Mataupu 19

Tulaga Faaletaitaiga

“A faapea tou te tuuina atu se tulaga faaletaitaiga i le lumanai mo le Ekalesia, [o outou] atunuu, ma o outou lava aiga, e tatau ona outou tutumau mausali i le faatuatua, e le maluelue pe a fetaia’i ma mea leaga.”

Mai le Soifuaga o Ezra Taft Benson

Na amata aoao Ezra Taft Benson e avea ma se taitai a o talavou. Ina ua toeitiiti atoa lona 13 tausaga, na valaauina ai lona tamā e auauna atu i se misiona. O le avea ai ma ulumatua i le aiga, na tauaveina ai e Ezra le tele o tiutetauave faaletaitai i le faatoaga a le aiga i le taimi a o toesea lona tamā. O ni nai tausaga mulimuli ane, ina ua valaauina o ia i le Misiona a Peretania, sa auauna ai o ia o se peresitene o le paranesi ma se peresitene o le Fono a Newcastle (e talitutusa ma se itu i aso nei). Mulimuli ane, sa auauna atu o ia i ni au peresitene o siteki e toatolu—e tasi o se fesoasoani, e tasi na avea ma peresitene o le siteki mo se taimi puupuu, ma le tasi foi na avea ai ma se peresitene o le siteki mo se vaitaimi na umi atu. I lana matata faalegaluega, sa galue ai o ia i le tele o tulaga faaletaitai i galuega taufaatoaga. Ona sa avea o ia ma se taitai ma se tagata atamai faapitoa i tulaga tau faatoaga, na talosagaina ai o ia e Peresitene Dwight D. Eisenhower e auauna atu i le tofiga aupito maualuga o mea tau faatoaga i le Iunaite Setete. E valu tausaga na galue ai o ia faatasi ma Peresitene Eisenhower e avea ma failautusi a le Iunaite Setete mo mea tau faatoaga.

A o le’i avea o ia ma Peresitene o le Ekalesia, na auauna atu Peresitene Benson mo le 12 tausaga o se Peresitene o le Korama a Aposetolo e Toasefululua. E maoae le faaaloalogiaina o ia e sui o le Korama i le avea ai ma o latou taitai. Sa masani ona ta’u atu e Elder Bruce R. McConkie “i tagata o le aiga, na te le’i vaai lava i se mea e tutusa ma le taitaiga a Peresitene Benson i totonu o le Ekalesia.”¹

I le taitaiga o le Toasefululua, sa uunaia ai e Peresitene Benson sui o le korama e faaali sa’o atu o latou lagona, e tusa lava pe na ese sona manatu na i ai. A o avea Elder Russell M. Nelson ma se sui fou o le korama, sa manatu o ia atonu e sili ai le aua ne’i faasoaina atu ni ona manatu. “Ae sa le’i taliaina e [Peresitene Benson] lena mea,” o lana tala lea. “O le mea moni, afai ou te sāō i se mea, na te tauanauina a’u e faasoa atu so’u manatu.”²

E ui ina talosagaina e Peresitene Benson ni manatu faaalia mai [ia i latou] uma, ae na te le’i tuua talanoaga e feosoosofa’i solo. Na saunoa Peresitene Howard W. Hunter na ia “iloaina auala e maua ai ni talanoaga tuusa’o ma faamaoni mai [le] Usoga, ma [sa] mafai ona ia taitaia ma taulimaina ma taunuu atu i se faaiuga autasi e malilie uma i ai tagata uma.”³ Pe a “ia lagona na lava ma totoe talanoaga sa faia, e na ona ia faapea mai, ‘Ou te manatu ua lava le talanoaina o se mataupu. Ae ua tatau nei ona faia se faaiuga.”⁴

Sa alofa Peresitene Benson ia i latou sa ia taitaiina, ma sa ia aoao atu e ala i faataitaiga. “E leai se tagata ua ou iloa e sili atu le magafagafa i e na latou galulue faatasi pe sili atu foi le popole mo lo latou manuia i lo ia,” o le saunoaga lea a Peresitene Gordon B. Hinckley. “E le fai atu o ia i isi e fai se mea lea na te le fia faia foi e ia, ae i lo lena, na te faia se faataitaiga mo isi o i matou e mulimuli ai.”⁵ Sa lelei tele foi Peresitene Benson i le faasafuaina atu o galuega i isi, e aoaoina ma tuputupu a’e ai i latou i lena faagasologa.

I le konafesi aoao lea na lagolagoina ai Peresitene Benson o se Peresitene o le Ekalesia, sa faailoa ai e Peresitene Gordon B. Hinckley lona talitonuga maumaututu e faapea, na filifilia ma saunia e le Alii ia Peresitene Benson e taitai le Ekalesia:

“Ou te tuu atu ia te outou la’u molimau, o le Alii na filifilia Ezra Taft Benson e avea ma sui o le Aufono a le Toasefululua i le toeitiiti fasefulu ma le tolu tausaga talu ai. O le Alii lava foi ua tofotofoina ma aoaiina o ia, aoaoina ma saunia o ia mai i nei tausaga uma. …

“I le avea ai ma se tasi e iloa o ia ma tu i ona tafatafa, ou te molimau atu o ia o se tamalii o le faatuatua, na tofotofoina i tulaga faaletaitaiga, o le alofa loloto mo le Alii ma Lana galuega, o le alofa mo atalii ma afafine o le Atua i soo se vaipanoa lava. O ia o se tamalii ua i ai gafatia faamaoniaina.”⁶

Peresitene Ezra Taft Benson ma ona fesoasoani i le Au Peresitene Sili: Peresitene Gordon B. Hinckley (agavale) ma Peresitene Thomas S. Monson (taumatau)

Aoaoga a Ezra Taft Benson

O taitai mataalia e tutumau mausali i le faatuatua ma fai faataitaiga lelei.

O le mana o le taitaiga a Keriso na tuputupu a’e mai le lu’i o Lana faataitaiga. O Lana fetalaiga manino o le, “Sau, mulimuli mai ia te a’u!” … O Lona [faamanuiaina i le mauaina] o le faamaoni atoa ma le tuuto o tagata i mataupu faavae o le amiotonu e faalagolago lea i le alofa ua fai ma vaega autu e faaosofia ai. Na Ia fesoasoani ia tatou iloa o uiga faaalia faaleatua o loo i totonu o i tatou taitoatasi o loo poloai mai e faaali atu, e mafai ona avea o ni mea moni matagofie ma ola. O Lana faataitaiga o loo faaauau pea ona avea ma faamoemoega ma malosiaga silisili o tagata.⁷

A faapea tou te tuuina atu se tulaga faaletaitaiga i le lumanai mo le Ekalesia, [o outou] atunuu, ma o outou lava aiga, e tatau ona outou tutumau mausali i le faatuatua, e le maluelue pe a fetaia’i ma mea leaga, ma e pei ona fai mai Paulo, “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo. Aua tatou te le o tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.” (Efeso 6:11–12.)⁸

E manaomia e o tatou tagata talavou ni nai faitioga laiti ae ia tele ni faataitaiga lelei. O outou o faataitaiga latou te vaavaai atu i ai mo se mamanu o le olaga ina ia mafai ona latou mulimuli ma usitai i ai. O le a latou manaomia le uunaiga lea e mafai ona sau mai ia te outou a o outou faaogatasia lelei o outou olaga ma aoaoga o le talalelei.⁹

E tali atu tagata i taitaiga mataalia lelei.

