Kapitulo 14

Kaminyoon ug Pamilya—Gi-orden sa Dios

“Ang pamilya usa sa labing lig-on nga mga panalipod sa Dios batok sa mga dautan sa atong panahon. Tabang sa paghimo sa inyong pamilya nga malig-on ug suod ug takus sa mga panalangin sa atong Amahan sa Langit.”

Gikan sa Kinabuhi ni Ezra Taft Benson

Gikan sa sinugdanan sa ilang kaminyoon, si Ezra ug Flora Benson mihimo sa ilang panimalay ug pamilya nga ilang unang prayoridad. Sa gagmay pa ang ilang mga anak, misugod sila sa paghatag og gibug-aton nga gusto nila nga ang ilang pamilya walay “bakante nga mga lingkuranan” didto sa mga kahangturan.¹ Gihatagan og gibug-aton ni Presidente Benson kining sama nga mensahe atol sa iyang serbisyo isip usa ka lider sa Simbahan. Siya miingon:

“Gituyo sa Dios nga ang pamilya mahimong mahangturon. Sa tibuok nakong kasingkasing, ako magpamatuod sa kamatuoran niana nga pamahayag. Hinaut nga Siya mopanalangin kanato sa paglig-on sa atong mga panimalay ug sa mga kinabuhi sa tanang sakop sa pamilya aron sa tukma nga panahon kita maka-report ngadto sa atong Langitnong Amahan didto sa Iyang celestial nga panimalay nga kitang tanan atua didto—amahan, inahan, igsoong babaye, igsoong lalaki, ang tanan kinsa nagminahalay. Ang tanang lingkuranan puno. Tanan kita mopauli sa panimalay.”²

Alang ni Presidente ug Sister Benson, ang paningkamot sa paglig-on sa ilang pamilya misugod diha sa pag-amuma sa ilang kaminyoon. Sila nagminahalay ug nagmatinud-anon, nag-inunongay ug nagmatinuoron. Bisan tuod og sila walay hilig sa pag-away, kasagaran sila adunay prangka nga mga panaghisgutay.³ Nag-ambitay sila og hingpit nga pagsalig sa usag usa, nga ilang gibati nga usa sa dakong kalig-on sa ilang kaminyoon. “Ako wala sukad, masukad may bisan unsang pagduha-duha mahitungod sa pagkamaunungon ni Flora,” miingon si Presidente Benson.⁴

Si Presidente ug Sister Benson nagsuportahay ug naglig-onay sa usag usa. “Si Flora dihay mas dakong panglantaw alang kanako ug sa akong potensyal kay ni bisan kinsa sa akong kinabuhi. Ang iyang hugot nga pagtuo ug suporta nahimong dako kaayong panalangin,” miingon si Presidente Benson.⁵ Kasagaran, kon gibati niya ang kakulang diha sa iyang bug-at nga mga responsibilidad, si Sister Benson mopahid sa iyang mga luha ug mohupay ni Presidente Benson.⁶ Mangayo siya og panabang sa Ginoo sa pagsuporta ni Presidente Benson, ug iyang awhagon ang mga anak sa paghimo sa sama. “Dihay daghang pag-ampo ug pagpuasa alang ni papa,” miingon ang anak nga babaye nga si Barbara.⁷

Si Presidente ug Sister Benson kanunay nga maunungon ug matinud-anon sa usag usa.

Sa pagtukod og lig-on nga pundasyon sa ilang kaminyoon, gitudloan ni Presidente ug Sister Benson ang ilang mga anak sa importansya sa mga relasyon sa mahangturong pamilya. “Ang among mga ginikanan misilsil og lawom nga mga pagbati sa pagkamaunungon ug paghigugma taliwala kanamong mga anak,” miingon ang anak nga lalaki nga si Mark. “Ako wala magtuo nga kana nga matang sa kinaiya mamugna sa natural nga paagi diha sa panimalay, apan kini giawhag ug gipalambo pinaagi sa usa ka mabalak-on ug mahigugmaon nga inahan ug amahan.”⁸

