Punaoa mo le Puleaina o Manaoga Faaleagaga

I faifeautalai, o le tali atu masani lava i le soona atuatuvale o le fesiligia lea o le malosiaga o a latou molimau po o le moni a’ia’i o le talalelei. O lenei tauiviga e masani lava ona mafua mai i le leai o ni punaoa e taulima ai le soona atuatuvale nai lo le leai o se molimau. Afai o ia te oe ia faigata, faataitai ia fautuaga o loo i lalo e foliga mai e sao ia te oe. Ia tagai foi i le vaega o le “Mataupu Faavae Lautele mo le Puleaina o le Atuatuvale” i le itulau 17–22 mo nisi manatu faaopoopo.

An elder missionary sitting at a desk or table with his hands clasped and eyes closed. There are scriptures laying on the desk.

A

Aoao e Faamalosia La’u Molimau

• Ia iloa o fesili e lelei. Sa maua e Iosefa Samita le tele o faaaliga o ni tali i ni fesili faamaoni. O tusitusiga paia, faiaoga, ma mafuaaga e mafai ona fesoasoani i nisi o fesili, ae ua na o le Agaga lava e mafai ona faamautuina le moni o le Atua, o Iesu o le Keriso, ma o le Ekalesia e moni.

• Malamalama po o le a le faatuatua. O le mauaina o le faatuatua o le faalagolago lea i le agalelei atoatoa o le Alii, alofa, atamai, ma le faamaoni, e ui lava tatou te le malamalama atoatoa i ai. Ua aoao mai Alema e faapea “o le faatuatua e le o le maua lea o se malamalama atoatoa i mea; o lea afai ua ia te outou le faatuatua ua outou faamoemoe mo mea e le vaaia, ae moni” (Alema 32:21). E te le manaomiaina se “malamalama atoatoa” e maua ai le faatuatua. Suesue i le Alema 32 mo se fesoasoani i le fausiaina o lou faatuatua. (Tagai Talai La’u Talalelei, 124–26.)

• Ia onosai. O le taimi ma aafiaga o le a fesoasoani ia te oe e malamalama ai i nisi o mea o loo fenumiai i le taimi nei. Manatua le tautinoga a Nifae: “Ua ou iloa e alofa [le Atua] i ana fanau; e ui i lea, ou te le iloa le uiga o mea uma” (1 Nifae 11:17). Fausia i luga o mea ua e iloaina e ala i le Agaga e moni e uiga i le Atua. (Tagai Talai La’u Talalelei, 129.)

• Tausi Poloaiga. Tatou te maua le faalagolago i le Alii pe a tatou aoao le taua o Ana aoaoga e ala i aafiaga. “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au” (Ioane 7:17).

A sister missionary reading the scriptures.

“Saili ma le filiga, tatalo e lē aunoa, ma ia talitonu, ma o le a galulue faatasi mea uma mo lo outou lelei, pe afai tou te savavali saʼo ma manatua le feagaiga na outou osifeagaiga ai ma le tasi.”

—Mataupu Faavae ma Feagaiga 90:24

E

Aoao e Salamo

• Ia e faamaoni i lou peresitene o le misiona. A manaomia ona e salamo i agasala matuia e te lei taulimaina lava, talanoa i lou peresitene o le misiona ma tatala i ai ou lagona ma le faamaoni. O le a ia fesoasoani atu ia te oe e faasa’o nei mea.

• Faamagalo oe lava ia pe a uma ona salamo. Afai ua e salamo ae o loo lagonaina pea le tausalaina ma le maasiasi, manatua tatou te lagona lava le tausalaina i agasala ma mea sese ua tuanai. Ia faatuatuaina le lava o le Togiola a Keriso, mo oe. Manatua o le salamo e le na o se fuafuaga faaleoleo. O le salamo o le fuafuaga o le fiafia mo tagata uma. Ia mautinoa o mea o loo sili ona e popole i ai o mea ia e sili ona taua moni (mo se faataitaiga, o le alualu i luma o au tagata sailiili), e le o ni mataupu o le faamaualuga patino (e pei o mea o loo mafaufau i ai isi e uiga ia te oe).

