tawo nga namalandong

Baruganan 2

Iwakli ang mga Kadena nga Naggapos Kaninyo

“Pagmata … isul-ob ang taming sa pagkamatarung. Iwakli ang mga kadena nga naggapos kaninyo, gawas kamo gikan sa kangiub, ug bangon gikan sa abug” (2 Nephi 1:23).

Ang Pagkaamgo nga Dili Kita ang Mabasol sa mga Pagpili sa Atong mga Minahal

Komon kanato nga kon atong sulayan sa pagsabut ang atong lisud nga sitwasyon maghunahuna dayon kita nganong ang atong mga minahal misubay man sa sayop nga dalan. Posibling mobati kita nga tingali sa wala mahibaloing rason kita ang responsable. Isip mga ginikanan, posibling mabalaka kita kon unsa diay kaha unta ang angay natong gibuhat nga lahi kay sa atong nabuhat. Isip mga kapikas, maghunahuna kita kon napakyas ba kaha kita sa paghatag sa panginahanglan sa atong bana o asawa ug mangutana sa atong mga kaugalingon og sama sa “Kulang pa ba ang akong kaayo?” ug “Unsa pa kaha unta ang angay nakong gibuhat?” Kon dili maayo ang dagan sa mga panghitabo, matintal kita nga basulon ang atong kaugalingon. Kini nga matang sa paghunahuna posibling modala kanato sa dili tukmang pagbati nga responsable kita sa mga pagpili sa ubang mga tawo, nga moresulta sa dili angay nga pagbati nga sad-an ug kasagmuyo.

Usa ka importante kaayong elemento sa plano sa Langitnong Amahan mao ang baruganan sa kabubut-on—ang abilidad ug kahigayunan sa paghimo og kaugalingon natong mga pagpili. Samtang tun-an ug sabton nato kini nga baruganan, ang Espiritu mopamatuod kanato nga dili kita ang hinungdan sa dili maayong mga pagpili sa atong mga minahal. Si Elder Richard G. Scott mitambag, “Kon kamo sa inyong kaugalingon walay nahimong grabe nga sala, ayaw antusa sa walay hinungdan ang mga sangputanan sa sala sa laing tawo. Isip asawa, bana, ginikanan o hinigugma, kamo makabati og kalooy alang sa tawo nga anaa sa apdo sa kapaitan tungod sa sala. Apan kinahanglang dili ninyo hunahunaon nga kamo adunay tulubagon nianang mga buhata” (“Aron Luwas sa Mabug-at nga mga Palas-anon,” Liahona, Nob. 2002, 88). Ang atong mga minahal responsable sa mga pagpili nga ilang gihimo. Samtang ang eksaktong rason sa ilang mga pagpili tingali komplikado, dili kita ang responsable sa ilang mga pagpili. Ang maayong pahinumdom mao nga, “Bisan kinsa nga mohimo og dautan, magbuhat niini sa iyang kaugalingon; kay tan-awa, kamo gawasnon” (Helaman 14:30). Ang atong mga minahal malagmit makahimo og dili maayo nga mga pagpili. Kabahin sa proseso aron maayo ug maulian mao nga sila makahimo og mga sayop apan manubag sa hingpit sa ilang mga desisyon. Ang atong kalampusan ug kalipay sa kinabuhi dili angay sukdon kon giunsa pagpili sa mga tawo ang paggamit sa ilang kabubut-on. Kita responsable lamang sa atong kaugalingong mga pagpili ug mga aksyon.

• Mibati ba kamo sa ubang paagi nga responsable sa dili maayong mga pagpili sa inyong mga minahal? Kon mao, sa unsang paagi kini nakaapekto kaninyo?

• Unsa ang nakatabang ninyo sa pagkahibalo nga dili diay kamo ang responsable sa mga pagpili sa inyong mga minahal?

