Exodo 1–6: Leksiyon 38

Exodo 1

Pagpasidungog sa Dios bisan Nag-atubang sa Oposisyon

Giulipon sa Ehiptohanon nga paraon ang mga Israelinhon ug gisugo ang mga mananabang nga patyon ang mga batang lalaki nga Israelinhon inigkatawo nila. Kini nga mga mananabang wala mituman kang Paraon tungod sa ilang pagtahod sa Dios. Sama niining matinud-anong mga babaye, makapili ta nga mosalig sa Dios bisan og lisod ang mga kahimtang. Kini nga leksiyon makatabang sa mga estudyante nga magtinguha nga unahon ang Dios kay sa ubang pagpamugos.

Pagpangandam sa estudyante: Ikonsiderar ang pagdapit sa mga estudyante nga mangutana sa sakop sa pamilya o higala kon sa unsang paagi nila nakita nga gipanalanginan sila sa Dios tungod sa pagsunod Kaniya imbes sa uban.

Posibleng mga Kalihokan sa Pagkat-on

Kristohanon nga kaisog

Ikonsiderar ang pagpakigbahin sa mosunod gikan ni Presidente Nelson.

Gihulagway ni Presidente Russell M. Nelson ang mga hiyas sa mga disipulo ni Jesukristo:

Ang tinuod nga mga disipulo ni Jesukristo andam nga magpabantang, motingog, ug magpalahi gikan sa mga tawo sa kalibotan. Sila walay kahadlok, maunongon, ug maisogon. (“Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 40–41)

• Nganong nagkinahanglan og kaisog ang paglihok sa paagi nga gihulagway ni Presidente Nelson?

• Sa imong hunahuna, nganong importante ang pagsunod sa tambag ni Presidente Nelson?

Ipakita ang mosunod nga pagsukod sa kaugalingon aron tabangan ang mga estudyante nga pamalandongan kon unsay ilang gibati bahin sa pagtuman sa Dios imbes magpadala sa uban pang pagpamugos.

Basaha ang mosunod nga mga pamahayag ug i-rate kon unsa kini ka tinuod kanimo gikan sa sukdanan nga 1 (dili gyod tinuod) hangtod 5 (tinuod kaayo).

• Andam ko nga unahon ang Ginoo, bisan mibati ko og pagpamugos sa uban nga paubsan ang akong mga sumbanan.

• Dili ko segurado kon ang Dios mopanalangin ba nako sa pagpaningkamot nga tumanon ang Iyang mga sugo.

• Andam kong barogan ang akong gituohan nga sakto, bisan og dili kini ang gipili sa kadaghanan.

Awhaga ang mga estudyante sa paghatag og gibug-aton sa mga impresyon gikan sa Espiritu samtang ilang tun-an ang Exodo 1. Makatabang nila ang Espiritu sa pagpangandam nga molihok uban ang kaisog dihang mobati sila og pagpamugos sa pagbuhat sa mga butang nga supak sa kabubut-on sa Dios.

Matarong nga mga ehemplo

Ikonsiderar ang pagdapit sa mga estudyante nga ipakigbahin kon unsay ilang nahibaloan nga nahitabo sa mga Israelinhon human mamatay si Jose sa Ehipto. Kon kinahanglan, gamita ang pipila o ang tanan sa mosunod nga summary.

Human mamatay si Jose sa Ehipto, nanaghan ang mga Israelinhon (gitawag usab og mga Judeo) sa yuta sa Ehipto. Kay nahadlok nga basin og mapildi sa mga Israelinhon ang mga Ehiptohanon, ang bag-o nga paraon miulipon nila (tan-awa sa Exodo 1:6–14).

Basaha ang Exodo 1:15–16, nga pangitaon kon unsay gisugo sa Paraon kang Sipra ug ni Pua, ang duha ka Hebreohanon nga mga mananabang, nga buhaton. Ang “mga mananabang” nagpasabot sa mga babaye nga motabang sa pagpanganak. Ang “lantay” sa (bersikulo 16) nagpasabot sa mga angkanan nga gigamit sa mga babaye nga nanganak.

Dapita ang mga estudyante sa pagpakigbahin sa unsay ilang nakaplagan. Pangita og mga paagi aron tabangan ang mga estudyante nga masabtan ang pagpamugos nga gibati niining mga babaye nga buhaton kon unsay gusto sa uban imbes kon unsay gusto sa Dios. Ang mosunod nga pangutana ug kalihokan maoy usa ka paagi aron mabuhat kini.

• Kon ikaw si Sipra o si Pua, unsay nakapalisod alang kanimo sa pag-una sa kabubut-on sa Dios kay sa kang Paraon?

