Mga Maghuhukom 2–4; 6–8; 13–16: Leksiyon 67

Sukda ang Imong Nakat-onan 4

Mga Numero–Mga Maghuhukom

Ang pagpamalandong ug ang pagsukod sa atong espirituhanon nga pagkat-on makatabang nato aron mas mapaduol sa atong Langitnong Amahan ug kang Jesukristo. Kini nga leksiyon gituyo aron tabangan ang mga estudyante nga pamalandongan ang gitakda nilang mga tumong ug ang pag-uswag nga ilang nasinati panahon sa bag-ohay lang nga pagtuon sa Daang Tugon.

Pagpangandam sa estudyante: Dapita ang mga estudyante nga mosulod nga andam sa pagpakigbahin sa ilang nakat-onan o sa mga paagi nga sila mitubo sa espirituhanong paagi sukad sa pagsugod sa ilang pagtuon sa Daang Tugon niining tuiga. Pwede nimong isugyot nga ilang rebyohon ang ilang mga journal sa pagtuon o mubo nga mga sulat diha sa ilang mga kasulatan aron matabangan sila nga mamatikdan ang ilang pagkat-on ug pag-uswag.

Posibleng mga Kalihokan sa Pagkat-on

Ang pagtuon sa imong klase sa Daang Tugon nagpunting tingali sa laing resulta kay sa gisukod niini nga leksiyon. Kon mao, ipahiangay ang mga kalihokan sa pagsukod sa nasinati nga pag-uswag sa mga estudyante gikan sa mga resulta nga gipunting sa imong klase.

Niini nga leksiyon, ang mga estudyante makabaton og oportunidad sa pagsukod sa ilang pag-uswag sa:

1. Pagpasabot sa mga matang o mga simbolo ni Jesukristo gikan sa Daang Tugon. (Hinumdomi: Kini nga kalihokan may kalabotan sa nagkalain-laing mga leksiyon sa tibuok Daang Tugon, lakip ang Leksiyon 57: “Mga Numero 21.”)

2. Pagbaton og dugang nga tinguha sa paghigugma sa Ginoo sa tibuok nilang kasingkasing. (Hinumdomi: Kini nga kalihokan may kalabotan sa unsay gihimo sa mga estudyante sa Leksiyon 58: “Deuteronomio 6:1–6.”)

3. Pagsunod sa mga sugo sa Ginoo. (Hinumdomi: Kini nga kalihokan may kalabotan sa unsay gihimo sa mga estudyante sa Leksiyon 49: “Exodo 20:1–11,” Leksiyon 58: “Deuteronomio 6:1–6,” Leksiyon 59: “Deuteronomio 6:6-25; 7:1-26; 8:1-20,” ug Leksiyon 60: “Deuteronomio 15.”)

Ang kaimportante sa atong direksyon kay sa gipaspason

Aron tabangan ang mga estudyante sa paghisgot sa kaimportante sa espirituhanon nga pag-uswag, dapita sila sa paghisgot sa mosunod nga pangutana isip usa ka klase o sa gamayng grupo:

• Unsa ang pipila ka pananglitan sa sports o sa kinabuhi diin mas importante kon asa ka paingon kay sa imong gipaspason?

Ipakita ang mosunod nga pahayag ug dapita ang mga estudyante nga pangitaon ang kaimportante sa direksyon kon bahin sa espirituhanon nga pag-uswag.

Si Elder Larry R. Lawrence sa Seventy mitudlo bahin sa atong espirituhanon nga pag-uswag.

Ang atong Langitnong Amahan nahibalo sa atong balaanong potensyal. Magmaya Siya sa matag higayon nga magpadayon kita. Para Niya, ang atong direksyon mas importante kay sa atong gipaspason.

Magmakanunayon, mga kaigsoonan, apan ayaw kawala sa paglaom. (“Unsa Pa May Akong Kulang?” Liahona, Nob. 2015, 35)

• Sa imong hunahuna, nganong mas importante sa atong Langitnong Amahan ang direksyon sa atong espirituhanon nga pag-uswag kay sa atong gipaspason?

