Kapitulo 19

Pagpangulo

“Kon kamo ugma damlag mangulo sa Simbahan, [sa inyong] nasud, ug sa inyong panimalay, kinahanglang lig-on mong mobarug sa tinuohan, dili matarug kon mapalibutan sa mga dautan.”

Gikan sa Kinabuhi ni Ezra Taft Benson

Si Ezra Taft Benson nagsugod sa pagkat-on nga mahimong lider sa batan-on pa siya. Sa dihang hapit na siya mag-13 anyos, ang iyang amahan gi-call nga magserbisyo og misyon. Isip kinamagulangan sa pamilya, giangkon ni Ezra ang daghang responsibilidad sa pagpangulo sa ilang umahan samtang wala ang iyang amahan. Pipila ka tuig ang milabay, sa dihang gi-call siya nga mag-misyon sa British Mission, nakaserbisyo siya isip presidente sa branch ug presidente sa Newcastle Conference (susama sa district karon). Sa wala madugay, nagserbisyo siya og katulo sa kapangulohan sa stake—kausa isip magtatambag, kausa nga kadiyot isip presidente sa stake, ug sa mas dugay nga panahon isip presidente sa stake. Atol sa iyang propesyonal nga panarbaho, nakatrabaho siya sa daghang mga posisyon sa pagpangulo sa industriya sa agrikultura. Tungod sa iyang pagka-lider ug ka-eksperto sa natad sa agrikultura, gihangyo siya ni Presidente Dwight D. Eisenhower sa pagserbisyo sa pinakataas nga posisyon sa agrikultura sa Estados Unidos. Sulod sa walo ka tuig nagtrabaho siya uban ni Presidente Eisenhower isip secretary sa agrikultura sa Estados Unidos.

Sa wala pa siya mahimong Presidente sa Simbahan, si Presidente Benson miserbisyo og 12 ka tuig isip Presidente sa Korum sa Napulog Duha ka mga Apostoles. Ang mga sakop sa korum adunay dakong pagtahud kaniya isip ilang lider. Si Elder Bruce R. McConkie “kanunay moingon sa iyang pamilya nga iyang nakita nga patas gyud kaayo ang pagpangalagad ni Presidente Benson sa Simbahan.”¹

Sa pagpangulo sa Napulog Duha, giawhag ni Presidente Benson ang mga sakop sa korum nga moprangka gayud sa pagpadayag sa ilang mga hunahuna, bisan og may lahi siya nga opinyon. Sa dihang si Elder Russell M. Nelson bag-o pa nga sakop sa korum, naghunahuna siya nga dili lang gyud siya mosulti. “Apan dili kini maoy gusto ni [Presidente Benson],” miingon siya. “Gani, kon maghilom lang ko sa usa ka butang iya kong pasultihon sa akong gihunahuna.”²

Bisan tuod nangayo siya og mga opinyon gikan sa tanan, dili niya itugot nga malayo ang diskusyon sa gihisgutan. Si Presidente Howard W. Hunter miingon nga si Presidente Benson “nasayud unsaon nga prangka ug bukas ang diskusyon sa [mga] Kaigsoonan ug [makahimo] sa paggiya ug pagkontrolar niini ug mosangput nga ang tanan magkauyon sa desisyon.”³ Kon “siya mobati nga igo na ang diskusyon, yano siyang moingon, ‘Tingali igo na ang atong diskusyon.’ Karon, kinahanglan na kitang modesisyon.”⁴

Giamuma ni Presidente Benson kadtong iyang mga gigiyahan, ug nagtudlo siya pinaagi sa ehemplo. “Walay koy laing tawo nga nailhan nga mas mosabut sa iyang mga kaubanan o mas mabalaka sa ilang kaayohan,” miingon si Presidente Gordon B. Hinckley. “Dili niya ipabuhat sa uban ang mga butang nga nga siya mismo dili ganahang mobuhat, hinoon siya nagsilbing ehemplo sa pagserbisyo nga angay natong sundon.”⁵ Epektibo usab si Presidente Benson sa pagdelegar og trabaho sa uban, nagtudlo ug mipalambo kanila niana nga proseso.