Ang Pagsabut nga Mga Anak Kita sa Dios

Ang mga pagpili sa atong mga minahal posibling makaapekto sa atong pagtan-aw sa atong kaugalingon ug sa atong pagtan-aw sa kinabuhi. Mahimong hinay-hinay natong mahulagway ang atong mga kaugalingon sumala sa atong kasinatian uban sa mga pagpili sa atong mga minahal, kay usahay daw makaapekto kini sa tibuok natong kinabuhi. Importante nga atong hinumduman kon si kinsa kita ug kon nganong ania kita dinhi sa yuta. Dili lang Tigmando ug Tiglalang ang atong Dios, apan Siya usab ang atong Langitnong Amahan. Ang tanang mga lalaki ug mga babaye mga anak gayud sa Dios. Makasalig kita sa yanong kamatuoran nga Siya atong Amahan ug kita Iyang mga anak. Ang pagsabut niini nga relasyon magdala og kalinaw ug pagsalig sa pagpadayon—dili tungod sa kaugalingon natong mga abilidad apan tungod sa Iyang pagkamaayo ug sa walay ikatandi nga gahum ug sa Iyang Anak, si Jesukristo. Bisan unsa pay panghitabo sa atong kinabuhi, mahimong usahon nato ang atong hunahuna sa mahangturong kalig-on sa Iyang gugma kanato. Dinhi magsugod ang proseso sa atong pagkaayo. Taliwala sa atong mga pagsulay, samtang ipaduol nato ang atong mga kasingkasing ngadto sa Amahan sa Langit, ang Iyang gugma ug makaayo nga gahum sa Iyang Anak, pinaagi sa Pag-ula, makatabang sa atong pag-angkon og kaisug ug paglaum.

• Sa unsang paagi ang kahibalo nga ikaw anak sa Dios makatabang kanimo?

• Unsaon nimo paglig-on ang imong relasyon ngadto sa Dios pinaagi sa mga butang nga sama sa pag-ampo, pagtuon sa kasulatan, pagpamalandong, pagpuasa, ug pagtuman sa Iyang mga sugo?

Ang Pag-ila nga Kita Gawasnon sa Paglihok sa Atong Kaugalingon

Posibling mobati kita nga walay gahum tungod kay dili kaayo kita makakontrolar sa unsay pilion nga buhaton sa atong mga minahal o sa mga sangputanan niana nga mga pagpili. Apan ang ebanghelyo nagtudlo kanato nga kita “gawasnon sa pagpili sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo, o pagpili sa pagkabihag ug sa kamatayon, sumala sa pagkabihag ug sa gahum sa yawa” (2 Nephi 2:27). Makagamit kita sa atong kabubut-on aron mas moarang-arang ang atong kahimtang ug makahimo og matarung nga mga pagpili bisan unsa pa ang atong mga kahimtang. Mitambag si Elder David A. Bednar, “Samtang kamo ug ako makasabut ug mogamit sa makaabag nga gahum sa Pag-ula sa personal natong kinabuhi, mag-ampo kita ug magtinguha sa kalig-on sa pag-usab sa atong mga kahimtang kay sa mag-ampo nga mausab ang atong mga kahimtang. Mamahimo kita nga mga instrumento kinsa molihok kay sa mga butang nga aghaton sa paglihok (tan-awa sa 2 Nephi 2:14)” (“Ang Pag-ula ug ang Panaw sa Pagka-mortal,” Liahona, Abr. 2012, 12).

• Unsaon nimo paggamit ang imong kabubut-on sa paglihok ug pagpalambo sa imong sitwasyon?

• Sa unsang paagi ang ikaduhang artikulo sa hugot nga pagtuo magamit sa imong sitwasyon?

babaye nga nagunit og gamay nga batang lalaki sa iyang buko-buko

Taliwala sa atong mga pagsulay, samtang ipaduol nato ang atong mga kasingkasing ngadto sa Amahan sa Langit, ang Iyang gugma ug makaayo nga gahum sa Pag-ula sa Iyang Anak makatabang nato nga makaangkon og kaisug ug paglaum.

