Ako

lightbulb-red

ʻE founga fēfē haʻaku fakatau atu lahi ange?

Taimí:Seti ʻa e uasí ke miniti ʻe 60 ʻa e konga ki he Akó.

Mamata:“Made the Sale, Missed the Sale!” (ʻIkai ha vitiō? Vakai peesi 178.)

Lau:Na’e faingofua ia. Na’e fai ‘e Malia ha fakatau. Na’e ma’u ‘e Silivia ‘a e na’á ne fie ma’ú. ‘Okú na fakatou fiefia. Ka na’e mole ‘ia Malia ‘a e fakatau lahi angé—ko ha fakatau makehe ‘o ha ngāue fetuku koloa. Ka tānaki atu ‘a e fetuku koloá ‘e lava leva ‘e Malia ke fakatau ‘o lahi ange, pe “hiki ‘a e mahu’ingá,” kia Silivia.

ʻOku ʻuhinga ʻa e “fakalahi ʻo e fakatau atú” ke ʻoange ha faingamālie ki heʻetau kau fakataú ke nau fakatau lahi ange pe ko ha koloa lelei ange ʻi he meʻa naʻa nau mei fakataú.

Hangē ko ʻení:

• Lahi ange: Foaki ha inu pe foʻi mā ki ha taha fakatau ʻokú ne ʻota ha ika fakapaku

• Lelei angé: Tuʻuaki ange ha mīsini tuitui lelei ange ki ha taha fakatau ʻoku fakakaukau ke ne fakatau ha mīsni tuitui ʻoku ʻikai fuʻu lelei

Mamata:“The Upsell” (ʻIkai ha vitiō? Vakai peesi 178.)

Aleaʻi:Naʻe lava fēfē ʻe Malia ke hikiʻi hake hono fakatau ʻo e ngāué kia Siliviá? Ko e hā ha niʻihi ʻo e ngaahi sīpinga ʻo hikiʻi hake ʻo e fakataú kuó ke mamata ai?

ʻOku hikiʻi hake maʻu pē ʻa e fakataú ʻe he kau pisinisi leleí.

Lau:FEHUʻI ʻO E UIKÉ—ʻE founga fēfē ke fakalahi ʻeku tupú?

NGĀUE ʻO E UIKÉ—Te u ʻahiʻahiʻi ha founga ʻe ua ʻo e hiki hake ʻo e fakataú. Te u ʻahiʻahiʻi ha founga ʻe ua ke holoki ʻeku fakamolé.

KO E HĀ TE U HIKI HAKE HONO FAKATAÚ?

Lau:He ʻikai ke fakatau lahi ʻe he kau fakatau iá ha meʻa koeʻuhí pē ko haʻatau fokotuʻu ange. Kuo pau ko ha meʻa ia ʻoku nau fie maʻu lahi ange ʻi he ʻuluaki koloa naʻa nau fie maʻú.

ʻE lava pe ke nau fie totongi ʻo lahi ange ki he faʻahinga meʻa ko iá ʻo hangē ko ʻení:

• Ke siʻisiʻi ai e fakamole honau taimí

• Hao ai ʻenau paʻangá

• Koloa lelei

• Hono lahí

• Ngāue

• Fengāueʻaki

• Vave

• Falalaʻanga

• Fakaʻofoʻofa

• Ongoongó

ʻOku ʻilo ʻe he kau pisinisi leleí ʻa e meʻa ʻoku mahuʻinga ki heʻenau kau fakataú.

Akoako Fakahoko:Ko e hā ha meʻa ʻe totongi lahi ki ai hoʻo kau fakataú? ʻE lava fēfē ke ke ʻilo ia? Aleaʻi mo hao hoa ngāue ʻa e meʻa ʻokú mo pehē ʻoku fakamahuʻingaʻi ʻe hoʻomo kau fakataú.

Fakaʻaongaʻi ʻa e tēpile ʻi laló ke hiki ai ha founga ʻe tolu ke ke ʻilo ai ʻa e meʻa ʻoku mahuʻingaʻia ai hoʻo kau fakataú (ʻoku ʻoatu heni ha ngaahi sīpinga).

