« ពង្សាវតារក្សត្រ ទី២ ២–៤ ៖ ព្រះអម្ចាស់ប្រទានព្រះចេស្តា និងសិទ្ធិអំណាចដល់អេលីសេ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ពង្សាវតារក្សត្រ ទី២ ២–៤ ៖ ព្រះអម្ចាស់ប្រទានព្រះចេស្តា និងសិទ្ធិអំណាចដល់អេលីសេ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ពង្សាវតារក្សត្យ ទី២ ២–៧ ៖ មេរៀនទី ៨៣
ពង្សាវតារក្សត្រ ទី២ ២–៤
ព្រះអម្ចាស់ប្រទានព្រះចេស្តា និងសិទ្ធិអំណាចដល់អេលីសេ
នៅពេលយើងទទួលយកការហៅនៅក្នុងសាសនាចក្ររបស់ព្រះអម្ចាស់ យើងទទួលបានសិទ្ធិអំណាចរបស់ទ្រង់ដើម្បីបម្រើ ។ នៅពេលយើងខិតខំបម្រើដោយឧស្សាហ៍ព្យាយាម ហើយប្រែក្លាយកាន់តែដូចជាទ្រង់ នោះទ្រង់នឹងប្រទានពរដល់យើងនូវអំណាចរបស់ទ្រង់ ។ ដំណើររឿងអំពីព្រះអម្ចាស់ប្រទានពរដល់ព្យាការីអេលីសេដោយនូវអំណាច និងសិទ្ធិអំណាច បន្ទាប់ពីបានយកអេលីយ៉ាទៅស្ថានសួគ៌ បង្ហាញពីសេចក្តីពិតនេះ ។ មេរៀននេះអាចជួយសិស្សឲ្យយល់ថា ព្រះអម្ចាស់ប្រទានសិទ្ធិអំណាចដល់មនុស្សដែលទ្រង់ហៅ និងអំណាចដល់អ្នកដែលបម្រើដោយសុចរិត ។
ការរៀបចំសិស្ស ៖ សូមអញ្ជើញសិស្សឲ្យគិតអំពីពេលមួយដែលពួកគេ ឬនរណាម្នាក់ដែលពួកគេស្គាល់បានបម្រើក្នុងការហៅបម្រើក្នុងសាសនាចក្រ ។ សូមអញ្ជើញសិស្សឲ្យជញ្ជឹងគិតពីសំណួរថា « តើនៅពេលណាខ្ញុំបានឃើញព្រះចេស្ដា និងសិទ្ធិអំណាចរបស់ព្រះអម្ចាស់នៅក្នុងការបំពេញការហៅរបស់សាសនាចក្រ ? »
សកម្មភាពរៀនសូត្រដែលអាចមាន
ប្រភពនៃអំណាច និងសិទ្ធិអំណាច
សូមពិចារណាចាប់ផ្តើមថ្នាក់ដោយពិភាក្សា ថាតើសិទ្ធិអំណាចដើម្បីធ្វើកិច្ចការជាក់លាក់មួយចំនួនបានមកពីណា ។ អ្នកអាចធ្វើដូច្នេះដោយបង្ហាញរូបភាពវេជ្ជបណ្ឌិតពាក់អាវពេទ្យ ឬនៅមន្ទីរពេទ្យ ( ឬអ្នកជំនាញផ្សេងទៀតដែលមានសិទ្ធិអំណាចក្នុងការបំពេញតួនាទីរបស់ពួកគេ ) ហើយសួរសំណួរខាងក្រោម ។
-
តើបុគ្គលនេះមានការទទួលខុសត្រូវអ្វីខ្លះ ?
-
តើនរណាជាអ្នកផ្តល់សិទ្ធិអំណាចឲ្យពួកគេបំពេញតួនាទីរបស់ពួកគេ ?
-
តើអ្វីដែលផ្ដល់ឲ្យអ្នកមានទំនុកចិត្តលើពួកគេ ?
