Hagai 1–2; Zakaria 1–4; 10–14: Mësimi 156

Zakaria 1–8

“Kthehuni Tek Unë”

Pas 50 vjetësh robëri në Babiloni dhe Persi, një mbetje e shtëpisë së Izraelit ishte kthyer fizikisht në tokën e saj të shenjtë, por shpirtërisht ishte ende larg nga Zoti. Nëpërmjet profetit Zakaria, Shpëtimtari e rinovoi ftesën e Tij, “kthehuni tek unë” (Zakaria 1:3), me premtimin se Ai do të “bano[nte] midis [popullit të Tij]” (Zakaria 2:10). Ky mësim mund t’i ndihmojë nxënësit t’i kuptojnë mënyrat se si mund të drejtohen te Zoti.

Përgatitja e nxënësve: Ftojini nxënësit të përsiatin atë që do t’i thoshin një shoku që ndihet shumë larg nga dashuria e Zotit. Nxënësit mund të përgatiten t’ia japin këshillën e tyre klasës. Nxënësit mund të pyesin një shok të mirëbesuar ose prind se çfarë këshille do të jepte në këtë situatë.

Veprimtari të Mundshme të të Mësuarit

Përse disa njerëz largohen nga Jezu Krishti?

Merreni parasysh ta filloni orën mësimore duke paraqitur një figurë të Shpëtimtarit afër një figure njeriu me një shigjetë të drejtuar për te ai prej së largu.

• Cilat janë disa arsye përse adoleshentët mund të largohen nga Zoti?

Kujtojuni nxënësve se gjatë gjithë Dhiatës së Vjetër profetët shpallën ftesën e Shpëtimtarit për t’u drejtuar ose për t’u kthyer tek Ai pavarësisht arsyes përse ata u larguan (shihni te Ligji i Përtërirë 4:30–31; Nehemias 1:9). Ndonjëherë ne largohemi pa e kuptuar se po devijojmë nga udha.

Ftojini nxënësit të mendojnë nëse ata ose njerëzit që ata i duan mund të jenë duke u larguar nga Zoti. Mund t’i ftoni nxënësit të reflektojnë mbi vetëvlerësimin vijues.

Cila nga thëniet vijuese mendon se është e vërtetë për ty?

• Unë dua t’i ndihmoj njerëzit që i kam për zemër që po largohen nga Zoti.

• Nuk e kam menduar mirë se sa afër jam me Zotin.

• Ndihem i/e tunduar të largohem nga Zoti.

• Po bëj gjithçka që mundem për të qëndruar pranë Zotit dhe shpresoj të mund të qëndroj i/e fortë.

Ndërsa studion te Zakaria, kërko frymëzim nga Fryma e Shenjtë për të të ndihmuar në rrethanat e tua vetjake.

Të drejtuarit te Zoti

Pas 50 vjetësh robëri, shumë izraelitë u kthyen më në fund në Jerusalem dhe në zonën përreth. Ata e rindërtuan qytetin dhe filluan të rindërtonin tempullin e Zotit (shih tek Ezdras 5:1–2; 6:14). Por megjithëse ishin kthyer fizikisht në Jerusalem, shumë njerëz ishin ende larg nga Zoti shpirtërisht. Ai dërgoi profetin Zakaria për t’i ndihmuar njerëzit të drejtoheshin tek Ai në mënyrë që Ai të mund të “bano[nte] midis [tyre]” (Zakaria 2:10).

Lexo te Zakaria 1:1–3, duke kërkuar atë që Zoti e ftoi popullin e Tij të bënte.

Krijoni katër kolona në tabelë. Shkruajeni ose vini një nxënës ta shkruajë të vërtetën e paplotë vijuese në tabelë mbi kolonat: Ne drejtohemi te Zoti duke …

Mund t’i shkruani fragmentet vijuese të shkrimit të shenjtë në tabelë, një në secilën kolonë. Organizojini nxënësit në grupe me nga katër veta dhe ftojeni secilin pjesëtar të grupit të studiojë njërin nga fragmentet. Nxënësit mund ta plotësojnë më pas pohimin e të vërtetës duke përdorur fragmentin e tyre.

