1 Mga Hari 12–13; 17–22: Leksiyon 81

1 Mga Hari 17

“Siya Miadto ug Nagbuhat Sumala sa Pulong ni Elias”

Ang atong mahigugmaong Langitnong Amahan ug ang Iyang anak, si Jesukristo, kanunay nga naghatag kanato og mga oportunidad sa paglihok uban sa hugot nga pagtuo ngadto Kanila bisan paman sa mga kalisod sa kinabuhi. Sa tungatunga sa hulaw, si propeta Elias mihangyo sa biyuda sa Sarepta nga ihatag kaniya ang kataposan niyang pagkaon. Sa dihang milihok ang biyuda uban sa hugot nga pagtuo, ang Ginoo misaad kaniya og daghang mga panalangin. Sama sa biyuda, atong mapakita ang atong hugot nga pagtuo pinaagi sa pagsunod sa Iyang mga propeta. Kini nga leksiyon makatabang sa mga estudyante nga molihok uban sa mas dakong pagtuo sa Langitnong Amahan ug ni Jesukristo pinaagi sa pagsunod sa mga pulong sa mga propeta.

Pag-andam sa estudyante: Dapita ang mga estudyante sa pag-ila og usa ka butang nga gidapit sa Ginoo nga atong buhaton pinaagi sa Iyang propeta ug usa ka saad nga Iyang gihatag kon ato kining buhaton. Dapita ang mga estudyante nga motambong sa klase nga andam sa pagpakigbahin.

Posibleng mga Kalihokan sa Pagkat-on

Propetikanhong mga pagdapit

Aron sa pagtabang sa mga estudyante nga makita kon sa unsang paagi gihatag sa Langitnong Amahan ug ni Jesukristo kanato ang giya pinaagi sa Ilang mga propeta, mahimo ninyong ipakita ang mosunod nga mga kalihokan. Ikonsiderar ang pag-apil sa kasamtangang propeta ug sa iyang pagdapit nga bag-o lang niyang gihatag. Sa laing paagi, puwede usab hinganlan sa mga estudyante ang pipila ka propeta (lakip ang kasamtangang propeta) ug molista sa labing minos usa ka pagdapit nga gihatag sa Ginoo kanato pinaagi sa matag propeta.

Itukma ang mga propeta uban sa pagdapit nga gihatag sa Ginoo ngadto sa ilang katawhan:

Igsoong lalaki ni Jared Moises Lehi Brigham Young

Mibiya sa Jerusalem ug miadto ngadto sa kamingawan. Milbiyahe ngadto sa Rocky Mountains. Naghimo og mga kasko sa pagtabok sa kadagatan paingon sa gisaad nga yuta. Mitabok sa Pula nga Dagat agi sa uga nga yuta.

Mga Tubag: 1–C (tan-awa sa Ether 2:16; 6:4, 12); 2–D (tan-awa sa Exodo 14:21–22); 3–A (tan-awa sa 1 Nephi 2:1–2); 4–B (tan-awa sa Doktrina ug mga Pakigsaad 136:1). Tingali pwede nimong dapiton ang mga estudyante sa pagpamalandong kon sila ba misunod niinig propetikanhong direksiyon kon sila nabuhi sa panahon niadto nga mga propeta.

Dapita ang mga estudyante sa pagpamalandong sa ilang mga pagtubag sa mga pagdapit sa buhing propeta pinaagi sa pagbuhat sa mosunod.

Sa sukdanan nga 1-10, unsaon ninyo pagsukod sa inyong kaugalingon sa matag usa niini nga mga pamahayag:

• Ako nagtuo nga ang Ginoo nakigsulti pinaagi sa mga propeta.

• Ako kabisado sa unsay gitudlo sa Ginoo pinaagi sa Iyang mga propeta karon.

• Ako mosunod sa mga pagtulun-an sa Ginoo nga gihatag pinaagi sa Iyang mga propeta.

