Mga Salmo 49–51; 61–66; 69–72; 77–78; 85–86: Leksiyon 106

Pagbansay 7 sa Doktrinal nga Kahanas

Pagsag-ulo sa Mahinungdanong Hugpong sa mga Pulong ug sa Paggamit sa mga Baroganan sa Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makatabang sa mga estudyante sa pagsag-ulo sa mahinungdanong hugpong sa mga pulong sa kasulatan diha sa mga tudling sa doktrinal nga kahanas ug sa paggamit sa balaanong mga baroganan sa pag-angkon og espirituhanong kahibalo.

Pagpangandam sa estudyante: Dapita ang mga estudyante nga irebyo ang listahan sa Mga tudling sa Doktrinal nga Kahanas sa Daang Tugon ug ang mahinungdanong mga hugpong sa mga pulong sa kasulatan nga anaa diha sa Librarya sa Ebanghelyo. Pwedeng mamili ang mga estudyante og usa ka tudling ug mahinungdanong hugpong sa mga pulong sa kasulatan gikan sa listahan. Dapita ang mga estudyante sa paggahin og pipila ka minuto sa pagsag-ulo sa ilang napiling tudling ug mahinungdanong hugpong sa mga pulong sa kasulatan. Pwede nilang gamiton ang mobile app sa doktrinal nga kahanas isip usa ka himan aron motabang nila sa pagsag-ulo.

Posibleng mga Kalihokan sa Pagkat-on

Pagrebyo sa doktrinal nga kahanas: Sag-uloha

Aron matabangan ang mga estudyante sa pagsag-ulo sa mga tudling sa doktrinal nga kahanas ug sa mahinungdanong hugpong sa mga pulong sa kasulatan gikan sa Daang Tugon, pwede nimo silang bahinon og tinag-upat kada grupo. Hatagi ang kada estudyante og upat ka gagmayng piraso sa papel nga naka-stapler. Ipasabot nga magpulipuli og mga papel ang mga estudyante diha sa ilang grupo. Ingon nga bahin niini nga kalihokan, magdrowing og mga hulagway ang mga estudyante. Pahinumdomi sila nga dili magdrowing og nagrepresentar sa dios.

Pwede nimong usa-usahon og pakita ang mosunod nga mga instruksiyon samtang kompletohon sa mga estudyante ang kada kalihokan. (Para sa lakang 1 ug 3, hatagig usa ka minuto ang kada estudyante sa paghuman niini. Para sa lakang 2 ug 4, hatagi silag 30 ka segundo sa paghuman niini.)

1. Dili ipakigbahin kini diha sa inyong grupo, magpili og usa ka mahinungdanong hugpong sa mga pulong sa kasulatan gikan sa pakisayran sa doktrinal nga kahanas. Sa imong unang piraso sa papel, pagdrowing og yano nga hulagway nga nagpakita sa mahinungdanong hugpong sa mga pulong sa kasulatan.

2. Ipatuyok ang mga papel padulong sa tuo nga sama sa relo nga direksyon sulod sa inyong kagrupo. Tan-awa ang hulagway sa unang pahina. Sa ikaduhang pahina, isulat ang pakisayran sa doktrinal nga kahanas nga para nimo konektado sa hulagway.

3. Ipatuyok ang mga papel padulong sa tuo nga sama sa relo nga direksyon. Basaha ang pakisayran sa doktrinal nga kahanas sa ikaduhang pahina nga dili motan-aw sa hulagway sa unang pahina. Sa ikatulong piraso sa papel, pagdrowing og yano nga hulagway nga nagpakita sa mahinungdanong hugpong sa mga pulong sa kasulatan.

4. Ipatuyok ang mga papel padulong sa tuo nga sama sa relo nga direksyon. Tan-awa ang hulagway sa ikatulong pahina nga dili tan-awon ang pakisayran sa ikaduhang pahina. Sa ikaupat nga pahina, isulat ang pakisayran sa doktrinal nga kahanas nga para nimo konektado sa hulagway.

Sultihi ang mga estudyante nga ibalik ang mga papel sa orihinal nga tag-iya. Dapita ang matag tawo sa pagpakigbahin sa mga drowing ug sa mga panaghap sa ilang mga papel diha sa ilang mga grupo. Pwedeng ipakigbahin sa kada estudyante ang orihinal nga mahinungdanong hugpong sa mga pulong sa kasulatan nga ilang gipili.

Diha sa ilang grupo, dapita ang mga estudyante sa pagsultig kusog sa mga tudling sa doktrinal nga kahanas ug mahinungdanong mga hugpong sa mga pulong nga gigamit niini nga kalihokan. Pwede nila kining balikbalikon og kadaghan.

