Mga Kapanguhaan sa Pagdumala sa Intelektwal nga mga Panginahanglan

Ang intelektwal nga mga panginahanglan makaapekto kanato sa lain-laing paagi. Ang atong mga abilidad paigo sa pagtuman sa buhat sa Dios kon mosalig kita Kaniya nga mopuno sa kulang tali sa atong kahanas ug sa gikinahanglan. Ang mga sugyot sa ubos makatabang sa pipila ka mga isyu. Tan-awa usab sa “Kinatibuk-ang mga Baruganan sa Pagdumala sa Stress” nga sekyon sa mga pahina 17–22 alang sa dugang nga mga ideya.

Elder missionaries engaged in companion

A

Pagkat-on sa Pinulongan

• Padayon sa pagkugi. Salig sa Ginoo nga mopanalangin kanimo sa gasa sa pinulongan kon imong gikinahanglan sa pagtuman sa Iyang tinguha. Hinumdumi, pipila lang ka mga misyonaryo ang mahimong hingpit nga larino sa bag-o nga pinulongan. Ang Ginoo nakaila kanimo, mitawag kanimo, ug mogamit sa imong mga kalig-on sa pagpanalangin sa uban. Iyang hulipan ang imong kahuyang. Itampo ang tanang gasa nga anaa kanimo.

• Kalingawi ang imong bag-ong pinulongan. Usahay mas sayon ang paglitok sa bag-ong pinulongan kon kita mismo wala magpaabut nga mahimong eksperto.

B

Pagpabiling Organisado sa mga Tumong ug mga Plano

• Gamita ang mga scheduling tools nga anaa sa Isangyaw ang Akong Ebanghelyo. Tun-i ang kapitulo 8, “Unsaon man Nako Paggamit ang Panahon sa Maalamong Paagi?” Kini nga mga himan mainampingon nga gimugna alang sa mga misyonaryo ug motabang kanimo nga matuman ang imong katuyoan. Pag-focus sa usa ka butang matag higayon, ug likayi nga masobrahan.

• Ayaw pagsalig sa imong panumduman lang. Isulat ang mga ngalan, mga address, mga sabut, mga plano sa leksyon, ug mga tumong. Pagpapilit og mugbong sulat sa pahinumdom alang sa importanting mga butang diha sa pultahan, sa ref, duol sa higdaanan, o sa imong planner.

I-rekord sa imong planner

• Mga paagi sa maalamon nga paggamit sa gamayng mga panahon

• Mga plano sa preparation-day

• Mga ngalan, mga address, mga sabut, mga plano sa leksyon

• Ibutang ang tanan nimong kinahanglanon sa sunod adlaw sa usa ka dapit sa dili pa matulog. Niining paagiha dili nimo makalimtan ang usa ka butang nga importante. Ibutang ang importante nga mga butang sa sama nga dapit aron dili ka mag-usik og panahon sa pagpangita niini.

• Kon malinga ka, mabination apan hugtanon nga ibalik ang imong pagtagad ngadto sa imong tahas. Buhata kini sa matag higayon nga gikinahanglan nimo.

• Isalig ang imong adlaw sa Ginoo. Kon nabuhat na nimo ang imong mahimo sa hingpit nga pagplano, hangyoa Siya nga ang mga butang maghiusa sa paglihok alang sa imong kaayohan. Magmahimong andam sa paghimo og kausaban ug magmakiuyunon sa Espiritu.

An elder missionary studying.

“Sama nga dili gyud nato ipaubos ang mga sumbanan nga giestablisar sa Ginoo alang sa pamatasan sa Iyang mga suluguon, wala usab kita tuguti nga mopataas niini. … Siguradoha nga ang imong mga sumbanan alang kanimo o sa uban dili mas taas kaysa giestablisar sa Ginoo” (“Perfection, Perceptions, Pressures, and Principles” [debosyonal sa Provo Missionary Training Center, Mar. 19, 2002], 2–3).

—Elder Cecil O. Samuelson Jr.

C

Mobati nga Dili Sama Kaalisto o Kamaayo sa Uban

• Kon maglisud ka sa pagbasa, pagtuon, o pagmemorya, pagmapailubon sa imong kaugalingon. Pahulay permi sa imong pagsugod; dayon hinay-hinay nga pun-i og pipila ka minuto ang imong pagtuon. Pagsulat sa imong nabasahan aron makatabang kanimo sa paghinumdom. Basaha og kusog (hilom) kon makatabang kini. Sulayi sa pagmemorya pinaagi sa (1) pagbalik-balik og sulti niini, (2) pagbasa o pagsulat niini sa makadaghan, o (3) paglakaw-lakaw ug idrama-drama kini samtang nagkat-on ka. Sutaa kon asa nga paagi ang pinakamaayo alang kanimo. Gamita ang uban nimo nga mga kalig-on, sama sa pagkontak sa potensyal nga mga investigator, paghan-ay sa inadlawng buluhaton, o pagkamalipayon.

  Sister Missionary reading the scriptures against a white background.

• Ipadayon ang imong maayong buot kon masayop ka. Dayon sulayi pag-usab.

• Pangitaa ang kalig-on diha sa kahuyang. Usahay ang pagkaadunay kahuyang nagtudlo kanato og mga kalig-on sama sa kalooy, pagbati, pailub, pagkamapainubsanon, ug pagsalig sa Ginoo. Usahay ang kahuyang (sama sa pagkadali malinga) adunay benepisyo nga kuyog niini (sama sa makamatikod sa mga butang nga dili mabantayan sa uban). Pangitaa ang mga kalig-on nga maggikan sa imong mga kahuyang.

• Kon mobati ka nga nasina sa mga kahanas sa uban, i-focus og balik ang imong pagtagad ngadto sa imong personal nga misyon. Gamita ang imong kalagsik sa pagpalambo sa imong mga kalig-on ug sa pagtampo niini ngadto sa buhat. Kini ang imong misyon. (Tan-awa sa Isangyaw ang Akong Ebanghelyo, 12–13.)