Samtang inyong tun-an ang 1 Mga Hari 17, hatagi og pagtagad ang mga hunahuna ug mga panabot gikang sa Espiritu Santo. Hunahunaa kon sa unsang paagi ang inyong pagtuon karon mahimong makaapekto sa inyong mga pagbati mahitungod niini nga mga pamahayag.

Si Elias ug ang biyuda sa Sarepta

Ang duha ka mosunod nga parapo mahimong basahon o i-summarize.

Tungod sa kadaotan, ang gingharian sa Israel nabahin sa duha ka gingharian: Israel ug Juda (tan-awa sa 1 Mga Hari 11–12). Atol sa paghari sa daotang Hari nga si Achab, ang Ginoo mipadala sa Iyang propeta nga si Elias ngadto sa katawhan sa Israel.

Gamit ang gahom sa Dios, si Elias mipugong sa pag-ulan sa yuta, diin miresulta sa mga tuig nga hulaw. Ang Ginoo mihatag sa mga gikinahanglan ni Elias, misugo kaniya sa pagtago sa sapa diin ang langgam nga uwak nagpakaon kaniya (tan-awa sa 1 Mga Hari 17:1–6).

Usa ka paagi nga mabati sa mga estudyante ang gahom sa ilang pagbasa sa mga kasulatan mao ang paghanduraw sa ilang kaugalingon nga diha sa samang sitwasyon.

Dapita ang mga estudyante sa pagbasa sa mosunod nga mga bersikulo ug sa pagtubag sa mga pangutana pinaagi sa panglantaw ni Elias o sa biyuda. Seguradoha ang pagpasabot nga usa ka paagi nga ang Manluluwas mopahayag sa Iyang mga pulong ngari kanato mao ang pinaagi sa Iyang mga propeta ug ang mga pulong ni Elias niini nga istorya naggikan sa Ginoo.

Mahimong pareson ang mga estudyante, nga sa matag kapares magbasa sa istorya pinaagi sa lainlain nga panglantaw. Ang mga estudyante mahimo dayon nga mogamit sa kaubang mga pangutana sa pag-interbiyo sa ilang kapares mahitungod sa unsay ilang nakat-onan gikan sa ilang panglantaw.

Laing paagi, tingali pwede kamong magpasalida sa “Si Elias ug ang Biyuda sa Sarepta,” nga anaa sa ChurchofJesusChrist.org, gikan sa time code nga 4:09 hangtod 10:06, ug mosunod sa mga bersikulo.

Basaha sa 1 Mga Hari 17:8–16.

• Sa unsang paagi gipakita ang hugot nga pagtuo ni Elias ug sa biyuda kang Jesukristo?

• Sa unsang paagi ang saad sa Ginoo natuman?

• Sa unsang paagi si Elias ug ang biyuda nagsimbolo ni Jesukristo?

  Dapita ang mga estudyante sa pagpakigbahin sa ilang mga tubag. Usa sa mga paagi nga si Elias mahimong mopahinumdom sa mga estudyante mahitungod ni Jesukristo mao ang pagdapit sa biyuda sa pagsunod unsa ang iyang gisulti aron maluwas. Misaad usab siya kaniya nga ang pagkaon mahimong modaghan (1 Mga Hari 17:14–16), sama sa saad sa Manluluwas alang sa uban (tan-awa sa Mateo 14:15–21). Usa sa mga paagi nga ang biyuda mopahinumdom sa mga estudyante mahitungod ni Jesukristo mao ang sa paagi nga siya andam sa pagsakripisyo sa tanan nga anaa kaniya, sama sa gibuhat sa Manluluwas.

  Pangutan-a unsa ang mga leksiyon nga nakat-onan sa mga estudyante gikan niini nga istorya. Mahimong mopakigbahin sila sa lainlaing mga baroganan. Kon dili nila mahisgotan ang mosunod nga kamatuoran, seguroha sa pagdugang niini: Ang paglihok uban sa hugot nga pagtuo sa mga pulong sa Manluluwas magdala sa Iyang gisaad nga mga panalangin. Kini maglakip sa mga pulong sa Manluluwas pinaagi sa Iyang mga propeta.

