“Genesis 25–27: Jacob ug Esau,” Manwal sa Magtutudlo sa Seminarysa Daang Tugon (2026)
“Genesis 25–27: Jacob ug Esau,” Manwal sa Magtutudlo sa Seminary sa Daang Tugon
Genesis 24–33: Leksiyon 30
Genesis 25–27
Jacob ug Esau
Sa pagkatawo sa ilang kaluha nga si Jacob ug Esau, ang pakigsaad nga gisaad sa kaliwat ni Rebeca ug Isaac sa kataposan natuman. Si Esau, isip magulang sa kaluha, mao ang angayan sa gisaad nga katungod sa pagkapanganay nga gihatag ngadto sa magulang nga anak nga lalaki. Subo lang, wala unaha ni Esau ang iyang mahangtoron nga mga panalangin, hinoon siya nagtinguha sa pagtagbaw sa iyang kalibotanong mga tinguha. Kini nga leksiyon makatabang sa mga estudyante nga mahatagan og bili ang mahangtoron nga mga panalangin sa Ginoo kaysa kalibotanong mga tinguha.
Pagpangandam sa estudyante: Awhaga ang mga estudyante nga mainampoong susihon ang pagkabalanse sa ilang mga kinabuhi tali sa mga butang sa Dios (e.g., pag-ampo, pagtuon sa kasulatan, kalihokan sa simbahan) ug sa mga butang sa kalibotan. Dapita sila nga ilhon ang bisan unsang kalibotanong mga babag nga tingali nahimo na nilang prayoridad kay sa mahangtoron nga mga butang.
Posibleng mga Kalihokan sa Pagkat-on
Paghatag og bili sa mga butang sa Dios
Aron matabangan ang mga estudyante sa paghunahuna kabahin kon sa unsang paagi ang dihadiha dayon nga mga panginahanglan o mga gusto nga usahay mahimong makaapekto sa taas og lugway nga mga tumong, idrowing ang mosunod nga tsart sa pisara:
|
Karon |
Umaabot |
Dapita ang pipila ka estudyante sa pagpakigbahin sa ilang usa ka tumong sa umaabot. Isulat kini sa pisara diha sa ikaduha nga kolum. Pagpili og usa sa mga tumong diha sa ikaduha nga kulom. Dapita ang mga estudyante sa paghunahuna mahitungod sa dihadiha nga mga panginahanglan o mga gusto nga, kon buhaton, mahimong makababag sa usa ka tawo sa pagkab-ot niana nga tumong. Hatagi ang mga estudyante og kahigayonan nga mopakigbahin sa pipila ka lahi nga mga ideya. Hisgoti kon sa unsang paagi ang mga pagpili nga atong buhaton makaapektar sa atong umaabot nga mga tumong ug tingali gani makababag kanato sa pagkab-ot kanila.
Kon mahuman na ang mga estudyante, ipasabot nga kini nga konsepto mahimong maggamit sa atong mga paningkamot sa pagtinguha sa mahangtorong mga panalangin sa Dios. Dapita ang mga estudyante sa pagkompleto sa mosunod nga pagsukod sa kaugalingong nakat-onan diha sa ilang mga journal sa pagtuon.
Mainampoong mamalandong sa mosunod nga mga pamahayag. Irekord sa imong journal sa pagtuon sa unsang paagi ang matag pamahayag maggamit diha nimo, gamit ang mga tubag nga “sigurado,” “kasagaran,” “gamay ra,” ug “wala gayod.”
-
Andam akong mosakripisyo sa kalibotanong mga tinguha alang sa mahangtorong mga panalangin.
-
Ako nakasabot ngano ang Ginoo naghangyo kanako nga hatagan og bili ang Iyang mahangtorong mga panalangin kaysa mga butang nga akong gusto karon.
-
Akong mailhan ang mga panalangin nga moabot kon akong unahon ang Langitnong Amahan ug si Jesukristo kaysa kalibotanong mga butang.
Samtang ikaw magtuon karon, dapita ang Espiritu Santo nga tabangan ka nga makakita sa bili sa mahangtorong mga panalangin. Tinguhaa ang inspirasyon mahitungod kon unsaon sa pag-una sa mahangtorong mga panalangin kay sa kalibotanong mga tinguha.
Ang kabilin sa katungod sa pagkapanganay ug panalangin
Aron matabangan ang mga estudyante nga masabtan ang kultural nga kalabotan sa desisyon nga gihimo ni Esau ug Jacob, i-summarize ang mosunod nga mga parapo sa imong kaugalingong mga pulong.