Sa kinatibuk-ang komperensya sa dihang si Presidente Benson gipaluyohan isip Presidente sa Simbahan, si Presidente Gordon B. Hinckley mipahayag sa iyang konbiksyon nga ang Ginoo mipili ug miandam ni Presidente Benson sa pagdumala sa Simbahan:

“Mopamatuod ko kaninyo nga ang Ginoo mipili ni Ezra Taft Benson nga mahimong sakop sa Konseho sa Napulog Duha hapit kwarenta y tres ka tuig nang milabay. Niining mga tuiga ang Ginoo misulay ug midisplina, mitudlo ug miandam kaniya. …

“Isip usa nga nakaila niya ug nagserbisyo uban kaniya, mosaksi ko nga siya tawo nga adunay dakong pagtuo, nasulayan na ang pagpangulo, may dakong gugma sa Ginoo ug sa Iyang buhat, nahigugma sa mga anak sa Dios bisan asa. Siya tawo nga napamatud-an na sa iyang kapasidad.”⁶

Si Presidente Ezra Taft Benson ug iyang mga magtatambag sa Unang Kapangulohan: Presidente Gordon B. Hinckley (sa wala) ug Presidente Thomas S. Monson (sa tuo)

Mga Pagtulun-an ni Ezra Taft Benson

Ang epektibong mga lider mobarug nga lig-on diha sa pagtuo ug mopakita og maayong ehemplo.

Milambo ang gahum sa pagpangulo ni Kristo gumikan sa Iyang ehemplo. Ang klaro niyang panawagan mao ang, “Umanhi ka, ug sumunod kanako!” … Ang Iyang [kalampusan nga maangkon] ang kamaunungon ug debosyon sa mga tawo ngadto sa mga baruganan sa pagkamatarung nag-agad sa gugma isip dakong butang nga pangpadasig. Siya mitabang nato aron mahibalo nga ang mga diosnong kinaiya nga anaa sa atong pagkatawo nga nagkinahanglang ipahayag mamahimo nga usa ka mahimayaong reyalidad sa pagpakabuhi. Ang Iyang ehemplo nagpadayon isip dakong paglaum ug kalig-on sa katawhan.⁷

Kon kamo ugma damlag mangulo sa Simbahan, [sa inyong] nasud, ug sa inyong panimalay, kinahanglang lig-on mong mobarug sa tinuohan, dili matarug kon mapalibutan sa dautan, ug sama sa giingon ni Pablo, “Isul-ob ninyo ang tibuok hinagiban sa Dios, aron makabarug kamo batok sa malipat-lipatong kaugdahan sa yawa. Kay ang atong pakigdumog dili batok sa mga binuhat nga unod ug dugo, kondili batok sa mga punoan, batok sa mga kagamhanan, batok sa mga labawng agalon niining mangitngit nga kalibutan karon, batok sa mga dautan nga espirituhanong panon diha sa mga dapit sa kalangitan.” (Mga Taga-Efeso 6:11–12.)⁸

Ang atong mga batan-on nanginahanglan og diyutay ra nga kritiko ug daghang mga modelo. Kamo ang mga modelo diin ilang malantaw ang sumbanan sa kinabuhi nga ilang sundon ug buhaton. Sila nanginahanglan og inspirasyon gikan kaninyo samtang hingpit kamong nagsunod sa mga pagtulun-an sa ebanghelyo.⁹

Ang mga tawo mosunod sa epektibong pagpangulo.

