Përgatitja për Arsimimin dhe Punësimin e Ardhshëm: Mësimi 191

Gjetja e një Mentori

Zoti Vendos Shembuj në Shtegun Tonë

Kur reflekton mbi jetën tënde, si të kanë ndihmuar mentorët e mirëbesuar? Nga Moisiu dhe Jozueu tek Eliu dhe Samueli, historitë nga shkrimet e shenjta ilustrojnë vlerën e marrëdhënieve të ndjekjes nga një mentor. Këto histori na drejtojnë te mentorët tanë të përsosur: Ati Qiellor dhe Jezu Krishti. Ky mësim mund t’i ndihmojë nxënësit të bëjnë një plan për të përcaktuar dhe për t’u lidhur me mentorët e mundshëm të arsimimit dhe karrierës.

Përgatitja e nxënësve: Ftojini nxënësit të mendojnë për arsimimin e tanishëm dhe të ardhshëm dhe synimet e karrierës. Kërkojuni nxënësve të bëjnë një listë të disa të rriturve të mirëbesuar që mund të shërbejnë si shembuj ose mentorë për t’i ndihmuar ata t’i arrijnë këto synime dhe ta sjellin listën e tyre në klasë.

Veprimtari të Mundshme të të Mësuarit

Kë do të doje të ndiqje?

Merreni parasysh ta filloni mësimin duke i ftuar nxënësit të imagjinojnë sikur ishin pjesë e një grupi shokësh që ishin gati të fillonin një udhëtim përmes një xhungle të dendur. Grupit iu tha se udhëtimi do të ishte i vështirë, por vendmbërritja do të ishte e mrekullueshme dhe që ia vlente përpjekja. Grupi u ftua të përzgjidhte dikë si udhërrëfyes.

• Cilat janë disa nga kualifikimet që do të doje të kishte udhërrëfyesi yt? Përse?

• Si do të përgjigjeshe nëse një anëtar i grupit do të sugjeronte se nuk keni nevojë për një udhërrëfyes?

Ftojini nxënësit të mendojnë rreth mënyrës se si ky skenar mund të gjejë zbatim në planet e tyre për arsimim dhe karrierë. Mund të përmendni se ky mësim do të përqendrohet në përcaktimin dhe vënien në kontakt me mentorët.

Shënim: Mund të keni nxënës që nuk e shohin nevojën për një mentor. Mund të kërkoni mundësi për t’i ndihmuar ata të kuptojnë vlerën e mentorëve dhe fushat ku ata mund të marrin ndihmë sot. Ndihmojini nxënësit të dallojnë se, ashtu si një udhërrëfyes, një mentor mund të sjellë përvojë dhe pikëpamje që mund të na ndihmojnë të orientohemi në vendimet për arsimim dhe karrierë.

Studioji këto thënie duke kërkuar mënyrën se si Zoti mund të të udhërrëfejë nëpërmjet këshillës së mentorëve.

Vëllai Milton Kamargo, asokohe Këshilltar i Parë në Presidencën e Përgjithshme të Shkollës të së Dielës, tha:

“Në njëfarë pike gjatë udhëtimit tuaj [në] arsimim … ju mund të ndiheni të mbingarkuar me kaq shumë gjëra për të bërë. Ju lutem kujtoni se nuk jeni vetëm gjatë sfidave tuaja. Zoti ju ka dhënë shumë njerëz që mund t’ju përkrahin: pjesëtarët e familjes, udhëheqësit e Kishës, shokë, si edhe instruktorë, mentorë dhe edukatorë. Dhe, sigurisht, Zoti Vetë qëndron gjithmonë gati për t’ju ngushëlluar dhe forcuar.” (“Persevere with the Lord’s Help” [takim shpirtëror i UBJ–Pathway Mbarëbotëror, 1 mars 2022], f. 2, byupathway.edu)

Plaku Ronald A. Rasband, i Kuorumit të Dymbëdhjetë Apostujve, dha mësim:

“[Mentorët] kanë shkuar para nesh dhe ata e dinë rrugën. … Një individ me më shumë përvojë, i mirëbesuar, shërben si një udhërrëfyes dhe këshillues i efektshëm për një person me më pak përvojë, duke ndihmuar të formësohet kuptueshmëria e atij personi dhe parimet e mësimdhënies që do ta bëjnë atë më të efektshëm, më të fortë, më të urtë dhe më me vlerë si një shërbëtor të Perëndisë” (“Thy Friends Do Stand by Thee” [Brigham Young University devotional, 7 mars 2010], f. 3, speeches.byu.edu).

