Mga Salmo 102–3; 110; 116–19; 127–28; 135–39; 146–50

Mga Salmo 102–3; 110; 116–19; 127–28; 135–39; 146–50

Kinatibuk-ang Pagpasabot

Atong makita diha sa Mga Salmo ang mga pagtandi nga motabang nato sa pagsabot sa gahom sa pulong sa Dios, ug atong makakita ang mga pagdasig nga ipahayag ang mga pasalamat sa Ginoo, Iyang mga panalangin, ug Iyang mahangtorong gugma.

Dapita ang mga tigkat-on sa pagpangandam sa pagkat-on. Ang espirituhanong pag-andam importante—alang kanimo ug sa mga tawo nga imong tudloan. Dihang mibista sa mga Amerika, gisultihan sa Manluluwas ang panon, “Pamauli kamo sa inyong mga panimalay, ug … iandam ang inyong mga hunahuna pagkaugma” (3 Nephi 17:3). Pangita og mga paagi nga imong masunod ang ehemplo sa Manluluwas ug dasiga ang mga estudyante nga mangandam sa pagkat-on sa seminary. Aron makakat-on og dugang kon sa unsang paagi kini gibuhat sa Manluluwas, tan-awa ang “Gidapit sa Manluluwas ang Uban sa Pagpangandam sa Pagkat-on” (Pagtudlo Sumala sa Pamaagi sa Manluluwas [2022], 25). Usa ka ehemplo sa pagpangandam sa mga estudyante sa pagkat-on makita sa pagpangandam sa estudyante para sa Leksiyon 107: “Salmo 119” (tan-awa sa ubos).

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Salmo 119

Katuyoan sa leksiyon: Aron tabangan ang mga estudyante sa paghimo og plano sa pagtuon sa pulong sa Dios.

Ang pagdapit sa mga tigkat-on nga himoon ang gagmayng mga buluhaton o kalihokan una pa ang sunod nga klase makaandam nila sa pagkat-on og dugang. Kini nga mga kalihokan mohatag og mga kahigayonan sa mga estudyante sa pagtuon sa mga kasulatan, pagpamalandong sa mga hilisgotan sa ebanghelyo, ug matudloan sa Espiritu Santo. Ang mosunod nga pagpangandam sa estudyante usa ka ehemplo:

• Pagpangandam sa estudyante: Dapita ang mga estudyante nga personal nga tun-an ang mga kasulatan sa dili pa ang sunod nga klase. Hangyoa sila sa pagpamalandong kon ila bang gibati ang paggiya sa Ginoo pinaagi sa ilang pagtuon sa kasulatan. Kon mao, aduna ba silay mahunahunaan nga mga pananglitan?

Para sa dugang pagbansay sa pagpangandam sa estudyante, tan-awa sa “Paghimo og mga imbitasyon nga motabang sa mga tigkat-on nga mangandam alang sa sunod nga kasinatian sa pagkat-on” diha sa Pagpalambo sa mga Kahanas sa Magtutudlo.

• Dugang nga pagpangandam sa estudyante: Pwede usab nimong hangyoon ang mga estudyante sa pagdala og usa ka butang nga motabang nila sa pagkompleto sa mosunod nga pamahayag: “Ang mga kasulatan nahisama og kay .”

• Mga aytem: Lampara o flashlight; usa ka hymnbook, mga sinsilyo (o usa ka butang nga nagrepresentar og mga bahandi), dugos (o usa ka butang nga tam-is), usa ka hulagway sa dalan, usa ka makuptan nga hulagway sa magtatambag (sama pananglit, usa ka magtatambag sa Unang Kapangulohan sa Simbahan o magtatambag sa eskwelahan)

• Sulod nga ipakita: Mga instruksiyon aron tun-an sa mga estudyante ang usa sa lima ka tudling

• Bidyo: “Giunsa Nako #PagpaminawKaniya: Elder David A. Bednar” (1:15)

Salmo 136

Katuyoan sa leksiyon: Aron tabangan ang mga estudyante nga mabati ang gugma sa Langitnong Amahan ug ni Jesukristo samtang ilang ipahayag ang ilang pasalamat Kanila.

• Pagpangandam sa estudyante: Dapita ang mga estudyante sa pag-ampo aron pasalamatan ang Langitnong Amahan nga walay pangayoon agi og balos gikan Kaniya. Pwedeng mangandam ang mga estudyante sa pagpakigbahin sa ilang mga impresyon gikan sa kasinatian diha sa klase.

• Handout: “Salmo 136: Pasalamat para sa Ginoo”

• Bidyo: “Principles of Peace: Gratitude” (2:32)