inahan ug amahan nga naggunit og gamayng bata nga babaye

Baruganan 12

Kaninyo Ihatag Ko ang Akong Kalinaw

“Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27).

Pagpangita og Kalinaw

Kon mag-atubang og mga sangputanan sa dili maayong mga pagpili nga gihimo sa atong mga minahal, posibling moreklamo kita o mobati og kapait. Usahay makapangutana kita og sama sa “Nganong kinahanglan nga mahitabo kini kanako?” “Nganong mag-antus pa man ako niini karon?” o “Unsa may akong nahimo aron nga angayan ako niini?” Bisan og usahay sa sinugdanan modominar kini sa atong mga hunahuna ug mohurot sa atong kusog, posibling mapili nato ang pagsanong sa atong mga kahimtang sa lahi nga paagi. Makapangutana kita sa atong kaugalingon, “Unsa may gusto sa Ginoo nga akong makat-unan gikan niini?” “Unsa may gusto Niya nga akong buhaton? Kinsa ang pwede nakong serbisyuhan?” ug “Unsaon man nako sa paghinumdom ang akong mga panalangin?” Ang Langitnong Amahan naghigugma kanato ug gusto nga magawasnon kita gikan sa mga sangputanan sa dili maayong mga pagpili sa atong mga minahal. Importante ang paghinumdom nga wala Siya mohatag kanato niini nga mga pagsulay—kondili, resulta kini sa dili maayong mga pagpili sa atong mga minahal. Apan ang Langitnong Amahan makagamit sa atong mga pagsulay aron matabangan kita nga motubo, molambo, ug mahimong mas sama Kaniya (tan-awa sa D&P 122).

Kon mopakita kita og pagtuo, mabati nato ang makalunsay nga impluwensya ug kalinaw sa Iyang Espiritu ug iyang pulihan ang “purongpurong nga bulak nga puli sa abo” (Isaias 61:3).

Kon motawag kita sa Ginoo, mopanalangin Siya ug mohupay kanato sa makahuluganong mga paagi. Samtang dili sa kanunay kita makadawat sa unsa gayud ang atong gipangayo, panalanginan gihapon kita sa Ginoo. Ang katawhan ni Alma wala dayon buhii gikan sa pagkaulipon, apan “ang Ginoo mipalig-on kanila nga sila makadaug sa ilang mga alantuson” (Mosiah 24:15). Ug pinaagi sa tabang sa Ginoo, makaplagan nato ang kalinaw.

• Unsay imong buhaton aron makakaplag og kalinaw?

• Sa unsang paagi nakaplagan nimo ang kalinaw gikan sa Langitnong Amahan ug sa Manluluwas?

Paghatag og Pasaylo

Kabahin sa proseso sa pagtanyag og kapasayloan mao ang paghikalimot sa mga palas-anon nga nagpugong aron masinati nato ang kalinaw sa Manluluwas. Miingon si Presidente Gordon B. Hinckley, “Ang diwa sa pagpasaylo ug ang kinaiya sa gugma ug kalooy ngadto niadtong kinsa nakasala kanato mao ang labing mahinungdanon nga bahin sa ebanghelyo ni Jesukristo” (“Of You It Is Required to Forgive,” Ensign, Hunyo 1991, 2). Makaplagan nato ang pagkaayo samtang mopasaylo kita sa uban. Nagtudlo si Presidente James E. Faust: “Magkinahanglan og pagpaubos ang paghimo niini, apan kon moluhod ug mangayo sa Langitnong Amahan alang sa pagbati og pagpasaylo, Siya motabang kanato. Ang Ginoo nagsugo kanato ‘sa pagpasaylo sa tanang mga tawo’ [D&P 64:10] alang sa atong kaayohan tungod kay ang ‘kasilag [mobabag] sa espirituhanong pagtubo’ [Orson F. Whitney, Gospel Themes (1914), 144]. Kon ato lamang tangtangon sa atong kaugalingon ang kasilag ug kalagot ang Ginoo makahupay sa atong mga kasingkasing” (“Ang Makaalim nga Gahum sa Pagpasaylo,” Liahona, Mayo 2007, 69).

Ang pagpasaylo wala magpasabut nga ibaliwala nato ang dili maayong mga pagpili sa atong mga minahal o tugutan sila nga mopanamas-tamas kanato. Apan ang pagpasaylo magtugot nga makapadayon kita sa espiritwal, sa emosyunal, ug sa pisikal nga paagi. Sama nga ang atong mga minahal anaa sa pagkaulipon, ang atong pagkadili andam nga mopasaylo mohimo kanatong ulipon. Kon mopasaylo kita, biyaan nato ang mga pagbati nga, sa mga pulong ni Presidente Thomas S. Monson, adunay gahum sa “pagdaot, pagpasaput, ug sa katapusan pagguba” (“Hidden Wedges,” Ensign, Mayo 2002, 20). Niining paagiha, giwagtang nato ang mga babag aron makabaton sa Espiritu sa buhong nga paagi ug makapadayon kita sa dalan sa pagkadisipulo. Sama sa gipahinumdom kanato ni Presidente Dieter F. Uchtdorf, “Ang langit puno sa mga tawo kinsa aduna niini: Gipasaylo sila. Ug sila mipasaylo” (“Ang Maloloy-on Magadawat og Kalooy,” Liahona, Mayo 2012, 77).