“Ang sumbanan sa pamatasan nga gipaabut sa mga Benson, ingon man ang prayoridad nga ilang gihatag ngadto sa pamilya, gisentro diha sa ebanghelyo. Sila naningkamot sa pagtukod og usa ka panimalay diin ang gugma mopatigbabaw, diin ang mga bata nakakat-on ug milambo, ug diin sila nalingaw. Ang mga Benson buot nga ang ilang panimalay mahimong usa ka sanktwaryo gikan sa kalibutan. “Kana wala magpasabut nga kami walay mga kalisud,” ang anak nga lalaki nga si Reed miingon. “Kami dili kanunay magkasinabtanay. Kami dili kanunay nga mobuhat sa among mga buluhaton. Gisulayan namo ang pasensya ni Mama sangko sa utlanan usahay. Apan, bisan pa nianang tanan, ang pagbati sa panaghiusa sa pamilya mao ang among gipaningkamutang tambayayungan.”⁹ Giangkon ni Sister Benson: “Walay tawo nga perpekto. Sa among pamilya dili among katuyoan sa pagpadako sa mga kasaypanan, apan sa pag-awhag sa usag usa sa paglambo.”¹⁰

Ang mga anak sa mga Benson gagmay pa sa dihang ang ilang amahan gi-call nga moserbisyo sa Korum sa Napulog Duha ka mga Apostoles, ug siya nabalaka mahitungod sa unsay epekto sa iyang iskedyul sa biyahe diha sa iyang panahon uban kanila. Gisulat niya sa iyang journal: “Ang dugay nga biyahe tungod sa trabaho sa Simbahan mopalayo kanako gikan sa akong pamilya sa dakong bahin. … Ako sinserong misalig nga ako unta magmatinuoron sa akong pamilya, magpabilin kanila nga duol sa Simbahan, ug bisan pa niana matuman ang akong mga obligasyon isip usa sa mga General Authority. Kini ako nahibalo nga dili sayon nga butang.”¹¹

Ang katinuod nga kini dili sayon miaghat ni Presidente Benson sa pagtrabaho og maayo aron mapaduol sa iyang pamilya. “Ang pipila sa labing malipayon, labing makatagbaw sa kalag nga mga pagbati ug mga kasinatian sa [akong] kinabuhi may kalabutan sa panag-uban sa panimalay ug pamilya,” miingon siya.¹²

Niadtong 1957, isip secretary sa agrikultura sa Estados Unidos, mibiyahe si Presidente Benson og upat ka semana sa tibuok kalibutan aron sa pagpalambo og mga oportunidad sa pakigbayloay og mga produkto. Si Sister Benson ug ang anak nga mga babaye nga si Beverly ug Bonnie mikuyog kaniya. Miadto sila og 12 ka mga nasud, diin nakighimamat sila og mga lider sa gobyerno ug mibisita og importanting mga dapit, pinuy-anan sa mga refugee, ug mga pagpalakat sa agrikultura. Gibati ni Presidente Benson nga ang biyahe malampuson sa pagpauswag og mga oportunidad sa pakigbayloay og mga produkto ug pagmugna usab og maayong pakighigalaay alang sa Simbahan. Sa ilang pagpamauli, ang anak nga babaye nga si Beth naghulat samtang ang eroplano milanding. Sa dihang nakita niya ang iyang mga ginikanan, misugod siya sa pagdagan paingon ngadto kanila nga luhaan ang iyang mga mata. Gikab-ot ug gibitad siya sa iyang amahan ngadto sa mapinanggaong paggakos. Si Presidente Benson naghunahuna, “Sa tanang mga kahibulungan sa kalibutan nga [among nakita], kini nga higayon sa kalit mao ang labing nindot sa tibuok nga biyahe.”¹³

Mga Pagtulun-an ni Ezra Taft Benson

Ang pamilya mao ang labing importanting organisasyon karon ug sa kahangturan.

