Mataupu 21

O Mataupu Faavae o le Manuia Faaletino ma le Faaleagaga

“O mea uma e faatatau i le tulaga manuia o le tamaoaiga, agafesootai, ma le faaleagaga o le aiga o le tagata, e avea ma o le a avea pea ma popolega o le Ekalesia a Iesu Keriso o le Au Paia o Aso e Gata Ai.”

Mai le Soifuaga o Ezra Taft Benson

I le 1936, a o tauivi tagata uma o le lalolagi atoa ma luitau faaletamaoaiga o le Pau Tele o le Tamaoaiga, na faalauiloa mai ai e le Au Peresitene Sili se polokalama fou o le uelefea. O lenei polokalama, na ta’ua o le Fuafuaga a le Ekalesia mo le Puipuiga, na faatulagaina e lē ina ia tuuina saoloto atu ai meaai ma mea e faaaoga mo tagata le tagolima, ae ina “ia fesoasoani i tagata e fesoasoani ia i latou lava.”¹ A o faatulagaina e le Au Peresitene Sili ma isi taitai o le Ekalesia lenei polokalama, sa latou aoao atu mataupu faavae autu o le galue malosi, ola faalagolago o le tagata ia te ia lava, ma le auauna atu. Na latou uunaia tagata o le Ekalesia e totogi sefuluai ma taulaga anapogi, gaosi pe totō ma teu taumafa, aloese mai aitalafu le talafeagai, ma teu se tupe mo mea e manaomia i le lumanai.

I le vaitaimi lena, sa auauna atu ai Peresitene Ezra Taft Benson o se fesoasoani i le au peresitene o se siteki i Boise, Idaho. Sa avea foi o ia ma se tagata tomai faapitoa i mea e tau tamaoaiga, se tagata tomai faapitoa i faalauiloaga o oloa, ma se tagata tomai faapitoa i le puleaina o mea tau faatoaga mo le setete o Idaho. Sa ia taliaina se tofiga mai lona peresitene o le siteki e auai atu i se fonotaga lea sa faalauiloa ai le Fuafuaga a le Ekalesia mo le Puipuiga. Sa ia ta’ua mulimuli ane: “Sa ou tali atu ma lo’u loto atoa i mea uma na ou faalogo i ai i lena aso. Na ou foi atu i le Siteki a Boise ma faailoa atu i lo matou usoga e faapea o lenei polokalama lea na faasilasila mai, o se faautautaga atamai mo le tamaoaiga, agafesootai, ma le faaleagaga, ma sa faaalia foi le talitonuga o le a tali mai i ai tagata o le Ekalesia ma le loto atoa ona o se mea e le gata ina talafeagai lelei ae manaomia foi.”²

E lua masina talu ona faalauiloa atu e Peresitene Benson le polokalama i lana siteki, “ae tele galuega faatino o le uelefea na faagasolo: o se tasi o uarota na totoina se togalaau i ni eka se tele, o le isi na totoina le sefululima eka o a’a puta fai suka [sugar beets], ae o le Aualofa i se tasi o uarota na tuuapaina meaai ma tasu’i ni ie soosoo ma lavalava. O se [tasi uarota] na fauina se fale laitiiti na tuuapa ai meaai.”³

Elder Ezra Taft Benson, taumatau, faatasi ma Peresitene Max Zimmer, sui peresitene o le Misiona a Swiss, o loo siakiina sapalai uelefea i Sineva, Suitiselani, 1946

Na vaaia e Peresitene Benson le salalau atu o le aafiaga o le polokalama o le uelefea i le 10 tausaga mulimuli ane. I le avea ai ma se tasi o le Korama a Aposetolo e Toasefululua, na tofia ai o ia e pulefaamalumalu i le Ekalesia i Europa i le faatoa uma ai lava o le Taua Lona II o le Lalolagi. I na atunuu na faatama’ia i le taua, sa ia taitaia ai taumafaiga a le Ekalesia e tuuina atu oloa ma meaai na fesoasoani ai i tagata ia toe mafai ona latou ola tutoatasi. Na saunoa o ia e uiga i lona aafiaga i le taimi na taunuu atu ai le uta muamua o sapalai o le uelefea i Perelini, Siamani:

“Sa ma o ma le sui peresitene o le misiona, Peresitene Richard Ranglack. Sa ma savavali atu i le faleteuoloa tuai ma masofasofa sa leoina e fitafita faaauupegaina, lea na teu i ai oloa faapelepele o le uelefea. I le tulimanu pito i tua o le faleteuoloa na ma vaai ai i le faaputugā pusa na toeitiiti tau i le fa’alo.