• Unsa ang nakahimo niini nga lisod sa paglihok pinaagi sa hugot nga pagtuo sa mga pagtulun-an sa Manluluwas?

• Unsay inyong nakat-onan bahin sa Langitnong Amahan ug ni Jesukristo nga makatabang ninyo sa paglihok pinaagi sa hugot nga pagtuo?

Ang mga pulong sa Manluluwas pinaagi sa Iyang mga propeta

Dapita ang mga estudyante sa pagpakigbahin asa makita ang pulong sa Ginoo nga gihatag pinaagi sa Iyang mga propeta. Agi og dugang sa mga kasulatan ug kinatibuk-ang komperensiya, ang mga estudyante mahimong mopakigbahin sa mga dapit sama sa Liahona ug Alang sa Kalig-on sa mga Kabatan-onan nga mga magasin, Alang sa Kalig-on sa mga Kabatan-onan: Usa ka Giya sa Paghimo og mga Pagpili, ug sa social media.

Dapita ang mga estudyante sa paggamit sa bisan asa niini nga mga kapanguhaan aron sa pagkompleto sa mosunod nga kalihokan. Ikonsiderar ang pagpakita sa mga instruksiyon ug hatagi ang mga estudyante og tagal sa pihong oras sa pagtuon.

1. Paghimo og duha ka kolum sa inyong journal sa pagtuon. Pagdrowing og tinapay aron sa pagrepresentar sa tinapay sa biyuda sa wala nga kolum ug lana sa tibud ug tadyaw sa pagkaon (tan-awa sa 1 Mga Hari 17:12, 16) sa tuong kolum.

   

2. Isulat sa wala nga kolum ang Unsa ang gipangayo sa Langitnong Amahan ug ni Jesukristo. Isulat sa tuo nga kolum ang Ilang mga Gisaad nga Panalangin.

3. Sa wala nga kolum, ilista ang mga butang nga gihangyo sa Langitnong Amahan ug ni Jesukristo nga atong buhaton pinaagi sa Ilang mga propeta. Sa tuo nga kolum, ilista ang mga gisaad nga mga panalangin sa pagsunod sa Ilang mga pulong.

Mahimong makatabang ang paghatag og usa ka ehemplo alang sa mga estudyante. Mahimo nimong itanyag ang “pagsunod sa Pulong sa Kaalam” diha sa wala nga kolum. Dayon pwedeng basahon sa mga estudyante ang Doktrina ug mga Pakigsaad 89:18–21 alang sa mga gisaad nga mga panalangin sa Ginoo. Laing paagi, mahimo ninyong ipakigbahin ang usa ka bag-ong ehemplo gikan sa mga pulong sa propeta diha sa kinatibuk-ang komperensiya.

Dapita ang mga estudyante sa pagpakigbahin sa unsay ilang gisulat sa ilang mga kolum sa gagmay nga mga grupo. Seguroha nga ang matag estudyante adunay oportunidad sa pagpakigbahin labing minos usa ka butang gikan sa matag kolum. Dayon mahimong hisgotan sa mga grupo ang mosunod nga pangutana.

• Sa unsang paagi ninyo nakita ang mga panalangin sa pagpakita og hugot nga pagtuo sa mga pulong sa Langitnong Amahan nga gihatag pinaagi sa Iyang mga propeta?

Ikonsiderar ang pagdapit sa mga estudyante sa pagpakigbahin sa mga ehemplo gikan sa ilang kinabuhi diin ilang nakita ang mga panalangin gikan sa pagsunod sa propetikanhong tambag. Isip kabahin sa panaghisgotan, mahimo nimong ipasalida ang “Nianang Gabii ang Akong Pamilya Adunay Igo” (1:47) o “Mga Amahan ug mga Anak” (5:42), nga anaa sa ChurchofJesusChrist.org.

Plano aron sundon ang mga propeta sa Dios

Awhaga ang mga estudyante nga tinguhaon ang tabang sa Espiritu Santo samtang ilang buhaton ang mosunod nga kalihokan.