• Çfarë të bën përshtypje nga kjo këshillë?

  Pasi nxënësit të përgjigjen, shkruajeni të vërtetën vijuese në tabelë: Zoti mund të na udhërrëfejë nëpërmjet mentorëve të mirëbesuar.

  Ftojini nxënësit të reflektojnë mbi sa vijon:

• Kur ke marrë ti ose dikush që ti njeh, ndihmë nga një mentor?

• Cilat janë disa fusha të planifikimit tënd për arsimimin dhe karrierën që mund të kishin dobi nga udhërrëfimi i Zotit nëpërmjet këshillës së një mentori?

Ju mund të jepni një shembull të dikujt që ka shërbyer si një mentor për ju. Merreni parasysh të tregoni përvojën tuaj të punës me atë person dhe mënyrën se si ai ju ka ndihmuar ta dalloni udhërrëfimin e Shpëtimtarit në jetën tuaj.

Ndërsa studion sot, ftoje Frymën e Shenjtë të të ndihmojë të përcaktosh mentorë të mirëbesuar në jetën tënde që mund të të ndihmojnë të kërkosh udhërrëfimin e Zotit ndërsa merr vendime rreth planeve të arsimimit dhe karrierës.

Shembuj nga shkrimet e shenjta për ndjekjen nga një mentor

Mund të jetë e dobishme të tregoni se një nga titujt që i është dhënë Atit Qiellor, është “Njeri i Këshillës” (shihni te Moisiu 7:35). Ju mund t’i ftoni nxënësit të lexojnë te Gjoni 5:19–20 dhe Gjoni 8:26–28, duke kërkuar mënyrën se si Ati Qiellor qe mentori i Birit të Tij, Jezu Krishtit. Mund të bëni një pyetje si:

• Çfarë mund të na ndihmojë të kuptojmë kjo rreth nevojës së Shpëtimtarit për një mentor?

Nxënësit mund të përmendin se Jezusi mësoi nga shembulli i Atit të Tij dhe kërkoi këshillën dhe drejtimin e Atit të Tij.

Pasi nxënësit të shprehen, mund të jepni shembujt vijues nga shkrimet e shenjta për Zotin që e udhërrëfen popullin e Tij nëpërmjet mentorëve të frymëzuar. Nxënësit mund të punojnë me një partner dhe të përzgjedhin një tregim për ta studiuar dhe për t’iu përgjigjur pyetjeve që pasojnë.

Moisiu dhe Jozueu: Ligji i Përtërirë 3:21–22 (Moisiu udhërrëfen Jozueun), 28 (udhëzimet e Zotit për Moisiun)

Debora profetesha dhe Baraku, komandanti i saj ushtarak: Gjyqtarët 4:4–10, 14; Gjyqtarët 5:1–3 (duke festuar fitoren e Izraelit)

Prifti i lartë Eliu dhe profeti i ri, Samueli: 1 Samuelit 3:1–10

• Si e siguroi Zoti udhërrëfimin e Tij nëpërmjet këtij mentori?

• Si mund ta ndihmojë ky tregim dikë që ngurron të kërkojë ndihmë nga një mentor?

Veprimtaria vijuese mund t’i ndihmojë nxënësit të përcaktojnë dhe të bëjnë një plan për t’u lidhur me mentorë të mundshëm.

Siguroni fletushkën “Gjetja e një Mentori” për secilin nxënës. Organizojini nxënësit në grupe ose dyshe për të plotësuar fletushkën. Si një alternativë, mund ta vendosni secilën pjesë të fletushkës rreth dhomës dhe t’i ftoni nxënësit të lëvizin dhe të plotësojnë secilën veprimtari.