Sa panahon sa Daang Tugon, ang kinamagulangang anak nga lalaki kasagaran mao ang makadawat sa katungod sa pagkapanganay. Ang kabilin sa katungod sa pagkapanganay naglangkob sa doble nga bahin sa yuta ug bahandi. Kini naglangkob usab sa dakong responsibilidad sa pag-amuma sa inahan ug sa tibuok pamilya human sa kamatayon sa amahan. Agig dugang sa temporal nga kabilin, ang amahan mohatag sa panalangin sa katungod sa pagkapanganay aron mohatag sa katungod sa pagkapari sa kinamagulangang anak nga lalaki. Kini nga mga panalangin nag-establisar sa posisyon sa anak nga lalaki diha sa pamilya isip magtutudlo ug lider.
Si Rebeca ug Isaac nag-ampo sa panalangin sa matinuoron nga kaliwat sa mga katuigan. Sa kataposan, sila napanalanginan og kaluha nga lalaki, si Esau ug si Jacob. Tungod kay unang natawo si Esau, siya unta ang makadawat sa katungod sa pagkapanaganay nga anak. Bisan paman, gipadayag sa Ginoo ngadto kang Rebeca nga si Jacob ang mahimong adunay katungod sa pagkapanganay nga anak (Genesis 25:22–23).
Basaha ang Genesis 25:27–34, nga mangita kon sa unsang paagi si Esau nagpakita nga wala niya tagai og bili ang iyang katungod sa pagkapanganay nga panalangin. (Ngadto sa “sud-an nga sinabawan” nagpasabot nga lugaw.)
-
Unsay imong nakaplagan?
Bsaha ang Genesis 26:34–35, nga mangita sa desisyon ni Esau ug ang mga pagbati sa iyang mga ginikanan mahitungod sa iyang mga pagpili sa pagminyo. (Ang Hetehanon mao ang Canaanhon kinsa nagsimba sa bakak nga mga dios.)
-
Nganong naguol si Rebeca ug Isaac sa desisyon ni Esau?
Kon ang mga estudyante dili sigurado unsay ilang tubag sa naunang mga pangutana, pwede nimong ipasabot nga ang mga Canaanhon nagsimba sa mga diois dios ug naghimo sa uban pa nga mga buhat sa pagpakasala. Ang pagpakigminyo sa Canaanhon nga mga babaye nagpasabot nga si Esau mitalikod sa pakigsaad sa Dios nga gihimo uban ni Abraham ug sa ilang kaliwatan.
Ang mga panalangin sa paghatag og bili sa mga butang sa Dios
Aron matabangan ang mga estudyante nga makasabot sa istorya ni Jacob ug Esau, mahimong basahon ang mosunod nga parapo o i-summarize. O pwede nimong ipakigbahin ang bidyo nga “Jacob and Esau” (2:06), nga anaa sa ChurchofJesusChrist.org.
Bisan paman sa dili maayong mga desisyon ni Esau, si Isaac sa iyang pagkatigulang mipatawag ni Esau aron ihatag ang panalangin sa pagkapanganay. Sa wala pa naabot si Esau, gipatakuban ni Rebeca si Jacob nga iyang igsoong lalaki. Naghunahuna nga si Jacob mao si Esau, gipanalanginan ni Isaac si Jacob sa pagkapanganay nga panalangin (tan-awa sa Genesis 27:1–29). “Human si Isaac [nasayod] nga iyang gipanalanginan si Jacob [imbis] si Esau, siya nanghimatuod nga si Jacob ‘mabulahan’ (Genesis 27:33)—nagsugyot nga ang kabubut-on sa Dios pagatumanon” (Dali Sunod Kanako—Alang sa Indibidwal ug Pamilya: Daang Tugon 2022, 39).
Basaha ang Genesis 27:34, 38, nga mangita sa reaksiyon ni Esau dihang iyang nasayran nga si Jacob ang nahatagan sa panalangin sa pagkapanganay.
-
Unsay nagpatigbabaw alang kanimo?
-
Unsaon nimo sa pag-summarize ang unsay atong makat-onan gikan niini nga istorya isip usa ka pamahayag sa kamatuoran?
Gamita ang mga pulong sa mga estudyante aron sa pagpangita sa usa ka kamatuoran nga sama sa mosunod: Ang pagpili sa dihadiha dayon o kalibotanong mga tinguha kay sa mahangtorong mga panalangin sa Dios mosangpot ngadto sa kaguol ug pagmahay.