សូមពិចារណាបង្ហាញរូបភាពរបស់ព្យាការីបច្ចុប្បន្ន ហើយសួរសំណួរដែលបានរៀបរាប់ពីមុននេះម្តងទៀតអំពីលោក ។
ដើម្បីជួយសិស្សវាយតម្លៃពីអ្វីដែលពួកគេយល់អំពីការបម្រើដោយអំណាច និងសិទ្ធិអំណាចរបស់ព្រះអម្ចាស់ក្នុងការហៅបម្រើ អ្នកអាចអញ្ជើញពួកគេឲ្យធ្វើដូចតទៅនេះ ។
នៅក្នុងសៀវភៅកំណត់ហេតុការសិក្សារបស់អ្នក ឬផ្នែកកំណត់ចំណាំនៅក្នុងបណ្ណាល័យដំណឹងល្អ សូមឆ្លើយសំណួរខាងក្រោម ។ នៅពេលអ្នកពិចារណាលើចម្លើយរបស់អ្នក សូមស្តាប់ចំណាប់អារម្មណ៍ពីព្រះវិញ្ញាណបរិសុទ្ធអំពីអ្វីដែលព្រះអម្ចាស់ចង់ឲ្យអ្នកយល់អំពីការបម្រើដោយព្រះចេស្ដា និងសិទ្ធិអំណាចរបស់ព្រះអម្ចាស់ក្នុងការហៅបម្រើទាំងឡាយ ។
-
តើខ្ញុំយល់យ៉ាងណាអំពីការទទួលបានព្រះចេស្ដា និងសិទ្ធិអំណាចរបស់ព្រះអម្ចាស់ដើម្បីបម្រើក្នុងការហៅបម្រើទាំងឡាយ ?
-
តើការយល់ដឹងនេះអាចមានឥទ្ធិពលលើរបៀបដែលខ្ញុំឆ្លើយតប នៅពេលខ្ញុំ ឬនរណាម្នាក់ផ្សេងទៀតទទួលការហៅពីព្រះអម្ចាស់យ៉ាងដូចម្ដេច ?
អេលីសេទទួលអំណាច និងសិទ្ធិអំណាចរបស់ព្រះ
អ្នកអាចនឹងពន្យល់ថា ព្រះអម្ចាស់បានបើកសម្ដែងដល់អេលីយ៉ាថា អេលីសេនឹងក្លាយជាព្យាការី ( សូមមើល ពង្សាវតារក្សត្រ ទី១ ១៩:១៦, ១៩ ) ។
-
តើអេលីសេអាចមានកង្វល់អ្វីខ្លះ នៅពេលលោកបានរៀបចំសម្រាប់ការហៅរបស់លោកពីព្រះអម្ចាស់ ?
អេលីសេបានដឹងថា ព្រះអម្ចាស់នឹងយកអេលីយ៉ាទៅឆាប់ៗនេះ ( ពង្សាវតារក្សត្រ ទី២ ២:១–៣ ) ។ នៅថ្ងៃចុងក្រោយរបស់អេលីយ៉ា អេលីសេបានដើរតាមអេលីយ៉ាពីទីក្រុងមួយទៅទីក្រុងមួយ រហូតដល់អ្នកទាំងពីរមកដល់ទន្លេយ័រដាន់ ។
ដើម្បីជួយសិស្សឲ្យរកឃើញនូវអ្វីដែលបានកើតឡើងនៅទន្លេយ័រដាន់ អ្នកអាចរៀបចំថ្នាក់រៀនជាក្រុមតូចៗ ។ នៅលើក្តារខៀន អ្នកអាចគូររូបភាពទាំងបួនខាងក្រោម ឬសង្ខេបរូបភាពនីមួយៗដោយប្រើពីរបីពាក្យ តាមលំដាប់លំដោយព្រាវៗ ។ អញ្ជើញសិស្សឲ្យអាន ពង្សាវតារក្សត្រ ទី២ ២:៨–១៥ និងរៀបចំរូបភាព ឬសេចក្តីសង្ខេបនៃព្រឹត្តិការណ៍តាមលំដាប់លំដោយកាល ។ អ្នកប្រហែលជាត្រូវពន្យល់ថា ក្រមាគឺជាអាវផាយ ។
-
តើព្រះអម្ចាស់បានបង្ហាញអេលីសេ និងអ្នកដទៃទៀតថាទ្រង់បានប្រទានអំណាច និងសិទ្ធិអំណាចដល់អេលីសេយ៉ាងដូចម្ដេច ?