  An elder missionary kneelining at his bed praying.

• Malamalama i le matafaioi o le tautau atu o agasala. Afai e te lagonaina se manao e tautau atu ni agasala e le matuia tele pe tautau soo atu, e tusa lava pe ua faamautinoa atu e taitai perisitua ia te oe ua lava lou tautau atu [o na agasala], e masalo la ua soona mamafa ia te oe le tautau atu [o agasala]. O le faaauau pea ona lagonaina o le tausalaina ma le faanoanoa e uiga i agasala ua mavae o se mea ua masani ai ae e le faapea la e manaomia ai ona e toe saga tautau atu. Ia aveese oe lava mai ia mafaufauga [i le faia o] i isi gaoioiga, ma faia se filifiliga magafagafa lelei e talitonu i le faamagaloga a le Alii. Aua nei amanaiaina le faaosoosoga e popolevale pe maasiasi.

• Talanoa i lou peresitene o le misiona pe afai o loo faaauau pea ona e tauivi.

I

Aoao e Fai Tatalo Anoa

• Taumafai e tatalo leotele, e tusa lava pe ua na o se musumusu. Taumafai e saunia mo se tatalo e ala i le tusiaina o ni au fesili po o ni popolega. Vaai faalemafaufau o loo latalata mai le Alii. Ole atu i le Atua po o le a se mea e mafai ona e faia mo Ia i le asō; ona faatino lea o manatu e oo atu i lou mafaufau. I nisi taimi faaaoga au tatalo e na o le faafetai ai lava i le Atua mo le tele o mea lelei ua Ia faamanuiaina ai oe.

• Suesue le “Tatalo ma le Faatuatua” i le Talai La’u Talalelei. O lenei vaega, o loo maua i le itulau 98–99, o loo tuuina mai ai ni fautuaga e uiga i le tatalo.

O

Aoao e Fiafia i Tusitusiga Paia

• Tatalo patino lava mo se fesoasoani ia malamalama ai ma fiafia i tusitusiga paia. Faaaoga nisi o au taimi mo suesuega e tusitusi ai ou lagona ma le tali atu, o mea ua e aoaoina, po o uunaiga faaleagaga e te mauaina.

• Iloilo le “Manatu ma Fautuaga mo Suesuega” i le Talai La’u Talalelei. O lenei vaega o loo maua i le itulau 22–25, ua maua ai fautuaga mo suesuega tauia atili o tusitusiga paia.

Church members singing from hymnbooks.

Ia filemu, lo’u Agaga: O loo tautai lou Atua

E taiala le lumanai e pei ona ia faia i le tuanai.

Lou faamoemoe, lou talitonuga ia le maluelue;

O le a iu lava ina manino mai mealilo o i ai nei.

Ia filemu, lo’u Agaga: O loo iloa pea e galu ma matagi

Lona siufofoga na puleaina i latou a o afio i lalo nei.

—Hymns, no. 124

U

Aoao e Faalagolago i le Agaga

• Faataitai ma le onosai. O le aoao ia iloaina le siufofoga o le Agaga e tai pei lava o le aoaoina o se gagana—e manaomia ai le faatino, onosai, lotomaualalo, ma se naunautaiga e aoao mai mea sese e aunoa ma le fiugofie.

• Aoao mai konafesi aoao. Mo ni manatu i le auala e atiae ai ia faaaliga patino, ia suesue i lauga o konafesi aoao e uiga i lenei autu.

• Suesue le Talai La’u Talalelei.O loo i ai i le itulau 101–02 ni fautuaga ma ni malamalamaaga faaopoopo e uiga i le iloaina ma le faalagolago i le Agaga.

Punaoa mo Tusitusiga Paia

Suesue i fuaitau o loo i itulau nei e faamalosia ai lou faatuatua lea o le a tuu atu e le Atua ia te oe le mafanafana ma le fesoasoani. A e manatuaina le Faaola, o le a e “maua lona Agaga e faatasi ma [oe]” (MF&F 20:79).