KO ʻEKU NGAAHI FAKAKAUKAU KI HE MEʻA OKU MAHUʻINGAʻIA AI ʻEKU KAU FAKATAÚ	KO E HĀ ʻA E MEʻA TE U FEHUʻI PE FAI KE U ʻILOʻI AÍ
Te u pehē ʻe mahuʻingaʻia ʻeku kau fakataú ʻi he falalaʻangá.	Fehuʻi ki he kau fakataú, “Kapau te u fakapapauʻi atu ʻe aʻu atu ʻi he taimi 5:00 maʻu pē, te ke fie maʻu?””
Te u pehē ʻe ala mahuʻingaʻia ʻeku kau fakataú ʻi ha koloa ʻoku kei foʻou.	Fakahingoa ha puha fua’i ‘akau ‘e taha ko e “toki toli pē ‘aneuhu” pea puha ‘e taha ko e “toli ‘i he uiké ni.” Siofi pe ko e fē ‘e fili ‘e he kau fakataú.

Hili hono hiki hoʻo ngaahi fakakaukaú, vahevahe ia mo e kulupú.

Ko e hā ʻeku mahuʻinga ke hiki ki aí?

Lau:Mahalo ʻe fie maʻu ʻe ha taha fakatau ia ha meʻa lahi ange, ka ko e hā ʻa e mahuʻinga te ne fie totongí?

Ko e hā ʻa e mahuʻinga ʻoku tau fie fakatau atu aí? Kuo pau ke ʻi ai haʻatau tupu.

Hangē ko ʻení, naʻe ʻahiʻahiʻi ʻe Nāomi ʻa ʻene fakakaukau ʻoku mahuʻingaʻia ʻa e kau fakataú ʻi he lelei ʻo e koloá. Naʻa nau faʻa fili pē ʻa e fuaʻiʻakau naʻe “toki toli pē ʻaneuhú.” Ko e palopalemá he naʻe mamafa ange ʻene mahuʻingá ʻi he fuaʻiʻakau foʻoú. Naʻe mole ʻi he meʻá ni.

Na’e fakakaukau leva ke fakatau ‘a ‘ene fua’i’aku ‘i he “toli ‘i he uike ní” ʻi he 10 (tupú = 1) pea ko ‘ene “toki toli pē ‘aneuhú” ‘i he 13 (tupú = 3). ‘E feinga ke ne hiki hake ‘a e mahu’inga ‘o e fua’i’akau toki tolí ki he’ene kau fakataú.

Akoako Fakahoko:Kumi hao hoa. Vakai ki he ngaahi meʻa naʻe mahuʻingaʻia ai hoʻo kau fakataú ʻi he peesi kimuʻá. Hiki hoʻo ngaahi koloa pe ngāue ʻe hiki honau totongí. Fakaʻaongaʻi ʻa e tēpile ʻi laló ke hiki ai hoʻo mahuʻingá.

HIKI ʻO E MAHUʻINGÁ	KO ʻEKU MAHUʻINGA ʻOKU HIKI KI AÍ
Te u fakatau atu ‘a e fua’i’akau “toki toli ‘aneuhú.”	Fua’i’akau “toli ‘i he uike ní” = 10 (tupú ko e 1) Fuaʻiʻakau “toki toli ʻaneuhú” = 13 (tupú ko e 3)
Te u fakapapauʻi ʻe ʻosi ʻa e foó kimuʻa he 5:00.	Totongi angamaheni ki fō ʻi he ʻaho hokó = 20 (tupú ko e 4) Totongi fō ʻoku fakapapauʻí = 27 (tupú ko e 8)
Te u fakatau atu ʻa e koa ki he kilí.	Totongi koa fō angamahení = 12 (tupú ko e 2) Totongi koa fō ʻoku lelei ki he kilí = 18 (tupú ko e 6)

Aleaʻi:Hili hono hiki hoʻo ngaahi fakakaukaú, vahevahe ia mo e kulupú.

ʻE founga fēfē haʻaku hiki hono totongí?

Lau:Ko e hā te ne ʻai ke fie fakatau lahi ange ʻetau kau fakataú? ʻOku tau fie maʻu ha “kupuʻi lea ki he hiki ʻo e mahuʻingá.” ʻE lava pē ke hoko ʻeni ko ha kupuʻi ki he hiki ʻo e mahuʻingá: “ʻOku kiʻi totongi lahi ange, ka ___.” Tau fakafonu ʻa e konga ʻoku ʻataá ʻaki ʻa e meʻa ʻoku tau ʻilo ʻoku mahuʻinga ke tokotaha fakataú.