Pagkamapainubsanon

Usa sa mga timaan sa epektibong pangpangulo sa kanunay ug sa hangtud mao ang mapainubsanong espiritu.¹⁰

Espirituhanong Kalig-on

Ang espirituhanong kalig-on nagdasig og positibong panghunahuna, positibong baruganan, positibong batasan, positibong kinaiya, ug positibong mga paningkamot. Mga kalidad kini nga makadasig og kaalam, ikaayo sa pisikal ug mental, ug mahinamong pagdawat ug pagtabang sa uban.¹¹

Ang mga maayo lamang ang adunay kapasidad sa pagtabang ug pag-awhag sa uban para sa mas dakong pagserbisyo, sa mas dakong kalampusan, sa mas dakong kalig-on.¹²

Ang inspirasyon mahinungdanon sa tarung nga paggiya. … Kinahanglang anaa kanato ang diwa sa inspirasyon kon kita magtudlo (D&P 50:13–14) o mangalagad sa mga buluhaton sa gingharian (D&P 46:2).¹³

Walay katagbawan nga ikapuli sa Espiritu.¹⁴

Kahibalo

Ang tinuod nga lider maningkamot nga kanunayng masayud. Siya molihok sumala sa baruganan kaysa paspas mahimo ang buluhaton. Siya naningkamot nga makat-on gikan sa tanang kasinatian sa tawo nga itandi ngadto sa napadayag nga mga baruganan sa balaang kaalam.¹⁵

Usa sa pinakamaayong paagi nga ang mga lider makasabut sa saktong mga baruganan mao ang pag-angkon og daghang kahibalo ug pagsabut sa kasulatan ug sa tukma nga handbook. Kasagaran sa mga sitwasyon nahitabo na sa una, tingali sa makadaghan, ug ang polisiya ug pamaagi gitino aron sa pagtubag sa problema. Kanunay nga usa ka malaamon, ang, pagtamud ug pagpamilyar sa nasulat na nga mga instruksyon ug polisiya sa Simbahan alang sa pagtubag sa mga pangutana.¹⁶

Ang mga lider gitambagan sa pagtuon sa mga doktrina sa Simbahan aron igo ang ilang mahimo sa pagrepresentar sa atong doktrina ngadto sa uban. Gamit ang mga pulong ni Apostol Pablo, kami naglaum nga kamo mga “magtatrabaho nga dili kinahanglan magakaulaw” (2 Timoteo 2:15).¹⁷

Kamaunungon

Ang maayong lider makalaum nga siya unungan. Siya usab kinahanglang mounong sa uban. Iyang tabangan kadtong iyang gisaligan sa trabaho. Ang kamaunungon mosobra pa sa pagtrabaho. Siya malipay kon mapasidunggan ang iyang mga giserbisyuhan. Siya mapasigarbuhon sa ilang kalampusan. Dili siya mousab sa desisyon sa uban gawas kon konsultahon una niya ang mihimo sa desisyon. Dili niya pakaulawan ang iyang mga kauban sa atubangan sa ubang tawo. Siya prangka ug walay gitago ngadto kaniya.¹⁸

Panaghiusa

Adunay “pagkahiusa nga gikinahanglan sa balaod sa celestial nga gingharian; Ug ang Zion dili matukod kon dili pinaagi sa mga baruganan sa balaod sa celestial nga gingharian.” (D&P 105:4–5.) Usa sa gikinahanglang mga baruganan ug mga hiyas mao ang panaghiusa sa hunahuna ug kasingkasing. “Ako moingon nganha kaninyo, paghiusa; ug kon kamo dili magkahiusa kamo dili ako,” mao ang sugo sa Manluluwas sa Iyang Simbahan karon (D&P 38:27; Juan 17:20–23). Kini gikinahanglan gyud niadtong Iyang gi-call sa pagdumala sa Iyang gingharian.¹⁹

“Ang gugma sa katawhan mahinungdanon sa epektibong pagpangulo.”