Isaia 41:10	“Aua e te fefe, aua ou te ia te oe: aua le fetepatepai; aua o au o lou Atua: Ou te faamalosia oe; e moni, ou te fesoasoani ia te oe; e moni, ou te taofia oe i lo’u lima taumatau e i ai le amiotonu.”
Ioane 14:27	“Ou te tuuina atu ia te outou le manuia; o lou manuia ou te avatu ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”
2 Timoteo 1:7	“Aua ua le foaiina mai e le Atua ia te i tatou le Agaga e matau ai, a o le Agaga e faamalosi ai, ma alofa ai, ma mafaufau tonu ai.”
1 Nifae 1:20	“O le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua, e faamalolosi tele ai i latou e oo lava i le mana e laveaiina ai.”
Iakopo 3:1	“O le a ia faamafanafanaina outou i o outou puapuaga, ma o le a ia aioia a outou tagi.”
Iakopo 4:7	“Ua faailoa mai ia te i matou e le Alii le Atua lo matou vaivai, ina ia mafai ai ona matou iloa, o lona alofa tunoa, ma lona faamaualalo tele i le fanauga a tagata, ua matou maua ai le mana e fai ai ia mea.”
Mosaea 4:27	“Ma ia vaai ia faia nei mea uma i le poto ma le faatulagaga lelei; ona e le tatau i se tagata ona momoe televave atu nai lo le malosi ua ia te ia.”
Mosaea 24:13–14	“Ina ea ia o outou ulu ma ia faamafanafanaina outou; ona ua Ou iloa le feagaiga na outou faia mai ia te a’u; ma o le a Ou osifeagaiga ma o’u tagata ma laveai i latou mai le pologa. Ma o le a Ou faamāmāina foi avega ua tuu i o outou tauʼau, e oo ia te outou tou te lē lagonaina i latou i luga o o outou tua, aʼo outou i ai lava i le pologa; ma o le a Ou faia lenei mea ina ia mafai ona outou tutu e avea o ni molimau mo aʼu i le lumanai, ma ina ia mafai ona outou iloa ma le mautinoa o Aʼu, o le Alii le Atua, e asiasi atu i oʼu tagata i o latou puapuaga.”
Alema 7:12	“O le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata e tusa ma o latou vaivaiga.”
Alema 26:27	“Ina ua vaivai o tatou loto, ma toetoe a tatou toe foi i tua, faauta, sa faamafanafanaina i tatou e le Alii, ma fetalai mai: … tauave ma le onosai ou puapuaga, ma o le a ou tuu atu ia te outou le manuia.”
Alema 38:5	“Afai e te tuu atu lou faalagolago i le Atua seia faapea ona tele, o le a ia laveaiina oe i fafo mai ou tofotofoga, ma ou faalavelave, ma ou puapuaga.”
Eteru 12:27	“Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma; aua afai latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou.”
Mataupu Faavae ma Feagaiga 6:32–36	“E faapei lava ona Ou i ai ia te oulua. … O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo. Faauta, ou te le tausalaina oulua. … Vaai mai ia te aʼu i mafaufauga uma; aua le masalosalo, aua le fefefe.”
Mataupu Faavae ma Feagaiga 58:2–4	“O ia o le e faamaoni i puapuaga, ua sili atu le tele o le taui o lea lava tagata i totonu o le malo o le lagi. E lē mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele. Aua a mavae puapuaga e tele ona oo mai lea o faamanuiaga.”
Mataupu Faavae ma Feagaiga 122:7–9	“O nei mea uma e te maua ai le poto masani, ma o le a avea ma ou lelei. Na afio mai le Atalii o le Tagata i lalo o i latou uma. … O lea, piimau.”
Bible Dictionary, “Fear”	“O le aafiaga muamua lava o le agasala a Atamu o lona fefe (Kenese 3:10). … Talu mai lava le Pa’ū, o loo aoao pea e le Atua ia tagata ia aua nei fefefe, ae faatasi ai ma le loto momomo ia ole atu ai mo se faamagaloga i le talitonuga atoa i le mauaina.
Isi punaoa mo tusitusiga paia: