Faatumauina o le Paleni Faaleaoaoga Faavae

Faamatala

Faamalamalama atu o le paleni faaleaoaoga faavae o lona uiga o le tuuina atu o le taulaiga talafeagai po o le mamafa i se vaega o le aoaoga faavae i totonu o le talaaga o isi upumoni e faatatau i ai ua faaalia mai e le Atua. Ina ia fesoasoani i tagata aoga ia malamalama i lenei tomai e mafai ona e faasoa atu ai faamatalaga nei:

E valea tele le ave o se tama’i mea moni ma faia e pei o le mea atoa lea. (Joseph F. Smith, Gospel Doctrine, 5th ed. [1939], 122)

O loo i ai aoaoga felagolagoma’i ma le faalototeleina i tusitusiga paia lea e aumaia ai se malamalama paleni o le upumoni. (Boyd K. Packer, “The Pattern of Our Parentage,” Ensign, Nov. 1984, 66)

Valaaulia tagata aoga e fesili ifo ia i latou lava fesili nei a o latou suesue i tusitusiga paia ma faailoa mai aoaoga o le talalelei:

• O le a se mea e ono tulai mai pe afai ou te taumafai e malamalama pe faaaoga lenei aoaoga i le faaesea o isi upumoni o le talalelei?

• O a isi upumoni e faalototele pe aumaia le paleni i lenei aoaoga o le talalelei?

Faataitaiga

E mafai ona e faaaogaina le faataitaiga lenei po o se tasi o au lava faataitaiga e faataitai ai lenei tomai.

Faitau le Mataio 22:39, ma faailoa mai le poloaiga a le Alii e tatau ona tatou alolofa atu i isi e pei o i tatou lava.

O le a se lē paleni e ono oo i ai pe afai e tuuesea lenei poloaiga mai isi upumoni o le talalelei?

E mafai ona tupu le lē paleni pe afai e talitonu se tasi o le aapa atu i isi i le alofa ma le agalelei e aofia ai le taliaina o filifiliga e feteenai ma tulafono a le Atua. O loo i ai foi se lē paleni pe afai o le alofa mo isi e taitai atu ai i le faaitiitia po o le faatoese ai mo tulafono a le Atua.

O a isi upumoni e faalototele pe aumaia le paleni i lenei aoaoga o le talalelei?

E mafai ona tatou manatua o le poloaiga muamua ma le sili o le alofa i le Atua, lea e aofia ai le usiusitai i Ana tulafono ae le o le maasiasi i ai (tagai i le Mataio 22:37–38; Roma 1:16). Ua poloaiina foi i tatou e le Atua e valaaulia isi e o mai ia Iesu Keriso ma salamo (tagai i le Mataupu Faavae ma Feagaiga 18:14–16). O le valaauliaina o isi e ola i tulafono a le Atua o se faailoaga lea o lo tatou alolofa mo Ia ma Ana fanau.

E mafai foi ona e faaalia le vitio “Go and Sin No More” (3:21) pe toe iloilo le tala o i le Ioane 8:1–11. Valaaulia le vasega e vaavaai pe na faapefea ona faataitai e le Faaola le paleni i le va o le poloaiga ia alofa atu i isi ma Lana tautinoga i le tulafono a le Atua.

Faataitai

Filifili se fuaitau mai le faitauga o tusitusiga paia o lenei vaiaso o loo aoao mai ai se upumoni e manaomia ona paleni ma isi upumoni ina ia malamalama lelei ai pe faaaogaina. Pe e mafai foi ona e filifili mai fuaitau o loo lisi atu i lalo. Valaaulia tagata aoga e suesue le fuaitau ma faailoa mai mea nei:

• O se upumoni o le talalelei o loo aoao mai e le fuaitau

• O se lē palanei e mafai ona i ai pe afai e tuuesea lenei upumoni mai isi aoaoga o le talalelei

• O aoaoga o le talalelei e aumaia ai le paleni i lenei upumoni

Valaaulia tagata aoga e faasoa mai i le vasega po o ni vaega toalaiti mea latou te maua.

Fuaitau faaopoopo mo faataitaiga:

• Isaia 63:1–6. Ua aoao mai Isaia e faapea o le Afio Mai Faalua o le a avea ma aso o le tauimasui ma faatafunaga.

• Maeko 11:24. Ua aoao mai le Faaola e faapea, soo se mea lava e tatalo ai Ona soo ma le faatuatua o le a tuuina atu ia i latou.

• Efeso 2:8–9. Ua aoao mai Paulo e faaolaina i tatou e ala i le alofa tunoa e ala i le faatuatua ae le o a tatou galuega.

• Alema 34:32–33. Ua aoao mai e Amuleka e faapea o le olaga lenei o le taimi e saunia ai e fetaiai ma le Atua.

• Mataupu Faavae ma Feagaiga 64:2, 4. Ua aoao mai le Alii e agaalofa ma alofa mutimutivale o Ia.

Valaaulia ma Toe Tulitatao

Fautuaina tagata aoga e faataitai le faatumauina o le paleni faaleaoaoga faavae a o latou suesue i tusitusiga paia ma le talalelei. Manatua e tulitatao ma tuu atu se taimi mo tagata aoga e faasoa mai ai mea ua latou mauaina ia latou suesuega faaletagata lava ia e ala i le faaaogaina o lenei tomai. E mafai foi ona e valaaulia tagata aoga e faasoa mai pe mafai faapefea e lenei tomai ona fesoasoani ia i latou e malamalama atili ai i upumoni o le talalelei o loo aoao mai i tusitusiga paia. Vaavaai mo avanoa e faaauau ai ona faataitai lenei tomai i le vasega.