Jeremias 31–33; 36–38; Mga Pagbangotan 1; 3: Leksiyon 137

Pagbansay 9 sa Doktrinal nga Kahanas

Pagsag-ulo sa Mahinungdanong mga Hugpong sa mga Pulong ug Paggamit sa mga Baroganan sa Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makatabang sa mga estudyante nga masag-ulo ang mahinungdanong mga hugpong sa mga pulong sa kasulatan diha sa mga tudling sa doktrinal nga kahanas ug sa paggamit sa balaanong mga baroganan sa pag-angkon og espirituhanong kahibalo.

Pagpangandam sa estudyante: Dapita ang mga estudyante sa pagpili og usa o duha ka tudling sa doktrinal nga mga kahanas gikan sa Daang Tugon ug sa pagsag-ulo sa mahinungdanong hugpong sa mga pulong sa kasulatan ug sa pakisayran. Kon gusto sila, pwede nilang sag-ulohon ang tibuok tudling. Dapita sila sa paghunahuna kon sa unsang paagi makatabang nila ang pagsag-ulo sa mahinungdanong hugpong sa mga pulong o mga tudling diha sa ilang kinabuhi.

Posibleng mga Kalihokan sa Pagkat-on

Pagrebyo sa doktrinal nga kahanas: Sag-uloha

Ipakita sa mga estudyante ang sumbanan nga mga kasulatan: Daang Tugon, Bag-ong Tugon, Basahon ni Mormon, Doktrina ug mga Pakigsaad, ug ang Perlas nga Labing Bililhon. (Pwede kang magpakita og pisikal o electronik nga mga kopya, o pwede nimong gamiton ang hulagway sa ibabaw).

• Hain niini nga mga basahon sa kasulatan ang gitun-an sa Manluluwas sa Iyang pagkabata, pagkabatan-on, ug samtang nangalagad Siya dinhi sa yuta?

Kon kinahanglan, ipasabot nga ang Manluluwas aduna untay akses sa daghan sa mga kasulatan diha sa Daang Tugon, ang kasulatan nga gitun-an sa kabatan-onan karon.

Basaha ang usa o duha sa mosunod nga mga kasulatan, nga pangitaon kon sa unsang paagi gigamit sa Manluluwas ang gisag-ulo nga hugpong sa mga pulong o mga bersikulo sa Daang Tugon: Mateo 4:2–4; 19:4–5; Marcos 7:9–10; Lucas 24:27.

• Unsay inyong nakaplagan?

  Mahimong ipasabot sa mga estudyante nga gigamit sa Manluluwas ang nasag-ulo nga mga kasulatan aron sa pagbuntog sa tentasyon, pagtubag sa mga pangutana sa uban, pagkorehir sa sayop nga mga panghunahuna, ug sa pagtudlo sa uban. Kon gustong mahibaloan sa mga estudyante ang mga bersikulo nga gikutlo sa Manluluwas, ipakigbahin nga sa Mateo 4:2–4 gikutlo sa Manluluwas ang Deuteronomio 8:3, sa Mateo 19:4–5 gikutlo Niya ang Genesis 2:24, ug sa Marcos 7:9–10 gikutlo Niya ang Exodo 20:12 ug Deuteronomio 5:16.

  Tabangi ang mga estudyante nga makasabot nga sa pagsag-ulo nila sa mga tudling sa kasulatan sa doktrinal nga kahanas o sa mahinungdanong mga hugpong sa mga pulong sa kasulatan ug gamiton kini diha sa ilang kinabuhi, nagsunod sila sa ehemplo ni Jesukristo.

• Unsang pipila ka kahimtang nga imong giatubang o mahimong atubangon sa umaabot diin nakatabang o makatabang ang nasag-ulo nga kasulatan?

  Ang ubang ehemplo mahimong maglakip sa pagtudlo og leksiyon o paghatag og pakigpulong, pagtubag sa mga pangutana sa uban, pagtinguha og personal nga tubag, ug pag-atubang og tentasyon.

• Unsa ang pipila ka butang nga imong gihimo o mahimo nga makatabang aron makasag-ulo ka og mahinungdanong hugpong sa mga pulong o mga tudling sa kasulatan?

Ang mga tubag mahimong maglakip sa pagbalik-balik sa hugpong sa mga pulong o mga tudling, pagsulat niini ug pagtangtang sa pipila ka pulong, o paggamit og mga flashcard o mga papel nga gihimo sa mga estudyante sa Leksiyon 15: “Pagbansay 1 sa Doktrinal nga Kahanas.”

Ikonsiderar ang pagpakita o paghatag sa kada estudyante og mga tudling sa doktrinal nga kahanas nga ila nang natun-an. Ang lista sa mga pakisayran sa doktrinal nga kahanas ug sa mahinungdanong hugpong sa mga pulong sa kasulatan sa Daang Tugon makita sa Mahinungdanon nga Dokumento sa Doktrinal nga Kahanas (2023).

Dapita ang mga estudyante sa pagkompleto sa mosunod nga kalihokan gamit ang teknik sa pagsag-ulo nga ilang napili. Pipila sa mga ideya mao ang paggamit sa unang letra sa kada pulong diha sa hugpong sa mga pulong sa doktrinal nga kahanas o ang paggamit sa app sa Doktrinal nga Kahanas. Dugang nga mga ideya nakalista diha sa “Mga Kalihokan sa Pagrebyo sa Doktrinal nga Kahanas” diha sa Apendiks.

Paggahin og pipila ka minuto sa pagsag-ulo sa mga pakisayran ug sa mahinungdanong hugpong sa mga pulong sa pipila sa mga kasulatan sa doktrinal nga kahanas. (Kon gusto ka, pwede nimong sag-ulohon ang tibuok tudling gawas pa sa mahinungdanong hugpong sa mga pulong.)

Dapita ang mga estudyante sa pagpili og usa sa hugpong sa mga pulong o mga tudling nga ila nang nasag-ulo, ug mangandam sa pagtubag sa mosunod nga mga pangutana:

• Sa unsang paagi makatabang sa imong kinabuhi kini nga hugpong sa mga pulong o tudling?

• Sa unsang paagi makatabang kini kanimo nga mas mahisama sa Manluluwas?

Pagdapit og pipila ka estudyante sa pagpakigbahin ug ikonsiderar usab ang pagbakigbahin sa imong mga hunahuna. Pangita og mga paagi sa pag-awhag sa mga estudyante nga magpadayon sa pagsag-ulo og mga kasulatan.

Pagkat-on ug paggamit sa mga baroganan sa pag-angkon og espirituhanong kahibalo

Ang nahibiling bahin sa leksiyon nagtutok sa pagtabang sa mga estudyante sa paggamit sa mga baroganan sa pag-angkon og espirituhanong kahibalo sa haom nga mga sitwasyon. Sa dili pa mopadayon, pwede nimong dapiton ang mga estudyante sa pagrebyo nini nga mga baroganan. Ang abilidad sa mga estudyante nga mahinumdoman dayon ug magamit kini nga mga baroganan sa pag-angkon og espirituhanong kahibalo molambo pinaagi sa balik-balik nga pagrebyo ug pagpraktis. Naa sa apendiks ang gisugyot nga mga kalihokan sa pagrebyo nga giulohan og “Mga Kalihokan sa Pagrebyo sa Doktrinal nga Kahanas.” Ang mga deskripsiyon sa baroganan naa sa mga parapo 5–12 sa Mahinungdanon nga Dokumento sa Doktrinal nga Kahanas (2023).

Ipakigbahin ang mosunod nga senaryo sa imong mga estudyante. Pwede usab nimong ipahaom ang senaryo sa mga kahimtang sa imong mga estudyante, o pwede kang mangutana sa imong mga estudyante kon unsaon nila kini pagpahaom aron mas nahiangay ngadto kanila.

Hunahunaa nga miingon ang imong higala nga si Mia: “Boring kaayo ang atong ginahimo kada Dominggo ug morag nag-usik-usik lang tag panahon. Mas nindot gyod unta atong weekend, di ba, kon dili na nato angayng hunahunaon kon unsaon nga padayong balaanon ang adlaw nga Igpapahulay?”

• Unsa kaha ang pipila ka rason kon nganong naglisod si Mia niini nga sugo?

Ikonsiderar ang pagpangutana kon nganong makatabang ang pagkahibalo sa rason nga walay gana si Mia.

Dapita ang mga estudyante nga pamalandongan kon unsaon nila paggamit ang mga baroganan sa pag-angkon og espirituhanong kahibalo aron tabangan si Mia nga bag-ohon ang iyang gibati aron pulihan kini og pagsabot ug pagbati sa kalipay sa adlaw nga Igpapahulay.

Pwedeng himoon sa mga estudyante ang mosunod nga nag-inusara o sa gagmayng mga grupo:

Paggahin og pipila ka minuto sa pag-andam kon unsay makatabang kang Mia, nga naglakip tingali sa:

• Mga Kasulatan, mga pahayag gikan sa mga lider sa Simbahan, o uban pang balaanong gitudlo nga mga tinubdan. Mahimong maglakip kini og mga bersikulo sa doktrinal nga kahanas nga sama sa Exodo 20:8; Isaias 58:13–14; Mosiah 2:41; o uban pang bersikulo, sama sa Doktrina ug mga Pakigsaad 59:9, 13–15.

• Ang mga kamatuoran o doktrina nga imong nahibaloan makatabang ni Mia nga makita kini nga kahimtang uban ang mahangtorong panglantaw (pananglitan, kon sa unsang paagi kini makatabang nato nga mahimong mas mahisama sa Ginoo [tan-awa sa Moises 3:3]).

• Usa ka pananglitan gikan sa mga kasulatan, usa ka pakigpulong sa kinatibuk-ang komperensiya, o usa ka personal nga kasinatian nga nagpakita kon sa unsang paagi ang usa ka tawo molihok uban ang hugot nga pagtuo diha ni Ginoong Jesukristo sa pagtuman sa Igpapahulay, nga naglakip sa pagtambong sa simbahan ug pag-ambit sa sakramento. Pwede usab nimong ihulagway kon sa unsang paagi sila gipanalanginan sa Ginoo samtang nagpakita sila og hugot nga pagtuo. (Pipila sa mga pananglitan sa kasulatan naglakip sa Exodo 16:14–30 ug Jarom 1:5–9.)

  Ang mosunod mao ang usa ka paagi aron maandam nimo ang mga estudyante sa pagpakigbahin sa ilang mga ideya ngadto sa usag usa.

  1. Hatagi ang matag estudyante og usa ka piraso nga papel. Ipabahin kini nila sa tulo ka seksiyon pinaagi sa pagpilo niini o pagdrowing og mga linya.

  2. Pabutangi og label ang kada seksiyon gamit ang lainlaing baroganan sa pag-angkon og espirituhanong kahibalo.

  3. Pagpili og usa ka baroganan ug ipasulat sa tanang estudyante diha sa ilang mga papel ang usa ka paagi nga makatabang ni Mia kon iyang gamiton ang napili nga baroganan.

  4. Pwedeng ipasa sa mga estudyante ang mga papel ug magsulat bahin sa laing baroganan diha sa laing piraso sa papel. Ipapadayon sa mga estudyante ang pagpasa ug pagsulat.

  5. Dihang naa nay daghang ideya diha sa kada papel, sultihi ang mga estudyante nga dili na ipasa ang papel ug basahon kon unsay nasulat diha niini.

  Dapita ang pipila ka estudyante nga gustong tubagon ang mosunod nga mga pangutana base sa ilang nabasa. Pwede nimong pangutan-on ang mga estudyante nga dili kaayo mopakigbahin sa klase nga tubagon ang usa o kapin pa niini nga mga pangutana. Mas komportable tingali para sa pipila ka estudyante nga ipakigbahin ang gisulat sa uban.

• Unsay imong nabasa o gisulat nga para nimo dako og tabang kang Mia? Ngano man?

• Unsa kahay imong ikadugang niini?

Human makigbahin ang pipila ka estudyante, ikonsiderar ang pagpangutana sa klase kon unsa pa kahay gikinahanglan ni Mia niining higayona. Naa bay baroganan sa pag-angkon og espirituhanong kahibalo nga wala nimo hisgoti nga makatabang tingali? Padayon hangtod nga mobati ang klase nga igo na ang tabang nga nadawat ni Mia.

Unsay imong nakat-onan?

Sa imong journal sa pagtuon, isulat ang imong nakat-onan bahin niini nga kasinatian nga gusto nimong hinumdoman, nga naglakip tingali kon sa unsang paagi ang paggamit sa mga baroganan sa pag-angkon og espirituhanong kahibalo makatabang nimo sa bisan unsang pangutana ug sa imong mga gikabalak-an.

Dugang nga mga Kalihokan sa Pagkat-on

Usa ka alternatibong paagi sa pagtabang sa mga estudyante nga makasag-ulo

Sa dili pa ang klase, dapita ang daghang estudyante sa paghunahuna og paagi nga gamiton aron masag-ulo ang mga kasulatan. I-assign nila ang matag tudling sa doktrinal nga kahanas ug hangyoa sila nga tudloan ang klase kon unsaon nila sa pagsag-ulo sa hugpong sa mga pulong ug sa pakisayran sa kasulatan. Pwede usab nimong hangyoon ang mga estudyante nga ipakigbahin ang ilang paagi sa pagsag-ulo ngadto sa klase. Ingon nga alternatibo, pwede nimong hangyoon ang mga estudyante nga mag-set up og mga istasyon diha sa classroom diin pwede nilang itudlo ang ilang mga teknik sa pagsag-ulo ngadto sa mas gagmayng mga grupo.

Alternatibong senaryo:

Kon para nimo makabenepisyo ang mga estudyante sa paghisgot og laing senaryo kay nianang kang Mia, ikonsiderar ang mosunod:

• Dili gustong magpuasa si Lucas kay naghunahuna siya nga lisod kaayo kining himoon. (Pwedeng gamiton sa mga estudyante ang Isaias 58:6–7 diha sa ilang tubag.)