Lotomaualalo

O le tasi o faailoga o se taitaiga maoae na i ai lava i taimi uma ma o le a i ai pea lava, o le loto maualalo.¹⁰

Malosi faaleagaga

O le malosi faaleagaga e faaosofia ai mafaufauga lelei, manatu lelei, aga masani lelei, uiga faaalia lelei, ma taumafaiga lelei. O uiga auau mama nei e lagolagoina le atamai, tulaga manuia faaletino ma faalemafaufau, ma le taliaina fiafia ma le tali mai a isi.¹¹

E na o tagata faamaoni ua i ai le malosi e siitia ma uunaia ai le tasi ma le isi i auaunaga sili atu, i mea sili atu e ausiaina, i malosiaga sili atu.¹²

E tatau ona i ai musumusuga e taitai lelei ai. … E tatau ona tatou maua le agaga o musumusuga pe o tatou aoao atu (MF&F 50:13–14) po o le faatautaiga o mataupu o le malo (MF&F 46:2).¹³

E leai se mea faamalie loto e mafai ona suitulaga mo le Agaga.¹⁴

Iloa

O se taitai faamaoni e taumafai ia malamalama lelei. O ia o se tagata e galue e tusa ma le mataupu faavae ae le seiloga e talafeagai ai. E taumafai o ia e aoao mai i aafiaga uma o tagata ona fua lea agai i mataupu faavae ua faaalia mai o le poto faalelagi.¹⁵

O se tasi o auala e sili ona lelei mo taitai e malamalama ai i mataupu faavae sa’o, o le i ai lea o se silafia ma se malamalama atoa i tusitusiga paia ma le tusitaulima talafeagai. O le tele lava o tulaga ua uma ona tutupu muamua, atonu ua faatele, ma ua uma ona iloiloina aiaiga faavae ma faiga faavae e taulima ai le faafitauli. O le mea lea, o se faiga atamai i taimi uma, le tagai lea ma faamasani i faatonuga tusitusia ma aiaiga faavae a le Ekalesia o loo i ai nei e faatatau i ni fesili pe a tulai mai.¹⁶

Ua fautuaina taitai e suesue i aoaoga faavae a le Ekalesia ina ia mafai ai ona faamatala lelei atu a tatou aoaoga faavae i isi. Ina ia faaaoga le faaupuga a le Aposetolo o Paulo, matou te faamoemoe ai ia fai outou ma “lē faigaluega e leai se mea e ma ai” (2 Timoteo 2:15).¹⁷

Lotonuu

O se taitai lelei ua faamoemoeina ia e manaomia le lotonuu. E faapena foi ona ia tuuina atu lona lotonuu. Na te lagolagoina le tagata na ia tuu atu i ai se galuega. O le lotonuu e faalautele atu i mataupu e i fafo atu o ona tiutetauave. E lotonuu o ia pe a oo atu faamamaluga ia i latou o loo latou galulue faatasi. E mitamita o ia i lo latou faamanuiaina. E le pulepuletutu o ia [i se faaiuga] sei vagana ua ia soalaupule muamua ma le tagata e ana le faaiuga ua ia faaleaogaina. Na te le faalumaina se paaga i luma o isi. E fai atu sa’o ma talanoa sa’o atu ia te ia.¹⁸

Lotogatasi

O loo i ai se “tuufaatasiga ua manaomia e le tulafono o le malo selesitila; Ma e le mafai ona ati a’e Siona vagana ua atia’e i mataupu autu o le tulafono o le malo selesitila.” (MF&F 105:4–5.) Faatasi ai ma mataupu faavae ma uiga e manaomia, o le tasi lea o le mafaufau ma le loto. “Ou te fai atu ia te outou, ia tasi outou; ma afai tou te le tasi e lē a a’u outou,” o le poloaiga lea a le Faaola i Lana Ekalesia i aso nei (MF&F 38:27; Ioane 17:20–23). E leai se isi mea e sili atu ona taua ai lenei tulaga manaomia nai lo i latou o e ua Ia valaauina e pulefaamalumalu i Lona malo atoa.¹⁹

“O le alofa i tagata e taua i se taitaiga mataalia lelei.”

