nei filifiliga. … Tatou te tuu atu o tatou lava olaga i le ala o le manuia po o le toilalo. Atonu e le gata ina tatou filifilia a tatou sini taua, ae tatou te ono iloaina foi ma filifilia mo i tatou lava, i le tele o tulaga, ni auala tatou te taunuu atu ai i na sini, ma e ala atu i lo tatou galulue malosi po o le leai foi, e iloa ai le vave e mafai ai ona ausiaina. O lenei mea e manaomia ai taumafaiga taitoatasi ma le malosi ma o le a le aunoa ma mea faafeagai po o feteenaiga.25
O le taunuuga o le tagata ma malo uma e faalagolago lea pe o le a faaaoga e le tagata lona … faitalia e pulea ai o ia lava po o le le amanaiaina o tulafono e faavavau i lona lava malaia ma selesele ai taunuuga. O lea la, o faafitauli moni o aso nei e le o le tulaga i le tamaoaiga pe o faiga faaupufai. E faaleagaga—o lona uiga e tatau i tagata ona iloa ona mulimuli i tulafono ua tuuina mai e le Atua i tagata.26
Ua tuuina mai ia i tatou uma le faitalia e fai ai faaiuga taua ia o le a i ai ni aafiaga malolosi i lo tatou faaolataga. O na faaiuga e aafia ai lo tatou fiafia i le faavavau.27
O a tatou faaiuga ua avea ai i tatou ma tagata ua tatou i ai. O lo tatou taunuuga e faavavau o le a iloa i faaiuga o le a tatou faia.28
4
O faaiuga e matuai taua e manaomia ai a tatou taumafaiga ma le loto tatalo.
Afai o le a tatou faia faaiuga talafeagai, faaKeriso, e tatau lava ona muamua ona tatou ola ina ia mafai ona tatou aapa atu ma pa’i atu i lena mana lemavaaia, a aunoa ma lena mana e le mafai e se tagata ona faia le mea sili na te mafaia i le faiga o faaiuga.
O se tasi o faaiuga aupito silisili o lenei augatupulaga, o le taimi lea na filifili ai le taulealea o Iosefa Samita o le a mulimuli i le apoapoaiga a Iakopo: “Ae afai ua leai se poto i so outou, ina ole atu ia i le Atua, o lē foai tele mai i tagata uma, ma le le toe ta’uta’ua; ona foaiina mai ai lea ia te ia. A ia ole atu ma le faatuatua, aua lava nei masalosalo. Aua o le masalosalo e tusa ia ma le peau o le sami ua sousou i le matagi ma felafolafoaiina.” (Iakopo 1:5–6.)
O le faaolataga moni o le faitau miliona o alii ma tamaitai i le tisipenisione o le atoaga o taimi, ua faalagolago lea i lena faaiuga! E tatau ona tatou manatua e taua tagata taitoatasi, ma o faaiuga latou te faia e ono aafia tele ai olaga o isi.29
Na fetalai le Alii, “Tu’itu’i atu ma o le a tatala mai ia te outou” (3 Nifae 14:7; Mataio 7:7). I se isi faaupuga, e manaomia ai le taumafaiga i la tatou vaega.30
O le tali a le Alii i taumafaiga le mataalia a Oliva Kaotui ua faamanino mai ai lenei mea, “Ae, faauta, Ou te fai atu ia te oe, e ao ina e suesue i ai i lou mafaufau; ona ao lea ona e ole mai ia te aʼu pe ua sao, ma afai ua sao, o le a Ou faia ia mu lou loto i totonu ia te oe; o lea, o le a e lagona ai ua sao.” (MF&F 9:8.)
O le mea lea, ia tatou amata e ala i le faapea atu, o le sailia ma le naunautai o lo tatou Tama i le lagi, mauaina o le faatuatua o le a ia tali mai i a tatou tatalo, o se faavae lelei lea e amata ai. … O le a le faamanuiaina e le Alii i tatou pe a tatou le galulue ia maua lena faamanuiaga, o lea e tatau ai ona fai la tatou vaega. O nisi taimi o le taumafai e su’e se faaiuga sa’o e alu ai le tele o le malosi, suesuega, ma le loa ona talitiga.31
I faaiuga e ogaoga le taua, o le anapogi faatasi ma le tatalo e mafai ai ona aumaia ia malamalamaaga faaleagaga maoae.32
5
O i tatou o ni sui mo i tatou lava, ma ua faamoemoe mai le Alii ia tatou faia mea lelei i lo tatou lava loto fuatiaifo.
I le 1831 na fetalai mai ai le Alii i le mea lenei i lana Ekalesia:
“Aua faauta, e le tatau ona Ou poloai atu i mea uma; aua o ia o le e tau faamalosia i mea uma, o ia lava lea o se auauna paie ma lē poto; o le mea lea e le maua e ia se taui.