Ikonsiderar ang paggrupo-grupo sa klase. Dapita ang mga grupo sa pag-ila sa mga kahimtang nga ilang giatubang o posibleng maatubang diin maglisod ang pagpili sa kabubut-on sa Dios tungod sa ubang mga pagpamugos. Pahimoa sila og listahan sa mga rason kon nganong mabalaka ang usa ka tawo mahitungod sa pagsunod sa Dios sa maong mga kahimtang.

Basaha ang Exodo 1:17–21, nga pangitaon kon nganong mihimo og mga desisyon ni Sipra ug Pua.

• Unsay imong nakaplagan?

• Unsay naa niini nga mga bersikulo ang makapadasig sa usa ka tawo nga nagduhaduha tingali kon unahon ba nila ang Dios labaw sa ubang mga pagpamugos nga ilang giatubang?

  Samtang nakigbahin ang mga estudyante, pwede nimo silang sultihan nga ang “kahadlok sa Dios” (tan-awa sa mga bersikulo 17, 21) nagpasabot og pagtahod o pagrespeto sa Dios. Ipasabot nga ang hugpong sa mga pulong nga “ang Dios naluoy” kang Sipra ug Pua (bersikulo 20) kon wala kini makita sa mga estudyante. Dapita ang mga estudyante nga markahan kini nga hugpong sa mga pulong. Nagpasabot kini nga gipanalanginan sa Dios si Sipra ug Pua tungod sa pag-una Kaniya labaw sa mga pagpamugos nga ilang giatubang. Usa ka panalangin nga gihatag sa Ginoo kang Sipra ug Pua maoy mga kaliwat.

• Unsang kamatuoran ang atong makat-onan gikan kang Sipra ug Pua nga makatabang nato dihang mag-atubang kita og mga pagpamugos nga sundon ang uban imbes ang Dios?

  Gamit ang kaugalingon nilang mga pulong, mailhan sa mga estudyante ang kamatuoran nga sama sa kon atong itugyan ang atong kabubut-on ngadto sa Dios imbes magpadaog sa ubang mga pagpamugos, Siya mopanalangin kanato.

  Bisan og ang nahibilin nga bahin sa leksiyon nagtutok kon sa unsang paagi “ang Dios [maluoy]” nato, pwede nimong ikonsiderar ang paggahin og panahon sa pagtutok sa ehemplo sa Manluluwas sa pagtugyan ngadto sa kabubut-on sa Langitnong Amahan. Pwede kang mangutana og sama sa mosunod aron mahimo kana. Kon naglisod ang mga estudyante sa paghatag og mga pananglitan, pwede nimo silang idirekta sa Juan 6:38 o Lucas 22:42.

• Unsay gitudlo o gihimo sa Manluluwas nga nagpakita kon sa unsang paagi Siya mao ang hingpit nga ehemplo niini nga kamatuoran?

  Paghunahuna og kalihokan nga makatabang sa mga estudyante nga masabtan ang mga paagi nga ang Ginoo maluoy (mopanalangin) kanila tungod sa pagtahod Kaniya pinaagi sa pag-una Kaniya. Ania ang duha ka ideya. Pagpili og usa niini o lain nga imong pilion aron tabangan ang mga estudyante nga matubag ang mosunod nga mga pangutana.

  1. Ipakigbahin sa mga estudyante ang bidyo nga “Biya sa Parti” (6:26) o ang bidyo nga “Magmaisogon diha sa Kaisog, Kalig-on, ug Pagkaabtik” gikan sa time code nga 1:20 hangtod 5:13 (ang duha ka bidyo anaa sa ChurchofJesusChrist.org). Dapita ang mga estudyante sa pag-ila kon giunsa pagpanalangin sa Ginoo si John tungod sa pag-una sa Dios bisan pa sa mga pagpamugos.

  1. Hatagi ang mga estudyante og pipila ka kasulatan nga tun-an nga nagpakita sa mga paagi nga naluoy ang Dios sa uban tungod sa pagpili Kaniya imbes ang ubang mga pagpamugos. Pwede nilang tun-an ang 2 Nephi 5:6–13; Mosiah 24:11–15; 4 Nephi 1:15–18. Pwede usab pangitaon sa mga estudyante ang ubang kasulatan nga naghulagway kon sa unsang paagi maluoy ang Dios sa Iyang mga anak dihang unahon nila Siya.

• Unsa kahay mahitabo dihang “ang Dios maluoy” nato?

• Sa unsang paagi naluoy ang Dios nimo o sa imong kaila tungod sa pagtugyan sa Iyang kabubut-on imbes magpadaog sa ubang mga pagpamugos?

