Magtagumpay sa Paaralan: Lesson 193

Pagiging Responsable sa Inyong Pag-aaral

Pag-iwas sa mga Pagdadahilan at Pagkilos sa Edukasyon

Kapag nagiging mahirap ang mga gawain sa paaralan, gumagawa tayo minsan ng mga pagdadahilan at iniiwasan nating kumilos. Habang tinutularan natin ang halimbawa ng Tagapagligtas at nagiging responsable tayo sa ating pag-aaral, madaragdagan ang ating karunungan na tulad Niya (tingnan sa Lucas 2:52). Ang lesson na ito ay makatutulong sa mga estudyante na matukoy ang mga pagkilos na makatutulong sa kanila na maging responsable sa kanilang pag-aaral.

Paghahanda ng estudyante: Anyayahan ang mga estudyante na isipin ang tungkol sa kanilang mga pagsisikap sa pag-aaral sa mga sumusunod na tanong:

Mga Posibleng Aktibidad sa Pag-aaral

Responsibilidad para sa ating pag-aaral

Anyayahan ang mga estudyante na gumawa ng sitwasyon tungkol sa isang tinedyer at isang hindi magandang desisyon na ginawa niya tungkol sa kanyang mga gawain sa paaralan. Halimbawa, hindi nag-aral ang tinedyer para sa isang pagsusulit, nahuli siya sa klase, nakalimutan niya ang isang mahalagang assignment, o hindi siya nagsumite ng isang sanaysay. Maaari kang magpadrowing sa isang estudyante ng stick figure sa pisara, bigyan ng pangalan ang tinedyer, at isulat ang kanyang hindi magandang desisyon sa ilalim ng stick figure.

Pagkatapos ay maaari mong isulat ang Mga Pagdadahilan sa itaas ng stick figure. Maaaring anyayahan ang mga estudyante na isulat ang kanilang mga sagot sa mga sumusunod na tanong sa paligid ng stick figure sa pisara.

• Ano ang ilang mga pagdadahilan na maaaring gawin ng isang tinedyer para sa hindi magandang desisyong ito?

• Sa inyong palagay, bakit gumagawa tayo minsan ng mga pagdadahilan para sa mga ganitong uri ng pagpili?

Itinuro nina Pangulong Russell M. Nelson at Elder D. Todd Christofferson ng Korum ng Labindalawang Apostol ang mahahalagang katotohanan na makatutulong na alalahanin kapag natutukso tayong gumawa ng mga pagdadahilan para sa mga maling pagpili sa paaralan.

Kayo ang mag-aaral. Walang ibang mag-aaral para sa inyo. Saanman kayo naroon, magkaroon ng matinding hangaring matuto. Para sa atin na mga Banal sa mga Huling Araw, ang pag-aaral ay hindi lang isang pribilehiyo, ito’y isang banal na responsibilidad. (“Will You Choose to Increase in Learning?,” New Era, Set. 2014, 2)

Sa mga bagay na kapwa temporal at espirituwal, ang pagkakataong tumanggap ng personal na responsibilidad ay isang kaloob na bigay ng Diyos at kung wala ito ay hindi natin makakamit ang ating potensyal bilang mga anak ng Diyos. (“Malaya Magpakailanman, na Kumilos para sa Kanilang Sarili,” Liahona, Nob. 2014, 18)

• Ano ang tumatak sa inyong isipan mula sa mga pahayag na ito?

• Bakit mahalagang personal na maging responsable sa ating pag-aaral?

  Maaaring tulungan ang mga estudyante na makilala ang sumusunod na katotohanan sa pamamagitan ng pagsulat nito sa tabi ng drowing sa pisara: Ang pagtanggap ng personal na responsibilidad para sa ating pag-aaral ay tumutulong sa atin na maunawaan ang ating buong potensyal bilang mga anak na babae at anak na lalaki ng Diyos.

• Ano ang ilang partikular na bagay na maaaring gawin ng isang tinedyer para tumanggap ng responsibilidad sa kanilang pag-aaral?

• Paano makatutulong sa atin ang pagtanggap ng personal na responsibilidad para sa ating pag-aaral upang maging higit na katulad ng Tagapagligtas?

Habang sinasagot ng mga estudyante ang mga tanong sa itaas, maaari mo silang anyayahang magbahagi ng mga katangiang ipinakita ni Jesucristo nang naging responsable Siya sa Kanyang ministeryo at misyon (tulad ng pagsusumigasig, pagpapakumbaba, at pagmamahal).

Maglaan ng ilang sandali upang isipin kung paano makatutulong sa inyo ang pagkakaroon ng mga katangiang tulad ng kay Cristo para madaig ang mga pagdadahilan at tumanggap ng responsibilidad para sa inyong pag-aaral. Makinig sa mga pahiwatig na mula sa Espiritu Santo na makatutulong sa inyong matukoy ang mga katangian na maaari ninyong mabuo o mga pagkilos na maaari ninyong gawin upang maging responsable sa inyong mga gawain sa paaralan.