• Sa unsang paagi nga ang pagpasaylo nakapanalangin kanimo?

Pagpangita og Tabang sa Dios sa Pagpasaylo

Kon ang pagpasaylo daw lapas na sa atong kapabilidad, makasalig kita sa Manluluwas sa pagtabang nga mausab ang atong kasingkasing ug mahatagan kita sa gasa sa gugmang putli. Ang pagpasaylo sa uban kon nasayop kita o nasakitan lisud kaayo—ilabi na kon kini nga mga sala gibalik-balik sa paghimo. Apan kabahin kini sa gitawag nga pagkadisipulo ni Kristo. Si Presidente Uchtdorf nagtudlo:

“Miingon si Jesus nga sayon higugmaon ang nahigugma kanato; bisan ang dautan makahimo niana. Apan si Jesukristo nagtudlo og mas taas nga balaod. … ‘Higugmaa ang inyong mga kaaway, pagpanalangin kanila nga nagtunglo kaninyo, pagbuhat og maayo ngadto kanila nga nagdumot kaninyo, ug pag-ampo alang kanila kinsa nag-amung-among kaninyo, ug nagalutos kaninyo.’ …

“Ang tiunay nga gugma ni Kristo makawagtang sa kasilag ug kapungot gikan sa atong mga mata, nagtugot kanato nga makakita sa uban sama sa pagtan-aw sa atong Langitnong Amahan kanato” (“Ang Maloloy-on Magadawat og Kalooy,” 76).

Posibling nagkinahanglan kita nga magpailub sa atong kaugalingon samtang maningkamot kita sa pagpasaylo sa atong mga minahal. Si Presidente Faust miingon:

“Kasagaran nato nagkinahanglan og panahon nga maalim ang kasakit ug pagkawala. Makakita kita sa tanang matang sa rason sa paglangay sa pagpasaylo. Usa niini nga mga rason mao ang paghulat sa mga nakahimo og sayop nga maghinulsol sa dili pa kita mopasaylo kanila. Apan ang ingon nga paglangan mohikaw kanato sa kalinaw ug kalipay nga unta ato. Ang sayop nga kanunay maghunahuna sa mga kasakit nga dugay nang nahitabo dili makadala og kalipay. …

“Kon kita makapasaylo diha sa atong mga kasingkasing alang niadtong nakamugna og kasakit ug kadaut, kita mosaka ngadto sa mas taas nga ang-ang sa pagtamud sa kaugalingon ug pagkatawo” (“Ang Makaalim nga Gahum sa Pagpasaylo,” 68). Kon mosalig kita sa Ginoo ug mangita sa Iyang tabang, makatabang siya nga kita makapasaylo, sama sa Iyang gihimo.

• Kanus-a ka gitabangan sa Dios nga makapasaylo?

• Sa unsang paagi ang Dios makatabang nimo sa pagpasaylo karon?

magtiayon nga naglingkod sa bangko

“Ang diwa sa pagpasaylo ug ang kinaiya sa gugma ug kalooy ngadto niadtong kinsa nakasala kanato mao ang labing mahinungdanon nga bahin sa ebanghelyo ni Jesukristo.”—Presidente Gordon B. Hinckley

Mga Kapanguhaan alang sa Dugang Pagtuon

Pagtuon sa Ebanghelyo

Samtang tun-an nimo ang mga kapanguhaan nga naa sa ubos, pagmainampuon sa pagkonsiderar kon unsaon nimo sa paggamit ang mga baruganan nga gitudlo niini.

• Mateo 18:21–35 (Kinahanglan kitang mopasaylo sa uban ingon nga ang Ginoo gawasnon nga mopasaylo kanato.)

• Lucas 7:36–50 (Mabatyagan nato ang gugma sa Manluluwas kon kita mapasaylo.)

• Alma 5:12–14 (Ang Ginoo makahimo og dako kaayo nga kausaban sa atong kasingkasing.)

• Doktrina ug mga Pakigsaad 45:3–5 (Tungod sa maulaong sakripisyo ni Kristo, kita mapasaylo.)

• Doktrina ug mga Pakigsaad 64:10 (Gikinahanglan nga mopasaylo kita sa tanan.)

