Ruth; 1 Samuel 1–7

Ruth; 1 Samuel 1–7

Kinatibuk-ang Pagpasabot

Ang asoy ni Ruth, Noemi, ug Boas maoy usa ka istorya sa katubsanan. Gipakita niini kon sa unsang paagi kita matubos sa Manluluwas. Gihatagan kita og ehemplo ni Hana sa mapaubsanong pag-ampo, samtang nangayo siya sa Dios og usa ka anak nga lalaki. Gitubag sa Dios ang iyang mga pag-ampo. Samtang nagdako ang anak ni Hana, si Samuel, nakadungog siya og tingog. Sa tabang sa pari nga si Eli, nailhan kini ni Samuel isip ang tingog sa Ginoo.

Pangita og Angay nga mga Paagi sa Pagpahayag sa imong Gugma. Pwede nimong angay nga ipahayag ang imong gugma sa mga estudyante sa daghang paagi. Samtang bation sa mga estudyante ang imong gugma, mahimo silang mas komportable sa klase ug dawaton nila ang mga impresyon sa Espiritu Santo. Ang Manluluwas mao ang hingpit nga ehemplo sa pagpakita og gugma. Aron makakat-on og dugang, tan-awa ang “Gipahayag sa Manluluwas ang Iyang Gugma alang Niadtong Iyang Gitudloan” diha sa Pagtudlo Sumala sa Pamaagi sa Manluluwas. Aron makapraktis og usa ka paagi sa angay nga pagpahayag sa gugma, tan-awa ang pagbansay nga “Pagpadala og mensahe ngadto sa ginikanan sa estudyante mahitungod sa usa ka butang nga positibo nga imong namatikdan mahitungod sa ilang anak.” diha sa Pagpalambo sa mga Kahanas sa Magtutudlo.

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Ruth

Katuyoan sa leksiyon: Aron tabangan ang mga estudyante nga mobati og mas dako nga tinguha sa pagsalig kang Jesukristo ug sa Iyang gahom sa pagtubos.

• Pagpangandam sa estudyante: Dapita ang mga estudyante nga ikonsiderar kon nganong usa sa mga titulo ni Jesukristo mao ang Manunubos. Dapita sila nga pamalandongan kon sa unsang paagi kita gitubos ni Jesukristo gikan sa pisikal ug espirituwal nga kamatayon. (Pwede nilang tan-awon ang “Tubos, Gitubos, Katubsanan” diha sa Giya ngadto sa mga Kasulatan alang sa tabang.) Dasiga sila nga mosulod sa klase nga andam mopakigbahin sa ilang mga hunahuna ngadto sa klase.

• Sulod nga ipakita: Usa ka litrato ni Jesukristo

• Handout: “Si Ruth ug Naomi Gitubos”

• Mga bidyo: “Pagpangita sa Katuyoan sa Imong Kinabuhi: Importante Ba ang Hugot nga Pagtuo?” (5:08); “Biyai ang Kanhing mga Kasaypanan” (3:43)

1 Samuel 1

Katuyoan sa leksiyon: Aron tabangan ang mga estudyante nga masabtan nga ang Langitnong Amahan maminaw sa ilang mapaubsanong mga pag-ampo ug mopanalangin kanila.

• Pagpangandam sa estudyante: Dapita ang mga estudyante nga maghunahuna og usa ka kasinatian dihang nadawat nila o sa ilang kaila ang tubag sa pag-ampo. Pwedeng mangandam ang mga estudyante sa pagpakigbahin niana nga kasinatian isip kabahin sa kalihokan sa pagtuon.

• Posibleng mga Bidyo: “Naa Ba Gyod Ka?” (3:46); “Pabilin Uban Kanako,” (3:08); “Ang Hugot nga Pagtuo ni Hana” (3:08); “Kon Giunsa Nako #PagkadungogNiya: Elder D. Todd Christofferson” (2:25); “One–on–One (Pagpangalagad uban ang Gugma)” (13:02) gikan sa timecode 7:24 hangtod 9:00.

1 Samuel 3

Katuyoan sa leksiyon: Aron tabangan ang mga estudyante nga tinguhaon ug ilhon ang personal nga pagpadayag.

• Pagpangandam sa estudyante: Pangutan-a ang mga estudyante, “Sa unsang paagi nimo madungog ang tingog sa Ginoo diha sa imong kinabuhi?” Dapita sila sa pagpamalandong kon unsaon nila pagtubag. Pwede usab nilang pangutan-on ang mga higala o mga sakop sa pamilya.

• Mga aytem nga andamon: Taptap sa mata

• Handout: “Unsaon Nako sa Pag-ila ang Tingog sa Ginoo?”