Hangē ko ‘ení, ko e taimi ‘oku siofi ai ‘e he kau fakatau ʻa Nāomí ‘a e “toli ‘i he uike ní,” ‘oku pehē ange leva, “Na’á ku toli ha fua’i’akau fo’ou ‘aneuhu.”

Peá ne tānaki atu leva ‘a e totongi hikí, “‘Oku ki’i totongi lahi ange, ka ‘oku fo’ou.”

ʻOku ʻai ʻe he kau pisinisi leleí ke faingofua ʻa e fakatau meiate kinautolú.

Akoako Fakahoko:Fakakaukau ki hoʻo pisinisí. Fakakaukau ki hoʻo ngaahi koloa ʻe hiki honau mahuʻinga fakatau atú. Ko e hā te ke lea ʻaki ke hiki e mahuʻinga ki hoʻo kau fakataú? Fakaʻaongaʻi ʻa e tēpile ʻi laló ke fokotuʻu ai hao ngaahi kupuʻi lea ki he hiki ʻe mahuʻinga hoʻo fakatau atú (ʻoku ʻoatu heni ha ngaahi sīpinga).

HIKI HA KUPUʻI LEA KI HE HIKI ʻO E MAHUʻINGÁ
ʻUluaki Koloá pe Ngāué	Koloa pe Ngāue ʻOku Hiki Hono Mahuʻingá	Meʻa ʻOku Mahuʻingaʻia ai ʻEku Kau Fakataú	Kupuʻi Lea ki He Hiki ʻo e Mahuʻingá
Fuaʻiʻakau “toli ʻi he uike ní”	Fuaʻiʻakau “Toki toli ʻaneuhú”	Tuʻunga leleí (kei foʻoú)	ʻOku kiʻi lahi ange hono totongí, ka ʻoku foʻou ange.
Vaeuaʻi lita huʻakau ki he 3	Lita huʻakau ki he 5	Ko e fakahaofi ʻo e paʻangá	ʻOku kiʻi totongi lahi ange, ka ʻoku liunga ua ange hono lahí ʻi hao tānaki atu ha 2.
Koa angamahení	Koa ʻoku lelei ki he kilí	Tuʻunga Leleí	ʻOku kiʻi lahi ange hono totongí, ka ʻoku lelei ange ki ho kilí.
Ngāue ki he foó	Haiane ʻa e soté	ʻIkai mole ʻa e taimí	ʻOku kiʻi totongi lahi ange, ka ʻoku hao ai hao taimi lahi.

ʻE founga fēfē haʻaku fakatau vave ange ʻeku koloá?

Lau:‘Oku fakatau ‘e he kau pisinisi leleí ha koloa lahi ange ki he taha fakatau kotoa pē ka nau lava ‘o “fulihi mai ‘a e koloá” ‘o vave ange. ‘Oku ‘uhinga ‘a e “fulihi mai ‘a e koloá” ke fakatau kotoa ‘a e koloa na’a tau hū mai mei he ngaahi kautaha hū koloa maí. Te tau lava ‘o faka’aonga’i ‘a e ngaahi founga hiki mahuʻinga ‘o e koloá ke fakatau lahi atu ki he tokotaha fakatau kotoa pē.

ʻOku toutou fulihi maʻu mai pē ʻa e koloá ʻe he kau pisinisi leleí.

Mamata:“Turn Inventory Quickly” (ʻIkai ha vitiō? Lau ʻa e peesi 179.)

Aleaʻi:ʻE founga fēfē ke lava ʻe Malia ʻo fulihi vave ange mami ʻa ʻene koloá? ʻE lava fēfē ʻe he meʻá ni ʻo hiki hake ʻene tupú?