Ang Simbahan ni Jesukristo sa mga Santos sa Ulahing mga Adlaw nagtan-aw sa pamilya isip ang labing importanting organisasyon karon ug sa kahangturan. Ang Simbahan nagtudlo nga ang tanan kinahanglan nga masentro diha ug libut sa pamilya. Gipasabut niini og maayo nga ang pagpreserba sa kinabuhi sa pamilya karon ug sa kahangturan mag-una sa tanang mga butang.¹⁴

Walay makatagbaw nga ikapuli alang sa panimalay. Ang pundasyon niini ingon ka karaan sa kalibutan. Ang misyon niini gi-orden sa Dios.¹⁵

Walay nasud nga molambo labaw sa iyang mga panimalay. Kini nga Simbahan dili gayud molambo labaw pa sa mga panimalay niini. Kita dili molabaw ka maayo isip katawhan kay sa dapit pundokanan sa pamilya, ang atong mga panimalay. … Ang maayong panimalay mao ang lig-on nga pundasyon, ang tukuranang bato sa sibilisasyon. Kinahanglan gayud kini nga ipatunhay. Kinahanglan gayud kini nga pagalig-unon.¹⁶

Ang pipila ka mga tawo mangutana kanako isip lider sa Simbahan kon nganong nagbutang kita og dakong gibug-aton diha sa panimalay ug pamilya nga aduna pa may mas dagkong mga problema nga naglibut kanato? Ang tubag mao, dayag lamang, nga ang mas dagkong mga problema mga resulta lamang sa mga problema sa indibidwal ug sa pamilya.¹⁷

Ang kaminyoon ug kinabuhi sa pamilya gi-orden sa Dios. Sa usa ka mahangturong paghunahuna, ang kaluwasan usa ka butang nga buluhaton sa pamilya. Ang Dios nagbutang sa mga ginikanan nga responsable alang sa ilang pagkatinugyanan sa pagmatuto sa ilang pamilya. Kini usa ka labing sagrado nga responsibilidad.¹⁸

Sa malipayong mga kaminyoon, ang mga bana ug mga asawa nahigugma ug nagserbisyo sa Dios ug sa usag usa.

Ang kaminyoon, panimalay, ug pamilya labaw pa kay sa sosyal nga mga institusyon lamang. Kini balaan, dili hinimo sa tawo. Gi-orden sa Dios ang kaminyoon gikan gayud sa sinugdanan. Diha sa rekord nianang unang kaminyoon nga narekord sa Genesis, ang Ginoo naghimo og upat ka importanting mga pahayag: una, nga dili maayo sa usa ka lalaki nga mag-inusara; ikaduha, nga ang babaye gilalang aron mahimong kaabag sa lalaki; ikatulo, nga sila mahimong usa ka unod; ug ikaupat, nga ang lalaki mobiya sa amahan ug inahan ug mounong ngadto sa iyang asawa. (Tan-awa sa Genesis 2:18, 24.)

Sa kadugayan, sa pagdugang og kalig-on sa naunang pahayag, ang Ginoo miingon: “Busa ang sa Dios gihiusa, sa tawo dili pagabulagon sila” (Mateo 19:6). Miingon usab Siya, “Higugmaa ang inyong asawa sa inyong tibuok nga kasingkasing ug unong ngadto kaniya ug wala nay lain” (D&P 42:22).¹⁹

Ang mga kasulatan nag-ingon kanato: “Si Adan misugod sa pagtikad sa yuta … ingon nga Ako ang Ginoo misugo kaniya. Ug si Eva, usab, iyang asawa, naghago uban kaniya. … Nagsugod sila sa pagsanay ug sa pagpuno sa yuta. … Ug si Adan ug si Eva, iyang asawa, mitawag sa ngalan sa Ginoo. Ug si Adan ug si Eva mihimaya sa ngalan sa Dios, ug sila mihimo sa tanan nga mga butang nga mahibaloan ngadto sa ilang anak nga mga lalaki ug sa ilang anak nga mga babaye. … Ug si Adan ug si Eva, iyang asawa, wala mohunong sa pagtawag sa Dios.” (Moises 5:1–2, 4, 12, 16.)