Alofa ma faaailoaga o le talitonuina

O se alofa mo tagata e taua i se taitaiga mataalia. E te alofa ia i latou o loo outou galulue faatasi? O e silafia e sili le taua o agaga i le silafaga a le Atua (tagai MF&F 18:10)? E te faatuatuaina le autalavou? O e iloaina o e viia o latou uiga mama, ma faamalo atu mo mea ua latou ausiaina? Pe o i ai sou uiga faitio ia i latou ona o a latou mea sese?²⁰

O le tele o taimi, e sili atu le faigata o le leai o se faamatalaga e fai mai e o tatou taitai e uiga i se galuega na atofa mai ia i tatou nai lo faitioga. O ni nai manatu faaalia po o ni nai faamatalaga lava, e faamaoni ma maoti, o ni faamalosiau sili ia e tuuina atu a o faataunuuina o latou tofiga.²¹

Ua matou iloa … o le taimi e faaalu e se taitai i fesootaiga patino ma tagata o le au paia e sili atu le faamanuiaina nai lo le taimi e faaalu i fonotaga ma tiute faalepulega. O fesootaiga patino o le ki lea i le liuaina o tagata le toaaga o le ekalesia.²²

I totonu o le Ekalesia lava ia, o le talosagaina o se tagata e fai se mea e sili atu ona taunuuga nai lo o le faatonuina—e sili atu foi lagona lelei e maua ai. Ia manatua e tau atu i ai le mafuaaga. Toe tulitatao ia iloa ai po o a mai le gasologa o mea. Faaali atu le loto faafetai pe a lelei le faatinoina e tagata o ni faatonuga. Faaali atu le lagona o le talitonuina pe a mafai ona faia ma le faamaoni. A i ai se mea e faaletonu mai, e lelei le toe siaki ma saili po o gafea na e faaletonu ai—ma aua le fefe e te ioeina le mea sese na e faia. Ia manatua, o o tatou tagata o ni tagata galulue fua i lo latou lava lotomalie. E alolofa foi i latou i le Alii ma Lana galuega. Alofa ia i latou Talisapaia i latou. Pe a faaosoosoina oe e otegia se uso a auauna, ‘aua. Nai lo lena, faataitai se lu’i manaia lea, o le pōpō o lona papatua e faamālō i ai. O fanau o lo tatou Tama i le lalolagi atoa e ese le lelei. E alofa o Ia ia i latou. E tatau foi la ona tatou alolofa ia i latou.²³

E le fiafia tagata e faamalosi i latou e fai ni mea, e tusa lava pe mo lo latou lava lelei. Ae e tali mai tagata i taitaiga mataalia lelei.²⁴

O taitai lelei latou te faasafua atu [tiute] ma le atamai.

O le faataitaiga a le Faaola o le faasafua atu

O le faavaeina o le lalolagi na faia i le pule faasafua. E tele taimi na faamanatu mai ai e Iesu i tagata, o Lana misiona i luga o le fogaeleele o le misiona na faia e ala i le pule faasafua. O le toefuataiga o Lana Ekalesia na amataina i le pule faasafua.

I le fetalai atu ai i tagata Iutaia i totonu o le sunako, na ta’u atu ai e Iesu ia i latou, o Ia na auina mai e Lona Tama: “Auā ou te le’i alu ifo mai le lagi e fai lo’u lava loto, a o le finagalo o lē ua auina mai a’u” (Ioane 6:38).²⁵

Ua tuuina mai e Iesu ia i tatou le faataitaiga sili o le taitaiga lelei e ala i le faasafua atu ma le tatau [o tiute]. … O le toatele o Ana faifeautalai ua fai ma Ona sui e malaga lava e aunoa ma ni atotupe po o ni ato malaga. Sa puapuagatia tagata i le tele o faigata i le faatinoina o Ana faatonuga. O nisi o i latou na maliliu i ni fasiga matuia i Lana galuega. Ae sa agai pea i luma ma le totoa Ona soo na fai ma ona sui i le lalolagi e pei o ni leona ona o Lana poloaiga. Na latou ausia ni mea latou te le’i mafaufauina e mafai ona ausia. E leai se taitai na faaosofiaina alii ma tamaitai e pei ona sa Ia faia.²⁶

O Le Ekalesia a Iesu Keriso na te atiaeina taitai e ala i le faaaafia o tagata e faasafua atu i ai le pule. A o i ai [Iesu] i luga o le fogaeleele, na ia valaauina aposetolo e toasefululua e lagolagosua ia te ia i le taitaiga o le ekalesia. Sa ia valaauina foi le au fitugafulu. Sa Ia faasafua atu [i] isi. Sa le tatau ona i ai ni au maimoa i totonu o lana ekalesia. Na tatau ona aafia tagata uma i le atiina ae o le malo. Ma a o latou atiina ae le malo, sa latou atiina ae foi i latou lava.