“‘O pusa meaai mea la?’ na fesili mai ai Richard. ‘O le uiga o lau tala o pusa la o loo tutumu uma i meaai?’

“‘Ioe, lo’u uso,’ na ou tali atu ai, ‘o meaai ma lavalava ma mea e momoe ai—ma, ou te faamoemoe o loo i ai ma ni nai sapalai o mea faafomai.’

“Sa ma tuuina ifo i lalo ma Richard se tasi o pusa. Sa ma tatalaina. Sa faatumulia i meaai e masani ona tausami soo—o pi mamago. A o vaai atu i ai lena tamalii lelei, sa tuu ona lima i totonu o apa pi ma faatoulu ifo i ona tamatamailima, ona amata lea ona tagi e pei o se tamaitiiti ma le loto faafetai.

“Sa ma tatalaina le isi pusa, na tumu i saito ua uma ona tala, e leai ma se mea na faaopoopo pe aveesea mai ai, ae o le faiga tonu lava lea na saunia e le Alii ma faamoemoe i ai. Sa ia tuuina i lona gutu sina ini o le saito. Ina ua mavae se taimi, sa ia tilotilo mai ia te a’u ma loimata—ma na ou tagi foi a’u ia—ma ia fai mai, a’o lūlū lemu lona ulu, ‘Uso Benson, e faigata ona ou talitonu, e mafai e ni tagata e le’i vaai ia i matou ona faia ni mea se tele mo i matou.’

“O le ala lena a le Alii! O foai ofofua na faaosofia ai lo’u alofa faaleuso ma lo’u naunau e ositaulaga, ma lagolago atu i isi ia fesoasoani ia i latou lava. O auaunaga ofofua faapena e mautinoa lava le faatumauina ai o le faamalualiiina ma le faaaloalogiaina e le tagata [e taliaina ia foai] o ia lava.”⁴

Aoaoga a Taft Benson

O loo naunau ma finagalo le Alii e faamanuia i Ona tagata i le faaletino ma le faaleagaga.

Ou te iloa, o’u uso e ma tuafafine, o le talanoaina ai o mataupu faaletino, ua fetalai mai le Alii:

“… ua faaleagaga mea uma lava ia te a’u, ma Ou te le’i tuuina atu lava ia te outou i soo se taimi se tulafono sa faaletino. …” [MF&F 29:34.]

Ioe, o le faamoemoega e faaleagaga. Peitai, ua tatou ola i se lalolagi o mea faitino, faaletagata, ma faaletino. …

… O le tagata e lua ona itu, faaletino ma le faaleagaga, ma i faaaliga muamua na tuuina mai i lo tatou tisipenisione, e tele taimi na faaaoga ai e le Alii ni avanoa, e tuuina mai ai taitaiga ma poloaiga e faatatau i mea faaletino. Sa Ia taitaia le Au Paia ma taitai o le Ekalesia i le faatauina mai o fanua ma isi fale; i le fausiaina o malumalu; e oo lava i le faatuina o se fale lomitusi, ma se faleoloa, ma i le fauina o se fale e mapu i ai le “tagata malaga vaivai” [tagai MF&F 124:22–23]. I le faaaliga maoae ua ta’ua o le Upu o le Poto, e le gata ina sa ia faailoa mai mea e lelei ma mea e le lelei mo le tagata, ae na ia faataatiaina foi se fuafuaga mo le fafagaina o lafu, lea ua silia ma le selau tausaga o loo faasolosolo lava ona lagolagoina e suesuega faasaienitisi a tagata [tagai MF&F 89]. Soo se mea lava e aafia ai le tulaga manuia o le tagata, na avea lava ma o le a avea pea ma se popolega o le Ekalesia. O loo fautuaina pea e le aunoa o tatou tagata i tulaga o mea faaletino. …