1. Zakaria 1:4

2. Zakaria 3:7 (“Unë do të të lejoj të hysh lirisht midis këtyre që rrinë këtu” mund t’i referohet të ndierit të pastër dhe të denjë në praninë e lajmëtarëve qiellorë.)

3. Zakaria 7:9–10

4. Zakaria 8:16–17 (shëno frazën “në portat tuaja jepni … paqe”)

Nxënësit mund të japin formulime të ndryshme, por ndihmojini ata të plotësojnë të vërtetën e theksuar me të zezë me thënie si:

… u larguar nga ligësia (Zakaria 1:4).

… ecur në rrugët e Zotit (Zakaria 3:7).

… i trajtuar të tjerët me mëshirë dhe dhembshuri (Zakaria 7:9–10).

… vepruar si paqebërës (Zakaria 8:16–17).

Merreni parasysh ta shkruani secilën frazë në tabelë në kolonat e duhura.

Veprimtaria vijuese mund të ndihmojë të thellohet kuptueshmëria e nxënësve për të vërtetat që ata i përcaktuan nga Zakaria. Jepini secilit grup kopje të fletushkës “Ne Mund të Drejtohemi te Zoti Duke …” Ftojini nxënësit të punojnë në dyshe ose në grupe të vogla për të plotësuar fletushkën. Përndryshe, mund t’u caktoni skenarë të ndryshëm dysheve të ndryshme dhe t’i vini ata të përgatiten për t’ua treguar dysheve që punuan me një skenar të ndryshëm.

Tregoje atë që ke mësuar

Ftojini grupet ta tregojnë atë që mësuan. Një mënyrë për ta bërë këtë është ta ftoni secilin grup t’i shkruajë përgjigjet e tij për nxitjen 2 ose 3 për një nga skenarët në kolonën e duhur në tabelë.

Kur nxënësit të mbarojnë së foluri, ndihmojini ata të reflektojnë mbi atë që kanë mësuar duke i ftuar ata të bëjnë sa vijon.

Në ditarin tënd të studimit, shkruaj një ose dy gjëra që ti mendon se të ndihmojnë të drejtohesh te Zoti. Ftoje plot lutje Atin tënd Qiellor të të ndihmojë me përpjekjet e tua.

Mund ta përmbyllni me dëshminë tuaj për dashurinë që kanë Ati Qiellor dhe Jezu Krishti për ne dhe ftesën e Tyre të dashur të vazhdueshme për t’u drejtuar tek Ata.

Burime Shtesë

Çfarë mund të bëj për t’u larguar nga ligësia?

Plaku Dejvid A. Bednar, i Kuorumit të Dymbëdhjetë Apostujve, shpjegoi:

“Pasoja e parë dhe e natyrshme e mirëbesimit në Shpëtimtarin është pendimi dhe largimi nga e keqja. Ndërsa ushtrojmë besim në dhe te Zoti, ne natyrshëm kthehemi drejt Tij, vijmë tek Ai dhe varemi prej Tij. Pra, pendim do të thotë t’i mirëbesojmë Shëlbuesit dhe të mbështetemi tek Ai që të bëjë për ne atë që nuk mund ta bëjmë vetë. Secili prej nesh duhet të ‘[mbështetet] tërësisht në meritat e atij që është i fuqishëm të shpëtojë’ [2 Nefi 31:19] pasi vetëm ‘nëpërmjet meritave dhe mëshirës dhe hirit të Mesias së Shenjtë’ [2 Nefi 2:8] ne mund të bëhemi krijesa të reja në Krishtin dhe përfundimisht të kthehemi e të banojmë në praninë e Perëndisë.” (“T’i Sjellim në një Krye të Vetëm, në Krishtin, të Gjitha Gjërat”, Liahona, nëntor 2018, f. 23)

Çfarë mund të bëj për t’i trajtuar të tjerët me mëshirë dhe dhembshuri?

Presidenti Rasëll M. Nelson tha:

“Si dishepuj të Jezu Krishtit, ne duhet të jemi shembuj të mënyrës se si ndërveprojmë me të tjerët, veçanërisht kur kemi ndryshime në opinione. Një nga mënyrat më të thjeshta për ta dalluar një pasues të vërtetë të Jezu Krishtit, është se sa me dhembshuri ai person i trajton njerëzit e tjerë. …

Vëllezërit dhe motrat e mia të dashura, mënyra se si e trajtojmë njëri‑tjetrin, vërtet ka rëndësi! Mënyra se si u flasim të tjerëve ose flasim për të tjerët në shtëpi, në kishë, në punë dhe në internet, vërtet ka rëndësi. Sot po kërkoj që ne të ndërveprojmë me të tjerët në një mënyrë më të lartë e më të shenjtë. Ju lutem, dëgjoni me kujdes. ‘Në qoftë se ka diçka të virtytshme, të dashur ose me famë të mirë apo të denjë për t’u lavdëruar’ [Nenet e Besimit 1:13] që mund ta themi rreth një personi tjetër, qoftë ballë për ballë ose pas shpinës së tij ose të saj, ai duhet të jetë standardi ynë i komunikimit.” (“Kërkohen Paqebërës”, Liahona, maj 2023, f. 98, 99–100)

Si mund të jem një paqebërës/e?

Presidenti Rasëll M. Nelson tha:

“Asnjëri prej nesh nuk mund t’i kontrollojë kombet, ose veprimet e të tjerëve, as pjesëtarët e vetë familjeve tona madje. Por ne mund të kontrollojmë veten. Thirrja ime sot, të dashur vëllezër e motra, është t’u jepni fund konflikteve që po ziejnë në zemrën tuaj, në shtëpinë tuaj dhe në jetën tuaj. Groposeni çfarëdo prirjeje dhe të gjitha prirjet për t’i lënduar të tjerët, qoftë nëse ajo prirje është një temperament, një gjuhë e mprehtë ose inat ndaj dikujt që ju ka lënduar. Shpëtimtari na urdhëroi të kthejmë faqen tjetër, t’i duam armiqtë tanë dhe të lutemi për ata që na keqtrajtojnë. …

Ne jemi ndjekës të Princit të Paqes. Tani më shumë se kurrë, kemi nevojë për paqen që vetëm Ai mund ta sjellë. Si mund të presim të ekzistojë paqja në botë kur ne, si individë, nuk po kërkojmë paqe dhe harmoni? … Ju lutem të bëni çmos që t’u jepni fund konflikteve personale që po ziejnë aktualisht në zemrën tuaj dhe në jetën tuaj.” (“Fuqia e Hovit Shpirtëror”, Liahona, maj 2022, f. 97)

Po nëse vazhdoj të bëj gabime që më largojnë nga Zoti?

Motra Xhoi D. Xhons, ish-Presidente e Përgjithshme e Fillores, dha mësim:

“Të përpiqesh të bësh pak më mirë çdo ditë. Ati Qiellor nuk pret që ti të jesh në gjendje të bësh çdo gjë njëherësh. Jeta ka të bëjë me të mësuarit dhe rritjen pak e nga pak. Ai dëshiron që ti të vazhdosh të përpiqesh. Dhe Ai dëshiron që ti ta shijosh rritjen!

Ndonjëherë ne jemi të ashpër me veten. Mendojmë: ‘Dështova. Nuk e bëj dot’, dhe pastaj heqim dorë. Por Shpëtimtari po thotë: ‘Vazhdo. Jam pikërisht këtu për të të ndihmuar!’ Për shkak të Jezu Krishtit, nuk kemi përse ta bëjmë këtë të vetëm. Ne mund të ngrihemi dhe të përpiqemi sërish me ndihmën e Tij. Ky është i gjithë qëllimi i kësaj jete.” (“Pak më i/e Mirë Çdo Ditë”, Liahona, janar 2020, f. 20)

Plaku Alen D. Hejni, i Të Shtatëdhjetëve, dha mësim:

“Unë dëshmoj se Shpëtimtari kurrë nuk do të na largojë kur me përulësi e kërkojmë Atë në mënyrë që të pendohemi; kurrë nuk do ta quajë çështjen tonë të humbur; kurrë nuk do të thotë kurrë: ‘O mos, jo prapë ti’; kurrë nuk do të na hedhë poshtë për shkak se nuk arrijmë ta kuptojmë se sa e vështirë është ta shmangësh mëkatin. Ai i kupton të gjitha përsosurisht, duke përfshirë ndjenjën e brengës, turpit dhe të ndrydhjes që është pasojë e pashmangshme e mëkatit.