Sa faamoemoe Iesu ia faaeaina le tagata. …

Sa faamoemoe Iesu ina ia faia tagata uma o se tupu, ia atiaeina o ia i tulaga faaletaitai e oo atu i le faavavau. I lena po le mafaagaloina ina ua mae’a le tausamaaga mulimuli, na Ia fetalai atu i le toasefulutasi … , “E moni, e moni, ou te fai atu ia te outou, o lē talitonu mai ia te a’u, e faia lava e ia o galuega ou te faia; e fai foi e ia mea e sili i ia mea; aua ou te alu i lo’u Tama.” (Ioane 14:12.) E ala i le faasafua atu o tiute, na finagalo Iesu ia siitia le tagata nai lo le taotaomia. Ma i le Ekalesia aoao i aso nei, ua tuputupu a’e alii ma tamaitai i ni tulaga malolosi e ala i tofiga ua faasafua atu ia i latou.²⁷

I le taimi o Lana galuega i la le tino, na faasafua atu ai e Iesu Keriso le pule i Ana Aposetolo e Toasefululua.

Faasafuaina atu o [tiute] i totonu o a tatou faalapotopotoga

O le pulega lelei o lona uiga o le pule faasafua. O le pitolaau o le faasafuaina atu o [tiute] o galuega e fesoasoani lea ia te oe ma lau faalapotopotoga. O pulega mataalia o le ute lea o le faatoateleina o oe lava ia e ala atu i isi tagata ua faasafua atu i ai ni mea ia ausia.²⁸

O le faasafua atu ma le atamai e manaomia ai sauniuniga ma le agaga tatalo, e faapena foi i le mataalia o le aoao atu po o le talai atu. Ua faamanino mai lenei mea e le Alii i upu nei: “Ma o le a tuu atu ia te outou le Agaga e ala i le tatalo o le faatuatua; ma afai tou te le maua le Agaga aua tou te aoao atu” (MF&F 42:14). Ma atonu e mafai ona tatou faaopoopo i ai, afai tou te le maua le Agaga aua le faasafuaina atu.²⁹

O se taitai atamai i totonu o le Ekalesia i aso nei o le a le taumafai e fai lava e ia mea uma, aua e foliga mai ai e leai ma se isi tagata e agavaa. Ma a o ia faasafua atu ni mea e fai, o le a ia tuuina atu se faamautinoaga i lē ua ia faasafua atu i ai ni tiute e faapea ua i ai foi lana lagolago atoa.³⁰

Pe a ua tuuina atu le tiutetauave, e le faagaloina e le taitai le tagata na tofiaina po o lona tofiga. E tulitatao e ia ma le fiailoa ae le “o le mata’ituina o auiliiliga uma o le galuega a se tagata.” Na te tuuina atu se faamalo patino pe a tatau ai. Na te tuuina atu le faamalosiauga aoga pe a manaomia. A ia lagona e le o faia le galuega ma e manaomia ai se suiga, na te faatinoina ma le lototele ma le mausali ae ia faia ma le agalelei. Pe a mae’a le umi atofaina o se tofiga, na te tuuina atu se faamamaluga ma se faafetai.³¹

E leai se taitai atamai e talitonu o manatu lelei uma lava na afua mai ia te ia. Na te valaaulia fautuaga mai ia i latou o loo ia taitaia. Na te tuu atu ia latou lagona o i latou o se vaega taua o le faiga o faaiuga. Na te tuu atu ia latou lagona o loo latou faatinoina a latou aiaiga faavae, ae le na o ana aiaiga faavae.³²

O taitai o le Ekalesia o ni meafaigaluega i aao o le Atua, ma e tatau ona sailia le Agaga i le taitaiga ma le atinaega o isi.