Adunay daghang posible nga mga tubag sa mosunod nga pangutana. Ang pagdasig sa pipila ka estudyante nga ipakigbahin ang ilang mga tubag mahimong makatabang sa mga estudyante nga mobati nga luwas sa pagpakigbahin sa lahi nga mga ideya ug mga panglantaw.
-
Nganong malisod usahay nga unahon ang mga butang nga adunay mahangtoron nga bili?
Si Elder David A. Bednar sa Napulog Duha ka Apostoles mipasabot:
Sa kabisi sa atong inadlaw-adlaw nga mga kinabuhi ug sa kaguliyang sa kasamtangang kalibotan diin kita nagpuyo, mahimong malinga kita gikan sa mahangtoron nga mga butang nga labing mahinungdanon pinaagi sa paghimo sa kalipay, kabulahan, kasikat, ug kabantogan nga maoy atong una nga mga prayoridad. Ang atong kadiyot nga pagkalinga “sa mga butang niini nga kalibotan” ug “sa mga pasidungog sa mga tawo” mahimong modala kanato sa pagsalikway sa atong espirituhanong katungod sa pagkamagulang alang sa menos ra kaayo nga linat-ang mga liso. …
Ang matag usa kanato kinahanglang motimbang-timbang sa atong temporal ug espirituhanon nga mga prayoridad sa sinsero ug mainampoon nga paagi aron sa pagtino sa mga butang sa atong mga kinabuhi nga mahimong mobabag sa buhong nga mga panalangin nga andam nga itugyan kanato sa Langitnong Amahan ug sa Manluluwas. David A. Bednar, (“Isul-ob ang Imong Kusog, O Zion,” Liahona, Nob. 2022, 94)
Hangyoa nga mopakigbahin ang mga estudyante kon unsay ilang ganahan o nakat-onan gikan sa pamahayag ni Elder Bednar. Dayon dapita sila sa pagbuhat sa mosunod nga tulo ka butang sa indibidwal o sa gagmayng mga grupo:
-
Paghimo og usa ka senaryo diin usa ka tawo sa imong pangidaron nga tingali gitental nga “mahimong modala kanato sa pagsalikway sa atong espirituhanong katungod sa pagkamagulang alang sa menos ra kaayo nga linat-ang mga liso.”
-
Paghunahuna og usa ka ehemplo kon giunsa pag-una sa Manluluwas ang kabubut-on sa Iyang Amahan kay sa kalibotanong mga tinguha. (Pananglitan, tan-awa sa Mateo 4:2–10 o Lucas 22:41–42.)
-
Paghunahuna og ehemplo sa modernong panahon sa usa ka tawo nga giuna ang kabubut-on sa Dios kay sa dihadiha o kalibotanong mga tinguha.
Hangyoa ang mga estudyante sa pagpakigbahin sa ilang mga ideya. Samtang mopakigbahin ang mga estudyante, pwede nimong ipasabot nga ang pagtambong sa seminary karon mao ang labing maayong ehemplo sa pag-una sa Dios. Pwede nimong ipasalida ang bidyo nga “No Regrets”(5:38) gikan sa ChurchofJesusChrist.org. Usa ka batan-ong lalaki mipili nga motambong sa seminary kay sa mag-surfing. Dasiga ang mga estudyante nga mangita sa mga panalangin nga iyang nadawat tungod niini nga pagpili.
-
Unsa nga mga panalangin ang atong madawat, karon ug sa umaabot, tungod sa pagpili sa mga butang sa Dios kay sa kalibotanong mga butang?
-
Giunsa sa pag-una sa Manluluwas ang mahangtorong mga panalangin kay sa dihadiha nga mga tinguha?
Paghimo og plano
Dapita ang mga estudyante sa pagkompleto sa mosunod nga kalihokan diha sa ilang mga journal sa pagtuon.
Ilista ang imong lima ka labing prayoridad sa han-ay nga paagi nga gikan sa labing importante ngadto sa dili kaayo importante.
Samtang imong rebyohon kini nga lista, timan-i ang bisan unsang mga pag-usab nga aghaton kang buhaton sa Espiritu Santo.
Sa ubos niini nga lista, irekord ang imong bisan unsang uban nga mga hunahuna human sa pagbuhat nini nga kalihokan. Klaro kana bang makaila sa sunod nga lakang aron imong iprayoridad ang mga butang sa Dios kay sa mga butang sa kalibotan? Kon mao, isulat kini sa bisan asa nga imong kanunay nga makita.
Aron sa pagtapos sa klase, pwede nimong ipakigbahin ang imong pagsaksi sa mga panalangin nga imong nadawat samtang imong gihatagan og bili ang mga butang sa Dios kay sa mga butang sa kalibotan.