“E moni Ou te fai atu, e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele;
“Aua ua i totonu ia te i latou le mana, lea ua latou pule ai ia te i latou lava. O le a lava o le tulaga e oo i ai le faiga e tagata o mea lelei, o le a leai lava se ala o le a aveesea ai lo latou taui.
“Ae o ia o lē e lē faia e ia se mea seia poloaiina ai o ia, ma talia se poloaiga ma le loto masalosalo, ma ia tausia ma le paie, o ia lava lea e tausalaina. (MF&F 58:26–29.)
E finagalo le Alii ia tatou faaaogaina lo tatou faitalia e “auai [ai] ma le naunautai i se faamoemoega lelei” (MF&F 58:27).
O faamoemoega o le Alii—o sini faamoemoeina sili—e faaauau pea i le mea e tasi: o le faaolataga ma le faaeaga o ana fanau.
E masani lava ona tuuina mai e le Alii ia i tatou ni sini faamoemoeina aoao tetele ina ia ausiaina faapea ai ma nisi o taiala ia mulimulitaia, ae ua ia faamoemoe mai ia tatou sailia le tele o faamatalaga auiliili ma ni metotia. O metotia ma faiga faavae e masani lava ona atiaeina e ala i le suesue ma le tatalo ma e ala i le ola ai ina ia mafai ona tatou maua ma mulimuli i uunaiga a le Agaga. O tagata e itiiti ifo atinaega faaleagaga, e pei o i latou sa i ai i vaitaimi o Mose, sa tatau ona poloaiina i le tele o mea. O aso nei o i latou e mataala faaleagaga e tagai atu i sini faamoemoeina, siaki taiala ua faataatitia e le Alii ma ana perofeta, ona galulue loa lea ma le agaga tatalo—e aunoa ma le tau poloaiina “i mea uma.” O lenei uiga faaalia e saunia ai tagata mo le tulaga faaleatua. …
O nisi taimi e faatalitali ai ma le faamoemoe le Alii i lana fanau ina ia galulue i latou lava, ma a latou le faia, latou te le maua le taui sili atu, ma a le faataatia ese e le Alii le mea atoa ma faataga i latou e mafatia i taunuuga, ia pe na te matuai faamatala mai foi le mea e tatau ona latou faia i faamatalaga auiliili. O le mea ou te fefe ai, e masani lava, o le tele o lona tau poloai mai, o le itiiti foi lena o lo tatou taui.33
E tatau ona tatou “auai ma le naunautai” i faamoemoega lelei ma tuua ai le lalolagi o se nofoaga lelei atu ona sa tatou nonofo ai.34
Fautuaga mo Suesuega ma le Aoaoina Atu
Fesili
-
O a ni auala ua e vaaia ai “o le taua sa amataina i le lagi … e le’i mae’a lava”? (Tagai i le vaega 1.) O a ni mea e mafai ona tatou faia e faaauau ai ona tutu atu mo le mataupu faavae o le faitalia?
-
E masani ona mafaufau tagata pe aisea e faataga ai e le Atua le amioleaga ia i ai i le lalolagi. E faapefea ona fesoasoani aoaoga a Peresitene Benson o loo i le vaega e 2 e tali lena fesili?
-
O a ni mea e mafai ona tatou faia e fesoasoani ai i tamaiti ma le autalavou ia malamalama i upumoni o loo i le vaega e 3? O a ni mea e mafai ona tatou faia e fesoasoani ai i tamaiti ma le autalavou ia malamalama ai i aafiaga o faaiuga latou te faia?
-
Mafaufau loloto i le fautuaga a Peresitene Benson e uiga i le faia o “faaiuga talafeagai, faaKeriso” (vaega e 4). O le a se mea ua e iloa e uiga i le tuufaatasia o le tatalo ma taumafaiga maelega i le faia o faaiuga?
-
O le a le uiga ia te oe o le “auai ma le naunautai i se faamoemoega lelei”? E suia faapefea lou olaga pe a e faia ni mea lelei “i [lou] lava loto malie” nai lo le faatalitali seia tau poloaiina? (Tagai i le vaega e 5.)
Mau Fesootai
Teuteronome 11:26–28; Iosua 24:15; 2 Nifae 2:14–16; Alema 42:2–4; Helamana 14:30–31; MF&F 29:39–45; 101:78
Fesoasoani mo le Aoaoina Atu
O talanoaga i vaega toalaiti “e tuu atu ai i se vaega toatele o tagata le avanoa e auai ai i se lesona. O tagata o e e masani ona mumusu e auai e ono faasoa atu ni manatu i vaega toalaiti ia latou te le faailoaina atu i luma o le vaega atoa” (O Le Aoao Atu, E Leai Se Isi Valaauga e Sili Ai [1999], 161).