O’u uso e ma tuafafine, e taua le tumau o le sagatonu o o tatou mafaufau. Ia tautuana ma i tatou ia manatua pea o mea uma faalelalolagi o mea ia e pala, ae o le iuga e faaleagaga, e ui lava o loo naunau ma finagalo le Alii e faamanuia ona tagata i le faaletino. Ua Ia faailoa mai lena mea i le tele o faaaliga. Ua faafia ona ia faailoa mai, e tatau ona tatou tatalo mo fua o a tatou faatoaga, mo a tatou lafumanu, mo o tatou auaiga, mo o tatou aiga, ma talosagaina faamanuiaga a le Alii i luga o a tatou fuafuaga faaletino. Ma ua ia folafola mai o le a i ai o ia iina ma sauni ma naunau e faamanuia i tatou. …

… O le a le faia e le Alii mo i tatou mea e mafai ma e tatau ona tatou faia mo i tatou lava. Ae o lona faamoemoega o le tausia lea o lana Au Paia. O mea uma e faatatau i le tulaga manuia o le tamaoaiga, agafesootai, ma le faaleagaga o le aiga o le tagata e avea ma o le a avea pea ma popolega o le Ekalesia a Iesu Keriso o le Au Paia o Aso e Gata Ai.⁵

A o tatou faatautaia ai soo se vaega o le polokalama uelefea, e tatau lava ona tatou manatuaina le faamoemoega autu na faavaeina ai. O lena faamoemoega autu “o le faatuina lea, i le mafai e gata mai ai, o se faiga e aveesea ai le mala o le paie, soloiesea le leaga o le faalagolago o tagata i penefiti a le malo ae le ō e faigaluega, ma le ola tutoatasi, galulue malolosi ma limalima faatasi, ola sefe, ma ia toe lagonaina e o tatou tagata le faaaloalo o le tagata ia te ia lava. O le faamoemoega o le Ekalesia o le fesoasoani lea i tagata ina ia fesoasoani ia i latou lava. E ao ona toe ave le faamuamua i le galue e avea ma mataupu faavae autu e limataitaiina ai olaga o tagata o la tatou Ekalesia.”⁶

O le malosiaga o le polokalama uelefea a le Ekalesia e faalagolago lea i le mulimulitaia e aiga uma o le taitaiga musuia a taitai o le Ekalesia ina ia tausia e le tagata o ia lava e ala i le lava o sauniuniga. E finagalo le Atua i lana Au Paia ina ia saunia i latou lava “ina ia mafai e le ekalesia [e pei ona fetalai mai ai le Alii] ona tutoatasi i luga ae o isi meaola uma lava i lalo o le lalolagi selesitila.” (MF&F 78:14.)⁷

O le faataoto mai tusitusiga e uiga i taupou popoto e toalima ma taupou valea e toalima [tagai Mataio 25:1–13] o se faamanatu e faapea, e i ai tagata e umi naua se taimi e faatalitali ai ona faatoa taumafai lea e faatulaga tonu lona aiga faaleagaga ma faaletino. Pe ua tatou saunia ea?⁸

E ala atu i le galue malosi ma le le manatu faapito mo se faamoemoega, tatou te maua ai mea e manaomia o le olaga ma tuputupu ae ai i uiga faaleatua.

O se tasi o uluai mataupu faavae na faaali atu i le tamā o Atamu ina ua tuliese o ia mai le Faatoaga o Etena o lenei: “E te ai foi au mea e ai ma le afu o ou mata, seia e toe foi atu i le eleele” (Kenese 3:19). O mea uma faaletino tatou te maua i le olaga, e oo mai o se taunuuga o le galue ma le foai a le Atua. E na o le galue e maua ai mea e manaomia o le olaga.⁹

Ua poloaiina e le Atua le tagata ia ola i le afu o ona lava mata, ae le o le afu o le isi tagata.¹⁰

O la tatou ekalesia o se talalelei o galuega—e tumu i faamoemoega, le manatu faapito ma tuuina atu i le agaga o le alofa moni o Keriso. E na o le pau lena o le ala e mafai ai ona tatou tuputupu ae i uiga faaleatua. E na o le pau foi lena o le ala e mafai ai ona avea i tatou ma meafaigaluega tauaogaina i aao o le Alii, mo le faamanuiaina o isi e ala atu i lena mana lea e mafai ona oo atu i le suia o olaga o alii ma tamaitai mo le lelei sili atu.