Mga halimbawa sa banal na kasulatan tungkol sa pagiging responsable

Para tulungan ang mga estudyante na matuklasan ang mga katotohanan tungkol sa pagiging responsable sa kanilang pag-aaral, maaari mo silang anyayahan na kumpletuhin ang handout na “Pagiging Responsable.” Anyayahan ang mga estudyante na pag-isipan kung paano maiaangkop sa kanila ang mga kuwento sa handout. Maaari mong ayusin ang mga estudyante sa maliliit na grupo at anyayahan ang ilan sa mga estudyante sa bawat grupo na basahin at sagutin ang mga tanong para sa kuwento ni David habang pinag-aaralan ng iba ang talinghaga ng mga talento.

Paalala: Ang huling bahagi ng handout ay gagamitin kalaunan sa lesson.

Pagkatapos ng sapat na oras, anyayahan ang mga estudyante na ibahagi sa klase ang natutuhan nila.

Pagdaig sa mga pagdadahilan para tumanggap ng responsibilidad sa pag-aaral

Para tulungan ang mga estudyante na maghandang tingnan ang sarili nilang buhay at madaig ang mga pagdadahilan na maaaring ginagawa nila, maaaring makatulong na gawin ang sumusunod na aktibidad bilang isang klase.

Pag-isipan ang tungkol sa tinedyer mula sa simula ng klase. Pagnilayan ang natutuhan ninyo mula sa mga banal na kasulatan at personal na karanasan tungkol sa pagiging responsable sa inyong pag-aaral. Tulungan ang tinedyer na ito sa pamamagitan ng pagmumungkahi ng mga katangian at pagkilos na tulad ng kay Cristo na nagpapakita ng kahandaang tumanggap ng responsibilidad sa pag-aaral na tumutugon sa mga pagdadahilan na nasa pisara.

Bago sila magsimula, maaaring makatulong na bigyan ng halimbawa ang mga estudyante. Ang isang pagdadahilan para sa pagdating nang huli [sa klase] ay maaaring “hindi ako ginising ng nanay ko sa tamang oras.” Maaaring imungkahi ng mga estudyante na “Magiging responsable ako tulad ng Tagapagligtas at magtatakda ng alarm para matiyak na makararating ako sa paaralan sa tamang oras.” Maaari mong isulat ang mga mungkahi ng mga estudyante malapit sa bawat pagdadahilan.

• Paano tayo matutulungan ng Tagapagligtas sa ating mga pagsisikap na tumanggap ng responsibilidad sa ating pag-aaral?

Maaaring anyayahan ang mga handang estudyante na ibahagi kung ano ang nagawa nila sa kanilang buhay upang tumanggap ng personal na responsibilidad sa kanilang pag-aaral. Habang nagbabahagi sila, purihin ang mga estudyante para sa mga pagsisikap na ginagawa nila.

Responsibilidad para sa aking pag-aaral

Anyayahan ang mga estudyante na kumpletuhin ang huling bahagi ng handout. Maaari mong ibahagi sa kanila ang sumusunod habang humihingi sila ng tulong sa Panginoon upang maging responsable sa kanilang pag-aaral.

Habang naghahangad kayo ng paghahayag mula sa Ama sa Langit tungkol sa kung paano huhusay, maaaring magpahiwatig sa inyo ang Espiritu Santo sa mga kinakailangang pagbabago. Matatandaan din natin na hindi natin kailangang gawin ang lahat ng ito nang mag-isa; maaari nating hingin ang tulong ng Tagapagligtas (tingnan sa Isaias 41:10).

Maaaring anyayahan ang ilang handang estudyante na magbahagi ng kung ano ang nadama nila na dapat nilang gawin. Maaari kang magbahagi ng isang halimbawa mula sa iyong buhay tungkol sa pagiging responsable sa iyong pag-aaral. Hikayatin ang mga estudyante na iuwi ang kanilang handout para matulungan silang maalala kung ano ang nahihikayat silang gawin ngayon.

Karagdagang Resources

Bakit mahalagang maging personal na responsable?

Itinuro ni Elder David A. Bednar ng Korum ng Labindalawang Apostol:

Ang ating personal na responsibilidad ay matutuhan kung ano ang dapat nating matutuhan, mamuhay sa paraang alam nating nararapat, at maging ang uri ng tao na nais ng Panginoon na kahinatnan natin. (“Handa na Matamo ang Bawat Kinakailangang Bagay,” Liahona, Mayo 2019, 102)

Itinuro ni Pangulong James E. Faust (1920–2007) ng Unang Panguluhan:

Sa ating lipunan ngayon napakarami kong nakikitang taong sinisisi ang iba sa kanilang mga kabiguan. Nakita ko na yaong tumatanggap ng pananagutan sa kanilang mga ginagawa ay mas matagumpay kaysa sa taong sinisisi ang ibang tao sa kanilang mga kakulangan at kabiguan. (“Ang Inyong Liwanag—Isang Sagisag sa Lahat ng Bansa,” Liahona, Mayo 2006, 112–113)