Gugma ug pagpakita og pagsalig

Ang paghigugma sa mga tawo mahinungdanon sa epektibong pagpangulo. Gihigugma ba ninyo ang inyong katrabaho? Nakaamgo ba mo nga ang bili sa kalag mahinungdanon sa panan-aw sa Dios (tan-awa sa D&P 18:10)? May pagsalig ba mo sa inyong kabatan-onan? Gidayeg ba ninyo ang ilang mga hiyas, nagpasalamat sa ilang mga nahimo? O dili maayo ang inyong pagtratar kanila tungod sa ilang mga sayop?²⁰

Gani ang mas grabe pa kaysa pagpanaway, kasagaran, mao ang pagkawalay komentaryo gikan sa atong mga lider kabahin sa trabaho nga gisangun kanato. Ang ginagmay nga komentaryo o mubong mga sulat, nga sinsero ug piho, makadasig gayud sa trabaho.²¹

Kita nasayud … nga ang panahon nga gigahin sa lider sa personal nga pakig-istoryahanay sa mga miyembro mas mabungahon kaysa panahon nga gigahin sa mga miting ug administratibong mga buluhaton. Ang personal nga pakig-istoryahanay mahinungdanon sa pagkakabig sa dili kaayo aktibo nga miyembro.²²

Ilabi na sa Simbahan, ang paghangyo mas maayo og resulta kaysa pagsugo—mas maayo usab ang pagbati. Ayaw kalimot sa pagsulti sa hinungdan. Mo-follow-up aron pagpangumusta sa mga butang. Pasalamati ang mga tawo sa maayo nilang pagkasunod sa mga instruksyon. Sultihi sa dako ninyong pagsalig kon kini matinuorong gituman. Kon magkaproblema, maayo nga ribyuhon ug sutaon kon asa ka nasayop—ug ayaw kahadlok sa pag-angkon nga nasipyat ka. Hinumdumi, ang atong mga tawo mga boluntaryo, walay bayad nga nagtrabaho. Nahigugma usab sila sa Ginoo ug sa Iyang buhat. Higugmaa sila. Pasalamati sila. Kon kamo tintalon sa pagpangasaba sa kaubang nagtrabaho, ayaw gyud na buhata. Sunda ang akong gisugyot ug pikpika hinoon siya sa likod. Ang mga anak sa Amahan sa tibuok kalibutan maingon ta mga maayo. Siya nahigugma kanila. Angay usab ni natong buhaton.²³

Ang mga tawo dili ganahang pugson sa pagbuhat og butang, bisan kon kini alang sa ilang kaayohan. Apan ang mga tawo mosanong sa epektibong pagpangulo.²⁴

Ang maayong mga lider maalamong modelegar.

Ang ehemplo sa Manluluwas sa pagdelegar

Ang mga pundasyon sa kalibutan gihan-ay pinaagi sa awtoridad sa pagdelegar. Kadaghan mipahinumdom si Jesus sa mga katawhan nga ang Iyang misyon usa ka gidelegar nga awtoridad. Ang pagpahiuli sa Iyang Simbahan nagsugod gayud pinaagi sa gidelegar nga awtoridad.

Namulong sa mga Judeo diha sa sinagoga, si Jesus miingon kanila nga Siya gidelegaran sa Iyang Amahan: “Kay ako nanaug gikan sa langit, dili sa pagbuhat sa akong kaugalingong kabubut-on, kondili sa kabubut-on sa nagpadala kanako” (Juan 6:38).²⁵

Si Jesus mao ang atong batid nga ehemplo sa matarung nga pagdumala pinaagi sa hustong pagdelegar. … Daghan sa Iyang gidelegaran nga mga misyonaryo mibyahe nga walay dalang kwarta o puntil. Ang mga tawo nag-antus og grabing kalisud sa pagtuman sa Iyang mga instruksyon. Pipila kanila nakasinati og dili makatarunganon nga kamatayon sa pagserbisyo Kaniya. Apan ang iyang gidelegaran nga mga disipulo maisugong misangyaw sa kalibutan sama sa mga leyon tungod sa Iyang sugo. Nakahimo sila og mga butang nga daw imposible. Walay laing lider nga makadasig sa mga katawhan sama sa Iyang nahimo.²⁶

Ang Simbahan ni Jesukristo naglig-on sa mga lider pinaagi sa pagpaapil sa mga tawo gamit ang awtoridad nga gidelegar. Sa dihang [si Jesus] dinhi pa sa kalibutan, mitawag siya og napulog duha ka mga apostoles sa pagtabang niya sa pagdumala sa simbahan. Mitawag usab siya og seventy. Siya midelegar [ngadto] sa uban. Walay tawo nga mag-urong ra sa iyang simbahan. Ang tanan apil sa pagtukod sa gingharian. Ug samtang ilang gitukod ang gingharian, ilang gilig-on ang ilang kaugalingon.

Tumong ni Jesus ang pagbayaw sa indibidwal. …

Tumong ni Jesus nga himoong hari ang tanang tawo, sa pag-andam kaniya sa pagpangulo sa kahangturan. Niadtong dili malimtang kagabhion human sa katapusang panihapon, Siya miingon ngadto sa napulog usa … , “Sa pagkatinuod, sa pagkatinuod magaingon ako kaninyo, nga ang mosalig kanako magahimo usab sa mga buhat nga akong ginabuhat; ug labi pa gani ka dagkong mga buhat kay sa niini ang iyang pagabuhaton; kay moadto man ako sa Amahan.” (Juan 14:12.) Pinaagi sa pagdelegar, si Jesus nagtinguha sa paglig-on, imbis ipakaubos, ang indibidwal. Ug ang tibuok Simbahan karon, tanang miyembro naglambo sa kahimtang pinaagi sa mga posisyon nga gidelegar nganha kanila.²⁷

Atol sa Iyang mortal nga pagpangalagad, gidelegar ni Jesukristo ang Iyang awtoridad ngadto sa Iyang Napulog Duha ka mga Apostoles.

Pagdelegar diha sa atong mga organisasyon

Ang maayong pagdumala nagpasabut og pagdelegar sa awtoridad. Ang pagdelegar sa buluhaton makatabang ninyo ug sa inyong organisasyon. Ang epektibong pagdumala usa ka kahanas aron daghan ka og mahimo pinaagi sa pagdelegar ngadto sa uban.²⁸

Ang maalamong pagdelegar nanginahanglan og mainampuong pagpangandam, sama sa epektibong pagtudlo o pagsangyaw. Giklaro kini sa Ginoo gamit niining mga pulong: “Ug ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo” (D&P 42:14). Ug mahimo namong dugangan, dili kamo modelegar kon wala ang Espiritu.²⁹

Ang maalamong tigdumala sa Simbahan karon dili mobuhat sa tanang trabahoon, magpakita nga walay laing tawo nga makamao niini. Ug sa iyang pagdelegar, iyang isiguro ang hingpit nga suporta sa tawo nga iyang gidelegaran.³⁰

Kon mahatag na ang responsibilidad, ang lider dili malimot sa tawo nga gisangunan o sa iyang buluhaton. Siya mo-follow-up nga may kahinam apan dili “strikto sa pagsubay sa iyang gibuhat.” Modayeg siya kon kini angay. Modasig siya kon gikinahanglan. Kon mobati siya nga ang buluhaton wala himoa ug kinahanglang usabon, buhaton niya kini nga may kaisug ug dili matarug apan sa kamabination. Kon ma-release na siya, mohatag siya og pahalipay ug pasalamat.³¹

Walay maalamong lider nga nagtuo nga ang tanang nindot nga mga ideya naggikan kaniya. Modapit siya og mga sugyot niadtong iyang gidumala. Ipabati niya nga sila may importanting bahin sa pagdesisyon. Iyang ipabati kanila nga ilang gisunod ang ilang mga polisiya, dili lang iyang polisiya.³²

Ang mga lider sa Simbahan mga instrumento sa kamot sa Dios ug kinahanglang magtinguha sa Espiritu sa pagdumala ug paglig-on sa uban.