1. Sa wala nga kolum, isulat o linginan ang butang nga gihangyo sa Ginoo nga inyong buhaton pinaagi sa Iyang mga propeta nga inyong gibati nga gusto Niyang inyong tutokan.

2. Sa tuo nga kolum, isulat o linginan sa unsang paagi ang Ginoo misaad sa pagpanalangin kaninyo kon inyong sundon ang Iyang tambag.

3. Pamalandongi kon unsa ang inyong gisulat o gilinginan, dayon isulat ang inyong plano nga magmasulundon kon unsa ang gipangayo sa Ginoo nga inyong buhaton pinaagi sa Iyang propeta.

Dapita ang mga estudyante sa pagpangita og paagi sa paghinumdom unsa ang ilang giplanohan nga buhaton. Pananglitan, ang mga estudyante mahimong mokuha og hulagway sa ilang tubag ug gamiton kini isip wall paper sa ilang phone. Ang mga estudyante adunay oportunidad sa pag-follow up ug pagreport sa ilang plano sa Leksiyon 96: “Sukda ang Imong Nakat-onan 6.”

Ikonsiderar ang pagtapos sa klase pinaagi sa pagpamatuod nga ang mga estudyante mahimong maduol ni Jesukristo pinaagi sa ilang mga paningkamot sa pagsunod sa Iyang propeta.

Dugang nga mga Kapanguhaan

Kinsa man si Elias?

Ang Giya ngadto sa mga Kasulatan naghatag og dugang impormasyon mahitungod ni Elias ug ang kamahinungdanon sa gahom sa pagselyo nga iyang gihuptan sa karaang mga panahon ug padayong gihuptan sa modernong mga panahon.

Unsa kaha kon ang akong ihatag murag dili paigo?

Si Sister Michelle D. Craig, kanhi sa Kinatibuk-ang Kapangulohan sa Young Women, mipasabot:

Kamo ug ako makahatag kon unsay anaa kanato ngadto kang Kristo, ug Iyang pilo-piloon ang atong mga paningkamot. Unsay inyong mahalad sobra na kaayo—bisan pa sa inyong tawhanong mga kahuyang—kon mosalig kamo sa grasya sa Dios. (“Pagkabalaan nga Wala Matagbaw,” Liahona, Nob. 2018, 54)

Sa unsang paagi ang Ginoo mopanalangin kanako isip usa ka matinud-anon nga mosunod sa Iyang propeta?

Si Elder Randall K. Bennett sa Seventy mitudlo:

Ako mosaad nga kon kamo molihok uban sa hugot nga pagtuo sa inyong Langitnong Amahan ug sa Iyang plano—Iyang dakong plano sa kalipay—ug kon kamo molihok uban sa hugot nga pagtuo ni Jesukristo ug sa Iyang Pag-ula ug mosunod sa mga propeta sa Dios, kamo hatagan og gahom sa pagbuhat sa bisan unsa nga ang Ginoo nagkinahanglan nga kamo mobuhat ug mahimong si bisan kinsa nga kinahanglan ka Niyang mamahimo, bisan paman sa imong sirkumstansiya. (“Prophetic Invitations and Promised Blessings,” [Brigham Young University devotional, Mar. 19, 2019], 1, speeches.byu.edu)

Ang Dios ba nagpadayon sa pagsugo sa Iyang katawhan sa paghimo og malisod nga mga butang?