E tatau ona tatou faafetai faamaualalo mo lenei lu’itau, lenei talatuu, lenei avanoa mo auaunaga atoa ai ma le anoanoai o ona taui. E ese le faamanuiaina o i latou o e e mafai ona mulimuli i le fuafuaga a le Alii e atia’e lenei mana ma faaaoga mo le faamanuiaina o isi. O le mea lena na fai e le Keriso. O le mea lena ua faamanuiaina i tatou e fai.¹¹

E tatau ia i latou e mauaina fesoasoani o le uelefea ona galulue i le mea e gata ai lo latou mafai ia maua oloa ma meaai po o fesoasoaniga o le taulaga anapogi. Afai e le tuuina atu ni galuega ‘anoa e fai, afai e le uunaia tagata e galulue, o le a oo ina i ai se faiga le matagofie o le foai fua atu e le Ekalesia o tupe i tagata ma le leai o se faamoemoe e galue mo lena foai, ma o le a faaleagaina ai le faamoemoega na faavaeina ai le polokalama o le uelefea. O se tulafono o le lagi, ma o se tasi lea o o tulafono e le’i atoatoa lava ona tatou aoaoina iinei i le lalolagi, e faapea e le mafai ona e fesoasoani i tagata i taimi uma e ala i le faia mo i latou o mea e mafai ona latou faia, ma e tatau lava ona latou faia mo i latou lava.¹²

E tatau ona tatou ole atu mo faamanuiaga a le Alii i luga o mea uma tatou te faia, ma e le tatau ona faia se mea lea e le mafai ona tatou ole atu ai mo Ana faamanuiaga. E le tatau ona tatou faamoemoe ia fai e le Alii mo i tatou mea e mafai ona faia lava e i tatou. Ou te talitonu i le faatuatua ma galuega, ma o le a sili atu ona faamanuiaina e le Alii le tagata e galue mo mea e tatalo atu ai, nai lo le tagata e na o le tatalo lava.¹³

O le galue malosi atoa ma se faamoemoega e taitai atu ai i le tino malosi maloloina, ausia o mea e logoleleia, se mafaufau manino, ma le moe lelei e toe faafouina ai le malosi. O le galue o loo avea pea lava ma se tulaga manuia i le tagata. Talosia ia outou maua se faaaloalo e tatau ai mo le galue, pe e te galue i lou mafaufau, ou lagona, po o lau galuega faatino. Talosia ia outou olioli e le aunoa i le maua o le lotomalie i le galue faamaoni. … E le mafai ona e oo i le lagi pe afai e na o lou moomoo ma e moemiti lava. E tatau ona e totogia le tau i le galue, i le ositaulaga, ma le ola amiotonu.¹⁴

Pe a tatou gaosia pe toto ma teuina taumafa, e vave ona tatou selesele i faamanuiaga ma saunia ai mo mea e manaomia i le lumanai.

Pe na i ai se taimi na e malōlō ai ia iloa ma malamalama i le mea o le a tupu i lo outou alalafaga po o le atunuu pe afai e le toe i ai ni auala o femalagaa’iga, po o le, pe ana tupu se taua po o se pa’u o le tamaoaiga? O le a faapefea ona outou maua ma ou tuaoi ni mea taumafa? O le a se umi o le a mafai ai e se faleoloa lata ane—po o se supamaketi—ona faafetaia’ia manaoga o le alalafaga atoa?