Kon itugot sa panahon, ikonsiderar ang pagsubli sa kalihokan sa pagdrowing gamit ang laing mahinungdanong mga hugpong sa mga pulong sa kasulatan. Seguroa nga adunay igong panahon ang mga estudyante (25–30 ka minuto) sa paghimo sa mga kalihokan diha sa seksiyon nga “Pagkat-on ug paggamit sa mga baroganan sa pag-angkon og espirituhanong kahibalo”.

Pagkat-on ug paggamit sa mga baroganan sa pag-angkon og espirituhanong kahibalo

Tabangi ang mga estudyante sa pagrebyo sa mga baroganan sa pag-angkon og espirituhanong kahibalo. Ang gisugyot nga mga kalihokan sa pagrebyo gilakip diha sa seksiyon sa apendiks nga giulohan og “Mga Kalihokan sa Pagrebyo sa Doktrinal nga Kahanas.” Wala nagkinahanglan og dakong panahon kini nga pagrebyo, pero ang mga estudyante nagkinahanglan og regular nga mga pagrebyo niini nga mga baroganan aron magamit nila kini sa ilang kinabuhi. Ang mga deskripsiyon sa mga baroganan makita sa mga parapo 5–12 sa Mahinungdanon nga Dokumento sa Doktrinal nga Kahanas (2023). Human sa rebyo, papraktisa ang mga estudyante gamit kini nga mga baroganon diha sa mosunod nga senaryo.

Human ang bag-o lang nga leksiyon sa Sunday School bahin sa kaimportante sa pag-adto sa templo, nahunahunaan ni Paul nga dugay na siyang wala makaadto sa templo. Tungod sa pipila ka sala nga iyang nahimo, mibati siya nga dili takos sa pagsulod sa balay sa Ginoo. Naghunahuna si Paul sa iyang kaugalingon, “Dili gyod gusto sa Dios nga mosulod ko sa Iyang templo tungod sa akong nahimo.”

• Sa imong hunahuna, sa unsang paagi ang pag-angkon og espirituhanong kahibalo makatabang sa usa ka tawo nga parehas og gibati ni Paul?

Dasiga ang mga estudyante nga ipakita kon sa unsang paagi ang matag mga baroganan makatabang ni Paul. Ang nahibiling sulod bahin niini nga leksiyon nagpunting sa pagtabang sa mga estudyante sa pagsusi sa mga pangutana uban ang mahangtorong panglantaw. Kon imong gibati nga ang mga estudyante nagkinahanglan og dugang nga pagpraktis sa ubang mga baroganan, ipahaom kini nga sulod [content] para sa mga panginahanglan sa imong mga estudyante.

Usa ka paagi sa pagsusi sa mga pangutana gikan sa mahangtorong panglantaw mao ang pagpahiuyon sa mga pangutana (o tan-awon kini sa laing paagi) base sa gitudlo sa Ginoo (tan-awa ang mga parapo 8–9 sa Mahinungdanon nga Dokumento sa Doktrinal nga Kahanas [2023]).

Gawas sa pagtudlo sa mga estudyante ngadto sa Mahinungdanong Dokumento, pwede usab nimong tultolan ang mga estudyante sa “Ang plano sa Dios sa kaluwasan naghatag og panglantaw,” nga makita sa seksiyon sa “Isentro ang Imong Kinabuhi diha ni Jesukristo” diha sa “Pagpangita og mga Tubag sa Imong mga Pangutana” sa Mga Hilisgotan ug mga Pangutana diha sa Librarya sa Ebanghelyo. Aron ipakita kon unsay mahimo sa mga estudyante bahin sa pangutana ni Paul, pwede nimong ipasalida ang “Pagsusi sa mga Pangutana nga inubanan sa Mahangturong Panglantaw” (2:56), nga anaa sa ChurchofJesusChrist.org.

Ikonsiderar ang pagdrowing og hulagway sa usa ka kwadro diha sa pisara. Isulat ang gikabalak-an ni Paul sa tunga sa kwadro. Pwedeng ilista sa mga estudyante ang mga tubag sa mosunod nga mga pangutana palibot sa kwadro.

• Unsa tingali ang mga pagpangagpas nga gihimo ni Paul bahin sa Langitnong Amahan, sa Iyang plano, ug sa Iyang pagtratar sa Iyang mga anak? Unsa tingali nga mga pagpangagpas ni Paul bahin sa iyang kaugalingon?

  Apil sa posibleng mga tubag sa mga estudyante nga makit-an tingali maglakip sa “Wala ko gimahal sa Dios,” “ang templo para lang niadtong mga hingpit,” ug “mailhan ko pinaagi sa akong mga sala.”

• Sa unsang paagi kini nga mga panghunahuna makaapektar sa relasyon ni Paul sa Langitnong Amahan ug kang Jesukristo?

