e vahine e tuatāpapa ra i te mau pāpa’ira’a mo’a

Mau mana’o nō te ha’amaita’i i tā ’oe iho tuatāpapara’a i te pāpa’ira’a mo’a

Teie te tahi mau rāve’a ’ōhie nō te ha’amaita’i i tā ’oe iho tuatāpapara’a i te parau a te Atua i roto i te mau pāpa’ira’a mo’a.

Pure nō te fa’aurura’a

Tei roto i te mau pāpa’ira’a mo’a te parau a te Atua. ’A tuatāpapa ai ’oe i te reira, e ani i tō ’oe Metua i te Ao ra i tāna arata’ira’a ’e ’ia fāri’i i tōna Vārua nō te tauturu ia ’oe ’ia māramarama i te reira.

’Imi i te parau mau nō ni’a ia Iesu Mesia

Tē ha’api’i nei te mau pāpa’ira’a mo’a ia tātou ē tē fa’a’ite pāpū nei te mau mea ato’a nō te Mesia (hi’o 2 Nephi 11:4 ; Mose 6:63), nō reira, e ’imi iāna i roto i te mau ’ohipa e tupu ra, i roto i te mau ’ā’amu ’e i roto i te mau ha’api’ira’a o te mau pāpa’ira’a mo’a. ’A feruri i te tāpa’opa’o ’aore rā i te fa’a’ū i te mau ’īrava ’o tē ha’api’i ra nō ni’a i te Fa’aora ’e e nāhea i te pe’e iāna.

’Imi i te mau ta’o ’e te mau pereota fa’auru mau

E ’ite mai paha ’oe ē, ’ua fa’ahiahia ’oe i te tahi mau ta’o ’e mau pereota i roto i te mau pāpa’ira’a mo’a, mai te huru ra ē, ’ua pāpa’i-ta’a-’ē-hia te reira nō ’oe. Penei a’e e fāri’i ’oe iho i te huru-’ē-ra’a o te reira ’e e fa’auru ia ’oe ’e e fa’aitoito ia ’oe. ’A feruri i te tāpa’o i te reira i roto i tā ’oe pāpa’ira’a mo’a ’aore rā e pāpa’i nō ni’a te reira i roto i te hō’ē buka tuatāpapara’a.

’Imi i te mau parau mau o te ’evanelia

I te tahi taime e parau ’āfaro mai te mau parau mau o te ’evanelia (tei parau-pinepine-hia te ha’api’ira’a tumu ’aore rā te mau parau tumu) ’e i te tahi atu taime, tei roto te hō’ē hi’ora’a ’aore rā te tahi ’ā’amu. E ui ia ’oe iho ē : « E aha te mau parau mau o te ’evanelia e ha’api’ihia nei i roto i teie mau ’īrava ? »

Faʼaroʼo i te Vārua

’A hi’o maita’i i tō ’oe mau mana’o ’e tō ’oe mau mana’otino, noa atu ā ’aita tō te reira e tū’atira’a i te mau mea tā ’oe e tai’o ra. Penei a’e ’o te reira mau mana’o te mea tā te Metua i te ao ra e hina’aro ra ia ’oe ’ia ’apo mai ’e ’ia fāri’i.

e vahine e tuatāpapa ra i te mau pāpa’ira’a mo’a 2

Fa’aau i te mau pāpa’ira’a mo’a i tō ’oe orara’a

’A feruri e nāhea te mau ’ā’amu ’e te mau ha’api’ira’a tā ’oe e tai’o ra e tū’ati ai i tō ’oe orara’a. ’Ei hi’ora’a, e ui ’oe i roto ia ’oe, « e aha te mau ’ohipa i tupu nō’u e tū’ati i te mea tā’u e tai’o ra ? » ’aore rā « e nāhea vau e nehenehe ai e pe’e i te hi’ora’a o teie ta’ata i roto i te mau pāpa’ira’a mo’a ? »

E ui i te mau uira’a.

E nehenehe te uira’a i te mau uira’a nō ni’a i te ’evanelia e tauturu ia ’oe ’ia fa’aoti e aha tā ’oe e tuatāpapa. ’A tuatāpapa ai ’oe i te mau pāpa’ira’a mo’a, e tae mai paha te tahi mau uira’a i tō ’oe ferurira’a. E tū’ati teie mau uira’a i te mea tā ’oe e tai’o ra ’aore rā i tō ’oe orara’a ’ia hi’o ’āmuihia. ’A feruri i teie mau uira’a ’e ’a ’imi i te pāhonora’a ’a tāmau noa ai ’oe i te tuatāpapa i te mau pāpa’ira’a mo’a. I muri mai i tā ‘outou tuatāpapara’a, ’a ui e aha atu ā tā te Atua e hina’aro ’ia ’apo mai ’oe, ’e ’a hi’o maita’i i te mau pāhonora’a i roto i te mau hora ’e te mau mahana e haere mai nei.