  Maglisod tingali ang pipila ka estudyante sa pag-ila sa ilang espirituhanon nga pag-uswag. Ipasabot nga ang pagpamalandong kon asa na kita karon kon itandi kon asa kita kaniadto—bisag gamay ra kaayo ang atong pag-uswag—makatabang nato nga mailhan ang espirituhanon nga pag-uswag. Pwedeng hinumdoman sa mga estudyante ang ilang nakat-onan bahin sa Manluluwas, ang matarong nga mga batasan nga ila nang naugmad, o ang mga paagi diin naningkamot sila sa pagkinabuhi nga sama kang Jesukristo.

  Ikonsiderar ang pagdapit sa mga estudyante sa paggahin og pipila ka minuto sa pagrebyo sa ilang journal sa pagtuon o mubo nga mga sulat diha sa ilang mga kasulatan. Pwede nilang tan-awon kon unsay ilang gisulat bahin sa Manluluwas, espirituwal nga mga impresyon o mga panabot, o bisan unsang plano nga gusto nilang himoon.

  Dapita ang mga estudyante sa pagpakigbahin sa unsay ilang nakaplagan. Dayon, dapita sila nga tubagon diha sa ilang mga journal sa pagtuon ang mga pangutana nga sama sa mosunod:

• Sa unsang paagi nimo namatikdan ang pag-uswag o paglambo sukad sa pagsugod sa tuig sa pagtungha diha sa imong mga paningkamot nga sundon si Jesukristo?

• Unsay imong nakat-onan o nagamit gikan sa imong pagtuon sa Daang Tugon?

Dapita ang mga estudyante nga gustong mopakigbahin sa ilang mga tubag ngadto sa klase.

Samtang imong sukdon ang imong nakat-onan karon, pangandam sa pagdawat sa mga impresyon gikan sa Espiritu Santo aron matabangan kang mailhan ang imong espirituhanon nga pag-uswag sa pagsunod kang Jesukristo—bisan kon ginagmay lang nga paglambo.

Ipasabot ang mga matang o mga simbolo ni Jesukristo gikan sa Daang Tugon

Hatagi og higayon ang mga estudyante nga magpraktis sa pagpasabot kon sa unsang paagi ang pipila sa mga matang o mga simbolo nga bag-ohay lang nilang gitun-an diha sa Daang Tugon nagtudlo kanato ngadto kang Jesukristo (tan-awa sa Moises 6:63).

Usa ka paagi sa pagbuhat niini mao ang pagpakita sa mosunod nga litrato ug sa pagpangutana sa mga estudyante kon unsay ilang nahinumdoman bahin niini nga asoy diha sa mga kasulatan. Kon nagkinahanglan og tabang ang mga estudyante, mahimo nimong i-refer sila sa Mga Numero 21:4–9. Dayon pwedeng magpraktis ang mga estudyante sa pagpasabot kon sa unsang paagi kini nga simbolo nagtudlo sa atong mga hunahuna ngadto sa tahas ug sa misyon ni Jesukristo pinaagi sa paghisgot sa ilang mga tubag sa mosunod nga duha ka pangutana:

• Unsay gitudlo sa simbolo sa bitin nga tumbaga nga diha sa tukon bahin ni Jesukristo?

• Giunsa pagtuman ni Jesukristo kining sama nga tahas diha sa atong kinabuhi?

  Pwedeng ipasabot sa mga estudyante nga ang Manluluwas adunay gahom sa pag-ayo kanato dili lang sa pisikal nga mga balatian apan usab sa espirituwal nga mga hagit sama sa kawalay pagtuo o kagahi sa kasingkasing. Kon makatabang, pahinumdomi ang mga estudyante nga sa Leksiyon 57: “Mga Numero 21” nakat-onan nila nga ang simbolo sa bitin nga tumbaga makatudlo nato nga samtang motutok kita sa Manluluwas uban sa hugot nga pagtuo, Siya moayo kanato.