Zoti do të na udhërrëfejë nëpërmjet mentorëve të mirëbesuar

Pas një kohe të përshtatshme, ftoni disa nxënës ta tregojnë atë që diskutuan në grup. Mund t’i ftoni nxënësit e gatshëm t’ia tregojnë planin e tyre klasës.

Mund të jetë e dobishme të shpjegoni se prindërit, mësuesit, këshilltarët e shkollës dhe të tjerë mund t’i ndihmojnë nxënësit të përcaktojnë një mentor të përshtatshëm. Disa degë, lagje dhe kunje mund të kenë edhe specialistë të arsimit dhe karrierës. Merreni parasysh t’i siguroni nxënësit se Zoti vendos shumë njerëz të mirëbesuar në shtegun tonë që mund të shërbejnë si mentorë. Disa njerëz janë mentorë afatshkurtër dhe plotësojnë nevojat specifike që kemi. Mentorë të tjerë mund të punojnë me ne gjatë një periudhe më të gjatë.

Ftojini nxënësit të kërkojnë ndihmën e Atit Qiellor për të gjetur dhe për t’u lidhur me mentorët e tyre që mund t’i ndihmojnë. Dëshmoni se Ai do t’u sigurojë atyre ndihmën që u nevojitet.

Burime Shtesë

Cilat cilësi duhet të kërkoj te një mentor?

Duke reflektuar mbi një njeri që shërbeu si mentori i tij, Presidenti Henri B. Ajring vërejti:

“Do ta përmblidhja atë që duhet të kërkoni për të përcaktuar një mentor të mirë të mundshëm …

Së pari dhe sigurisht më e rëndësishmja, ai kishte kuptueshmëri për botën me të cilën po mundohesha të përballesha. … Ai nuk dinte thjesht fakte për të; ai kishte një plan, madje të mirë. Dhe unë tani e di se cili lloj plani ka më shumë rëndësi: është ai që do t’ju tregojë se çfarë është me vlerë në të ardhmen. Ai nuk dinte vetëm teorinë e vendimmarrjes dhe teorinë organizative; ai kishte një ide për rezultatin e ndërthurjes së të dyja gjërave dhe atë që do të kishte vlerën më të madhe për njerëzit që punojnë për atë ndërthurje në vazhdim. Ai kishte kapacitetin të thoshte: ‘Ky kontribut ose ai kontribut do të sjellë ndryshimin më të madh’.” (“To Choose and Keep a Mentor”, [BYU University Conference, 26 gusht 1993], f. 3, speeches.byu.edu).

Plaku Robert D. Hejls (1932–2017), i Kuorumit të Dymbëdhjetë Apostujve, tha:

“Në vitet e mia të moshës madhore, unë kam kërkuar këshillë nga prindërit e mi dhe nga këshilltarë besnikë e të besuar. Njëri ishte një udhëheqës i priftërisë; tjetri një mësues që besoi tek unë. … Me lutje zgjidhni këshillues që shqetësohen sinqerisht për mirëqenien tuaj shpirtërore.” (“Përballja me Sfidat e Botës së Sotme”, Liahona, nëntor 2015, f. 46)

Si mund të kem dobi nga Gjetja e një Mentori?

Motra Suzan L. Gong dha mësim:

“Presidenti Nelson jep mësim: ‘Arsimimi është ndryshimi midis dëshirës që të mund t’i ndihmoni të tjerët dhe të qenit i aftë për t’i ndihmuar ata’.

Gjërat e mira dhe të dobishme që mësoni tani, do t’i japin formë dhe do ta bekojnë tërë jetën tuaj.