E le’i leva lava ona uma le Taua Lona II o le Lalolagi, ae valaauina a’u e le Au Peresitene Sili ou te alu i Europa e toe faatutu a tatou misiona ma faatulaga se polokalama mo le tufatufaga o taumafa ma lavalava i le Au Paia. O loo o’u manatua lelei lava tagata na feosofi i totonu o nofoaafi i taeao taitasi ma soo se ituaiga mea lava, e o atu i nuu i tua e faafesuiai a latou meatotino mo ni meaai. I le afiafi, na faatumulia le nofoaga o nofoaafi i tagata ma ni luuga o fualaau faisua ma fualaau taumafamata, ma le anoano o meatuāolō ma moa na feei solo. E te le’i faalogo muamua lava i se vāvāō faapea. Ioe, o nei tagata sa naunau e faafesuiai na toetoe lava o soo se mea mo lena oloa e tausi ai le ola—o le meaai.

O se auala ua toeitiiti a galo atu o le faalagolago o le tagata ia te ia lava mo [lona] tamaoaiga, o le gaosia lea o meataumafa ma teu i le fale. Ua tatou masani tele i le o atu i faleoloa ma faatau mai mea tatou te manaomia. O le gaosia o a tatou meaai tatou te tuuitiitia ai i se vaega tele, le aafiaga i a tatou tupe o le siitia o tau o oloa. Ae o le itu e sili atu le taua, tatou te iloa ai auala e gaosi ai a tatou lava meaai ma e aofia ai tagata uma o le aiga i se galuega faatino e manuia ai. …

E mafai e tagata uma o le aiga ona auai i le taumafaiga e gaosi ma toto mea taumafa.

… Ou te fia fautuaina atu, ia outou faia le mea na fai e isi. Ia faapotopoto faatasi ma isi ma saili se faatagaga e faaaoga ai se fasifanua avanoa mo se togalaau, pe totogi se fasi laueleele e toto ai a outou faatoaga. Na fai faatasi e nisi o korama a le au toeaina lenei faiga, ma o i latou uma na auai ai na selesele i faamanuiaga o se seleselega o fualaau faisua ma fualaau taumafa mata, ma faamanuiaga o le fe’oe’oea’i ma le faaauai ai o le aiga. O le toatele o aiga ua latou suaese le mutia mo ni togalaau.

Matou te uunaia outou ina ia faateleina le faalagolago o le tagata ia te ia lava e pei ona fetalai mai le Alii, “e ui i puapuaga o le a oo mai i o outou luga, … [ia mafai] ona tu lē faalagolago le ekalesia i luga o isi tagata uma i lalo o le lalolagi selesitila” (MF&F 78:14). E finagalo le Alii ia tatou tutoatasi ma faalagolago ia i tatou lava aua o aso faigata nei. Ua ia lapataia ma muai lapataia i tatou e uiga i mea leaga e ono tulai mai. …

O le gaosiga o taumafa ua na o se tasi lea o vaega o le faamamafa faifai pea ina ia outou teuina ni mea taumafa … i soo se atunuu lava e faatagaina ai e le tulafono ona faia. E le’i ta’uina atu e le Ekalesia ia te outou po o a ituaiga mea taumafa e teuina. O lenei filifiliga e tuu atu lava i tagata taitoatasi o le ekalesia. …

… O le faaaliga ina ia gaosia ma teuina mea taumafa, atonu e tutusa lava le taua i lo tatou manuia faaletino i aso nei ma le teuina o le uta a le vaa i tagata o aso o Noa. …

… Ia fuafua e faaputu lau sapalai o mea taumafa e pei lava ona e faia i au teugatupe. Faatau sina mea e teu mai ou totogi taitasi. Tuuapa pe utufagu fualaau taumafa mata ma fualaau faisua mai a outou faatoaga ma togalaau. Aoao i auala e faasao ai mea taumafa e ala i le faamamagoina ma atonu foi ma le faafulīsaina. Ia avea le teuga o au mea taumafa o se vaega o lau paketi. Teu fatulaau ma ia i ai ma lava mea faigaluega e fai ai le galuega. Afai o loo faaputu sau seleni ma fuafua mo se taavale lona lua po o se televise po o se isi aitema lea e na o le faaopoopo atu i mea e te fiafia ai po o mea e te manao i ai, atonu e manaomia ona toe sui mea e ave i ai lau faamuamua. Matou te uunaia outou ina ia fai lenei mea ma le agaga tatalo ma ia fai nei loa. …

O le tele o taimi ua tatou matele i le faataigamalie i mea ua tatou maua ona tatou ‘alo ai lea e faapea, o faatamaiga o le taua, faafitauli o le tamaoaiga, oge, ma mafuie e le mafai ona tutupu iinei. O i latou o e talitonu i lenei manatu a le o le, le masani i faaaliga a le Alii, pe latou te le talitonu foi i ai. O i latou o e mafaufau faasausili faapea, o nei faalavelave o le a le tutupu, e faapea o le a latou sao mai [nei faalavelave] ona o le amiotonu o le Au Paia, ua faaseseina ma o le a latou salamo ona o le talitonu i lena mea.