  Pwede nimong hatagan og laing higayon ang mga estudyante nga magpraktis sa pagpasabot sa ubang simbolo diha sa Daang Tugon nga nagtudlo sa atong mga hunahuna ngadto sa mga tahas ug misyon ni Jesukristo. Ang nahibiling bahin niini nga seksiyon naghisgot kon unsaon kini nimo paghimo.

• Unsa pay laing mga matang o mga simbolo ni Jesukristo nga imong mahinumdoman sa pagtuon nimo sa Daang Tugon?

Ilista ang mga tubag sa mga estudyante diha sa pisara. Mahimong isulti tingali sa mga estudyante ang paghalad og mga hayop (tan-awa sa Moises 5:5–7; Levitico 1), si Abraham ug Isaac (tan-awa sa Genesis 22:1–19), mga simbolo gikan sa Pagsaylo (tan-awa sa Exodo 12), tubig (tan-awa sa Exodo 15:23–26; 17:1–6), mana (tan-awa sa Exodo 16), mga maghuhukom o mga tigluwas (tan-awa sa Mga Maghuhukom 3:9), o uban pa.

Dapita ang mga estudyante nga ipasabot kon sa unsang paagi ang pagsabot niini nga mga matang ug mga simbolo sa Manluluwas makatabang nato karon. Aron mahimo kini, ipakita ang mosunod nga mga instruksiyon ug dapita ang mga estudyante nga makigtinabangay sa ilang kapares.

Pagpili og usa sa mga matang o mga simbolo ni Jesukristo gikan sa Daang Tugon ug ipasabot ang mosunod:

1. Unsa kana nga matang o simbolo nga nagtudlo nimo bahin kang Jesukristo.

2. Ang mga paagi nga gituman ni Jesukristo ang samang tahas diha sa atong kinabuhi.

Human sa igong panahon, dapita ang mga estudyante sa pagpakigbahin sa ilang mga tubag ngadto sa laing pares o sa klase.

Pagbaton og dugang tinguha sa paghigugma sa Ginoo uban sa tibuok natong kasingkasing

Aron tabangan ang mga estudyante sa pagpamalandong sa kasamtangan nilang tinguha sa paghigugma sa Ginoo uban sa tibuok nilang kasingkasing, ikonsiderar ang pagdrowing og kasingkasing diha sa pisara sama sa mosunod. Ayaw usa drowinga ang linya o kolori ang usa ka bahin sa kasingkasing. Sugdi kini nga seksiyon pinaagi sa pagtabang sa mga estudyante nga maghunahuna kon unsa ka dako ang ilang gugma sa mga butang o sa mga tawo diha sa ilang kinabuhi. Ang mosunod maoy usa ka paagi sa paghatag og pagtagad niini:

• Unsa ang pipila ka butang o kinsa ang pipila sa mga tawo nga gimahal nimo? Unsa ang pipila ka paagi nga imong mapakita kon unsa nimo sila kamahal?

Pwede kang mopili og usa ka estudyante nga mipakigbahin sa usa ka butang nga ilang gimahal. Pwede nimo silang hangyoon nga moadto sa pisara ug magdrowing og linya diha sa kasingkasing nga nagpakita kon unsa ka dako ang ilang paghigugma niana nga butang. Likayi ang pagdapit nila nga ipakigbahin kon unsa ka dako ang ilang gugma para sa mga indibidwal.

Basaha ang Deuteronomio 6:4–6, nga pangitaon kon unsaon nato paghigugma ang Langitnong Amahan ug si Jesukristo.

• Unsaon man nimo kini pagpakita diha sa kasingkasing?

Depende sa isulti sa mga estudyante, pwede nimong koloran ang nahibiling bahin sa kasingkasing.

Sa Leksiyon 58: “Deuteronomio 6:1–6,” gidapit ang mga estudyante nga hisgotan kon sa unsang paagi mapahayag sa mga indibidwal ang ilang paghigugma sa Dios sa lainlain nga kahimtang. Pahinumdomi ang mga estudyante niini sa nag-unang panaghisgot, kon pwede .