Mga Kapanguhaan alang sa Dugang Pagtuon

Pagtuon sa Ebanghelyo

Samtang tun-an nimo ang mga kapanguhaan nga naa sa ubos, pagmainampuon sa pagkonsiderar kon unsaon nimo sa paggamit ang mga baruganan nga gitudlo niini.

• Mga Salmo 82:6 (Mga dios kita, mga anak sa Labawng Makagagahum.)

• Mga Buhat 17:29 (Mga kaliwatan kita sa Dios.)

• 2 Nephi 2:14–16 (Gihatagan kita sa abilidad sa pagpili.)

• Moroni 7:15–16 (Makahukom kita tali sa maayo ug dautan pinaagi sa Kahayag ni Kristo.)

• Doktrina ug mga Pakigsaad 101:78 (Manubag kita sa kaugalingon natong mga buhat.)

• Moises 7:32 (Gihatagan kita sa Dios og kabubut-on.)

• Mga Artikulo sa Hugot nga Pagtuo 1:2 (Manubag kita sa kaugalingon natong mga buhat ug dili sa uban.)

• “Ang Pamilya: Usa ka Pamahayag ngadto sa Kalibutan”

• David A. Bednar, “Ang Pag-ula ug ang Panaw sa Pagka-mortal,” Liahona, Abr. 2012,12

• D. Todd Christofferson, “Matarung nga Disiplina,” Liahona, Nob. 2009, 105–8

• Robert D. Hales, “Kabubut-on: Mahinungdanon sa Plano sa Kinabuhi,” Liahona, Nob. 2010, 24–27

Personal nga Pagkat-on ug Paggamit sa Nakat-unan

Ang mosunod nga mga kalihokan makapalambo sa imong pagkat-on ug sa paggamit niini nga mga baruganan. Paghimo og journal sa unsay imong mga hunahuna, mga pagbati, mga panabut, ug mga plano sa pagtuman unsay imong makat-unan. Kon ang mga panginahanglan ug mga kahimtang sa imong kinabuhi mausab, ang pagsubli niini nga mga kalihokan makahatag kanimo og bag-ong mga panabut.

•        

• Tun-i ug pamalandungi ang mga kasulatan nga gihisgutan diha sa latid sa leksyon. Isulat sa imong journal kon unsay gitudlo niini mahitungod sa kabubut-on. Unsa nga mga kasulatan ang mas makahuluganon kanimo? Ngano man? Sa unsang paagi nga ang imong nakat-unan makatabang nimo?

• Pamalandungi ang mosunod nga kinutlo ni Elder Robert D. Hales: “Niining ulahing mga adlaw sama sa karaang mga panahon, kinahanglan gayud nga likayan nato nga pagaaghaton sa uban pinaagi sa pagbuhat sa ato mismong kagustuhan aron makalikay sa dautan” (“Ang Pagbuhat alang sa Atong Kaugalingon: Ang Gasa ug mga Panalangin sa Kabubut-on Liahona, Mayo 2006, 6–7). (Tan-awa sa 2 Nephi 2:14.)

• Unsay imong pagbati isip usa ka tinugyanan [agent] kinsa molihok imbis usa lang ka butang nga kinahanglan pang palihukon? Isulat kon sa unsang paagi magamit nimo ang tambag ni Elder Hales sa paglihok sa imo mismong kaugalingon ug sa pagpangita og mas dakong kalinaw ug pagkaayo.

• Tun-i ug pamalandungi ang pakigpulong ni Elder D. Todd Christofferson nga “Matarung nga Disiplina,” ug pangitaa ang mga baruganan sa kabubut-on nga magamit sa imong kinabuhi. Unsa nga mga panabut o pagtulun-an ang imong ipaambit sa usa ka higala nga anaa sa susama nimong sitwasyon? Isulat sa journal ang imong mga hunahuna.

• Hunahunaa ang mga baruganan nga ania niini nga mga himno: “Hibaloi, Nga ang Kalag May Kagawasan” (Mga Himno, nu. 147); “Tudloi Ko Paglakaw sa Kahayag” (Songbook sa mga Bata, nu. 70).