Gikan niining dinasig nga rekord atong makita nga si Adan ug si Eva naghatag kanato og hingpit nga ehemplo sa usa ka pakigsaad sa kaminyoon nga relasyon. Sila nag-uban sa paghago; nanganak; nag-uban sa pag-ampo; ug sila nagtudlo sa ilang mga anak sa ebanghelyo—nga nag-uban. Kini ang sundanan nga buot sa Dios nga sundon sa tanang matarung nga mga lalaki ug mga babaye.²⁰

Ang kaminyoon mismo kinahanglan gayud nga isipon nga usa ka sagradong pakigsaad diha sa atubangan sa Dios. Ang magtiayon nga minyo adunay obligasyon dili lamang sa usag usa, apan ngadto sa Dios. Siya adunay gisaad nga mga panalangin ngadto niadtong kinsa mopasidungog niana nga pakigsaad.

Ang pagkamatinud-anon ngadto sa mga panumpa sa kaminyoon hingpit nga panginahanglan alang sa gugma, pagsalig ug kalinaw. Ang pagpanapaw dili kadudahan nga gipanghimaraut sa Ginoo. …

Ang disiplina ug pagpugong sa kaugalingon kinahanglan gayud nga maoy magmamando nga mga baruganan sa relasyon sa kaminyoon. Ang magtiayon kinahanglan gayud nga magkat-on sa pagpugong sa ilang mga dila ingon man sa ilang mga pagbati.

Ang pag-ampo diha sa panimalay ug ang pag-ampo nga mag-uban molig-on sa panaghiusa [sa magtiayon]. Sa inanay ang mga hunahuna, mga tinguha, ug mga ideya magkalangkob ngadto sa pagkausa hangtud kamo maninguha sa samang mga katuyoan ug mga tumong.

Salig diha sa Ginoo, sa mga pagtulun-an sa mga propeta, ug sa mga kasulatan alang sa giya ug tabang, ilabi na kon adunay mga panaglalis ug mga problema.

Ang espiritwal nga pagtubo moabut pinaagi sa pagsulbad og dungan sa mga problema—dili sa pagpalayo gikan niini. Ang karon nga dili pinugngan nga pagpatigbabaw sa pag-iniyahay modangat sa paghunahuna lamang sa kaugalingon ug sa panagbulag. Ang duha ka mga indibidwal nga nahimong “usa ka unod” sa gihapon mao ang sumbanan sa Ginoo. (Tan-awa sa Gen. 2:24.)

Ang sekreto sa malipayong kaminyoon mao ang pagserbisyo sa Dios ug sa usag usa. Ang tumong sa kaminyoon mao ang panaghiusa ug pagkausa, ingon man sa paglambo sa kaugalingon. Sukwahi sa gituohan, kon mas moserbisyo kita sa usag usa, mas kusog ang atong espiritwal ug emosyonal nga pagtubo.²¹

“Ang gugma nga atong nahibaloan dinhi mao … gayud ang butang nga nagbugkos sa mga pamilya alang sa karon ug sa kahangturan.”

Ang tambag gikan ni Apostol Pablo mao ang labing maanindot ug untop sa punto. Yano siyang miingon, “Kamong mga bana, higugmaa ninyo ang inyong masigka-asawa maingon usab nga si Kristo nahigugma sa simbahan” (Mga Taga-Efeso 5:25).

Sa ulahing adlaw nga pagpadayag ang Ginoo namulong pag-usab kabahin niini nga obligasyon. Miingon Siya, “Higugmaa ang inyong asawa sa inyong tibuok nga kasingkasing, ug unong ngadto kaniya ug wala nay lain” (D&P 42:22). Sa akong nahibaloan adunay usa lamang ka laing butang diha sa tanan nga kasulatan nga kita gisugo sa paghigugma uban sa atong tibuok nga mga kasingkasing, ug kana mao ang Dios Mismo. Hunahunaa unsay gipasabut niana!

Kini nga matang sa paghigugma ikapakita alang sa inyong mga asawa sa daghan nga mga paagi. Una ug labaw sa tanan, wala gawas sa Dios Mismo ang kahatagan og prayoridad una sa inyong asawa diha sa inyong kinabuhi—dili trabaho, dili kalingawan, dili mga lingaw-lingaw. Ang inyong asawa mao ang inyong bililhon, mahangturon nga kaabag—inyong kauban.

Unsa ang gipasabut sa paghigugma og usa ka tawo sa tibuok ninyong kasingkasing? Kini nagpasabut sa paghigugma uban sa inyong tanang emosyonal nga mga pagbati ug uban sa inyong tanang pag-unong. Sa tinuod kon gihigugma ninyo ang inyong asawa sa tibuok ninyong kasingkasing, dili ninyo siya pakaulawan, sawayon siya, pangitaan siya og sayop, o abusohan siya pinaagi sa mga pulong, ngil-ad og batasan, o mga lihok.

Unsay gipasabut sa “unong ngadto kaniya”? Kini nagpasabut nga magpabiling duol kaniya, maunungon ug matinud-anon kaniya, sa pakigbayloay og hunahuna, ug sa pagpahayag sa inyong gugma alang kaniya.²²

Ang mga bana ug mga asawa kinsa naghinigugmaay mahibalo nga ang gugma ug pagkamaunungon mabalosan. Kini nga gugma mohatag og usa ka kahimtang sa pag-amuma alang sa emosyonal nga paglambo sa mga anak. Ang kinabuhi sa pamilya kinahanglan nga usa ka panahon sa kalipay ug hingpit nga kalipay nga mahinumduman sa mga anak uban sa maanindot nga mga panunduman ug pakig-uban.²³

Ang lig-on nga mga pamilya nag-ugmad og gugma, pagtahud, ug suporta sa matag sakop sa pamilya.

Atong lig-unon ang pamilya. Ang pamilya ug indibidwal nga pag-ampo sa buntag ug gabii makadapit sa mga panalangin sa Ginoo diha sa atong mga panimalay. Ang panahon sa tingpangaon naghatag og nindot nga panahon sa pagribyu sa mga kalihokan sa adlaw ug dili lamang sa pagpakaon sa lawas apan sa pagpakaon usab sa espiritu, nga ang mga sakop sa pamilya magpulihay sa pagbasa sa mga kasulatan, ilabi na sa Basahon ni Mormon. Ang panahon sa gabii usa ka importanting panahon alang sa nagkapuliki nga amahan sa pag-adto sa kiliran sa kada niya anak, sa pagpakigsulti kanila, pagtubag sa ilang mga pangutana, ug pagsulti kanila unsa sila ka gihigugma.²⁴

Ang pamilya usa sa labing lig-on nga mga panalipod sa Dios batok sa mga dautan sa atong panahon. Tabang sa paghimo sa inyong pamilya nga malig-on ug masuod ug takus sa mga panalangin sa atong Amahan sa Langit. Samtang kamo nagbuhat, madawat ninyo ang hugot nga pagtuo ug kalig-on nga mopanalangin sa inyong mga kinabuhi sa hangtud.²⁵

Usa ka importanting butang nga gikinahanglan sa Ginoo sa matag usa kanato mao ang paghatag og panimalay diin ang usa ka malipayon, positibo nga impluwensya alang sa kaayohan anaa. Sa umaabut nga mga katuigan ang pagkamahal sa mga kasangkapan o ang gidaghanon sa mga banyo dili maoy importante, apan unsa ang mas importante mao nga gibati ba sa atong mga anak ang gugma ug pagdawat diha sa panimalay. Kini dakong butang kon aduna bay kalipay ug kinataw-anay, o away ug lalis.²⁶

Ang malampuson nga mga pamilya adunay gugma ug respeto alang sa usag usa nga sakop sa pamilya. Ang mga sakop sa pamilya nahibalo nga sila gihigugma ug gikahimut-an. Ang mga anak mobati nga sila gihigugma sa ilang mga ginikanan. Busa, sila walay kabalaka ug may pagsalig sa kaugalingon.

Ang lig-on nga mga pamilya nag-ugmad og hiyas sa epektibo nga pagbinayloay og ideya. Maghisgot sila sa ilang mga problema, mag-uban sa paghimo og plano ug magtinabangay sa pagtuman sa komon nga mga katuyoan. Ang family home evening ug pagtinambagay sa pamilya gi-praktis ug gigamit isip epektibo nga mga instrumento aron matuman kini.

Ang mga amahan ug mga inahan sa lig-on nga mga pamilya nagpabilin nga suod sa ilang mga anak. Magsultihanay sila. Ang pipila ka mga amahan pormal nga mo-interbyu sa matag anak, ang uban mohimo sa mao sa dili pormal nga paagi, ug ang uban mogahin og regular nga panahon alang sa matag bata.

Ang matag pamilya adunay mga problema ug mga hagit. Apan ang malampuson nga mga pamilya maningkamot nga mag-uban sa pagpangita og mga kasulbaran kay sa mogamit sa pagpanaway ug panagbingkil. Nag-ampo sila alang sa usag usa, naghisgot, ug naghatag og pag-awhag. Usahay kini nga mga pamilya magpuasa og dungan agi og suporta sa usa sa mga sakop sa pamilya.

Ang lig-on nga mga pamilya nagsuportahay sa usag usa.²⁷

Ang panimalay mao ang labing maayo nga dapit alang sa mga anak sa pagkat-on og mga baruganan ug mga paggamit sa ebanghelyo.

Ang pamilya mao ang labing epektibo nga dapit sa pagsilsil og malungtarong mga hiyas diha sa mga sakop niini. Diin ang kinabuhi sa pamilya lig-on ug gibase sa mga baruganan ug mga paggamit sa ebanghelyo ni Jesukristo, … ang mga problema dili daling motungha.²⁸

Ang malumpuson nga mga ginikanan nakakita nga dili kini sayon sa pagmatuto og mga anak sa usa ka palibut nga nasagulan og dautan. Busa, naghimo sila og tinuyo nga mga lakang aron sa paghatag sa pinakamaayo nga mga impluwensya. Mga baruganan sa maayong pamatasan gitudlo. Maayong mga basahon anaa ug mabasa. Ang pagtan-aw sa telebisyon gilimitahan. Maayo ug makapabayaw nga musika gihatag. Apan labing importante, ang mga kasulatan gibasa ug gihisgutan isip usa ka paagi sa pagtabang og pagpalambo og espiritwal nga panghunahuna.

Sa malampuson nga mga panimalay sa mga Santos sa Ulahing mga Adlaw, ang mga ginikanan nagtudlo sa ilang mga anak sa pagsabut sa hugot nga pagtuo diha sa Dios, paghinulsol, bunyag, ug sa gasa sa Espiritu Santo. (Tan-awa sa D&P 68:25.)

Ang pag-ampo sa pamilya usa ka makanunayon nga buhat niini nga mga pamilya. Ang pag-ampo mao ang paagi sa paghatag og pasalamat alang sa mga panalangin ug sa mapainubsanong paagi sa pag-ila sa pagsalig diha sa Labawng Makagagahum nga Dios alang sa kalig-on, kabuhian, ug suporta.

Kini usa ka maalamon ug tinuod nga panultihon nga ang pamilya nga mag-uban og luhod magbarug nga ligdong sa atubangan sa Ginoo!²⁹

Ang mga anak kinahanglan nga mahibalo kinsa sila sa mahangturon nga hunahuna kabahin sa ilang pagkatawo. Kinahanglan silang mahibalo nga sila adunay usa ka mahangturon nga Langitnong Amahan kang kinsa sila makasalig, kang kinsa sila makaampo, ug kang kinsa sila makadawat og paggiya. Kinahanglan silang mahibalo diin sila gikan aron ang ilang mga kinabuhi adunay kahulugan ug katuyoan.