Hain sa mosunod ang bag-ohay lang nakaapektar sa imong gugma alang sa Langitnong Amahan ug kang Jesukristo:

• Mga kasinatian sa imong kinabuhi o sa kinabuhi sa uban?

• Mga kasulatan nga bag-ohay lang nimong gitun-an sa tinagsa-tagsa, uban sa imong pamilya, diha sa simbahan, o sa seminary?

Pwede nimong dapiton ang pipila ka andam nga mga estudyante sa pagpakigbahin. Aron tabangan ang mga estudyante sa timbang-timbang sa kasamtangan nilang tinguha sa paghigugma sa Ginoo uban sa tibuok nilang kasingkasing, pwede nimo silang padrowingon og kasingkasing diha sa ilang journal sa pagtuon ug ibutang diha sa kasingkasing kon sa unsang paagi sila sa kasamtangan nahigugma sa Dios diha sa ilang kasingkasing. Pwede nilang pamalandongan ang pipila ka pangutana aron matabangan sila.

Pamalandonga ang imong kasamtangang pagbati ngadto sa Langitnong Amahan ug kang Jesukristo gamit kini nga mga pangutana:

• Sa milabayng pipila ka semana, gibati ba nimo nga ang imong gugma sa Langitnong Amahan ug kang Jesukristo midako, nakuhaan, o parehas lang?

• Unsay nakaapekto sa imong pagbati karon bahin Kanila?

• Sa unsang paagi ka maningkamot sa paghigugma Kanila sa tibuok nimong kasingkasing, kalag, ug kusog?

Sunda ang mga sugo sa Ginoo

Atol sa ilang bag-ohay lang nga pagtuon sa Daang Tugon, nakat-onan tingali sa mga estudyante ang bahin sa ubay-ubay nga mga sugo sa Dios. Aron tabangan ang mga estudyante nga sukdon ang ilang mga paningkamot sa pagsunod sa mga sugo sa Ginoo, ikonsiderar ang pagdrowing og dako nga pinabaga nga 1 diha sa pisara. Kini nga 1 pwedeng magrepresentar sa ilang tinguha nga unahon ang Dios diha sa ilang kinabuhi pinaagi sa pagsunod sa Iyang mga sugo.

Ang mga estudyante mahimong magdrowing og 1 diha sa Leksiyon 49: “Exodo 20:1–11” ug magsulat og plano sa pagsunod sa usa sa mga sugo sa Dios duol niini nga 1 diha sa ilang journal sa pagtuon. Kon mao, dapita ang mga estudyante nga rebyohon ang ilang plano.

Kon wala pa makahimo daan og drowing o makahimo og plano ang mga estudyante, ikonsiderar ang pagdapit nila sa paghimo niini karon.

Pamalandonga ang imong pag-uswag pinaagi sa pagtubag sa mosunod nga mga pangutana diha sa imong journal sa pagtuon:

• Kumusta ang imong mga paningkamot sa pagsunod niini nga sugo? Unsa nga mga panalangin, pag-uswag, mga babag, o mga kalisdanan ang imong nabantayan?

• Sa unsang paagi ka mibati nga mas duol sa Dios samtang naningkamot sa pagsunod niini nga sugo? O sa unsang paagi ka mobati nga mas duol Kaniya samtang naningkamot ka sa pagsunod niini?

Dapita ang mga estudyante nga padayong maningkamot sa pag-una sa Dios diha sa ilang kinabuhi. Pwede usab nga magdrowing ang mga estudyante og bag-o nga 1 ug isulat sa sulod o duol niini ang bag-o nga sugo nga gusto nilang tutokan.

Pahinumdomi ang mga estudyante nga mas importante para sa Langitnong Amahan ang ilang espirituwal nga direksyon nga ilang padulngan kay sa ilang gipaspason. Pagpamatuod sa Iyang tabang ug dasiga sila nga magpadayon diha sa dalan sa pakigsaad, bisan kon ang ilang pag-uswag morag hinay.