Kjo është një periudhë për të kërkuar [mentorë] të urtë dhe të drejtë – prindërit ose gjyshërit e gjyshet, mësuesit/et, miqtë/mikeshat, udhëheqësit/et e Kishës dhe, më të rëndësishmin, Jezu Krishtin – që të na ndihmojnë të ndërtojmë jetë kuptimplota. Krijoni marrëdhënie kuptimplota me ata të cilët mund t’ju ndihmojnë të mësoni dhe të rriteni.” (“Arsyet për të Shpresuar”, [takimi shpirtëror mbarëbotëror i SeI‑së për të rinjtë në moshë madhore, 10 janar 2021], Gospel Library [Biblioteka e Ungjillit])

Veprimtari Plotësuese të të Mësuarit

Kërkoni këshillën e atyre që janë të urtë dhe me përvojë

Ndërsa nxënësit shohin shembuj të pasjes së mentorëve në shkrimet e shenjta, ata mund të kenë dobi nga të parit e pasojave të mosndjekjes së këshillës së njerëzve me më shumë përvojë. Për ta bërë këtë, mund të tregoni historinë e mbretit Roboam që vijoi pas të atit të tij, mbretit Salomon, si udhëheqës i Izraelit.

Ftojini nxënësit të lexojnë te 1 Mbretërve 12:1–4 duke kërkuar problemin që shprehu Jeroboami, nga shtëpia e Efraimit, për izraelitët.

Më pas, nxënësit mund të lexojnë te 1 Mbretërve 12:6–11. Organizojini nxënësit në dyshe. Një partner mund të kërkojë këshillën që i dhanë mbretit Roboam “pleqtë” që i kishin shërbyer mbretit Salomon. Partneri tjetër mund të kërkojë atë që i thanë shokët e rinj në moshë Roboamit të bënte. Ju mund t’u bëni nxënësve një pyetje për diskutim si:

• Përse do të ishte tunduese të ndiqni këshillën e bashkëmoshatarëve pa përvojë?

Nxënësit mund të lexojnë te 1 Mbretërve 12:12–16 duke kërkuar pasojat për Roboamin që ndoqi këshillën e shokëve të tij (dhjetë fise u rebeluan kundër Roboamit dhe u bënë Mbretëria Veriore e Izraelit).

Ndihmojini nxënësit të kuptojnë rëndësinë e dallimit të udhërrëfimit të Zotit nëpërmjet urtësisë së mentorëve të mirë. Përvoja e tyre mund të na ndihmojë të marrim vendime më të mira dhe të ndjekim Zotin.

Gjetja dhe takimi me një mentor

Pas veprimtarisë së fletushkës, mund t’i organizoni nxënësit në dyshe. Vërini ata të ushtrojnë një bisedë ndërmjet tyre dhe partnerit të tyre që do të luajë rolin e mentorit të mundshëm. Nxënësit mund të ushtrojnë mënyrën se si do ta ftojnë këtë person të jetë mentori i tyre, duke përdorur tri ose më shumë pyetje që i shkruan. Nxënësi që luan rolin e mentorit, mund të japë përshtypje (çfarë shkoi mirë, çfarë do të ndryshonte, ndonjë sugjerim). Më pas, nxënësit mund të ndërrojnë rolet dhe ta vënë partnerin tjetër të ushtrohet.

Pasi çdo partner të ketë një mundësi për t’u ushtruar dhe për të marrë përshtypje, mund të pyesni se çfarë përjetuan nxënësit që mund ta bëjë përcaktimin dhe lidhjen me një mentor të vështirë ose të sikletshme dhe t’u kërkoni t’i ofrojnë njëri-tjetrit sugjerime për mënyrën se si t’i kapërcejnë këto sfida.

Nëse nxënësit do të kishin dobi nga më shumë udhërrëfim për t’i ndihmuar ata të planifikojnë të takohen me një mentor, mund t’u siguroni burimin vijues: “Meet with Your Mentor”. Nxënësit mund të plotësojnë fletën e punës digjitale dhe më pas t’ua tregojnë idetë shokëve të tyre të klasës.

Nxënësit mund të kenë dobi nga të parit e mënyrës se si nxënësit në UBJ kanë dobi nga marrëdhëniet me mentorë në arsimimin e tyre. Ju mund të shfaqni materialin filmik “BYU First Year Mentoring | Experiences of Growth” [“Këshillimi i Vitit të Parë në UBJ | Përvoja Rritjeje”] (2:48).