• James E. Faust, “Ang Makaalim nga Gahum sa Pagpasaylo,” Liahona, Mayo 2007, 67–69

• Yoshihiko Kikuchi, “Pagpang-ayo Tun-an Ko,” Liahona, Mar. 2011, 18–23

• Richard G. Scott, “Healing the Tragic Scars of Abuse,” Ensign, Mayo 1992, 31–33

• Dieter F. Uchtdorf, “Ang Maloloy-on Magadawat og Kalooy,” Liahona, Mayo 2012, 70, 75–77

Personal nga Pagkat-on ug Paggamit sa Nakat-unan

Ang mosunod nga mga kalihokan makapalambo sa imong pagkat-on ug sa paggamit niini nga mga baruganan. Paghimo og journal sa unsay imong mga hunahuna, mga pagbati, mga panabut, ug mga plano sa pagtuman unsay imong makat-unan. Kon ang mga panginahanglan ug mga kahimtang sa imong kinabuhi mausab, ang pagsubli niini nga mga kalihokan makahatag kanimo og bag-ong mga panabut.

• Tun-i ug pamalandungi ang pakigpulong ni Presidente Dieter F. Uchtdorf nga “Ang Maloloy-on Magadawat og Kalooy,” ug pangitaa ang mga baruganan kabahin sa pagpasaylo. Unsa ang imong nakat-unan? Sa unsang paagi nga makatabang ang Ginoo nga makapasaylo ka sa imong minahal? Unsa ang gibati nimong pag-aghat nga buhaton?

•   Unsa ang imong nakat-unan mahitungod sa pagpasaylo? Sa unsang paagi nga ang pagpasaylo mahimong usa ka panalangin kanimo? Sa unsang paagi nga ang pagpasaylo mahimong usa ka panalangin sa imong minahal?

• Tubaga ang mosunod nga mga pangutana: “Nganong usahay lisud man ang pagpasaylo? Unsaon man nato pagbuntog kini nga mga kalisdanan?” Pangita og dugang pang mga panabut aron sa pagtubag niini nga mga pangutana sa pakigpulong ni Elder Yoshihiko Kikuchi nga “Pagpang-ayo Tun-an Ko.” Pamalandungi giunsa sa pagtabang sa Ginoo ang uban aron makapasaylo ug sa unsang paagi Siya makatabang nimo. Isulat sa imong journal ang imong mga hunahuna.

•   Unsay imong nakat-unan nga magamit sa kasamtangan nimong sitwasyon? Unsaon man nimo paglahutay og tarung? Unsa ang katuyoan sa kalisdanan? Unsaon nimo sa pagpangita og kalinaw taliwala sa kasakit?

• Tun-i ang pakigpulong ni Elder Richard G. Scott nga “Pag-ayo sa Makalilisang nga mga Uwat sa Pag-abuso,” ug pamalandungi ang mosunod nga tudling: “Atol sa taas-taas nga pagpaayo gikan sa daghang pag-opera, ang pasyente nagpaabut og kompletong pagkaayo pinaagi sa pagpailub, misalig sa pag-atiman sa uban. Wala niya masabti sa kanunay ang kaimportante sa pagtambal nga gihatag, apan ang iyang pagkamasulundon nagpadali sa iyang pagkaayo. Mao usab diha kanimo. … Dili nimo mapapas ang nanghitabo, apan [ikaw] makapasaylo (tan-awa sa D&P 64:10). Ang pagpasaylo moayo sa hilabihan, grabing mga samad, kay motugot kini sa gugma sa Dios nga molangkat sa makahilo nga kasilag nga naa sa inyong kasingkasing ug hunahuna. Molimpyo kini sa [imong] konsensya sa gitinguha nga pagpanimalos. Makamugna kini og dapit alang sa makalimpyo, makaayo, makaalim nga gugma sa Ginoo” (“Pag-ayo sa Makalilisang nga mga Uwat sa Pag-abuso,” Liahona, Marso 2014, 48). Unsa ang imong nakat-unan gikan sa mga pulong ni Elder Scott mahitungod sa pagpasaylo? Unsay kalabutan niini sa imong abilidad sa paghatag og pasaylo sa imong minahal?

• Ikonsiderar ang mga baruganan nga anaa niini nga mga himno ug mga kanta: “Ang Kalinaw Asa Ko Pangitaa?” (Mga Himno, nu. 75); “Amahan sa Langit” (Mga Himno, nu. 103); “Agalon, Unos Kapintas” (Mga Himno, nu. 60); “Ikaw Naghunahuna Ba sa Pag-ampo?” (Mga Himno, nu. 82); “Tabangi Ko Mahal nga Amahan” (Songbook sa mga Bata, 52).