Itinuro ni Elder Lynn G. Robbins ng Pitumpu:

Ang pagiging 100 porsiyentong responsable ay pagtanggap sa inyong sarili bilang ang taong may kontrol sa inyong buhay. Kung iba ang may kasalanan at kailangan nilang magbago bago magkaroon ng karagdagang pag-unlad, ikaw ay nasa kanilang awa at sila ang may kontrol sa mga positibong resulta o ninanais na mga resulta sa inyong buhay. Ang kalayaang pumili at responsibilidad ay konektado at hindi mapaghihiwalay. Hindi ninyo maiiwasan ang responsibilidad nang hindi rin nababawasan ang inyong kalayaang pumili. (“Be 100 Percent Responsible” [debosyonal sa Brigham Young University, Ago. 22, 2017], 11, speeches.byu.edu)

Mga Karagdagang Aktibidad sa Pag-aaral

Saul at Nehemias

Ang isang paraan para tulungan ang mga estudyante na matuto mula sa mga banal na kasulatan ay sa paghahambing ng dalawang kuwento sa banal na kasulatan. Ang sumusunod na aktibidad ay maaaring gamitin sa lesson bago pag-aralan ng mga estudyante ang mga banal na kasulatan sa handout. Maaari mong pagpartner-partnerin ang mga estudyante at magtalaga sa bawat magkapartner ng isa sa mga sumusunod na scripture reference:

1 Samuel 15:1–3, 9, 13–14, 20–21

Nehemias 6:1–4, 15–16

Anyayahan ang mga estudyante na pag-aralan ang kanilang mga talata at alamin kung paano tumanggap ng personal na responsibilidad ang indibiduwal (Nehemias) o gumawa ng mga pagdadahilan para sa kanyang mga pagkilos (Saul). Ang isang paraan kung paano maaaring isaayos ng mga estudyante ang kanilang mga iniisip ay paggamit ng sumusunod na handout:

Maaaring lagyan ng mga estudyante ang kaliwang bilog ng label na Saul at ang kanang bilog ng label na Nehemias. Maaari silang maglista ng mga pagkakaiba sa mga indibiduwal na bilog at maglista ng mga pagkakatulad kung saan nagtatagpo ang mga bilog.

Responsibilidad para sa aking pag-aaral

Para tulungan ang mga estudyante na pagnilayan ang mga pagkilos at pag-uugali na makatutulong sa kanila na maging responsable sa sarili nilang pag-aaral, maaari mong ibigay ang isang bahagi ng sumusunod na chart o ang buong chart:

Pagdadahilan	Pagiging Responsable
Hindi ko isinumite ang assignment ko dahil hindi ko maintindihan kung paano ito gagawin.	Ginawa ko ito hanggang sa kung ano ang alam kong gawin. Hihingi ako ng tulong sa mga bagay na hindi ko maintindihan.
Hindi ako nag-aral para sa aking pagsusulit dahil kasama ko ang mga kaibigan ko.	Pipiliin kong mag-aral bago maglaan ng oras sa aking mga kaibigan.
Nakalimutan akong gisingin ng nanay ko, at nahuli ako sa pagpasok sa paaralan.	Maaari akong magtakda ng alarm para magising ako at makarating sa paaralan sa tamang oras.

Maaari mong anyayahan ang mga estudyante na magdagdag ng mga karagdagang sitwasyon sa chart at talakayin kung paano maaaring itama ang mga pagdadahilan na ito sa pamamagitan ng pagiging responsable. Sa kanilang study journal, maaaring kumpletuhin ng mga estudyante ang mga sumusunod na prompt upang tulungan silang gumawa ng plano na maging mas responsable.

Isang pagdadahilan na ginamit ko upang maiwasan ang responsibilidad sa aking mga gawain sa paaralan ay .

Ang isang mas responsableng pagkilos na maaari kong subukan ay .

100 porsiyentong responsable

Bago mag-isip ang mga estudyante ng mga sitwasyong may kaugnayan sa edukasyon at mga posibleng pagdadahilan o pagkilos na maaaring gawin ng mga tinedyer, maaari mong ipakita ang “Inspiring Short: 100 Percent Responsible” (3:22). Sa video na ito, ibinahagi ni Elder Lynn G. Robbins ng Pitumpu ang isang kuwento kung paano nadaig ng dalawang manggagawa sa bodega ang kanilang mga pagdadahilan at tumanggap ng responsibilidad sa kanilang trabaho. Pagkatapos panoorin ang video, maaaring tukuyin ng mga estudyante ang mga sitwasyong pang-edukasyon kung saan maaaring madaling gumawa ng mga pagdadahilan. Pagkatapos ay maaari nilang tukuyin ang mga pagkilos na maaaring dumaig sa mga pagdadahilang iyon.