I le Ekalesia i aso nei, e masani ona maua i se faatinoga a se taitai le mea moni ua ia faamoemoeina. E manaomia ona maualuluga ni ona faamoemoega. E tatau ona ia faamautinoa atu ia i latou na te tuu atu i ai ni tofiga e faapea, i le galuega a le Alii, ua i ai ia te i latou ni mana e maoae atu nai lo tiutetauave masani. E le mafai ona i ai se toilalo i le galuega a le Alii pe a [tatou] faia le mea sili [tatou] te mafaia. O i tatou o meafaigaluega; o le galuega lenei a le Alii. O Lana Ekalesia lenei, le fuafuaga o Lana talalelei. O Ana fanau nei o loo tatou galulue i ai. O le a Ia le faatagaina i tatou ia toilalo pe afai e fai la tatou vaega. O le a Ia faalauteleina i tatou i tala atu o o tatou lava taleni ma tomai pe a talafeagai ai. Ua Ou iloa lenei mea.³³

E tatau ona tatou manatuaina … o le Ekalesia … e le o le lalolagi o pisinisi. O lona faamanuiaina e fuatiaina i tulaga o agaga e laveaiina, ae le o le polofiti po o le gau. O lea, e tatau ai ona tatou mataalia ma uluola, ae e manaomia foi ona tatou tepataulai pea i sini faamoemoeina e faavavau. Ia faaeteete i le faaaogaina o metotia ma faaupuga faalelalolagi i matafaioi paia o le perisitua. Ia manatua o faiga masani e foia ai faafitauli, e ui ina aoga, ae o le a le lava lena i le galuega o le malo. O le galuega a le Atua e tatau lava ona faia e ala i le faatuatua, tatalo, ma e ala i le Agaga, “ma afai e talai atu i se isi ala ua le mai i le Atua” (MF&F 50:18).³⁴

O le faamoemoega atoa lava o le Ekalesia o le atiina ae lea o alii ma tamaitai o e o le a avea e pei o le Atua i a latou amioga faaalia, ma i o latou uiga paia, ma i o latou tulaga faatonuina.³⁵

Fautuaga mo Suesuega ma le Aoaoina Atu

Fesili

Ua aoao mai Peresitene Benson, e tatau i taitai ona fai se faataitaiga amiotonu (tagai vaega 1). Aisea ua avea ai faataitaiga ma se faatosinaga malosi? O a ni auala ua faatosinaina ai oe e faataitaiga amiotonu a taitai?
Suesue i uiga vaaia o ni taitai lelei o loo faamatalaina mai i le vaega 2. Aisea e te manatu ai e “tali mai tagata i se taitaiga [faapena]”? Mafaufau i se mea e mafai ona e faia e atiina ae ai nei uiga.
Na aoao mai Peresitene Benson, e tatau i taitai o le Ekalesia ona mulimuli i le faataitaiga a le Faaola i le avea ai ma se tagata na faasafuaina atu [tiute] (tagai vaega 3). E faapefea ona fesoasoani le faasafua atu [o tiute] i le fausiaina o le malo o le Atua? O a ni auala ua faamanuiaina ai oe mai tiutetauave ua faasafua atu ia te oe?
E ono mafai faapefea ona suia la tatou auaunaga i le Ekalesia a o tatou manatuaina “o le galuega lenei a le Alii” ma “o Ana fanau nei o loo tatou galulue i ai”? (Tagai vaega 4.) O le a se aafiaga na oo ia te oe ina ua e galue o se meafaigaluega i aao o le Atua e fesoasoani ai i isi tagata?

Mau Talafeagai

Esoto 18:13–26; Mataio 5:13–16; Luka 22:31–32; Alema 17:1–11; MF&F 38:23–27

Fesoasoaniga mo le Aoao Atu

“E ootia tagata taitoatasi pe a aloaia o latou sāo. Atonu e te faia se taumafaiga faapitoa ina ia faailoa atu ai finagalo faaalia o tagata taitoatasi, afai e mafai, ia avea manatu faaalia o se vaega o talanoaga a le vasega” (O Le Aoao Atu, E Leai Se Isi Valaauga E Sili Ai [1999], 38).