KIMUʻA	MEʻA NAʻE FAI ʻE MALIÁ	KIMUI
Naʻe totongi ʻe Malia ki he tokotaha tufa huʻakaú ʻa e 17 ki he lita huʻakau ʻe taha.	Naʻe talanoa mo e tokotaha tufa huʻakú fekauʻaki mo ha fakamaʻamaʻa ʻi heʻene fakatau lahi ʻa e huʻakaú.	ʻOkú ne totongi he taimí ni ʻa e 15 ki he lita.
Naʻe fakalahi ʻe Malia ʻa ʻene koloá ʻaki hano hū lahi fakaʻangataha mai. Naʻe ʻikai ke ne liliu ʻene totongí. Naʻe taimi lōloa pea toki fulihi ʻene koloá pea naʻe kovi ha niʻihi ʻo ʻene huʻakaú.	Naʻá ne ngāue ʻaki ha founga ki he hiki ʻo e mahuʻingá: kapau te nau fakatau ha lita ʻe ua pe lahi ange ʻe fakamaʻamaʻa ange kiate kinautolu.	ʻOku fulihi he taimí ni ʻene koloá ʻi he ʻaho pē ua. ʻOku ʻikai kovi ha huʻakau. ʻOkú ne maʻu ha paʻanga ke fakatau lahi ange. Pea ʻokú ne maʻu ha paʻanga lahi ange.

Lau:ʻOku ʻi ai ha ngaahi koloa makehe ʻe niʻihi ʻoku fuoloa pea toki fakatau, pea ʻoku sai pē ia. Ka, kapau ʻoku ʻi ai haʻatau koloa ʻoku ʻikai pē ke fakataua, ʻe fihia leva ʻetau paʻanga pisinisi kehekehé ʻi he koloa ʻoku tuʻú kae ʻoua ke fakatau.

Aleaʻi:Aleaʻi mo ha taha, ʻa e ongo fehuʻi ko ʻení. Hiki hoʻo ngaahi fakakaukaú.

1. ʻE founga fēfē ke u lava ʻo fulihi vave ange mai ʻeku koloá?

2. ʻE founga fēfē ke u lava ʻo holoki ʻeku koloa ʻoku tuʻú?

ʻE founga fēfē haʻaku holoki ʻeku fakamolé?

Lau:ʻOku hiki hake ʻetau tupú ʻi hono fulihi vave ange mai ʻetau koloá. Te tau lava foki ʻo ʻai ke tupu lahi ange ʻetau pisinisí ʻaki hano holoki ʻetau fakamolé.

Akoako Fakahoko:Fakataha mo hao hoa ngāue. Tauaufetongi ʻi hono lau ʻa e ngaahi founga ki hono holoki ʻo e fakamole ʻi laló. Hiki ha ngaahi founga kehe te ke lava ke holoki ʻa e fakamolé.

TUʻUMAʻU	KEHEKEHE
Ngāueʻaki pē ʻa e meʻa ʻoku tau maʻú Totongi falé	Alea mo e kau hū koloá Fakaʻaongaʻi ha kau hū koloa kehekehe

Toe foki ki he kulupú pea vahevahe hoʻo ngaahi fakakaukaú.

Lau:Te tau toe lava foki ke fakakaukauʻi ha ngaahi founga te tau lava ʻo fakaʻehiʻehi ai mei he fakamolé.

Akoako Fakahoko:ʻOku fakakaukau ʻa Nāomi ke fakaʻaongaʻi ha ongo tokoni ʻe ua: Samuela mo Siosefa.

Te ne totongiʻi ʻa Samuela ke ngāue ʻi he fakatauʻanga fuaʻiʻakaú ʻi he houa ʻe fā he ʻaho kotoa pē (totongi tuʻumaʻu). He ʻikai ke ne fakangāueʻi ʻa Siosefa, ke ʻe toki telefoni pē ki ai ke ne tufaki ʻa e koloá ʻo ka fie maʻu (totongi kehekehe).

Aleaʻi mo ha toko ua kehe ʻa e ngaahi founga ke fakaʻehiʻehi ai pe holoki ʻa e fakamole tuʻu maʻu pe fakamole kehekehe ʻa Nāomí.

Akoako Fakahoko:Ko ho taimí ʻeni. Hiki ʻa e fakamole tuʻumaʻu mo e fakamole kehekehe hoʻo pisinisí. Aleaʻi mo hao hoa ʻa e ngaahi founga ke holoki ai ʻa e ngaahi fakamole ko ʻení.

TUʻUMAʻU	KEHEKEHE