អ្នកអាចពន្យល់ថា ក្រមាដែលអេលីយ៉ា និងអេលីសេបានប្រើ មិនបានប្រទានឲ្យពួកលោកនូវអំណាច និងសិទ្ធិអំណាចទេ ប៉ុន្តែ តំណាងឲ្យ ព្រះចេស្ដា និងសិទ្ធិអំណាចរបស់ព្រះ ។ នៅក្នុងសាសនាចក្រសព្វថ្ងៃនេះ ជួនកាលយើងសំដៅទៅលើការហៅ ឬសិទ្ធិអំណាចរបស់នរណាម្នាក់ថាជា « ក្រមា » របស់ពួកគេ ។ ឧទាហរណ៍ នៅពេលព្យាការីថ្មីត្រូវបានគាំទ្រជាប្រធានសាសនាចក្រ នោះលោកទទួលបានក្រមានៃសិទ្ធិអំណាច ។
វាក៏អាចមានប្រយោជន៍ផងដែរក្នុងការចង្អុលបង្ហាញថា សិទ្ធិអំណាចក្នុងការបម្រើក្នុងការហៅ គឺមកពីព្រះអម្ចាស់តាមរយៈបុរសដែលកាន់កូនសោបព្វជិតភាព ។
-
តើសេចក្តីពិតអ្វីដែលយើងអាចរៀនចេញពីបទពិសោធន៍របស់អេលីសេ អំពីអ្វីដែលព្រះអម្ចាស់បានធ្វើសម្រាប់មនុស្សដែលទ្រង់ហៅឲ្យបម្រើទ្រង់ ?
នៅក្នុងចំណោមសេចក្តីពិតដែលសិស្សអាចលើកឡើង សូមចង្អុលបង្ហាញថា ព្រះអម្ចាស់ប្រទានសិទ្ធិអំណាច និងអំណាចដល់មនុស្សដែលទ្រង់ហៅ ។
ការបម្រើដោយអំណាច និងសិទ្ធិអំណាចរបស់ព្រះ
ដើម្បីជួយសិស្សយល់អំពីអត្ថន័យក្នុងការហៅឲ្យបម្រើដោយនូវអំណាច និងសិទ្ធិអំណាចរបស់ព្រះ នោះអ្នកអាចសរសេរ សិទ្ធិអំណាចបព្វជិតភាព និង អំណាចបព្វជិតភាព នៅលើក្ដារខៀន ។ ចែកចាយសេចក្តីថ្លែងការណ៍ខាងក្រោមចេញពី ប្រកាសដំណឹងល្អរបស់យើង ៖ មគ្គុទេសក៏ចែកចាយដំណឹងល្អនៃព្រះយេស៊ូវគ្រីស្ទ ។ ខណៈពេលដែលសេចក្ដីថ្លែងការណ៍នេះអនុវត្តដោយផ្ទាល់ចំពោះការហៅជាអ្នកផ្សព្វផ្សាយសាសនា សូមរំឭកសិស្សថា ព្រះអម្ចាស់ប្រទានសិទ្ធិអំណាចដល់មនុស្សដែលទ្រង់ហៅដើម្បីបម្រើក្នុងការហៅបម្រើ និងអំណាចដល់អ្នកដែលបម្រើទ្រង់ដោយសុចរិត ។
នៅក្រោមការដឹកនាំរបស់ព្រះគ្រីស្ទ សិទ្ធិអំណាចក្នុងការប្រកាសដំណឹងល្អត្រូវបានស្ដារឡើងវិញតាមរយៈព្យាការី យ៉ូសែប ស្ម៊ីធ ។ ពេលអ្នកត្រូវបានញែកចេញជាអ្នកផ្សព្វផ្សាយសាសនា អ្នកបានទទួលសិទ្ធិអំណាចនេះ ។ ការហៅនេះមាននូវសិទ្ធិ អភ័យឯកសិទ្ធិ និងការទទួលខុសត្រូវដើម្បីតំណាងឲ្យព្រះអម្ចាស់ ហើយបង្រៀនដំណឹងល្អរបស់ទ្រង់ ។ …