Na lapataia ma muai lapataia i tatou e le Alii i se aso o le puapuaga tele ma tuuina mai fautuaga ia i tatou, e ala mai i Ana auauna, i auala e mafai ona tatou saunia ai mo nei taimi faigata. Pe ua tatou mulimuli ea i Lana fautuaga? …

O’u uso e ma tuafafine, ia faamaoni i lenei fautuaga ma o le a faamanuiaina ai outou—ioe, o tagata aupito sili ona faamanuiaina i le lalolagi atoa. O outou o ni tagata lelei. Ua ou iloa lena mea. Ae o i tatou uma e tatau ona lelei atu nai lo le tulaga o loo tatou i ai nei. Ia tatou i ai i se tulaga ina ia mafai ai e le gata ina tatou fafagaina i tatou lava e ala i meaai tatou te gaosia ma teuina i le fale, ae fafaga foi ma isi.

Ia faamanuia i tatou e le Atua ia tatou saunia mo aso o loo lumanai, ia atonu o le a sili atu ona faigata.¹⁵

E oo mai le filemu ma le lotomalie i o tatou loto pe a tatou faasaoina se vaega o a tatou tupe ma aloese mai aitalafu e le tatau ai.

Ou te uunaia outou ma le agaga faaaloalo ia ola i le mataupu faavae taua o le galue, ola sefe, ma le faalagolago o le tagata ia te ia lava, ma ia aoao a outou fanau e ala i a outou faataitaiga. … Ia ola i mea ua outou maua. Ia tuu e le aunoa se vaega o na tupe maua i se faaputugatupe. Aloese mai aitalafu le talafeagai. Ia atamai e ala i le aua ne’i taumafai e vavevave le ola fia tele. Aoao ia e iloa pulea lelei mea ua e mauaina ona faatoa e mafaufau lea e fai nisi mea faaopoopo.¹⁶

O le mea e faanoanoa ai, ua i ai i mafaufau o nisi se talitonuga e faapea, a tatou oo i taimi faigata, i taimi sa tatou le atamamai ai ma faama’umau a tatou punaoa, ma soona faaalu tupe ae le’o lava le faasoa, e tatau ona tatou tapa atu a le o le Ekalesia po o le malō e fesoasoani e faamalie o tatou manaoga. Ae ua galo i nisi o o tatou tagata se mataupu faavae autu o le fuafuaga o le uelefea a le Ekalesia e faapea, “e leai se tagata moni o le Au Paia o Aso e Gata Ai, e tino malosi lelei, e faamoemoe e galue se isi tagata e tausi o ia.” …

Ua sili atu nai lo se isi lava taimi muamua, le manaomia ona tatou aoao ma faaaoga mataupu faavae o le faalagolago o le tagata ia te ia lava i tulaga tau i le tamaoaiga. Tatou te le mailoa po o le a le taimi e ono aafia ai o tatou tulaga i faalavelave e aofia ai le ma’i po o le leai o se galuega. Ua tatou iloa ua folafola mai e le Alii mala e tele i le lalolagi atoa i le lumanai, ma ua lapataia ma na muai lapataia i tatou ia saunia. Mo lenei mafuaaga, ua faamamafa mai ai pea lava pea e le Usoga se polokalama o le “toe foi i mea faavae” mo le manuia faaletino ma le faaleagaga.¹⁷

E finagalo le Alii i lana Au Paia ina ia saoloto ma tutoatasi i aso faigata o loo lumanai. Ae e leai se tagata e saoloto moni pe a nofopologa i mea tautupe.¹⁸

I le tusi o Tupu tatou te faitau ai i se fafine na sau ma le tagi ia Elisaia, le perofeta. Na maliu lana tane, ma sa i ai sana aitalafu na le mafai ona ia totogia. Na alu le tagata na nofo aitalafu ai, e ave ona atalii e toalua e faatau atu o ni pologa.