Ang mga anak kinahanglan gayud nga matudloan sa pag-ampo, sa pagsalig diha sa Ginoo alang sa paggiya, ug sa pagpahayag og pasalamat alang sa mga panalangin nga gihatag kanila. Ako nahinumdom nga nagluhod sa kilid sa mga katre sa among gagmay nga mga anak, nagtabang kanila sa ilang mga pag-ampo.

Ang mga anak kinahanglan gayud nga tudloan sa husto gikan sa sayop. Sila makahimo ug kinahanglan gayud nga makakat-on sa mga sugo sa Dios. Sila kinahanglan gayud nga tudloan nga sayop ang pagpangawat, pamakak, panikas, o pangibug sa unsay anaa sa uban.

Ang mga anak kinahanglan gayud nga tudloan sa pagtrabaho sa panimalay. Kinahanglan silang makakat-on diha nga ang matinuorong paghago nagpalambo og dignidad ug respeto sa kaugalingon. Kinahanglan nilang makat-unan ang kalipay sa trabaho, sa paghimo sa trabaho nga maayo.

Ang panahon sa paglingaw-lingaw sa mga anak kinahanglan gayud nga matabangan nga itunong ngadto sa maayo, makaawhag nga mga kalihokan.³⁰

Gidesinyo sa paglig-on ug pagpanalipod sa pamilya, ang programa sa Simbahan nga family home evening nga himoon usa ka gabii matag semana kinahanglang igahin sa mga amahan ug mga imahan aron sa pagpundok sa ilang anak nga mga lalaki ug mga babaye diha sa ilang panimalay.³¹

Ang mga baruganan sa ebanghelyo mahimong isilsil pinaagi sa epektibo nga mga family home evening diin ang mga kabatan-onan mapalig-on aron sila dili kinahanglan nga mahadlok alang sa ilang kaugmaon. Ang mao nga pagtudlo kinahanglan gayud nga buhaton diha sa hugot nga pagtuo, pagpamatuod, ug paglaum.³²

Ang pagpahimutang og kahusay sa inyong panimalay mao ang pagsunod sa mga sugo sa Dios. Kini nagdala og panag-uyon ug gugma. … Kini mao ang matag adlaw nga pag-ampo sa pamilya. Kini mao ang pagtudlo sa inyong pamilya sa pagsabut sa ebanghelyo ni Jesukristo. Kini mao nga ang matag sakop sa pamilya nagsunod sa mga sugo sa Dios. Kini mao … ang pagpakatakus sa pagdawat og rekomend sa templo, ang tanang sakop sa pamilya nagdawat sa mga ordinansa sa kahimayaan, ug ang inyong pamilya ma-sealed alang sa kahangturan. Kini mao ang pagkalingkawas sa hilabihang utang, nga ang mga sakop sa pamilya nagbayad og matinuoron nga mga ikapulo ug mga halad.³³

Gipadayag sa Dios nga ang pamilya mahimong magpadayon lapas sa kamatayon.

Ang gugma nga atong nahibaloan dinhi dili temporaryo, apan mao gyud nga butang nga nagbugkos og tingob sa mga pamilya alang sa karon ug sa kahangturan.³⁴

Pinaagi kini ni Joseph Smith nga ang Dios sa Langit mipadayag sa kamatuoran nga ang pamilya makapadayon lapas sa kamatayon—nga ang atong mga kalooy, mga pagbati, ug gugma alang sa usag usa mahimong magpadayon sa hangtud.³⁵

Walay sakripisyo nga dako kaayo aron makabaton sa mga panalangin sa mahangturong kaminyoon. Kasagaran kanato, ang templo dali nga adtoon, tingali sayon kaayo nga ang mga panalangin wala kaayo hatagi og importansya. Mahitungod sa ubang mga butang sa pagkamatinud-anon sa pagsunod sa ebanghelyo, ang pagminyo sa paagi sa Ginoo nagkinahanglan og pagkaandam sa pagpugong sa inyong kaugalingon sa pagkadili diosnon—pagkakalibutanon—ug usa ka determinasyon sa pagbuhat sa kabubut-on sa atong Amahan. Pinaagi niining buhat sa hugot nga pagtuo, atong gipakita ang atong gugma sa Dios ug ang atong konsiderasyon alang sa kaliwatan nga wala pa matawo. Tungod kay ang atong pamilya mao ang atong labing dako nga tinubdan sa hingpit nga kalipay niini nga kinabuhi, mao usab kini sa kahangturan.³⁶