Papasa ang mga pangagpas ug pagdrowing og bag-ong kwadro diha sa pisara. Dayon pwedeng magpraktis ang mga estudyante sa pag-usab sa mga gikabalak-an ni Paul. Dapita ang mga estudyante sa pagsulat sa mga kamatuoran ug mga pakisayran sa mga tudling sa doktrinal nga kahanas diha sa pisara palibot sa bag-ong kwadro.

• Unsang mga kamatuoran bahin sa plano sa Langitnong Amahan o gikan sa mga pagtulun-an sa Manluluwas ang makatabang ni Paul sa pag-usab sa iyang mga gikabalak-an o tan-awon kini gikan sa panglantaw sa Dios?

• Unsang mga tudling sa kasulatan sa doktrinal nga kahanas ang pwede nimong ipakigbahin kang Paul? Ngano man?

Apil sa posibleng mga tubag sa estudyante ang:

• Kinahanglang takos kitang mosulod sa templo (tan-awa sa Salmo 24:3–4).

• Malimpyohan kita sa Ginoo sa atong mga sala ug makahimo natong takos (tan-awa sa Isaias 1:18; 53:3–5).

• Nailhan kita pinaagi sa atong pagkatawo ingon nga mga anak sa Dios (tan-awa sa Genesis 1:26–27), dili pinaagi sa atong mga sala ug sayop.

Ikonsiderar ang pagpakigbahin sa pamahayag ni Elder Quentin L. Cook diha sa Dugang nga mga Kapanguhaan.

Aron matabangan ang mga estudyante sa pagpamalandong sa ilang nakat-onan, dapita sila sa paghimo sa mosunod.

Gamit ang imong nakat-onan ug gibati karon, pagsulat og tubag kang Paul nga makatabang niya sa paglantaw sa iyang pangutana pinaagi sa mahangtorong panglantaw sa plano sa Langitnong Amahan ug mga pagtulun-an ni Jesukristo.

Dapita ang mga estudyante nga gustong ipakigbahin ang ilang mga tubag ngadto sa klase. Samtang maminaw ang mga estudyante sa uban, dasiga sila sa paghanduraw kon unsa kahay bation ni Paul dihang madungog niya ang maong mga tubag.

Kon moabot sa hunahuna ang usa ka kasinatian, pwede nimong ipakigbahin kon sa unsang paagi ang baroganan sa pagsusi sa mga konsepto ug mga pangutana nga adunay mahangtorong panglantaw nakatabang nimo sa pagsulbad sa mga pangutana o mga kabalaka.

Dugang nga mga Kapanguhaan

Sa unsang paagi ko mahimong angayan sa rekomend sa templo?

Si Elder Quentin L. Cook sa Korum sa Napulog Duha ka Apostoles mipahayag:

Dako namong tinguha nga ang mga miyembro sa Simbahan magpakabuhi nga takos sa temple recommend. Palihog ayaw hunahunaa nga ang pagtambong sa templo lisud ug tingali dili makab-ot nga tumong. Naningkamot uban sa ilang bishop, kadaghanan sa mga miyembro makahimo sa tanang matarong nga mga gikinahanglan sulod sa mubo nga panahon kon sila may determinasyon nga mopasarang ug hingpit nga maghinulsol sa mga kalapasan. Naglakip kini sa kaandam mopasaylo sa atong mga kaugalingon ug dili mo-focus sa atong mga imperpeksyon o mga sala nga magpugong kanato nga dili makasulod sa sagrado nga templo. (“Hunahunaa ang Inyong Kaugalingon nga anaa sa Templo,” Liahona, Mayo 2016, 98)

Dugang nga mga Kalihokan sa Pagkat-on

Alternatibo nga senaryo

Tabangi ang mga estudyante nga magpraktis gamit ang usa ka senaryo nga konektado sa pagkatakos diha sa templo o kaimportante sa paghimo sa templo nga bahin sa atong kinabuhi. Ang mosunod nga senaryo maoy usa ka paagi sa paghimo niini. Paghimog mga detalye sa senaryo nga para nimo magamit sa sitwasyon sa imong mga estudyante.

Ang klase sa Young Women ni Anna motambong sa Balay sa Ginoo karong semanaha. Busy kaayo si Anna ug wala niya mahimong prayoridad ang pagtambong sa templo. Sa dihang nadungog niya ang adlaw ug oras nga magkita ang iyang klase, nakahunahuna siya, “Kon moadto ko niini nga kalihokan sa templo, wala nakoy panahon sa pagbuhat sa tanang butang nga kinahanglan nakong humanon.”

Pwede nimong ihatag kini nga senaryo, ug ang usa niini diha sa leksiyon, ngadto sa mga estudyante ug dapiton sila nga mamili og usa nga tubagon.