O se vavega na faia e Elisaia na mafai ai e le fafine ona maua se sapalai tele o le suauu. Ona ia fai atu lea ia te ia: “Alu ia, ina faatau atu le suauu, i le e taui atu i le tagata ua outou aitalafu ai, a o mea ua totoe ia ola ai oe ma au tama.” (Tagai 2 Tupu 4:1–7.)

“Taui atu i le tagata ua outou aitalafu ai, a o mea ua totoe ia ola ai.” O nei upu e tauia e le aunoa! O se fautuaga poto lea mo i tatou i aso nei! …

E toatele tagata e le talitonu e toe oo mai le faafitauli ogaoga o le tamaoaiga. O le lagonaina o le saogalemu i mea ua latou faamoemoe i ai o le faaauau pea ona i ai o galuega ma le sologa lelei pea o totogi ma tupe maua, latou te faia ai ni aitalafu e aunoa ma se mafaufau po o le a se mea latou te faia pe afai e le toe i ai ni a latou galuega, po o ua taofia a latou tupe maua ona o nisi lava mafuaaga. Ae ua faafia ona fai mai le au faitofa sili ona atamamai, e le’i lava lelei lo tatou popoto e taulima ai lo tatou tamaoaiga e aunoa ma le oo mai o ni taimi faigata. I le lumanai, o le a oo mai ai nei taimi faigata.

O le isi mafuaaga o le faateleina o le nofo aitalafu e sili atu le loloto ma e mafua ai se popolega tele atu. O le faateteleina o le faaloloto ma le manao tele i mea faalelalolagi, pe a faatusatusa atu i tulaga faatauaina faaleagaga. E toatele aiga o le a taunapa lava e fau se fale tele ma taugata atu nai lo se fale e manaomia ona o “viiga a tagata,” ma ona o loo nonofo i se pitonuu taugata. … O le fesiisiitai ai o le tulaga o le olaga, ua faateteleina ai le faaosoosoga o masini faaeletonika fou e tuu mai i luga o le maketi. O metotia atamai e fuafuaina ma le faaeteete o faasalalauga ma faalauiloa o aso nei, o loo taulai atu i itu e aupito sili ona vaivai o le le mananao o tagata i se oloa fou. O le mea e leaga ai, o se taunuuga o lea mea, o loo i ai se lagona faatupulaia e faapea, o mea faalelalolagi e tatau lava ona maua i le taimi lena, e aunoa ma se faatali, e aunoa ma le sefeina o se tupe, e aunoa ma le faafiti po o le ositaulagaina o lena mea.

Ae e sili atu lava le leaga, o se vaega tele o aiga e i ai aitalafu patino e matuai leai lava ni aseta tautupe [teugatupe] po o se isi lava mea e tapa i ai. Oka ni faafitauli o le a latou oo i ai pe afai e faafuasei ona motusia pe matuai faaitiitia a latou tupe maua! Ua tatou iloa uma lava ni aiga o e ua saisaitia i latou lava mo mea e sili atu nai lo mea e mafai ona latou totogia. O i latou ua saisaitia i nei tulaga ua matua oo lava i le tele o faanoanoaga.¹⁹

O le ola e sili atu nai lo mea ua tatou maua e mafai ona oo ai “i se lalolagi o le faanoanoa.”

Ia ou te le o fai atu la o aitalafu uma e leaga. E leai. O le aitalafu mo se pisinisi lelei o le tasi lea o vaega taua o le tuputupu ae. O le aitalafu mo se mokesi lelei o se fesoasoaniga moni lea i se aiga lea e ao ona fai se nonogatupe mo se fale.²⁰

Mo se taimi umi, e faigofie atu le ola i tupe tatou te maua ma aloese mai nonogatupe mai faaputugatupe i le lumanai, sei vagana o tulaga e alagatatau ai—ae aua lava ne’i aitalafu ona o mea feilafi ae le o manaomia. E le o se tulaga talafeagai ia i tatou lava po o tatou alalafaga le soona faaalu o a tatou tupe faaalu ma le le atamai, ae oo ane i le aso e motusia ai a tatou tupe maua, ae tatou liliu atu i faalapotopotoga mo le toomaga po o le Ekalesia mo se fesoasoani tautupe.