Panimalay ug pamilya. Unsa ka tam-is nga mga panumduman ang mokalit og butho sa atong mga dughan kon madungog nato kining gimahal nga mga pulong! Ako mainampoong manghinaut alang kaninyo, ug uban sa tanang kadasig sa akong kalag, nga unta inyong mahibaloan ang dili ikapamulong nga kalipay ug katagbawan sa halangdong pagkaginikanan. Dili ninyo masinati ang usa sa labing makalipay niini nga kinabuhi ug sa kahangturan kon kamo motuyo sa paglikay sa mga responsibilidad sa pagkaginikanan ug sa pagtukod og panimalay. Ingon nga gipadayag pinaagi ni Propeta Joseph Smith, ang mahimayaong hunahuna kabahin sa panimalay ug sa malungtarong pakigrelasyon sa pamilya nahimutang sa sukaranan gayud sa atong kalipay dinhi ug sa umaabut.³⁷

Mga Sugyot alang sa Pagtuon ug Pagtudlo

Mga Pangutana

Gitudlo ni Presidente Benson, “Sa usa ka mahangturong paghunahuna, ang kaluwasan usa ka butang nga buluhaton sa pamilya. Unsa ang kahulugan niini nganha kaninyo? Unsa ang mabuhat sa mga sakop sa pamilya alang sa kaluwasan sa usag usa?
Samtang kamo magtuon sa tambag ni Presidente Benson diha sa seksyon 2, pamalandunga kon unsay kalabutan niini sa iyang gitawag og “ang sekreto sa malipayong kaminyoon.” Ngano sa inyong hunahuna kini nga “sekreto” moresulta ngadto sa kalipay?
Diha sa seksyon 3, hunahunaa unsay gisulti ni Presidente Benson mahitungod sa mga kalihokan sa malampuson nga mga pamilya. Sa unsa nga mga paagi kini nga mga kalihokan naglig-on sa mga pamilya? Pamalandunga unsay inyong mabuhat sa pagsunod niini nga tambag?
Ngano sa inyong hunahuna ang pamilya mao “ang labing epektibo nga dapit sa pagsilsil og malungtarong mga hiyas”? (Tan-awa sa seksyon 4, nagtimaan sa piho nga tambag ni Presidente Benson mahitungod sa pagtudlo diha sa pamilya.) Kanus-a kamo nakakita og mga sakop sa pamilya nga nagtinabangay sa usag usa sa pagkat-on sa mga baruganan sa ebanghelyo?
Mipamatuod si Presidente Benson nga ang mga pamilya “makapadayon lapas sa kamatayon” (seksyon 5). Unsa ang inyong mga hunahuna ug mga pagbati samtang kamo namalandong niini nga kamatuoran? Unsa ang pipila ka “ malipayon nga mga panumduman” nga moabut kaninyo kon hisgutan na ang panimalay ug pamilya?

May Kalabutan nga mga Kasulatan

Salmo 127:3–5; 1 Mga Taga-Corinto 11:11; 3 Nephi 18:21; D&P 49:15; 132:18–19; tan-awa usab sa “Ang Pamilya: Usa ka Pamahayag ngadto sa Kalibutan,” Ensign, Nob. 2010, 129.

Tabang sa Pagtuon

Ang inyong pagtuon sa ebanghelyo labing epektibo kon kamo matudloan pinaagi sa Espiritu Santo. Sugdi kanunay ang inyong pagtuon sa ebanghelyo pinaagi sa pag-ampo alang sa Espiritu Santo nga motabang kaninyo nga makat-on” (Isangyaw ang Akong Ebanghelyo [2004], 20).