• Nganong bililhon kanimo ang pagpili nga unahon ang Dios bisan og unsa pay resulta?

Pagtugyan sa kabubut-on sa Dios

Ikonsiderar ang pagpakita sa mosunod nga mga pangutana aron tabangan ang mga estudyante nga maghunahuna mahitungod sa unsay ilang nakat-onan o gibati karong adlawa ug sa unsang paagi kini nakatabang nila dihang mag-atubang og lisod nga mga sitwasyon.

Pagpili og usa sa mosunod nga mga pangutana nga imong tubagon sa imong journal sa pagtuon:

• Unsay imong nakat-onan o gibati karon nga makatabang nimo nga mosalig nga ang Dios mopanalangin kanimo kon pilion nimo nga unahon Siya?

• Unsay imong ipakigbahin ngadto sa usa ka tawo nga dili segurado kon angay bang pilion ang Dios dihang mag-atubang kita sa ubang mga pagpamugos?

Ikonsiderar ang paghatag og kahigayonan sa mga estudyante nga ipakigbahin ang ilang gisulat. Pwede usab nimong ipakigbahin ang saad sa Manluluwas sa mga tawo nga gilutos tungod sa pagpili Kaniya, nga makita sa Mateo 5:10–12. Ikonsiderar ang pagpakigbahin sa imong pagpamatuod kon sa unsang paagi kita panalanginan sa Ginoo dihang pilion nato nga sundon Siya, bisan og lisod kini.

Dugang nga mga Kapanguhaan

Exodo 1:17. Unsay buot ipasabot sa pagkahadlok sa Dios?

Ang Giya ngadto sa mga Kasulatan naghatag og duha ka kahulogan sa kahadlok: “(1) Ang pagkahadlok sa Dios mao ang pagbati og balaan nga pagtahod ug kataha alang Kaniya ug sa pagsunod sa iyang mga sugo; (2) Ang pagkahadlok sa tawo, tawhanon nga mga kakuyaw, kasakitan, ug sa daotan mao ang pagkahadlok sa ingon nga mga butang ug sa pagkalisang kanila” (Giya ngadto sa mga Kasulatan, “Kahadlok,” Librarya sa Ebanghelyo).

Si Elder David A. Bednar sa Korum sa Napulog Duha ka Apostoles mitudlo:

Lahi apan may kalabotan sa mga kahadlok nga atong kasagaran nga nasinati mao ang unsay gihulagway sa mga kasulatan isip ang “diosnong kahadlok” (Mga Hebreohanon 12:28) o “ang kahadlok diha sa Ginoo” (Job 28:28; Mga Proverbio 16:6; Isaias 11:2–3). Dili sama sa kalibotanong kahadlok nga naghimo og alarma ug kakulba, ang diosnong kahadlok usa ka tinubdan sa kalinaw, kasigurohan, ug pasalig.

Apan sa unsang paagi ang bisan unsang butang nga kaabay sa kahadlok mahimong makapabayaw o espirituhanon nga makatabang?

Ang matarong nga kahadlok nga akong gisulayan sa paghulagway naglukop sa lawom nga pagbati sa diosnong pagtahod, pagrespeto, ug kataha alang ni Ginoong Jesukristo (tan-awa sa Salmo 33:8; 96:4), pagkamasulundon sa Iyang mga sugo (tan-awa sa Deuteronomio 5:29; 8:6; 10:12; 13:4; Salmo 112:1), ug ang pagpaabo sa Kataposang Paghukom ug hustisya diha sa Iyang kamot. (“Busa Sila Mihupay sa Ilang mga Kahadlok,” Liahona, Mayo 2015, 48)

Unsaon nako pagpadayon uban ang kaisog bisan og nahadlok ko?

Si Elder Carl B. Cook sa Kapangulohan sa Seventy miingon:

Ang Dios sa langit ug yuta motabang nato nga mabuntog ang pagkawalay paglaom ug sa bisan unsa nga mga babag nga atong masugatan kon kita magtinguha sa Iyang tabang, mosunod sa mga pag-aghat sa Espiritu Santo, ug mopadayon lang—inubanan sa hugot nga pagtuo.