Pendimi është i vërtetë dhe funksionon.” (“Të Kujtojmë në Cilin Kemi Besuar”, Liahona, nëntor 2015, f. 123)

Veprimtari Plotësuese të të Mësuarit

Zakaria 3:1–7. Ne duhet të jemi të pastër për të qenë në praninë e Perëndisë

Për nxënësit mund të jetë e dobishme të studiojnë vegimin që Zoti i dha Zakarias për Jozueun, priftin e lartë të kohës së tij. Zoti i tregoi Zakarias se si Jozueu u pastrua nga mëkati në mënyrë që të mund të qëndronte në praninë e Zotit dhe të lajmëtarëve të Tij qiellorë ndërsa shërbente në tempull. Mund t’i ftoni nxënësit të studiojnë vargjet te Zakaria 3:1–7 dhe të diskutojnë arsyen përse është e rëndësishme të jemi të pastër ndërsa qëndrojmë përpara Zotit.

Nxënësit mund të imagjinojnë më pas se dikush po mundohet të ndihet i denjë për të qenë në praninë e Zotit. Ky person mund të shqetësohet se nuk do të ndihet më kurrë i pastër. Ftojini nxënësit të diskutojnë çfarë këshille do t’i jepnin një shoku që u ndje në këtë mënyrë.

Nxënësit mund të bëjnë më pas referencë-kryq të vargjeve te Zakaria 3:4, Isaia 1:18 dhe 3 Nefi 27:19. Organizojini nxënësit në dyshe dhe ftojini ata të ushtrohen duke shpjeguar se si këto vargje mund ta ndihmojnë shokun e tyre.

Nëse nxënësit mund të kenë dobi nga kuptueshmëria e mënyrës se si të qenit shpirtërisht të pastër i ndihmon ata të ndihen të sigurt në praninë e lajmëtarëve të shenjtë (shihni te Zakaria 3:7), mund të shfaqni materialin filmik “Preparation of Joseph F. Smith: I Am Clean” [“Përgatitja e Jozef F. Smithit: Jam i Pastër”] (2:16). Ky material filmik tregon rrëfimin për një vegim që pati Presidenti Jozef F. Smith kur pa xhaxhanë e tij, Profetin Jozef Smith. Rrëfimi shpjegon se si Jozef F. u ndje i sigurt që ishte në praninë e pjesëtarëve të familjes të ndarë nga jeta.

Zakaria 7:4–6. Bërja e gjërave për veten ose për Zotin

Për shkak se nuk ishin drejtuar plotësisht te Zoti, izraelitët në kohën e Zakarias kryenin vepra fetare si agjërimi për arsyet e gabuara. Ftojini nxënësit të lexojnë te Zakaria 7:4–6, duke kërkuar pyetjet që bëri Zoti.

Një mënyrë për t’i ndihmuar nxënësit ta kuptojnë këtë është të vizatoni dy kolona në tabelë, të emërtuara Për Veten dhe Ndaj Zotit. Ftojini nxënësit të përzgjedhin disa urdhërime që na ndihmojnë të drejtohemi te Zoti.

• Si do të dukej po ta zbatonim atë urdhërim “Për Veten”? Si do të dukej nëse bindja jonë do të ishte “Ndaj Zotit”?

Pasi nxënësit të kenë renditur disa urdhërime dhe përgjigje në tabelë, inkurajoni një diskutim të klasës me një pyetje si vijuesja:

• Përse mendoni se janë të rëndësishme shtysat tona për zbatimin e urdhërimeve të Zotit?