Fa’a’ohipa i te mau tauturu o te tuatāpapara’a i te pāpa’ira’a mo’a

Nō te fāri’i i te mau ha’amāramarama hau atu i roto i te mau ’īrava tā ’oe e tai’o ra, ’a fa’a’ohipa i te mau fa’ata’ara’a i raro i te ’api, te Arata’i o te mau pāpa’ira’a mo’a (scriptures.ChurchofJesusChrist.org), ’e te tahi atu mau rāve’a tuatāpapara’a.

’A feruri i te huru tupura’a i roto i te mau pāpa’ira’a mo’a

E nehenehe ’oe e ’ite mai i te tahi mau ha’amāramaramara’a faufa’a nō ni’a i te hō’ē ’īrava mai te peu e feruri ’oe i tōna huru tupura’a—te huru orara’a ’aore rā te vaira’a o taua ’īrava ra. ’Ei hi’ora’a, ’ia ’ite ’oe i te mau ’ohipa i tupu ’e te mau ti’aturira’a o te nūna’a tā te hō’ē peropheta i parau e nehenehe e tauturu ia ’oe ’ia māramarama i te hina’aro o tāna mau poro’i.

tāne e tuatāpapa ra i te mau pāpa’ira’a mo’a

Pāpa’i i te mau mana’o i tō ’oe ferurira’a ’e i tō ’oe ’ā’au

’Ua rau te rāve’a nō tē tāpa’o i te mau mana’o o te ’ā’au e tae mai ’a tuatāpapa ai ’oe. ’Ei hi’ora’a, e nehenehe tā ’oe e fa’a’ū i te hō’ē parau ’aore rā i te hō’ē pereota faufa’a rahi ’e e tāpa’o i tō ’oe mau mana’o ’ei parau fa’ata’ara’a i roto i tā ’oe pāpa’ira’a mo’a. E nehenehe ato’a ’oe e tāpe’a i te hō’ē buka ’ā’amu nō te mau mea i ’apohia mai, te mau mana’o ’e te mau fa’aurura’a tā ’oe e fāri’i. ’E ’aore rā e nehenehe ’oe e pāpa’i i te uira’a tā oe i ui hou ’a ha’amata ai i tā ’oe tuatāpapara’a, ma te pe’ehia e te mau pāhonora’a i arata’ihia atu ai ’oe.

Tuatāpapa i te mau parau a te mau peropheta ’e a te mau ’āpōsetolo i te mau mahana hope’a nei

Tai’o i te mea tā te mau peropheta ’e tā te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’oe i ’ite mau i roto i te mau pāpa’ira’a mo’a. E roa’a tā rātou mau poro’i i roto i te « ’Āmuira’a Rahi », « Te mau ve’a », ’e te tahi atu mau ha’aputura’a i roto i te Vaira’a buka ’evanelia.

Tai’o i te mau ’ā’amu

’A tai’o i te mau ’ā’amu i roto i te mau pāpa’ira’a mo’a, ma te ’imi ’ia māramarama i te huru tupura’a o te reira (taime, vāhi, ta’ata a’o, ’e ta’ata e fa’aro’o). ’Ua riro te hōho’a o te mau ’ā’amu o te pāpa’ira’a mo’a ’ei rāve’a tauturu rahi nō te reira, nō te mau tamari’i iho ā rā ’e te mau melo tei ha’amātauhia i te mau pāpa’ira’a mo’a.

Fa’a’ite i te mea i ’apohia mai

’Ua riro te ’āparaura’a i te mau mea i ’apohia mai i roto i tā ’oe tuatāpapara’a ’ei rāve’a maita’i nō te ha’api’i ia vetahi, ’e nō te tauturu i te ha’apūai i tō ’oe hāro’aro’ara’a i te mea tā ’oe i tai’o.

Ora ’ia au i te mea tā ’oe i ’apo mai

E fa’auru te tuatāpapara’a i te pāpa’ira’a mo’a ia tātou ’e e arata’i ia tātou ’ia taui i tō tātou orara’a. ’A fa’aro’o i te mea tā te Vārua e muhumuhu ia ’oe ’ia rave ’a tai’o ai ’oe, ’e i muri iho ’a fafau ’ia rave mai te au i te reira mau muhumuhu.