Sa Simbahan karon ang lider sa kinatibuk-an makakab-ot gayud kon unsay iyang gilauman. Kinahanglang taas ang iyang ekspektasyon. Iyang isiguro ngadto sa iyang gipanghatagan og mga buluhaton nga diha sa pagserbisyo sa Ginoo sila mas impluwensyal kaysa ordinaryo nga mga responsibildad. Walay kapakyasan diha sa buhat sa Ginoo kon [atong] buhaton ang [atong] pinakamaayo. Kita mga instrumento lang; kini buhat sa Ginoo. Kini Iyang simbahan, Iyang plano sa ebanghelyo. Kini Iyang mga anak nga atong kauban sa pagtrabaho. Dili niya itugot nga kita mapakyas kon atong buhaton ang atong bahin. Iya kitang palamboon gani lapas pa sa atong mga talento ug abilidad kon gikinahanglan. Nasayud ko niini.³³

Kinahanglan natong hinumduman nga … ang Simbahan … dili negosyo. Ang kalampusan niini gisukod sa mga kalag nga naluwas, dili sa ginansya o alkansi. Siyempre, kita kinahanglang, kamao ug mabungahon, apan kinahanglan usab nga mag-focus ta sa mahangturong mga tumong. Pagmabinantayon sa pagpatuman sa sekular nga mga pamaagi ug terminolohiya sa sagradong mga buhat sa priesthood. Hinumdumi nga ang pamaagi sa pagsulbad sa problema gamit ang hunahuna, bisan tuod makatabang, dili paigo diha sa buhat sa gingharian. Ang buhat sa Dios kinahanglang himoon pinaagi sa hugot nga pagtuo, pag-ampo, ug sa Espiritu, “ug kon kini pinaagi sa uban nga paagi kini dili gikan sa Dios” (D&P 50:18).³⁴

Ang tibuok katuyoan sa Simbahan mao ang paglig-on sa mga tawo nga mahimong sama sa dios sa ilang kinaiya ug sa ilang mga hiyas ug sa ilang mga baruganan.³⁵

Mga Sugyot alang sa Pagtuon ug Pagtudlo

Mga Pangutana

Si Presidente Benson nagtudlo nga ang mga lider mopakita og maayong ehemplo (tan-awa sa seksyon 1). Nganong ang ehemplo dako kaayo og impluwensya? Sa unsang paagi ang matarung nga mga ehemplo sa lider nakaimpluwensya kaninyo?
Tun-i ang mga kinaiya sa maayong mga lider nga gipasabut sa seksyon 2. Sa inyong hunahuna nganong ang mga tawo “mosunod sa [ingon ani] nga pagpangulo”? Hunahunaa kon unsay inyong mahimo aron makabaton niining mga kinaiyaha.
Si Presidente Benson nagtudlo nga ang mga lider sa Simbahan kinahanglang mosunod sa ehemplo sa Manluluwas isip tigdelegar (tan-awa sa seksyon 3). Sa unsang paagi ang pagdelegar makatabang sa pagtukod sa gingharian sa Dios? Sa unsang paagi kamo nakabenepisyo sa mga responsibilidad nga gidelegar diha kaninyo?
Sa unsang paagi nga ang atong pagserbisyo sa Simbahan mausab samtang atong hinumduman nga “kini buhat sa Ginoo” ug “kini Iyang mga anak nga atong kauban sa pagtrabaho”? (Tan-awa sa seksyon 4.) Unsay inyong nasinati sa dihang kamo milihok isip instrumento sa mga kamot sa Ginoo aron pagtabang sa ubang mga tawo?

May Kalabutan nga mga Kasulatan

Exodo 18:13–26; Mateo 5:13–16; Lucas 22:31–32; Alma 17:1–11; D&P 38:23–27

Tabang sa Pagtudlo

“Ang mga indibidwal malipay kon ang ilang mga gihimo gidayeg. Kinahanglang maningkamot ka nga matagad ang mga komentaryo sa matag tawo ug, kon mahimo, himoa ang mga komentaryo nga kabahin sa mga panaghisgutan sa klase” (Pagtudlo, Walay Labaw Ka Mahinungdanong Tawag [1999], 35–36).