’Ua ha’amau te Mesia i te ’ōro’a mo’a i rotopū i te mau ’āti Nephi, nā Andrew Bosley

Nō te aha e tuatāpapa ai i te mau papa’ira’a mo’a ?

’Ia tuatāpapa itoito ana’e tātou i te mau pāpa’ira’a mo’a, e ha’afātata atu ā tātou ia Iesu Mesia ’e e māramarama maita’i a’e tātou i tāna ’evanelia ’e tāna tusia tāra’ehara. Mai teie te huru, te peropheta Nephi i te fa’aitoitora’a ia tātou :

« ’E teienei, ’ia haere ti’a atu ’outou i mua i te ti’a-māite-ra’a i te Mesia, ma te tīa’i pāpū roa, ’e te here i te Atua ’e te ta’ata ato’a. E tenā na, ’ia haere ti’a ’outou i mua ma te ’oa’oa i te ’ite i te parau a te Mesia, ma te tāpe’a ho’i e tae noa atu i te hope’a ra, ’inaha, tē nā ’ō mai ra te Metua, e ’ora mure ’ore tō ’outou i reira ra » (2 Nephi 31:20).

’utuāfare e tai’o ra i te mau pāpa’ira’a mo’a

E tauturu te mau ha’api’ira’a nō roto mai i te mau pāpa’ira’a mo’a ia tātou ’ia ho’i fa’ahou i tō tātou Metua i te ao ra. ’Ua ani mai tō tātou mau peropheta nō te mau mahana hope’a nei ia tātou ’ia tuatāpapa tāmau i te reira ’ei ta’ata hō’ē, ’e i te vāhi e nehenehe, ’ei ’utuāfare. ’Ua ani manihini mai rātou ia tātou ’ia ha’api’i mai nā roto i te mau ’itera’a o te feiā i roto i te mau pāpa’ira’a mo’a ’e ’ia fa’a’ohipa i te mau ’ā’amu ’e te mau ha’api’ira’a o te mau pāpa’ira’a mo’a i tō tātou ’orara’a i teie mahana mai tā Nephi i a’o i roto i te 1 Nephi 19:23. ’Ua ’ani manihini mai te mau peropheta i tahito ra ’e i teie mahana ia tātou ’ia tuatāpapa i te mau pāpa’ira’a mo’a ’e ’ia « fa’a’amu’a i te parau a te Mesia » (2 Nephi 32:3).

tāne e tai’o ra i te mau pāpa’ira’a mo’a

‘Ua ha’api’i ato’a mai te peresideni Russell M. Nelson teie parau mau faufa’a rahi roa nō ni’a i te « fa’a’amu’ara’a » i te mau pāpa’ira’a mo’a :

« Te ravera’a i te fa’a’amu’a, e ’ere ïa i te tāmata noa. Te ravera’a i te fa’a’amu’ara’a ’o te ’amu-monamona-ra’a ïa, te aura’a. E ’amu monamona tātou i te mau pāpa’ira’a mo’a ’ia tuatāpapa tātou i te reira nā roto i te vārua au o te ’ite ’e te ha’apa’o maita’i. ’Ia fa’a’amu’a ana’e tātou i te parau a te Mesia, « ’ei ni’a [roa te reira] i te papa ta’ata ra i te ’ā’au » [2 Korinetia 3:3]. ’Ua riro te reira ’ei tuha’a tāmau nō tō tātou nāturara’a » (« Living by Scriptural Guidance », Ensign, Novema 2000, 17).

’Ia rave tāmau ana’e tātou i te tuatāpapara’a i te pāpa’ira’a mo’a nō te ta’ata hō’ē ’e nō te ’utuāfare, e nehenehe tātou ’e tō tātou utuāfare e arata’ihia, e pāruruhia ’e e ha’apūaihia i mua i te mau tāmatara’a e rave rahi o tō tātou mahana tāta’itahi.