បន្ថែមពីលើសិទ្ធិអំណាច អ្នកត្រូវការអំណាចខាងវិញ្ញាណដើម្បីបំពេញការហៅរបស់អ្នក ។ ព្រះប្រទានអំណាចខាងវិញ្ញាណ នៅពេលអ្នកខិតខំពង្រឹងទីបន្ទាល់របស់អ្នកអំពីទ្រង់ ព្រះយេស៊ូវគ្រីស្ទ និងសេចក្ដីពិតនៃដំណឹងល្អដែលអ្នកបង្រៀនដោយជាប់លាប់ ។ ទ្រង់ប្រទានអំណាចខាងវិញ្ញាណនៅពេលអ្នកអធិស្ឋាន សិក្សាព្រះគម្ពីរ និងស្វែងរកដើម្បីបំពេញគោលបំណងជាអ្នកផ្សព្វផ្សាយសាសនារបស់អ្នក ។ ទ្រង់ប្រទានអំណាចខាងវិញ្ញាណ នៅពេលអ្នកខិតខំរក្សាបទបញ្ញត្តិរបស់ទ្រង់ និងសេចក្ដីសញ្ញាដែលអ្នកបានធ្វើ ពេលអ្នកបានទទួលពិធីបរិសុទ្ធនៃសេចក្ដីសង្គ្រោះ ( សូមមើល គោលលទ្ធិ និងសេចក្តីសញ្ញា ៣៥:២៤ ) ។ ( ប្រកាសដំណឹងល្អរបស់យើង ៖ មគ្គុទេសក៏ចែកចាយដំណឹងល្អនៃព្រះយេស៊ូវគ្រីស្ទ [ ឆ្នាំ២០២៣ ] ទំព័រ ៣ )
-
តើអ្នករៀនអ្វីខ្លះអំពីព្រះចេស្ដា និងសិទ្ធិអំណាចរបស់ព្រះអម្ចាស់ពីសេចក្ដីថ្លែងការណ៍ទាំងនេះ ?
-
ហេតុអ្វីវាអាចមានប្រយោជន៍ក្នុងការចងចាំការណ៍នេះ ពេលអ្នកទទួលការហៅពីព្រះវរបិតាសួគ៌ និងព្រះយេស៊ូវគ្រីស្ទ ?
-
ហេតុអ្វីវាអាចមានប្រយោជន៍ក្នុងការចងចាំការណ៍នេះ ពេលអ្នកគាំទ្រអ្នកដទៃដែលទទួលការហៅទាំងឡាយ ?
នៅពេលសិស្សពិភាក្សាអំពីអ្វីដែលពួកគេបានរៀនអំពីសិទ្ធិអំណាច និងអំណាចបព្វជិតភាព នោះអ្នកអាចរាយបញ្ជីអ្វីដែលពួកគេចែកចាយនៅក្រោមចំណងជើងនីមួយៗនៅលើក្ដារខៀន ។ ដោយជាផ្នែកមួយនៃការពិភាក្សានេះ អ្នកអាចចង្អុលបង្ហាញថា ព្រះប្រទានសិទ្ធិអំណាចបព្វជិតភាពដល់នរណាម្នាក់ នៅពេលដែលពួកគេត្រូវបានញែកចេញនៅក្នុងការហៅមួយ ។ អំណាចបព្វជិតភាពមកពីព្រះ នៅពេលមាននរណាម្នាក់ខិតខំរក្សាបទបញ្ញត្តិ ហើយធ្វើតាមគោលការណ៍សុចរិត ( សូមមើល គោលលទ្ធិ និងសេចក្តីសញ្ញា ១២១:៣៤–៤៦ ) ។