Maayo gani, kon kita maluya o dili makahimo, ang Ginoo makalig-on sa atong hugot nga pagtuo. Siya makadugang sa atong kapasidad lapas pa sa atong kaugalingon. (“Padayon Lang—inubanan sa Hugot nga Pagtuo,” Liahona, Mayo 2023, 14)

Si Presidente Thomas S. Monson (1927–2018) mitudlo:

Kitang tanan mag-atubang og kahadlok, makasinati og pagbiay-biay, ug makasugat og pagsupak. Himoon nato—kitang tanan—nga magbaton og kaisog sa pagpakigbatok sa panan-aw sa katilingban, kaisug sa pagbarog alang sa prinsipyo. Ang kaisog, dili kompromiso, ang mopanalangin nato og pagtugot sa Dios. Ang kaisug mamahimong kusganon ug madanihong hiyas kon isipon kini dili lang ang kaandam nga mamatay … apan isip determinasyon sa tinarung nga pagpakabuhi. Samtang kita magpadayon, maningkamot sa pagpakabuhi kon unsay gikinahanglan natong buhaton, sigurado kitang makadawat og tabang gikan sa Ginoo ug makakaplag og kahupayan sa Iyang mga pulong. (“Magmakusganon Ka ug Magmaisug,” Liahona, Mayo 2014, 69)

Dugang nga mga Kalihokan sa Pagkat-on

Alternatibong pagsugod

Imbes basahon ang pamahayag ni Presidente Nelson, pwede nimong sugdan ang leksiyon pinaagi sa pagtan-aw sa “Biya sa Parti.” Ihunong ang bidyo sa 3:08. Pangutan-a ang mga estudyante kon unsay nakapalisod kang John niini nga sitwasyon. Pangutan-a sila kon unsang mga sitwasyon ang mga tin-edyer mahimong mobati usab og pagpamugos nga supakon ang Dios.

Human mailhan sa mga estudyante ang dagkong mga kamatuoran bahin sa mga panalangin sa Dios, tan-awa ang nahibiling bahin sa bidyo. Ipapangita sa mga estudyante kon unsang desisyon ang gihimo ni John ug kon sa unsang paagi ang Dios “naluoy” kang John tungod sa iyang desisyon.

Exodo 1:17, 21. Pagkahadlok ug ang pagsunod sa Dios

Human mahisgoti sa mga estudyante ang mga sitwasyon diin gibati nila o mahimong bation ang pagpamugos, pwede nimo silang tabangan nga madiskobreha kon unsay ipasabot sa pagkahadlok sa Dios ug maisogong mosunod Kaniya. Ikonsiderar ang pagdapit sa mga estudyante nga gamiton ang Topical Guide ug tun-an ang mga kasulatan nga nalista ubos sa “Kaisog,” “Kahadlok,” o “Kahadlok sa Dios.” Awhaga silang pangitaon ang mga kasulatan nga makatabang dihang ang usa ka tawo makasinati og pagpamugos nga balewalaon ang mga sugo o mga sumbanan sa Ginoo.

Pagsabot sa mga panalangin sa Ginoo

Aron tabangan ang mga estudyante nga masabtan nga ang mga panalangin sa Dios tungod sa pagsunod sa Iyang kabubut-on dili kanunayng parehas sa kada sitwasyon, basaha ang mosunod nga pamahayag gikan ni Presidente Monson.

Si Presidente Thomas S. Monson (1927–2018) mitudlo:

Dili tanang mga buhat sa kaisog makahatag og talagsaon o diha-diha nga mga resulta, apan kining tanan makahatag og kalinaw sa hunahuna ug kahibalo nga ang matarong ug ang kamatuoran napanalipdan. (“Magmakusganon Ka ug Magmaisug,” Liahona, Mayo 2014, 68)

Pwede usab nimong ipasabot nga ang pagsunod sa Dios wala magpasabot nga kanunay kitang luwas gikan sa mga pagpili sa uban. Bisan og wala unsaa ni Paraon kining mga mananabang, ang mga anak nga babaye ni Onitah gipatay sa daotang mga pari kay dili sila mosimba sa bakak nga mga dios (tan-awa sa Abraham 1:11). Aron tabangan ang mga estudyante nga masabtan ang panginahanglan nga mosalig sa Dios bisan unsa pay resulta, pwede kang mangutana og parehas sa mosunod:

• Ngano sa imong hunahuna nga ang mga panalangin sa Dios dili kanunayng makawagtang sa mga hagit o pag-antos?

• Unsay makatabang nimo nga unahon ang Iyang kabubut-on labaw sa ubang pagpamugos bisan unsa pa ang resulta?

“Ayaw Kabalaka”

Kon ang mga komentaryo sa estudyante modirekta sa leksiyon ngadto sa paghisgot sa kahadlok, ikonsiderar ang pagtan-aw sa “Ayaw Kabalaka” (4:30). Hangyoa ang klase sa pagpangita kon sa unsang paagi ang Dios makatabang nato nga mabuntog ang atong mga kahadlok. Dayon dapita ang mga estudyante sa pagpakigbahin kon giunsa sa Dios pagtabang kanila nga mabuntog ang ilang mga kahadlok.