Si Presidente Russell M. Nelson mitudlo:

Ang Dios kanunay nga misugo sa Iyang mga anak sa pakigsaad sa pagbuhat sa lisod nga mga butang. Tungod kay kamo mga anak sa Dios nga nagtuman sa pakigsaad nga nagpuyo sa ulahing bahin niining ulahing mga adlaw, ang Ginoo mohangyo kaninyo sa pagbuhat sa malisod nga butang. Makasiguro kamo niana. …

Kamo hangyoon sa pagdawat og mahagitong mga buluhaton ug mahimong instrumento sa mga kamot sa Ginoo. Ug Siya makapahimo kaninyo nga makab-ot ang imposible. (“Pagkahimo nga Tinuod nga mga Milenyal tibuok kalibotang debosyonal para sa mga young adult, Ene. 10, 2016], Librarya sa Ebanghelyo)

Dugang nga mga Kalihokan sa Pagkat-on

1 Mga Hari 17:17–24. Gibuhi ni Elias ang anak nga lalaki sa biyuda gikan sa pagkamatay

Mahimong makatabang sa mga estudyante ang pagtan-aw og laing ehemplo sa hugot nga pagtuo sa biyuda sa Sarepta sa 1 Mga Hari 17. Mahimong dapiton nimo ang mga estudyante sa pagbasa sa 1 Mga Hari 17:17 aron makita kon unsay nahitabo sa anak nga lalaki sa biyuda. Pwede nimong hisgotan ang mosunod:

• Ngano tingali nga morag mapakahingangha para sa biyuda?

• Unsay inyong marekomenda nga buhaton sa biyuda?

Ang mga estudyante mahimo dayon nga mobasa sa 1 Mga Hari 17:19–23 aron makita kon sa unsang paagi ang biyuda mitubag sa sitwasyon.

• Unsa ang atong makat-onan gikan niini nga istorya?

Makatabang ka sa mga estudyante sa pagkakita sa katinuod sa mga hagit sa atong mga kinabuhi bisan kon matinud-anon kitang motubag sa mga pulong sa propeta.

Basaha ang 1 Mga Hari 17:24, nga mangita sa gipakigbahin nga pagpamatuod sa biyuda human niini nga kasinatian.

• Sa unsang paagi ang inyong hugot nga pagtuo ni Jesukristo nalig-on pinaagi sa mga hagit?

Duha ka gingharian

Ang mga panghitabo sa 1 Mga Hari 17 mao ang unang mga panghitabo sa kasulatan nga tun-an sa mga estudyante sa seminary nga nahitabo human ang gingharian sa Israel nabahin sa 1 Mga Hari 11–12. Ang mosunod nga kinatibuk-ang pagpasabot mahimong makatabang sa mga estudyante nga makasabot sa konteksto sa mga gingharian sa Israel ug Juda.

Sa pagsugod niini nga panaghisgot, mahimo nimong ipakita ang mosunod nga han-ay sa panghitabo ug mohangyo sa mga estudyante sa pag-ila asa si Hari Solomon.

Ang mga estudyante mahimo dayon nga mobasa o mo-summarize sa mosunod nga parapo.

Bisan tuod si Solomon nagsugod isip usa ka matarong nga sumusunod sa Ginoo, sa kataposan siya mipili sa pagsupak sa mga sugo sa Ginoo. Isip resulta sa iyang pagsupak, ang Ginoo misulti ni Solomon nga ang gingharian sa Israel mahimong kuhaon gikan kaniya ug ihatag ngadto sa iyang sulugoon si Jeroboam. Ang gingharian ni Jeroboam mahimong inila sama sa gingharian sa Israel, Ephraim, o ang amihanang gingharian. Ang anak ni Solomon si Rehoboam mahimong hari sa nahibiling duha ka tribo. Ang gingharian ni Rehoboam mahimong inila sama sa gingharian sa Juda, o sa amihanang gingharian (tan-awa sa 1 Mga Hari 11:10–13, 26–40; 12:16–20).

Gamit ang han-ay sa mga panghitabo, ang mga estudyante mahimo dayon nga moila sa duha ka gingharian ug sa mga propeta nga migsangyaw niana nga mga gingharian ug ipasabot unsa ang mahitabo sa kataposan sa matag usa sa gingharian.

Alang sa dugang mahitungod sa gingharian sa Juda tan-awa ang mosunod nga parapo nga makita sa “Juda” ngadto sa Giya sa mga Kasulatan.

Alang sa dugang mahitungod sa gingharian sa Israel tan-awa sa“Israel, Kingdom of” sa Bible Dictionary.