សូមពិចារណាបង្ហាញវីដេអូ « Jesus Calls Twelve Apostles to Preach and Bless Others » ( ១:៣៨ ) ដែលមាននៅលើគេហទំព័រ ChurchofJesusChrist.org ។ នៅពេលសិស្សមើលវីដេអូនេះ សូមឲ្យពួកគេគិតអំពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទបង្ហាញសេចក្ដីស្រឡាញ់របស់ទ្រង់ទាំងទ្វេ ដោយការផ្ដល់សិទ្ធិអំណាច និងអំណាចដល់អ្នកបម្រើរបស់ទ្រង់ទាំងទ្វេនៅលើផែនដី ។
បន្ទាប់ពីវីដេអូនេះ សូមអញ្ជើញសិស្សពីរបីនាក់ឲ្យចែកចាយគំនិតរបស់ពួកគេ ។
បង្ហាញការយល់ដឹង
ដើម្បីជួយសិស្សសង្ខេបនូវអ្វីដែលពួកគេបានរៀន សូមពិចារណារៀបចំសិស្សក្នុងថ្នាក់ជាគូៗសម្រាប់សកម្មភាពខាងក្រោម ។
ជ្រើសរើសស្ថានភាពមួយ ឬច្រើនខាងក្រោម ហើយពិភាក្សាអំពីអ្វីដែលអ្នកបានរៀននៅថ្ងៃនេះ ដែលអាចជួយបុគ្គលរូបនោះ ដែលមានការព្រួយបារម្ភអំពីការហៅ ។ នៅក្នុងការឆ្លើយតបនីមួយៗ រួមបញ្ចូលទាំងបទគម្ពីរ សេចក្ដីថ្លែងការណ៍ពីថ្នាក់ដឹកនាំសាសនាចក្រ ឬការយល់ដឹងដែលអ្នកបានទទួលពីព្រះវិញ្ញាណ នៅពេលអ្នកបានសិក្សារឿងពីការហៅឲ្យបម្រើរបស់អេលីសេ ។
-
ប៊ីស្សពថ្មីត្រូវបានហៅ និងគាំទ្រ ។ កូនប្រុសរបស់គាត់ដឹងថា គាត់មិនល្អឥតខ្ចោះនោះទេ ។
-
ប្រធានយុវនារីថ្មីត្រូវបានហៅឲ្យបម្រើ ។ យុវនារីម្នាក់មានទំនាក់ទំនងល្អជាមួយប្រធានពីមុន ហើយមិនស្គាល់ប្រធានថ្មីទាល់តែសោះ ។
-
យុវជន ឬយុវនារីត្រូវបានហៅឲ្យបម្រើជាប្រធានកូរ៉ុម ឬថ្នាក់របស់ពួកគេ ។ ពួកគេមិនមានអារម្មណ៍ថា ពួកគេដឹងគ្រប់គ្រាន់ដើម្បីបំពេញការហៅនេះបានល្អនោះទេ ។
-
អ្នកផ្សព្វផ្សាយសាសនាត្រូវបានហៅឲ្យបម្រើនៅក្នុងប្រទេសដែលប្រជាជននិយាយភាសាផ្សេង ។ ពួកគេមានការព្រួយបារម្ភថាតើការចែកចាយដំណឹងល្អរបស់ពួកគេមានប្រសិទ្ធិភាពខ្លាំងប៉ុនណា ។
សូមគិតអំពីរបៀបដើម្បីឲ្យសិស្សចែកចាយការឆ្លើយតបរបស់ពួកគេជាមួយគ្នា ។ របៀបមួយគឺដើម្បីឲ្យគូនីមួយៗចែកចាយជាមួយក្រុមផ្សេងគ្នា ។ បន្ទាប់ពីមនុស្សគ្រប់គ្នាមានឱកាសចែកចាយហើយ អ្នកអាចអញ្ជើញសិស្សឲ្យចែកចាយនូវអ្វីដែលពួកគេពិតជាចូលចិត្តអំពីការឆ្លើយតបរបស់ក្រុមផ្សេងទៀត ។
ដើម្បីបញ្ចប់ អ្នកអាចថ្លែងទីបន្ទាល់ពីសេចក្តីពិតដែលអ្នកបានពិភាក្សានៅថ្ងៃនេះ ។