Ou te augani atu ma le faamaoni, aua ne’i saisaitia outou lava i aitalafu soonafai. Ia faaputuputu nei ae faatau mulimuli ane, ma o le a mamao lava i luma lau fuafuaga. O le a outou saoloto mai tului maualuluga ma isi tau e totogi, ma o le tupe e te faasaoina e ono maua ai le avanoa e te faatauina mulimuli ane ai i le tinoitupe i se tau pa’u tele.

… Ia tetee atu i le faaosoosoga o le nofo aitalafu mo se fale ia vaai mai tagata e manaia pe soona tele tele foi nai lo le mea tonu e te manaomia.

E sili atu le tulaga o le a i ai, ae maise lava o aiga talavou faatoa amata, pe a faatau muamua se tamai fale laitiiti lea e mafai ona outou totogiina i se taimi puupuu. …

Aua ne’i tuua oe lava po o lou aiga e lē malupuipuia mai afā o mea tautupe. Mo le taimi nei, ia lafoai ese mea feilafi faaopoopo e le manaomia, ae faaputu se teugatupe. O se mea atamai tele le mafai ona totogi o a’oga a lau fanau i le lumanai, ma tausi oe pe a e matua. …

Uso e ma tuafafine, e oo mai le filemu ma le faamalieina i o tatou loto pe a tatou ola i mea tatou te maua. E faamoemoe o le a faamatuu mai e le Atua ia i tatou le poto ma le faatuatua e usitaia ai fautuaga musuia a le perisitua ia saoloto ai mai le nofoaitalafu, ia ola i mea tatou te maua, ma ia totogi muamua ona faaaoga ai lea—i se faapuupuuga, ia “totogi au aitalafu, ma ola.”²¹

Fautuaga mo Suesuega ma le Aoaoina Atu

Fesili

I le vaega 1, o loo otooto mai ai e Peresitene Benson mataupu faavae autu o le polokalama uelefea a le Ekalesia. O a ni auala e saofagā ai nei mataupu faavae i lo tatou manuia faaletino? O a ni auala latou te saofagā ai i lo tatou manuia faaleagaga?
O a nisi o faamanuiaga o le “galue malosi, atoa ma se faamoemoe”? (Mo nisi o faataitaiga, tagai i le vaega 2.) O a ni mea e te fiafia ai i le galue? O le a se mea e mafai ona tatou faia e fesoasoani ai i tamaiti ma le autalavou e aoao ai ina ia fiafia e galulue?
O a nisi o faamanuiaga o le a oo mai pe a tatou mulimuli i le fautuaga a Peresitene Benson i le vaega 3? Mafaufau i le mea o le a e faia, mafaufau i ou tulaga o loo i ai nei, e mulimuli ai i lenei fautuaga.
Aisea e te manatu ai, o le faaaogaina ma le poto o tupe e taitai atu ai i le “filemu ma le lotomalie”? I se faatusatusaga, o le a se mea e mafai ona tatou oo i ai pe afai tatou te le “ola i mea ua [tatou] maua”? (Tagai i le vaega 4.)

Mau Talafeagai

Iakopo 2:17–19; Alema 34:19–29; MF&F 19:35; 42:42; 75:28–29; 104:78; Mose 5:1

Fesoasoaniga mo le Aoao Atu

“Ina ia fesoasoani i tagata o loo aoaoina e tali ia fesili, atonu e te manao e ta’u atu muamua ia i latou se mea a o le’i faitauina pe aoaoina atu, o le a e talosagaina ai ni a latou tali. … Mo se faataitaiga, e mafai ona e faapea atu, ‘Faalogo a o o’u faitauina atu le fuaitau lenei ina ia mafai ona outou fetufaai mai ai ni mea e sili ona outou fiafia i ai’” (O Le Aoao Atu, E Leai Se Isi Valaauga e Sili Ai [1999], 72).